“Lesson 60—Doktrina at mga Tipan 45:9–75, Bahagi 2: Paghahanda para sa Ikalawang Pagparito,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 45:9–75, Bahagi 2,” Manwal ng Titser ng Seminary para sa Doktrina at mga Tipan
Lesson 60: Doktrina at mga Tipan 45
Doktrina at mga Tipan 45:9–75, Bahagi 2
Paghahanda para sa Ikalawang Pagparito
Si Jesucristo ay paparitong muli sa mundo na “nadaramitan ng kapangyarihan at dakilang kaluwalhatian” upang tuparin ang mga pangakong Kanyang ginawa (Doktrina at mga Tipan 45:44; tingnan din sa talata 16). Sa Doktrina at mga Tipan 45, mapagmahal na itinuro ng Tagapagligtas kung paano tayo makapaghahanda para sa Kanyang Ikalawang Pagparito. Ang layunin ng lesson na ito ay tulungan ang mga estudyante na maghanda para sa Ikalawang Pagparito ni Jesucristo.
Mga Posibleng Aktibidad sa Pag-aaral
Paghahanda para sa mahahalagang kaganapan
Maaari kang magsulat sa pisara (o mag-display ng mga larawan) ng ilang kaganapan na nangangailangan ng paghahanda kung saan nakikibahagi o makikibahagi ang iyong mga estudyante. Maaaring kabilang sa mga halimbawa ang mga pagsusulit sa paaralan, graduation, full-time na misyon, o isang kaganapang pang-sports. Itanong kung ano ang karaniwan sa mga kaganapang ito.
Isipin ang mga kaganapan, gawain, o responsibilidad sa iyong buhay na nangangailangan ng paghahanda. Kapag ginawa mo ito, mag-isip ng isang karanasan kung saan hindi ka handa at isang karanasan kung saan handa ka.
-
Paano nakaapekto ang antas ng iyong paghahanda sa nadama mo habang papalapit ang aktibidad? Paano ito nakaapekto sa resulta?
Ang Ikalawang Pagparito ni Jesucristo ay isang kaganapan na hindi tulad ng anumang naranasan natin. Ang paghahanda natin para sa kaganapang iyon ang makapagsasabi kung ano ang nadarama natin habang inaasam natin ang Kanyang pagbabalik, at masasabi nito ang mararanasan natin kapag Siya ay bumalik.
Maaari mong sabihin sa mga estudyante na talakayin ang sumusunod na dalawang tanong nang magkakapartner o sa maliliit na grupo. (Maaari mong ipaalala sa kanila ang mga palatandaang pinag-aralan nila sa “Doktrina at mga Tipan 45:9–75, Bahagi 1.”)
-
Ano ang nalalaman mo tungkol sa mga pangyayaring magaganap bago ang Ikalawang Pagparito ng Tagapagligtas?
-
Mula sa nalalaman mo tungkol sa Kanyang Ikalawang Pagparito, bakit gusto mong maging handa para dito?
Habang binabasa mo o ng isang boluntaryo ang sumusunod na talata at pahayag, sabihin sa mga estudyante na ipikit ang kanilang mga mata at isipin kung ano ang magiging pakiramdam sa pagbabalik ng Tagapagligtas.
Basahin ang Doktrina at mga Tipan 45:44 at ang sumusunod na pahayag ni Elder Neil L. Andersen ng Korum ng Labindalawang Apostol, at alamin kung ano ang magiging pakiramdam sa Ikalawang Pagparito ng Tagapagligtas.
Walang nagpapasigla sa hangarin kong mas banggitin si Cristo kaysa sa isaisip ang Kanyang pagbabalik. Bagama’t hindi natin alam kung kailan Siya paparito, magiging kamangha-mangha ang mga kaganapan ng Kanyang pagbabalik! Darating Siya sa mga ulap ng langit na may kamahalan at kaluwalhatian kasama ang lahat ng Kanyang banal na mga anghel. Hindi lamang ilang anghel kundi lahat ng Kanyang banal na mga anghel. (Neil L. Andersen, “Nangungusap Tayo tungkol kay Cristo,” Liahona, Nob. 2020, 91)
-
Paano makatutulong ang pag-unawa sa mga mangyayari sa Ikalawang Pagparito ng Tagapagligtas para mahikayat kang maghanda para dito?
