Lesona 53: Fotopampianarana sy Fanekempihavanana 37–40

Fotopampianarana sy Fanekempihavanana 39–40

“Fitahiana lehibe tokoa toy izay tsy mbola fantatrao na oviana na oviana”

I James Covel dia mpitoriteny Metôdista tany amin’ny faritr’i New York nandritra ny 40 taona. Rehefa nandre ny hafatry ny Famerenana amin’ny laoniny izy dia nampanantena fa hankatò izay didy rehetra nomena azy tamin’ny alalan’ny Mpaminany Joseph Smith. Nandidy an’i James ny Mpamonjy mba hatao batisa sy hiara-hiangona amin’ireo Olomasina tany Ohio ary nampanantena azy hery lehibe raha toa ka manao sy mitandrina fanekempihavanana masina izy. Ity lesona ity dia afaka manampy ireo mpianatra hanana faniriana hanao sy hitandrina fanekempihavanana amin’i Jesoa Kristy mba hahazoana ny heriny bebe kokoa.

Sahanasa fianarana azo atao

Manao sy mitandrina fanekempihavanana amin’ Andriamanitra

Eritrereto ny hampiseho amin’ny mpianatra zavatra iray toy ny jiro, izay tsy afaka manatratra ny fahafaha-manaony raha tsy rehefa atambatra amin’ny loharanon-jiro. Anontanio ny mpianatra hoe inona no azon’ny jiro atao samirery raha ampitahaina amin’ny izy apetaka amin’ny loharanon-jiro. Asao ny mpianatra hifanakalo hevitra momba ny fomba hanehoan’izany ny fanekempihavanana nataontsika tamin’ Andriamanitra.

Vakio ny “Fanekempihavanana” ao amin’ny Torolalana ho an’ny Soratra Masina sy ity teny manaraka avy amin’ny Filoha Russell M. Nelson ity, ka tadiavo ny famaritana ny hoe fanekempihavanana.

Ny fanekempihavanana … dia voady masina ifanaovana amin’ Andriamanitra. Izy no mametraka ny fepetra. Ary ny olona tsirairay dia afaka misafidy ny hanaiky ireo fepetra ireo. Raha manaiky ireo fepetra mifehy ilay fanekempihavanana ny olona iray, ka mankatò ny lalàn’ Andriamanitra dia mandray ireo fitahiana izay mifandray amin’ ilay fanekempihavanana. (Russell M. Nelson, “Fanekempihavanana,” Liahona, nôv. 2011, 86)

• Ahoana no hanoritsoritanao na hamaritanao ny hoe fanekempihavanana?

• Inona avy ny fanekempihavanana efa nataonao tamin’ny Tompo?

• Inona no fiantraikan’ireo fanekempihavanana ireo teo amin’ny fiainanao?

Manasa antsika hanao fanekempihavanana Aminy i Jesoa Kristy

Mpitandrina Metôdista i James Covel. Rehefa nahare momba ny Mpaminany Joseph Smith i Covel dia nampanantena ny Tompo izy “fa hankatò izay didy rehetra homen’ny Tompo azy tamin’ny alalan’i Joseph Mpaminany” (Fotopampianarana sy Fanekempihavanana 39, sasin-tenin’ny fizarana).

Vakio ny Fotopampianarana sy Fanekempihavanana 39:1–9 ary tadiavo ny zavatra nianaranao momba an’i Jesoa Kristy izay mety hanosika olona iray hanao fanekempihavanana Aminy.

• Inona no hitanao momba ny Mpamonjy?

• Inona no asain’ny Mpamonjy hataontsika mba hahazoana ny heriny?

Mba hanampiana ireo mpianatra hamantatra fitsipika iray dia azon’izy ireo atao ny mameno eny amin’ny solaitrabe na ao amin’ny diary fandalinany izao filazana manaraka izao: “Raha __________ isika dia mahazo ___________.”

Mety hahita fitsipika mitovy amin’izao ny mpianatra: Raha manao sy mitandrina fanekempihavanana masina amin’ Andriamanitra isika dia mahazo ny heriny.

