Lesson 46: Doktrina at mga Tipan 29

Doktrina at mga Tipan 29:36–50

Mga Kinatawan sa Kanilang Sarili

Itinuro ng Panginoon kay Joseph Smith ang tungkol sa Pagkahulog nina Adan at Eva at kalayaang pumili sa panahong ginagawa niya ang inspiradong pagsasalin ng Biblia. Sa Doktrina at mga Tipan 29, itinuro ng Panginoon ang tungkol sa pagtubos mula sa Pagkahulog nina Adan at Eva sa pamamagitan ng Pagbabayad-sala ni Jesucristo. Ang layunin ng lesson na ito ay tulungan ang mga estudyante na mas maunawaan ang ating kalayaang pumili na ipinagkaloob ng Diyos at ang pagtubos na ibinigay ni Jesucristo.

Mga Posibleng Aktibidad sa Pag-aaral

Pagpili

Sabihin sa mga estudyante na alalahanin ang mga pagpiling ginawa nila sa nakaraang 24 na oras habang binabasa nila ang sumusunod na pahayag ni Pangulong Thomas S. Monson (1927–2018).

Bihirang lumipas ang isang oras sa maghapon na hindi natin kailangang gumawa ng iba’t ibang klase ng pagpili. Ang ilan ay di-gaanong mahalaga, ang ilan naman ay napakahalaga. Ang ilan ay walang kaibhang magagawa sa walang hanggang plano, at ang iba ay gagawa ng malaking kaibhan. (Thomas S. Monson, “Ang Tatlong Prinsipyo ng Pagpili,” Liahona, Nob. 2010, 67)

Maaari mong isulat sa pisara ang di-gaanong mahalaga at napakahalaga. Sabihin sa mga estudyante na ilista ang mga karaniwang pagpiling ginagawa ng mga tao sa ilalim ng bawat heading. Pagkatapos ay anyayahan silang talakayin kung aling mga pagpili ang pinakamahalagang pag-isipan nang may walang-hanggang pananaw bago natin gawin ang mga ito.

• Ano ang ilang pinakamahalagang desisyong ginawa, o gagawin mo, na makakaimpluwensya nang malaki sa iyong ugnayan sa Ama sa Langit?

Ang ating kalayaang pumili

Basahin ang Doktrina at mga Tipan 29:36–38, at alamin ang pinakamahalagang desisyon na kailangang gawin ng lahat ng anak ng Diyos bago ang buhay na ito.

• Anong pagpili ang inilahad sa ating lahat bago ang buhay na ito?

Ipinaliwanag ni Elder Robert•D. Hales (1932–2017) ng Korum ng Labindalawang Apostol ang napakahalagang ibinunga ng pagpili natin sa premortal na buhay.

Dahil sa paghihimagsik ni Lucifer, nagkaroon ng malaking espirituwal na pagtatalo. Bawat anak ng Ama sa Langit ay nagkaroon ng pagkakataong gamitin ang kalayaan na ibinigay sa kanya ng Ama sa Langit. Pinili nating manampalataya sa Tagapagligtas na si Jesucristo—na lumapit sa Kanya, sundin Siya, at tanggapin ang planong inilahad ng Ama sa Langit para sa ating kapakanan. Ngunit isangkatlo ng mga anak ng Ama sa Langit ang hindi nagkaroon ng pananampalatayang sundin ang Tagapagligtas at sa halip ay piniling sundin si Lucifer, o Satanas.

At sinabi ng Diyos, “Dahil dito, sapagkat yaong si Satanas ay naghimagsik laban sa akin, at naghangad na wasakin ang kalayaan ng tao, na ako, ang Panginoong Diyos, ang nagbigay sa kanya, … aking pinapangyaring siya ay mapalayas” [Moises 4:3]. (Robert D. Hales, “Kalayaan: Mahalaga sa Plano ng Buhay,” Liahona, Nob. 2010, 24)

Markahan ang salitang kalayaang pumili sa talata 36.

• Paano mo ilalarawan kung ano ang ibig sabihin ng salitang kalayaang pumili?

Kung kailangan ng mga estudyante ng tulong sa pagbibigay-kahulugan sa kalayaang pumili, maaari mo silang anyayahang gamitin ang Gabay sa mga Banal na Kasulatan para sa tulong.

Ang isang katotohanan na matututuhan natin mula sa mga talatang ito ay dahil binigyan tayo ng Diyos ng kalayaang pumili, mapipili nating sundin o tanggihan Siya.

• Paano naipapakita ng Diyos ang Kanyang pagmamahal sa atin sa pagkakaloob sa atin ng kakayahang pumili?

