Lesson 58: Doktrina at mga Tipan 45

Doktrina at mga Tipan 45:1–8

“Ang Tagapamagitan sa Ama”

Habang nagsasalita sa mga miyembro ng Simbahan sa panahon ng pandaigdigang pandemya, sinabi ni Pangulong Russell M. Nelson, “Alam ng ating Ama na kapag napalilibutan tayo ng kawalang-katiyakan at takot, ang lubos na makatutulong sa atin ay pakingggan ang Kanyang Anak” (“Pakinggan Siya,” Liahona, Mayo 2020, 89). Upang matulungang mapawi ang takot at kawalang-katiyakan ng mga Banal noong unang bahagi ng 1831, inanyayahan sila ng Panginoon na pakinggan ang Kanyang tinig at maniwala sa Kanyang pangalan. Ang lesson na ito ay makatutulong sa mga estudyante na mas maunawaan ang misyon at katangian ni Jesucristo habang nauunawaan nila ang ilan sa Kanyang mga pangalan at titulo.

Mga Posibleng Aktibidad sa Pag-aaral

Ang kahalagahan ng mga pangalan

Maaari mong hatiin ang mga estudyante sa maliliit na grupo at anyayahan silang magbahagi ng mga detalye tungkol sa kahulugan o kahalagahan ng kanilang pangalan o apelyido. Kung hindi sigurado ang mga estudyante tungkol sa mga detalye o kahulugan, maaari nilang ipaliwanag kung ano ang gusto nila tungkol sa kanilang pangalan. Matapos magbahagi ang mga estudyante sa mga grupo, sabihin sa ilan na ibahagi sa klase ang isang bagay na natutuhan nila tungkol sa pangalan ng isang kaklase.

Basahin ang sumusunod na pahayag ni Elder Jonathan S. Schmitt ng Pitumpu:

Ang isang simpleng paraan para makilala ang isang tao ay alamin ang kanyang pangalan. …

Kilala at tinatawag ni Jesus ang mga tao sa kanilang pangalan. Sa sinaunang Israel, sinabi ng Panginoon, “Huwag kang matakot, sapagkat ikaw ay tinubos ko, tinawag kita sa pangalan mo; ikaw ay akin” [Isaias 43:1; idinagdag ang pagbibigay-diin]. …

Gaya ng kilala ni Jesus ang bawat isa sa atin sa pangalan, ang isang paraan para mas makilala natin si Jesus ay sa pamamagitan ng pag-alam ng maraming pangalan Niya. … Marami sa mga pangalan ni Jesus ay mga titulo na tumutulong sa atin na maunawaan ang Kanyang misyon, layunin, katauhan, at mga katangian. Kapag nalaman natin ang maraming pangalan ni Jesus, mas mauunawaan natin ang Kanyang banal na misyon at ang Kanyang di-makasariling pag-uugali. Ang pag-alam sa maraming pangalan Niya ay naghihikayat din sa atin na maging mas katulad Niya. (Jonathan S. Schmitt, “Na Ikaw ay Makilala Nila,” Liahona, Nob. 2022, 104–5)

Sabihin sa mga estudyante na ibahagi ang makabuluhan para sa kanila mula sa pahayag ni Elder Schmitt.

Maaari mong ilista sa pisara ang mga sagot ng mga estudyante sa sumusunod na tanong.

• Ano ang ilang pangalan o titulo ni Jesucristo na nagtuturo sa inyo ng higit pa tungkol sa Kanyang pagkatao, misyon, at mga katangian?

• Paano madaragdagan ng pag-unawa pa tungkol sa Kanyang mga pangalan at titulo ang inyong hangaring sundin Siya?

Matapos matalakay ng mga estudyante ang naunang tanong, i-display ang sumusunod na katotohanan: Ang pag-alam sa mga pangalan at titulo ni Jesucristo ay makatutulong sa atin na mas maunawaan ang Kanyang banal na misyon at di-makasariling pagkatao.

Sabihin sa mga estudyante na i-assess ang sarili nilang hangarin na malaman pa ang tungkol kay Jesucristo. Maaari mong gamitin ang sumusunod na ideya, o maaari kang mag-isip ng sarili mong ideya. Hikayatin ang mga estudyante na tahimik na mag-isip at sumagot sa kanilang study journal.

Gamitin ang sumusunod na assessment para masuri ang iyong hangarin at mga pagsisikap na mas maunawaan pa ang tungkol sa Tagapagligtas.

1 = bihira; 2 = paminsan-minsan; 3 = madalas

• Nais kong mas maunawaan ang banal na misyon ni Jesucristo.

• Habang pinag-aaralan ko ang mga banal na kasulatan, kusa kong hinahanap ang mga pangalan at titulo ni Jesus.