Raha mampiasa ny lesona ampiasana zavatra azo tsapain-tanana dia ampidiro amin’ny loharanon-jiro ny jiro mba hanehoana fa ny fanaovana fanekempihavanana dia manampy antsika hahazo ny herin’ny Mpamonjy. Anontanio ny mpianatra hoe ahoana no ahafahan’izany maneho ilay fitsipika hitany.

Vakio ny Fotopampianarana sy Fanekempihavanana 39:10–15 ary tadiavo ny zavatra nasain’ny Tompo hataon’i James Covel mba hanaovana fanekempihavanana Aminy.

• Inona no nampanantenain’i Jesoa Kristy an’i James Covel raha nanao io fanekempihavanana io izy?

• Ahoana no iharan’ny torohevitry ny Tompo ho an’i James Covel amintsika ankehitriny?

• Oviana no nahitanao ny herin’ny Tompo teo amin’ny fiainanao na ny fiainan’ny olon-kafa izay fantatrao?

Ny tahotra sy ny fanenjehana ary ny fiahiahiana izao fiainana izao

I James Covel dia nanana fianakaviana sy namana ary fiaraha-monina akaiky tao New York. Nandidy azy ny Mpamonjy mba hatao batisa sy hifindra miaraka amin’ireo Olomasina ho any Ohio. Sorona ho an’i James Covel ny fidirana ho mpikamban’ny Fiangonana.

Vakio ny sasin-tenin’ny Fotopampianarana sy Fanekempihavanana 40 ary koa ny andininy 1–3, ary tadiavo ny fanapahan-kevitra noraisin’i James Covel.

Mety ho fotoana tsara hanaovana fanazaran-tena amin’ny fampiasana ireo fitsipiky ny fahazoana fahalalana ara-panahy izany. Azonao atao ny mifanakalo hevitra momba ny fomba nahafahan’i James Covel nanao asa tamim-pinoana. Hevero ihany koa ny hifanakalo hevitra momba ny fomba mety ho nahitany ny safidiny sy ny torohevitry ny Tompo tamin’ny fomba fijery mibanjina ny mandrakizay.

• Ahoana no mety hahatonga ny “fahatahorana ny fanenjehana” (andininy 2) hahatonga ny olona iray handà na handika ny fanekempihavanany tamin’ Andriamanitra?

• Inona avy ireo “fiahiahiana izao fiainana izao” (andininy 2) izay mitarika ny olona handà ny fanekempihavanana amin’ Andriamanitra ankehitriny?

Vakio ity fanambarana manaraka avy amin’ny Filoha Russell M. Nelson ity na jereo ny horonan-tsary “Mandresy izao tontolo izao dia mahita fiadanana” (18:31), azo jerena ao amin’ny ChurchofJesusChrist.org, manomboka amin’ny kaodim-potoana 4:21 ka hatramin’ny 5:39. Rehefa mamaky na mijery ianao dia tadiavo ny hery nampanantenaina an’ireo izay manao sy mitandrina fanekempihavanana amin’ Andriamanitra:

Ny fanaovana sy ny fitandremana ny fanekempihavanana dia tena manamora ny fiainana! Ny olona tsirairay izay manao fanekempihavanana ao amin’ny dobo fanaovana batisa sy any amin’ny tempoly—ka mitandrina izany—dia mampitombo ny fahafahana hahazo ny herin’i Jesoa Kristy. Mba saintsaino io fahamarinana mampitolagaga io!

Ny valisoa amin’ny fitandremana ny fanekempihavanana amin’ Andriamanitra dia hery avy any an-danitra—hery izay mampatanjaka antsika mba hanohitra tsara kokoa ny fitsapana sy ny fakam-panahy ary ny ratram-pontsika. Manamora ny lalantsika io hery io. Ireo izay miaina ny lalàn’i Jesoa Kristy izay ambony kokoa dia afaka mahazo ny heriny ambony kokoa. Noho izany, ny mpitandrina fanekempihavanana dia manan-jo hahazo karazana fitsaharana manokana izay tonga amin’izy ireo amin’ny alalan’ny fifandraisany amin’ Andriamanitra araka ny fanekempihavanana. (Russell M. Nelson, “Mandresy izao tontolo izao dia mahita fitsaharana,” Liahona, nôv. 2022, 96)

• Inona no hitanao ho manan-danja indrindra tamin’ny tenin’ny Filoha Nelson?