Ang Pagkahulog at ang ating kalayaang pumili

Maaari mong anyayahan ang mga estudyante na bumuo ng maliliit na grupo, at bigyan ang bawat grupo ng isang bahagi ng sumusunod na handout. Anyayahan silang basahin ang mga iminumungkahing talata at sama-samang talakayin ang mga tanong. Ipaalam sa kanila na ang ilan sa mga passage ay direktang nagsasaad ng tungkol sa Pagkahulog nina Adan at Eva, ngunit matutulungan sila ng Espiritu na makita kung paano naaangkop ang mga karanasan nina Adan at Eva sa ating buhay ngayon.

Kalayaang Pumili at Pagtubos sa pamamagitan ni Jesucristo

Ang mga tukso ng diyablo

Basahin ang Doktrina at mga Tipan 29:39 at 2 Nephi 2:16–18, at talakayin ang mga sumusunod na tanong:

• Batid na pinili nating sundin ang plano ng Ama sa Langit bago ang buhay na ito, bakit mahirap palaging piliing sundin Siya dito sa lupa?

• Ano ang mga pinakamabisang taktika ni Satanas para mahimok ang mga tao sa mundo na piliing hindi sundin ang payo ng Diyos?

• Ano ang ilang pagpapalang ibinigay sa atin ng Diyos para matulungan tayo na mapaglabanan ang mga tukso ni Satanas?

Mga bunga ng ating mga pagpili

Basahin ang Doktrina at mga Tipan 29:40–41 at Alma 41:10–11; 42:9, 14, at talakayin ang mga sumusunod na tanong:

• Sa anong mga paraan tayo napapailalim sa impluwensya ng diyablo kapag pinipili nating maghimagsik laban sa Diyos?

• Sa iyong palagay, bakit ang katagang “espirituwal na kamatayan” ay magandang paglalarawan ng pagkawalay sa Ama sa Langit?

• Paano mo ilalarawan ang nadarama natin matapos nating gamitin ang ating kalayaang pumili para hindi sundin ang kalooban ng Ama sa Langit?

Pagtubos sa pamamagitan ng Bugtong na Anak ng Diyos

Basahin ang Doktrina at mga Tipan 29:42–43 at 2 Nephi 2:6–9, at talakayin ang mga sumusunod na tanong:

• Ano ang ginawa ni Jesucristo para gawing posible ang pagtubos kahit nakagawa tayo ng mga maling pagpili?

• Ano ang ibabahagi mo tungkol sa Ama sa Langit at kay Jesucristo na makapagbibigay ng pag-asa sa isang taong nakadarama na napakalayo na niya at tila hindi na siya makababalik?

• Anong mga halimbawa ang maibabahagi mo para maipakita ang nakatutubos at nagpapatawad na katangian ng Ama sa Langit at ni Jesucristo?

© 2023 by Intellectual Reserve, Inc. All rights reserved.

Matapos ang sapat na oras na matalakay ng mga estudyante ang mga tanong sa kanilang grupo, sabihin sa kanila na bumuo ng mga bagong grupo kasama ang mga estudyanteng pinag-aralan ang iba pang mga bahagi ng handout at magsalitan sa pagbabahagi ng natutuhan nila.

Kapag tapos nang magbahagi ang mga estudyante, maaari ninyong basahin ang 2 Nephi 2:26–29 bilang klase. Sabihin sa mga estudyante na hanapin at ibahagi ang mga parirala na nagpapatibay o nagdaragdag sa natutuhan nila sa nakaraang aktibidad.

Pagpili ng pagtubos sa pamamagitan ni Jesucristo

Maaaring madama ng ilang estudyante na ang kanilang mga pagpili ay permanente nang naglayo sa kanila sa Diyos. Para mabigyan sila ng pagkakataong magtuon sa pagtubos ni Cristo, maaari kang mag-display ng isang sitwasyon na tulad ng sumusunod. Sabihin sa mga estudyante na magdagdag ng mga detalye rito na sa palagay nila ay makatotohanan para sa mga tinedyer ngayon.

Isang dalagitang nagngangalang Marie ang gumawa ng ilang desisyon na alam niyang mali. Nakadarama siya ng pagsisisi at pagkalayo sa Diyos at iniisip niya kung may pag-asa pa para sa kanya.

Gamit ang natutuhan mo ngayon tungkol sa kalayaang pumili at pagtubos sa pamamagitan ni Cristo, sumulat ng sagot na maaari mong ibahagi kay Marie na maghihikayat sa kanya na kumilos nang may pag-asa at pananampalataya sa kabila ng mga maling desisyon sa kanyang nakaraan.

