“Doktrina at mga Tipan 29:9–29: Ang Ikalawang Pagparito ni Jesucristo,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 29:9–29,” Manwal ng Titser ng Seminary para sa Doktrina at mga Tipan
Lesson 45: Doktrina at mga Tipan 29
Doktrina at mga Tipan 29:9–29
Ang Ikalawang Pagparito ni Jesucristo
Ang Ikalawang Pagparito ni Jesucristo ay magiging dakila at kakila-kilabot na araw. Ang mga hindi tumatanggap sa mga sugo at turo ni Jesucristo ay pagdurusahan ang mga bunga ng kanilang mga pagpili. Ang mga nagsisikap na sumunod sa Kanya ay magkakaroon ng kagalakan na makitang bumalik ang kanilang Manunubos sa lupa. Ililigtas Niya sila mula sa kasamaan at kalungkutan at mananahanang kasama nila sa loob ng isang libong taon. Ang lesson na ito ay makatutulong sa mga estudyante na makadama ng kagalakan habang inaasam nila ang pagbabalik ni Jesucristo sa lupa.
Mga Posibleng Aktibidad sa Pag-aaral
Natatakot o nagagalak?
Maaari kang mag-display ng larawan ng Ikalawang Pagparito, tulad ng nasa simula ng lesson na ito. Malapit sa larawan, gumawa ng scale mula 1 hanggang 10, kung saan ang 1 ay kumakatawan sa “natatakot” at ang 10 ay kumakatawan sa “nagagalak.” Sabihin sa ilang estudyante na maglagay ng marka sa scale na kumakatawan sa kung ano sa palagay nila ang nadarama ng maraming tinedyer tungkol sa Ikalawang Pagparito ng Tagapagligtas. Anyayahan silang ipaliwanag ang kanilang marka.
Pagkatapos ay maaari mong anyayahan ang mga estudyante na sagutin nang tahimik ang mga sumusunod na tanong sa kanilang study journal.
-
Ano ang nadarama mo kapag iniisip mo ang Ikalawang Pagparito ni Jesucristo? Bakit?
-
Kapag iniisip mo ang Ikalawang Pagparito, mas nakatuon ka ba sa Tagapagligtas o sa mga paghihirap bago ang Kanyang pagbabalik? Paano nakakaapekto ang pinagtutuunan mo sa iyong nadarama?
Maglaan ng kinakailangang oras para matulungan ang mga estudyante na maunawaan ang nilalaman ng sumusunod na talata.
Totoo na maraming pagsubok at matinding kasamaan ang iiral sa mga huling araw at ang “pagdurusa at kapanglawan” ay ipadadala sa masasama (tingnan sa Doktrina at mga Tipan 29:8). Mahalaga ring maunawaan na ang pagbabalik ng Tagapagligtas ay hindi magiging sanhi ng mga pagsubok at kasamaan. Ang Kanyang pagbabalik ay magliligtas sa Kanyang mga disipulo mula sa mga ito. Ang Ikalawang Pagparito ay magiging mas kamangha-mangha para sa Kanyang mga tagasunod kaysa inaakala natin! Sa pag-aaral mo ngayon, alamin ang mga dahilan kung bakit makadarama ng kagalakan at pag-asa ang matatapat kapag iniisip nila ang pagbabalik ni Jesucristo.
Magalak sa pagparito ni Cristo!
Basahin ang Doktrina at mga Tipan 29:10–13, at hanapin ang mga salita at parirala na nagbibigay sa iyo ng mga dahilan upang magalak.
Ang Doktrina at mga Tipan 29:10–11 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Sabihin sa mga estudyante na ilista sa pisara ang mga salita at pariralang nahanap nila. Itanong sa ilang estudyante kung bakit nakatulong ang nahanap nila para magalak sila.
Habang nagbabahagi sila, maaari mong gawing personal para sa kanila ang nahanap nila sa pamamagitan ng pagtatanong ng mga follow-up na tanong tulad ng mga sumusunod:
-
Paano nakapapanatag sa inyo na malaman na kapag nagpakita si Jesus, ito ay may “kapangyarihan at dakilang kaluwalhatian”? (talata 11).
-
Paano ninyo ilalarawan na naiiba ang pang-araw-araw ninyong buhay kapag nanahan si Cristo “sa kabutihan kasama ng mga tao”? (talata 11).
-
Sino sa mga mahal ninyo sa buhay na pumanaw na ang pinakanasasabik ninyong makita kapag binuhay na mag-uli ng Tagapagligtas ang mabubuti sa Kanyang pagparito? (Tingnan sa talata 13.)
-
Ano ang ibig sabihin sa inyo ng “makasama [si Cristo], nang [tayo] ay maging isa”? (talata 13). Sa inyong palagay, bakit nais ni Jesus na maging isa kayo?
Maaari mong imungkahi sa mga estudyante na markahan ang mahalagang parirala ng banal na kasulatan sa talata 11: “Aking ipakikita ang aking sarili mula sa langit sa kapangyarihan at dakilang kaluwalhatian … at mananahanan sa kabutihan kasama ng mga tao sa mundo ng isanlibong taon.”
Ang natitirang bahagi ng lesson na ito ay nakatuon sa magagandang kalagayan na ipagkakaloob ng Tagapagligtas sa mabubuti sa panahon ng Kanyang pagbabalik at pagkatapos ng Kanyang pagbabalik.