Maaari mong anyayahan ang mga estudyante na i-link ang Doktrina at mga Tipan 45:44 sa doctrinal mastery reference sa Doktrina at mga Tipan 29:10–11.
Maaari mong iguhit sa pisara ang sumusunod na scale at sabihin sa mga estudyante na isulat sa kanilang study journal ang anumang saloobin o damdamin nila habang tahimik nilang pinagninilayan kung paano nila ire-rate ang kanilang sarili.
Para maiba, maaari mong palitan ang mga numero sa scale ng mga emoji o iba pang larawan na nagpapakita ng mga emosyon.
Gamit ang scale na ito, saan mo ire-rate ang antas ng iyong kumpiyansa para sa mga sumusunod na pahayag?
-
Alam ko kung paano maghanda para sa Ikalawang Pagparito ng Tagapagligtas.
-
Sa palagay ko ay sapat ang paghahanda ko para sa Ikalawang Pagparito ng Tagapagligtas.
Paghahanda para sa Ikalawang Pagparito ni Jesucristo
Makatutulong na ibahagi sa mga estudyante na itinuturo sa Doktrina at mga Tipan 38:30 na “kung kayo ay handa kayo ay hindi matatakot.” Ang lesson ngayon ay makatutulong sa atin na madaig ang ating mga takot sa pamamagitan ng pagtutuon sa dalawang paraan na maihahanda natin ang ating sarili para sa Ikalawang Pagparito. Maaari mong isulat sa pisara ang “Makapaghahanda tayo para sa Ikalawang Pagparito ni Jesucristo sa pamamagitan ng .” Habang pinag-aaralan ng mga estudyante ang mga sumusunod na talata, sabihin sa kanila na magsulat ng mga parirala na kukumpleto sa pahayag sa pisara.
Basahin ang Doktrina at mga Tipan 45:9, 32, 39, 57, 71, at alamin ang mga paraan na inaanyayahan tayo ng Tagapagligtas na maghanda para sa Kanyang Ikalawang Pagparito.
Maaaring makatulong na ipaliwanag ang kahalagahan ng pagtupad ng ating mga tipan sa Tagapagligtas sa paghahanda para sa Kanyang pagbabalik (tingnan sa talata 9).
Bagama’t kasama sa bahagi 45 ang maraming paraan na inaanyayahan tayo ng Tagapagligtas na maghanda para sa Kanyang pagparito, ang natitirang bahagi ng lesson na ito ay magtutuon sa katotohanan na makapaghahanda tayo para sa Ikalawang Pagparito ni Jesucristo sa pamamagitan ng pagtayo sa mga banal na lugar at pagtanggap ng Banal na Espiritu bilang ating patnubay. Huwag mag-atubiling pagtuunan ang iba pang mga paraan para maghanda ayon sa mga interes at pangangailangan ng mga estudyante.
Pagtayo sa mga banal na lugar at pagtanggap ng Banal na Espiritu bilang ating patnubay
Maaari mong hatiin ang mga estudyante sa mga grupo at bigyan ang bawat grupo ng kalakip na handout. Maaaring pag-aralan ng mga grupo ang isa o dalawang bahagi ng handout. Habang gumagawa ang mga grupo, maaari mong sabihin sa ilan sa kanila na maghandang ibahagi sa klase ang nalaman nila kapag natapos na ang lahat.
Paghahanda para sa Ikalawang Pagparito
Tumayo sa mga banal na lugar
Basahin ang mga sumusunod na scripture reference at pahayag, at alamin ang mga paraan na mapipili nating tumayo sa mga banal na lugar.