Omeo fahafahana ny mpianatra hisaintsaina ny fanirian’izy ireo hanao sy hitandrina fanekempihavanana amin’ny Mpamonjy mba hahazoana ny heriny. Afaka manoratra ao amin’ny diariny na amin’ny tapa-taratasy ny mpianatra. Azon’izy ireo atao koa ny mifanakalo hevitra momba ny zavatra nianarany na tsapany ao anaty vondrona kely na miaraka amin’ny iray kilasy.

Ho famaranana ny lesona dia azonao atao ny mizara ny fomba nahitanao ny herin’ny Mpamonjy teo amin’ny fiainanao rehefa nanao fanekempihavanana tamin’ Andriamanitra ianao. Amporisiho ny mpianatra hanohy hiezaka hanao sy hitandrina ny fanekempihavanany ary hatoky ny fampanantenan’ny Tompo hitahy azy ireo amin’ny ezaka ataony.

Loharanom-pitaovana fanampiny

Mitahy ahy amin’ny fomba ahoana ny fifandraisako ara-panekempihavanana amin’ Andriamanitra?

Nampianatra toy izao ny Filoha Russell M. Nelson:

Ireo rehetra izay nanao fanekempihavanana tamin’ Andriamanitra dia afaka mahazo karazana fitiavana sy famindram-po manokana. …

Rehefa manao fanekempihavanana amin’ Andriamanitra izaho sy ianao, ny fifandraisantsika Aminy dia lasa tena akaiky kokoa noho ny talohan’ny fanekempihavanantsika. Mifamatotra isika izao. Noho ny fanekempihavanantsika amin’ Andriamanitra, dia tsy ho reraka mihitsy Izy amin’ny ezaka ataony hanampiana antsika, ary tsy ho lany mihitsy ny faharetany feno famindram-po amintsika. Samy manana anjara toerana manokana ao am-pon’ Andriamanitra isika tsirairay avy. Avo dia avo ny fanantenany ho antsika. …

Azonareo an-tsaina ve ny lanjan’izany? Ireo izay mitandrina ny fanekempihavanana nataony tamin’ Andriamanitra dia ho lasa hery velon’ny fanoherana fahotana! Ireo izay mitandrina ny fanekempihavanany dia hanana ny tanjaka hanoherana ny fitaomana tsy mitsahatr’izao tontolo izao. (Russell M. Nelson, “Ny fanekempihavanana maharitra mandrakizay,” Liahona, okt. 2022, 5–6, 8)

Nanazava ny Loholona David A. Bednar ao amin’ny Kôlejin’ny Apôstôly Roambinifolo hoe:

Tsy ho tanteraka ireo fampanantenana sy fitahiana avy amin’ny fanekempihavanana raha tsy i Jesoa Kristy Mpamonjy antsika. Manasa antsika Izy mba hijery Azy [jereo ny Fotopampianarana sy Fanekempihavanana 6:36], hanatona Azy [jereo ny 3 Nefia 12:20; Môrônia 10:32–33], hianatra Aminy [jereo ny Matio 11:29; Fotopampianarana sy Fanekempihavanana 19:23], ary hamatotra ny tenantsika Aminy [jereo ny Fotopampianarana sy Fanekempihavanana 43:9] amin’ny alalan’ireo fanekempihavanana sy ôrdônansin’ny filazantsarany naverina tamin’ny laoniny.