Bago magpatuloy, maaari mong tulungan ang mga estudyante na maunawaan ang huling parirala ng talata 11, “ang masasama ay hindi makapananatili.” Maaaring basahin ng mga estudyante ang mga talata 9, 15, at 17 para makita ang mga kahihinatnan ng mga taong hindi tumanggap kay Cristo. Kung pag-aaralan ninyo ang mga talatang ito sa klase, ipaalala sa mga estudyante na nag-aalala tungkol sa kanilang mga mahal sa buhay na ang hangarin at kapangyarihan ng Tagapagligtas ay magpatawad at pagalingin ang lahat ng nagsisisi at lumalapit sa Kanya.
(Paalala: Ang mga lesson sa Doktrina at mga Tipan 45 ay magtutuon lalo na sa mga palatandaan ng panahon at personal na paghahanda para sa Ikalawang Pagparito ni Cristo.)
Si Cristo ay mananahanang kasama ng mga tao nang isanlibong taon
Sabihin sa mga estudyante na ibahagi ang nalalaman nila tungkol sa mga kalagayan sa mundo sa panahon ng paghahari at pagkatapos ng paghahari ni Jesucristo sa milenyo. Maaari mo rin silang anyayahang magbahagi ng mga tanong nila tungkol dito.
Maglaan ng ilang minuto na saliksikin ang sources na itinalaga ng Diyos para sa mga sagot sa mga tanong mo tungkol sa Milenyo at sa masasayang kalagayan na iiral sa panahon ng paghahari ni Cristo sa milenyo at pagkatapos nito. Ang sumusunod ay maaaring makatulong sa iyong pag-aaral:
Maaari mong ilagay ang mga estudyante sa maliliit na grupo kung saan pag-aaralan ng bawat grupo ang isa sa sumusunod na sources. Pagkatapos, sabihin sa bawat grupo na ilahad ang natutuhan nila sa klase, o sabihin sa mga estudyante na bumuo ng mga bagong grupo kasama ang mga estudyanteng nag-aral ng magkakaibang sources at magsalitan sa pagbabahagi ng natutuhan nila.
Gabay sa mga Banal na Kasulatan, “Milenyo,” scriptures.ChurchofJesusChrist.org
Mga Paksa ng Ebanghelyo, “Milenyo,” topics.ChurchofJesusChrist.org
Doktrina at mga Tipan 29:23–27
Upang matulungan ang mga estudyante na malinaw na makita ang mga dahilan upang magalak sa mga kalagayang kasunod ng pagbabalik ng Tagapagligtas, maaari mong tapusin ang bahaging ito ng lesson sa pamamagitan ng pagbabahagi ng pahayag ni Elder D. Todd Christofferson sa bahaging “Karagdagang Resources.”
Pagtutuon sa Tagapagligtas
Upang matulungan ang mga estudyante na mailarawan sa kanilang isipan ang mapagmahal na Tagapagligtas na bumababa mula sa langit, maaari mong ipapanood ang video na “Nagpakita si Jesucristo sa Lumang Amerika,” na matatagpuan sa ChurchofJesusChrist.org, mula sa time code na 11:20 hanggang 16:31. Sabihin sa kanila na maghanap ng mga pagkakatulad sa pagitan ng pagmamahal na ipinakita ng pagdalaw ng Tagapagligtas sa mga Nephita at kung ano sa palagay nila ang mangyayari kapag Siya ay bumalik.
Nagpakita si Jesucristo sa Lumang Amerika | 3 Nephi 8–11
Tatlong araw bago magpakita si Jesucristo sa mga tao sa Sinaunang Amerika, dumanas sila ng matitinding kalamidad — mga lindol, unos, at apoy, na kumitil ng maraming buhay at nagwasak ng mga lungsod. Nagsimula ang tatlong araw ng kadiliman.
Maaari mong ipikit ang iyong mga mata at subukang isipin na si Jesucristo ay bumababa mula sa langit upang iligtas, protektahan, at pagalingin ang Kanyang mga tagasunod. Bigyang-pansin ang mga impresyon mula sa Espiritu Santo para malaman kung ano ang nais ng Ama sa Langit na madama mo tungkol sa pagbabalik ng Kanyang Anak.
-
Anong ekspresyon ang nakikinita mo sa Kanyang mukha habang tinitingnan Niya ang mga nagsisikap na sumunod sa Kanya?
-
Ano sa palagay mo ang sasabihin Niya sa matatapat pagkababa Niya sa lupa?
-
Sa iyong palagay, paano nais ng Tagapagligtas na madama ng Kanyang mga disipulo ang tungkol sa Kanyang pagbabalik sa lupa?
Maaari mong ibahagi ang sarili mong nadarama habang inaasam mo ang pagbabalik ni Jesucristo sa lupa. Maaari mong tapusin ang klase gamit ang isang pangwakas na himno na nagsasaad ng kagalakan ng pagparito ni Cristo at ng Kanyang paghahari sa milenyo, tulad ng “Espiritu ng Diyos” (Mga Himno, blg. 2), “Tayo’y Magalak” (Mga Himno, blg. 3), o “O Magsaya” (Mga Himno, blg. 121).
Isaulo
Maaari mo ring tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan ay “Aking ipakikita ang aking sarili mula sa langit sa kapangyarihan at dakilang kaluwalhatian … at mananahanan sa kabutihan kasama ng mga tao sa mundo ng isanlibong taon.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”