• Mahalaga sa akin na malaman ang katangian ni Jesus para mas masunod ko Siya.

Habang natututo ka pa tungkol sa kung sino ang Tagapagligtas sa pamamagitan ng pag-aaral ng Kanyang mga pangalan at titulo, mapanalanging hilingin sa Ama sa Langit na tulungan kang maragdagan ang iyong hangaring sundin ang Kanyang Anak.

Ang ating tagapamagitan at kaibigan

Mas mauunawaan ng mga estudyante ang misyon at katangian ni Jesus sa pamamagitan ng pag-aaral ng isa sa Kanyang maraming pangalan. Matapos talakayin ang Kanyang tungkulin bilang ating Tagapamagitan sa Ama, magkakaroon ang mga estudyante ng pagkakataong pag-aralan ang iba’t ibang pangalan at titulo ni Jesus nang mag-isa.

Maaari kang mag-display ng larawan ni Jesus sa Getsemani habang nakikibahagi ang mga estudyante sa sumusunod na aktibidad:

Basahin ang Doktrina at mga Tipan 45:3–5, at alamin ang isang titulo at tungkulin ni Jesucristo.

Pagnilayan ang mga titulo ni Jesucristo: Ang sumusunod na aktibidad ay makatutulong sa mga estudyante na mas makilala ang Tagapagligtas sa pamamagitan ng pag-unawa sa Kanyang titulo bilang ating Tagapamagitan sa Ama. Para sa karagdagang training kung paano matutulungan ang mga estudyante na pagtuunan ang mga titulo ni Jesucristo, tingnan ang training na “Ituro ang tungkol sa mga titulo, tungkuling ginagampanan, at mga katangian ni Jesucristo” na matatagpuan sa Mga Kasanayan para sa Pag-unlad ng Guro: Magtuon kay Jesucristo. Ang training na ito ay makatutulong sa pagkakaroon ng kasanayang “Gumawa ng mga tanong sa pagsasaliksik upang matulungan ang mga estudyante na matukoy ang mga tungkulin, titulo, simbolo, katangian, at [likas na pagkatao] ni Jesucristo.”

Maaari mong itanong ang tulad ng mga sumusunod upang matulungan ang mga estudyante na mapalalim ang kanilang pag-unawa sa tungkulin ni Jesucristo bilang ating Tagapamagitan sa Ama. Maaari mong ipaliwanag na ang isang kahulugan ng salitang tagapamagitan ay isang taong sinusuportahan at ipinaglalaban ang layunin ng mga nangangailangan.

• Ano ang pagkaunawa mo sa salitang tagapamagitan?

• Ayon sa mga talatang ito, paano tinutupad ni Jesucristo ang Kanyang tungkulin bilang ating Tagapamagitan sa Ama?

• Ano ang matututuhan natin tungkol sa katangian ng Tagapagligtas mula sa mga talatang ito?

Maaari mong basahin kasama ng mga estudyante ang sumusunod na pahayag ni Pangulong Russell M. Nelson. Sabihin sa mga estudyante na ibahagi kung paano pinag-iibayo ng mga karagdagang turong ito mula kay Pangulong Nelson ang kanilang pagmamahal at pagpapahalaga kay Jesucristo.

Si Jesus ang ating Tagapamagitan sa Ama (tingnan sa 1 Juan 2:1; D&T 29:5; 32:3; 45:3; 110:4). Ang salitang tagapamagitan ay mula sa salitang-ugat sa Latin na ang ibig ay “tinig para sa,” o “isang taong nagsusumamo para sa iba.” Ang iba pang nauugnay na mga salita ay ginagamit sa banal na kasulatan, tulad ng tagapagtanggol (tingnan din sa 1 Timoteo 2:5; 2 Nephi 2:28; DD&T 76:69). …

… Kapag naunawaan natin na siya ang tagapamagitan, at tagapagtanggol natin sa Ama, nagbibigay ito sa atin ng katiyakan ng kanyang di-napapantayang pag-unawa, katarungan, at awa (tingnan sa Alma 7:12). (Russell M. Nelson, “Jesus the Christ—Our Master and More” [Brigham Young University devotional, Peb. 2, 1992], 4, speeches.byu.edu)

Maaaring maging magandang bahagi ito sa lesson para bigyan ng oras ang mga estudyante na pagnilayan ang nadarama nila tungkol sa Tagapagligtas. Maaari mong isulat sa pisara ang mga sumusunod na tanong at sabihin sa mga estudyante na isulat ang kanilang mga sagot sa kanilang study journal. Kung naaangkop, sabihin sa ilang estudyante na ibahagi sa klase ang ilan sa kanilang nadarama.

• Ano ang nadarama mo habang sinusubukan mong ilarawan ang pagsusumamo at pamamagitan ng Tagapagligtas para sa iyo?