Ny fanekempihavanana sy ny ôrdônansy no vato fanorenana izay ahafahantsika manorina ny fiainantsika eo amin’ny “vatolampin’ny Mpanavotra antsika” [Helamàna 5:12] sy ny Sorompanavotany. Koa satria ny fanajana amim-pahatokiana ireo fanekempihavanana masina dia mamatotra antsika amin’ny fomba azo antoka amin’ny Mpamonjy, dia lasa loharanon’ny fitarihana sy tanjaka ara-panahy lehibe indrindra eo amin’ny fiainantsika Izy. (David A. Bednar, “Bound to the Savior through Covenants,” Ho zatovo mahery!, feb. 2022, 5)

Ahoana no ahafahako mampitombo sy manamafy orina ny fanoloran-tenako amin’ny Mpamonjy?

Nampianatra toy izao ny Loholona Neil L. Andersen ao amin’ny Kôlejin’ny Apôstôly Roambinifolo:

Voalohany, afaka mampirotsaka tanteraka ny tenantsika ao anatin’ny fiainan’i Jesoa, ny fampianarany, ny fiandrianany, sy ny heriny ary ny sorona fanavotana nataony isika. Hoy ny Tompo: “Banjino Aho amin’ny eritreritra rehetra” [Fotopampianarana sy Fanekempihavanana 6:36]. Nampahatsiahy antsika i Jaona hoe: “Isika tia, satria Izy efa tia antsika taloha” [1 Jaona 4:19]. Rehefa miaina tsara kokoa ilay fitiavany isika dia tia bebe kokoa Azy aza, amin’ny fomba tena mandeha ho azy, ary manaraka tsara kokoa ny ohatra nasehon’i Kristy eo amin’ny fitiavana sy fikarakarana ireo izay sahirana. Amin’ny fihetsehana marina rehetra manatona Azy dia mahita Azy mazava kokoa isika [jereo ny David B. Haight, “Temples and Work Therein,” Ensign, nôv. 1990, 61]. Tia Azy isika ary dia miezaka ny maka tahaka Azy amin’ireo fomba madinika ataontsika [jereo ny Môzià 5:13].

Manaraka, rehefa mahafantatra sy mitia kokoa ny Mpamonjy isika, dia maniry kokoa aza isika ny hampanantena fa tsy hivadika Aminy ary ho azo atokisana. Manao fanekempihavanana Aminy isika. Atombotsika amin’ireo fampanantenana ataontsika amin’ny batisa izany, ary hamafisintsika ireo fampanantenana ireo sy ny hafa rehefa mibebaka isan’andro isika sy mangataka famelan-keloka ary miandrandra fatratra ny handray ny fasan’ny Tompo isan-kerinandro. Mampanantena isika fa “hahatsiaro Azy mandrakariva sy hitandrina ny didiny” [Fotopampianarana sy Fanekempihavanana 20:77].

Rehefa vonona isika dia manaiky ny hanatanteraka ireo ôrdônansy sy fanekempihavanan’ny tempoly. Miaraka amin’ilay fahatsapana ny hery mitariky ny mandrakizay ao anatin’ilay fotoana masina sy tony ao amin’ny tranon’ny Tompo no hanaovantsika fanekempihavanana amim-pifaliana sy hanamafisantsika orina ny fahavononantsika hitandrina azy ireo.

Ny fanaovana sy ny fitandremana fanekempihavanana dia manome fahafahana ny fitiavan’ny Mpamonjy hilentika lalina kokoa ao am-pontsika. (Neil L. Andersen, “Manakaiky kokoa ny Mpamonjy,” Liahona, nôv. 2022, 74)

Aiza no ianarako misimisy kokoa momba an’i James Covel?

Jed Woodworth, “James Covel and the ‘Cares of the World,’” ao amin’ny Revelations in Context, hita ao amin’ny fizarana Church History ao amin’ny Médiathèque de l’Évangile

“James Covel,” hita ao amin’ny Historical Resources in the Church History section of the Gospel Library

Sahanasa fianarana fanampiny

Fomba hafa hanombohana ny lesona

Soraty eny amin’ny solaitrabe ny teny hoe “Mamarana.”

• Inona no zavatra matetika atomboky ny zatovo kanefa sarotra aminy ny mamarana azy?

• Inona no zavatra manahirana ny olombelona ny mamita azy?