Maaari mong sabihin sa ilang estudyante na ibahagi ang kanilang mga sagot sa klase. Habang nakikinig ang mga estudyante sa mga sagot ng kanilang mga kaklase, hikayatin sila na isipin kung ano kaya ang madarama ni Marie habang naririnig niya sila.

Basahin ang sumusunod na pahayag ni Pangulong Thomas S. Monson (1927–2018), at alamin ang pagpili na ipanghihikayat mo na gawin ni Marie.

Sa pagninilay natin sa mga desisyong ginagawa natin sa buhay araw-araw—piliin man natin ito o kaya’y iyon—kung pipiliin natin si Cristo, tama ang gagawin nating desisyon. (Thomas S. Monson, “Mga Pagpili,” Liahona, Abr. 2016, 86)

Maaari mong tapusin ang klase sa pamamagitan ng pag-anyaya sa mga estudyante na isulat ang kanilang sagot sa sumusunod na tanong o prompt sa kanilang study journal o saanman nila ito makikita nang paulit-ulit sa buong linggo.

Anyayahan ang mga estudyante na magbahagi: Ang sumusunod ay isang halimbawa ng paggamit ng prompt upang tulungan ang mga estudyante na ibahagi ang kanilang mga saloobin. Para sa iba pang mga paraan kung paano gumawa ng mga prompt na makatutulong sa mga estudyante na ibahagi ang kanilang mga saloobin, tingnan ang training na “Lumikha ng mga prompt na tutulong sa mga estudyante na maipahayag ang kanilang nadarama, karanasan, at patotoo.” Ang training na ito ay matatagpuan sa Mga Kasanayan para sa Pag-unlad ng Guro.

Sa linggong ito, gagamitin ko ang aking kalayaang pumili para piliin si Cristo sa pamamagitan ng …

Karagdagang Resources

Ano ang kaugnayan ng Pagkahulog at kalayaang pumili?

Ipinaliwanag ni Pangulong Russell M. Nelson:

Sina Adan at Eva [sa pamamagitan ng Pagkahulog] … ay naging mortal. Ito ay pagpapala para sa atin, dahil sila rin ay maaaring magsilang ng mga anak at maisasakatuparan ang mga layunin ng pagkalikha ng daigdig. … Dumating ang iba pang mga pagpapala sa atin sa pamamagitan ng Pagkahulog. Dahil sa Pagkahulog, magagamit ang dalawang magkaugnay na karagdagang kaloob mula sa Diyos, halos kasinghalaga ng buhay mismo—ang kalayaang pumili at pananagutan. (Russell M. Nelson, “Constancy amid Change,” Ensign, Nob. 1993, 34)

Ano ang malaya tayong piliin?

Sinabi ni Pangulong Russell M. Nelson:

Batid ko ang mga katotohanang ito: Ang Diyos na ating Ama sa Langit ay nagnanais na piliin ninyo na bumalik sa Kanya. Ang Kanyang plano ng walang hanggang pag-unlad ay hindi kumplikado, at iginagalang nito ang inyong kalayaang pumili. Malaya kayong piliin kung sino ang gusto ninyong maging kayo—at kung sino ang gusto ninyong makasama—sa daigdig na darating! (Russell M. Nelson, “Ang Templo at ang Inyong Espirituwal na Pundasyon,” Liahona, Nob. 2021, 96)

Itinuro ni Elder Dieter F. Uchtdorf ng Korum ng Labindalawang Apostol:

Nasa sentro ng plano ng Diyos para sa inyong kaligayahan ang kakayahan ninyong pumili. Mangyari pa, nais ng inyong Ama sa Langit na piliin ninyo ang walang-hanggang kagalakan sa piling Niya, at tutulungan Niya kayong makamit ito, ngunit hindi Niya ito ipipilit sa inyo kailanman. …

Kapag may mahahalagang pagpili kayong gagawin, si Jesucristo at ang Kanyang ipinanumbalik na ebanghelyo ang pinakamainam na piliin. (Dieter F. Uchtdorf, “Si Jesucristo ang Lakas ng mga Kabataan,” Liahona, Nob. 2022, 10)

Ano ang kailangan kong alalahanin kapag gumagawa ako ng mga maling desisyon?

Kahit sikapin ninyong gawin ang lahat ng inyong makakaya para makagawa ng mabubuting pagpili, kung minsa’y magkakamali kayo. Gagawin ninyo ang mga bagay na iisipin ninyong sana’y hindi ninyo nagawa. Ginagawa iyan ng lahat. Kapag nangyari iyan, madaling panghinaan-ng-loob o mag-isip kung magiging sapat ba ang kabutihan ninyo. Pero narito ang magandang balita—napakaganda at kaasam-asam na balita! Dahil mahal kayo ng Diyos, isinugo Niya ang Kanyang Anak na si Jesucristo na umako sa inyong mga kasalanan upang kayo ay makapagsisi at patuloy na umunlad. (Para sa Lakas ng mga Kabataan: Isang Gabay sa Paggawa ng mga Pagpili, 7)

Doktrina at mga Tipan 29:41. Ano ang espirituwal na kamatayan?