• Paano mapapalakas ng kaalamang namamagitan para sa iyo si Jesucristo ang iyong desisyon na manatili sa landas ng tipan?

Matuto tungkol kay Jesucristo

Habang pinag-aaralan ng mga estudyante ang mga sumusunod na talata, kung kailangan nila ng tulong sa pagtukoy sa isang titulo ni Jesucristo sa talata 1, maaari mong ipaliwanag na binanggit Niya ang Kanyang banal na tungkulin bilang Tagapaglikha ng lahat ng bagay.

Marami pang pangalan at titulo si Jesucristo. Basahin ang Doktrina at mga Tipan 45:1, 7, 59, at alamin ang marami pa sa mga ito.

Magpasiya kung makikinabang ang mga estudyante sa paggawa kasama ng iba o nang mag-isa para sa sumusunod na aktibidad.

Hikayatin ang mga estudyante na mag-isip ng malikhaing paraan para isaayos ang natututuhan nila. Halimbawa, maaaring gumawa ang mga estudyante ng isang disenyo sa kanilang study journal sa pamamagitan ng pagsusulat ng pangalan o titulo ni Cristo sa gitna ng isang pahina. Habang tumutuklas sila ng iba pang mga banal na kasulatan at parirala na tutulong sa kanila na mas maunawaan ang pinili nilang titulo, maaari nilang isulat ang mga ito sa iba’t ibang direksyon at laki sa buong pahina. Pagkatapos ay maaari silang gumuhit ng mga linya para maiugnay ang mga banal na kasulatan at parirala sa pangalan o titulo.

Pumili ng isang pangalan o titulo mula sa iyong pag-aaral na gusto mong malaman pa. Gamitin ang resources sa pag-aaral na magagamit mo, tulad ng Gospel Library app at mga tulong sa pag-aaral ng mga banal na kasulatan, para malaman kung ano ang itinuturo ng pangalan o titulo tungkol kay Jesucristo. Maaari mo ring pag-aralan ang mga salita ng mga propeta sa mga huling araw para matuto pa. Kapag tapos ka nang mag-aral, sagutin ang mga sumusunod na tanong:

• Ano ang isang bagay na natutuhan o nadama mo ngayon na nagpapaibayo sa iyong pagmamahal sa Tagapagligtas at sa hangarin mong sundin Siya?

• Paano mapagpapala ang iyong buhay ng patuloy na pag-aaral at pagkatuto pa tungkol sa mga pangalan ni Jesucristo?

Maaari mong anyayahan ang mga estudyante na magbahagi ng mga detalye at makabuluhang kabatiran mula sa kanilang pag-aaral. Maaaring may mga pagkakataon sa mga susunod na lesson na matalakay pa ang natutuhan ng mga estudyante ngayon tungkol sa mga pangalan at titulo ni Jesucristo.

Karagdagang Resources

Ano ang maituturo sa atin ng pagtatanggol ni Jesucristo tungkol sa Ama sa Langit?

Itinuro ni Elder Dale G. Renlund ng Korum ng Labindalawang Apostol:

Kay Jesucristo, “may Tagapamagitan tayo sa Ama” [1 Juan 2:1]. Pagkatapos magawa ang Kanyang nagbabayad-salang sakripisyo, si Jesus ay “umakyat na sa langit … upang angkinin sa Ama ang kanyang mga karapatan ng awa na mayroon siya sa mga anak ng tao.” At, dahil naangkin ang mga karapatan ng awa, “ipinagtatanggol niya ang kapakanan ng mga anak ng tao” [Moroni 7:27, 28].

Ang pagtatanggol ni Cristo para sa ating kapakanan ay hindi pagsalungat sa plano ng Ama. Si Jesucristo, na pinasakop ang Kanyang kalooban sa kalooban ng Ama, ay hindi susuportahan ang anumang bagay maliban sa yaong ninanais ng Ama noon pa man. Walang alinlangang natutuwa at sinasang-ayunan ng ating Ama sa Langit ang ating mga tagumpay.

Bahagi ng pagtatanggol sa atin ni Cristo ang ipaalala sa atin na nagbayad Siya para sa ating mga kasalanan at ibinigay sa lahat ng tao ang awa ng Diyos. (Dale G. Renlund, “Piliin Ninyo sa Araw na Ito,” Liahona, Nob. 2018, 104–5)

Doktrina at mga Tipan 45:7. Ano ang matututuhan ko tungkol kay Jesus mula sa titulong “Alpha at Omega”?