Asao ny mpianatra hisaintsaina raha toa ka efa nanomboka zavatra izay iriany ho vitany izy ireo nefa tsy vitany. Rehefa mieritreritra momba ny hoe mpianatr’i Jesoa Kristy ianao dia azonao atao ny mangataka ny mpianatra hieritreritra hoe nahoana ny sasany no mety hanomboka amin’ny lalan’ny fanekempihavanana nefa misafidy ny tsy hanohy. Azonao atao ihany koa ny mizara fa ao amin’ny Fotopampianarana sy Fanekempihavanana 39–40, ireo mpianatra dia handalina ny tantaran’ny lehilahy iray izay tsy nanohy araka ny nanombohany. Rehefa mandalina izy ireo dia afaka mikaroka ireo fitsipika izay nezahan’ny Tompo nampianarina an’io lehilahy io ny mpianatra izay afaka manampy antsika ho mpamita.

Ny fanoharana momba ny mpamafy (jereo ny Fotopampianarana sy Fanekempihavanana 40:2)

Ny zavatra niainan’i James Covel dia ohatra tsara amin’ny fanoharana nataon’ny Mpamonjy momba ny mpamafy (jereo ny Matio 13:18–23). Azonao atao ny mamerina mijery ilay fanoharana ary mifanakalo hevitra momba ny fomba nanehoan’i James Covel ilay voa “teo amin’ny tsilo” (andininy 22). Ny Mpamonjy dia mampianatra antsika hamboly ny tenin’ Andriamanitra lalina ao amin’ny “tany tsara” (andininy 23). Mety ho tafiditra ao amin’ireo fanontaniana amin’ny fifanakalozan-kevitra ny hoe:

• Tahaka ny ahoana ny tany misy tsilo amin’izao androntsika izao?

• Inona no “fiahiahiana izao fiainana izao” (Fotopampianarana sy Fanekempihavanana 40:2) izay mety hisy fiantraikany amin’ny fivoarantsika ara-panahy?

• Inona no azontsika atao mba hambolena lalina ao am-pontsika ny tenin’ Andriamanitra?

Ny nofin’i Lehia

Asao ny mpianatra handalina ireo vondron’olona tao amin’ny nofin’i Lehia (jereo ny 1 Nefia 8:19–34). Ifanakalozy hevitra hoe nahoana ny tantaran’i James Covel no ohatra amin’ny olona hitan’i Lehia ao amin’ny 1 Nefia 8:24–28. Azonao atao ny manasa ny mpianatra hizara ny zavatra azontsika atao mba hanaovana asa amim-pinoana rehefa miatrika ny fakam-panahin’izao tontolo izao. Afaka mamaky ny 1 Nefia 8:33–34 ny mpianatra ary mifanakalo hevitra momba ny zavatra nataon’ireo izay tsy menatra tamin’ilay voankazo mba hiasa amim-pinoana.

Avereno soratana ny tantaran’i James Covel

Rehefa avy nandalina ny fizarana 39 sy 40 ny iray kilasy dia asao izy ireo haka sary an-tsaina fa nanana fahafahana hanoratra indray ny tantaran’i James Covel izy ireo. Azonao atao ny mangataka azy ireo haka sary an-tsaina fa nandray fanapahan-kevitra hafa i James rehefa avy nandray ny torohevitry ny Mpamonjy ao amin’ny fizarana 39. Azonao atao ny manasa ny mpianatra hifanakalo hevitra ny mety ho fiainan’i James Covel raha nanao safidy hafa izy.

• Inona avy ireo fitahiana izay mety ho noraisiny?

• Inona no fahafahana mety ho nomena azy?

Nanazava ny fanekempihavanana masina ny Filoha Nelson

Ilay horonan-tsary hoe “Miresaka momba ny Fanekempihavanana ny Loholona Nelson” (4:45) manomboka amin’ny kaodim-potoana 0:00 ka hatramin’ny 1:12 dia azo ampiasaina any am-piandohan’ny lesona mba hanampiana ireo mpianatra hahatakatra ny atao hoe fanekempihavanana. Io horonan-tsary io dia hita ao amin’ny ChurchofJesusChrist.org.