Ang espirituwal na kamatayan ay pagkawalay sa Diyos. Itinuturo ng mga banal na kasulatan ang dalawang sanhi ng espirituwal na kamatayan. Ang unang sanhi ay ang Pagkahulog, at ang pangalawa ay ang sarili nating pagsuway. Ang kamatayang espirituwal ay madaraig sa pamamagitan ng Pagbabayad-sala ni Jesucristo at sa pagsunod sa Kanyang ebanghelyo. (Mga Paksa ng Ebanghelyo, “Kamatayan, Espirituwal,” topics.ChurchofJesusChrist.org)

Doktrina at mga Tipan 29:46. Paano tinubos ang maliliit na bata sa pamamagitan ng Pagbabayad-sala ni Jesucristo?

Itinuro ni Elder Bruce R. McConkie (1915–1985) ng Korum ng Labindalawang Apostol:

Sa lahat ng maluwalhating katotohanan ng ebanghelyo na ibinigay ng Diyos sa kanyang mga tao bibihira ang doktrina na labis na nakalulugod, labis na nakasisiya sa kaluluwa, na katulad ng doktrinang nagpapahayag na—

Ang maliliit na bata ay maliligtas. Sila ay buhay kay Cristo at magkakaroon ng buhay na walang hanggan. Para sa kanila magpapatuloy ang pamilya, at ang kabuuan ng kadakilaan ay makakamit nila. Walang pagpapala ang ipagkakait. Sila ay babangon sa walang kamatayang kaluwalhatian, magiging husto ang pag-iisip, at mabubuhay magpakailanman sa pinakamataas na langit sa kahariang selestiyal—lahat ng ito ay mangyayari sa pamamagitan ng kabutihan at awa at biyaya ng Banal na Mesiyas, at lahat ng ito ay dahil sa nagbabayad-salang sakripisyo Niya na namatay upang tayo ay mabuhay. (Bruce R. McConkie, “The Salvation of Little Children,” Ensign, Abr. 1977, 3)

Mga Karagdagang Aktibidad sa Pag-aaral

Ang mga kautusan ng Diyos ay espirituwal

Sabihin sa mga estudyante na maglista ng ilang kautusan sa pisara. Pumili ng isa sa mga kautusan sa pisara at talakayin ang mga temporal na pagpapalang maaaring dumating sa ating buhay kung susundin natin ito. Pagkatapos ay basahin ang Doktrina at mga Tipan 29:34–35, at alamin kung ano ang sinasabi ng Panginoon tungkol sa Kanyang mga kautusan. Talakayin ang mga espirituwal na pagpapala na maaaring magmula sa pagsunod sa kautusang pinili mo. Maaari mong igrupu-grupo ang mga estudyante para talakayin ang espirituwal na katangian ng ilan sa iba pang mga kautusan sa pisara.

Piliin ninyo sa araw na ito

Maaari mong panoorin ang mga sipi mula sa mensaheng “Piliin Ninyo sa Araw na Ito” ni Elder Dale G. Renlund ng Korum ng Labindalawang Apostol. Sabihin sa mga estudyante na tukuyin ang mga turo na tutulong sa atin na maunawaan ang kalayaang pumili at kung ano ang magagawa natin para piliin si Cristo sa ating buhay. Maaari kang huminto pagkatapos ng bawat isa sa mga sumusunod na clip para bigyan ang mga estudyante ng pagkakataong magbahagi ng isang bagay na natutuhan nila at kung bakit sa palagay nila ay mahalaga ito.

Ang Pagkahulog nina Adan at Eva

Upang matulungan ang mga estudyante na maunawaan ang Pagkahulog, maaari mong patingnan ang bahaging “Pagkahulog nina Adan at Eva” ng Mga Paksa ng Ebanghelyo. Maaari ninyong basahin ang mga piling bahagi bilang isang klase o hatiin ang mga bahagi para pag-aralan ng mga estudyante. Maaari mo ring ibahagi ang unang pahayag ni Pangulong Russell M. Nelson sa “Karagdagang Resources.” Maaari kang mamuno sa isang talakayan na nakatuon sa mga pagpapala ng kalayaang pumili at pananagutan na ibinunga ng Pagkahulog.