Isinulat ni Elder Jeffrey R. Holland ng Korum ng Labindalawang Apostol:

Ang Alpha, ang unang titik ng alpabetong Griyego, ay nagmumungkahi ng pagsisimula. “… Ako sa simula ay kasama ng Ama, … ” ipinahayag niya (D&T 93:21), at, bilang Panganay, tumayo siya sa kanan ng Ama sa mga kapulungan sa langit at sa gawain ng paglikha. …

… Tulad ng Omega, isang pangalan at titulo na hinango sa huling titik ng alpabetong Griyego, si Cristo ang katapusan, ang dahilan at sa pamamagitan Niya maisasakatuparan natin ang mga mithiin ng ating mortal na buhay. …

Ipinahihiwatig ng mga titik na ito mula sa Griyego ang pangkalahatang tungkulin na ginagampanan ni Jesus mula sa simula ng daigdig hanggang sa katapusan nito. Ngunit siya rin ang dapat na Alpha at Omega ng bawat isa sa atin—ang ating personal na mithiin sa simula at ang ating indibiduwal na mithiin—ang huwarang iyon na siyang tinutularan natin sa ating paglalakbay sa buhay … at ang pamantayan kung saan tayo susukatin sa pagtatapos ng buhay na ito.

Sa bawat pagpiling ginagawa natin, siya dapat ang batayan ng ating pagsusuri, ang landas na tinatahak natin, ang ating tanging daungan. Kung sino siya sa lahat ng tao, gayon din siya dapat maging sa bawat isa sa atin—ang mismong saligan ng buhay, ang kompas ng ating pribilehiyo. Huwag tayong lumihis mula sa kanya. Hindi natin dapat subukang gawin ito. Ako ang Alpha at Omega. (Jeffrey R. Holland, “Whom Say Ye That I Am?,” Ensign, Set. 1974, 6–7)

Doktrina at mga Tipan 45:7. Paano naging “ilaw na nagliliwanag sa kadiliman” si Jesucristo?

Ipinahayag ni Elder David A. Bednar ng Korum ng Labindalawang Apostol:

Sa bawat panahon sa ating buhay, sa lahat ng sitwasyong mararanasan natin, at sa bawat hamon na makakaharap natin, si Jesucristo ang ilaw na pumapawi sa takot, nagbibigay ng katiyakan at patnubay, at nagdudulot ng patuloy na kapayapaan at kagalakan. (David A. Bednar, “The Light and the Life of the World,” [First Presidency Christmas devotional, Dis. 6, 2015], broadcasts.ChurchofJesusChrist.org)

Mga Karagdagang Aktibidad sa Pag-aaral

Doktrina at mga Tipan 45:1. “Makinig, O kayong mga tao ng aking simbahan”

Bilang alternatibong paraan para masimulan ang lesson, maaari mong sabihin sa mga estudyante na ipagpalagay na may mahalagang desisyon silang gagawin ngunit gusto muna nilang humingi ng payo sa iba. Sabihin sa mga estudyante na isipin kung anong mga katangian ang maaari nilang hanapin sa mga tao bago magtiwala sa kanilang payo. Ipaliwanag na ang paghahayag na nakatala sa Doktrina at mga Tipan 45 ay dumating sa panahong ang mga tao ay nakaririnig at nakakabasa ng magkakasalungat na mensahe tungkol sa Simbahan. Sabihin sa mga estudyante na basahin ang Doktrina at mga Tipan 45:1–8 at hanapin ang mga salitang tulad ng makinig at pakinggan. Habang marami pang natututuhan ang mga estudyante tungkol sa mga pangalan, titulo, at tungkulin ng Tagapagligtas, sabihin sa kanila na pag-isipan kung paano Siya isang mapagkakatiwalaang pinagmumulan ng payo para sa kanila.

Doktrina at mga Tipan 45:8. “Kasindami ng tumanggap sa akin”

Maaaring makinabang ang mga estudyante sa pag-aaral ng ibig sabihin ng tanggapin ang Tagapagligtas sa kanilang buhay. Sabihin sa mga estudyante na basahin ang Doktrina at mga Tipan 45:8, at itanong kung ano sa palagay nila ang ibig sabihin ng Tagapagligtas nang sabihin Niyang, “Ako ay naparito sa sariling akin, at ang sariling akin ay hindi ako tinanggap.” Sabihin sa mga estudyante na talakayin ang mga paraan na matatanggap nila si Jesucristo at maisesentro nila ang kanilang buhay sa Kanya. Maaari mo ring itanong sa mga estudyante kung ano sa palagay nila ang ibig sabihin ng “maging mga anak [na lalaki at babae] ng Diyos.” Matapos sumagot ng mga estudyante, sabihin sa kanila na i-cross reference ang Doktrina at mga Tipan 45:8 sa Mosias 5:7–8. Talakayin kung paano nadaragdagan ng mga talatang ito ang ating pag-unawa at kung paano pinatototohanan ng mga ito ang kahalagahan ng pagtanggap sa Tagapagligtas at pagtataglay ng Kanyang pangalan sa ating sarili.