Mga Awit 24:3–4; Isaias 58:13; Helaman 5:12; 3 Nephi 18:24; Doktrina at mga Tipan 27:15; 115:5–6
Ipinaliwanag ni Sister Ann M. Dibb ng Young Women General Presidency:
Ipinayo ni Pangulong Ezra Taft Benson, “Kabilang sa mga banal na lugar ang ating mga templo, chapel, tahanan, at stake ng Sion, na … ‘isang tanggulan, at isang kanlungan’ [Doktrina at mga Tipan 115:6]” [“Prepare Yourself for the Great Day of the Lord,” New Era, Mayo 1982, 50]. Bukod pa rito, naniniwala ako na bawat isa sa atin ay makakahanap ng marami pang lugar. Maaaring isipin muna natin ang salitang lugar bilang pisikal na kapaligiran o lugar sa mapa. Gayunman, ang isang lugar ay maaaring “isang malinaw na kundisyon, posisyon o pananaw” [Merriam-Webster Online, “place,” merriam-webster.com/dictionary/place]. Ibig sabihin maaari ding kabilang sa mga banal na lugar ang mga di-malilimutang sandali—mga sandali na nagpapatotoo sa atin ang Espiritu Santo, [mga sandali na] nadama natin ang pagmamahal ng Ama sa Langit, o kapag tumatanggap tayo ng sagot sa ating mga panalangin. Higit pa rito, naniniwala ako na kapag malakas ang inyong loob na manindigan sa tama, lalo na sa mga sitwasyon kung saan walang ibang gustong gumawa nito, lumilikha kayo ng banal na lugar. (Ann M. Dibb, “Ang Inyong mga Banal na Lugar,” Liahona, Mayo 2013, 115)
Tanggapin ang Espiritu Santo bilang ating patnubay
Basahin ang mga sumusunod na scripture reference at pahayag, at alamin ang mga paraan na mapapasaatin ang Banal na Espiritu bilang ating patnubay.
Mga Kawikaan 3:5–6; Mga Awit 118:8–9; 1 Nephi 4:6; 2 Nephi 32:5; Moroni 10:5; Doktrina at mga Tipan 11:12–14
Itinuro ni Pangulong Dallin H. Oaks ng Unang Panguluhan:
Paano natin tinatanggap ang Banal na Espiritu bilang ating patnubay? Dapat tayong magsisi sa ating mga kasalanan linggu-linggo at magpanibago ng ating mga tipan sa pamamagitan ng pakikibahagi ng sakramento nang may malinis na mga kamay at dalisay na puso, tulad ng ipinagagawa sa atin [tingnan sa Doktrina at mga Tipan 59:8–9, 12]. Sa ganitong paraan lang natin matatamo ang banal na pangako na “sa tuwina ay mapasa[atin] ang Kanyang Espiritu” [Doktrina at mga Tipan 20:77]. …
… Lagi nating dapat gawin ang mga bagay na kailangan para mapanatili ang Espiritung iyon. [Dapat tayong] sumunod sa mga kautusan, manalangin para sa gabay, at dumalo sa Simbahan at makibahagi ng sakramento tuwing Linggo. At kailanma’y huwag tayong gagawa ng anumang bagay na magpapalayo sa Espiritung iyan. Iwasan natin, lalo na, ang pornograpiya, alak, sigarilyo at droga, at lagi–lagi nang iwasang labagin ang batas ng kalinisang-puri. (Dallin H. Oaks, “Huwag Palinlang,” Liahona, Nob. 2004, 46)
-
Anong mga kaisipan o impresyon ang pinakanapansin mo habang nag-aaral ka?
-
Paano tayo maihahanda ng paggawa ng mga bagay na ito para sa Ikalawang Pagparito ni Jesucristo?
Pumili ng isa sa dalawang bahagi mula sa handout. Sa likod ng handout, isulat ang dalawa o tatlong partikular na paraan na maipamumuhay ng mga kabataan ang mga turo sa bahaging ito.
Maaari mong sabihin sa mga grupo na ilagay ang kanilang handout sa buong silid-aralan na makikita ang likod ng handout. Sabihin sa mga estudyante na lumibot sa buong silid-aralan na binabasa ang iba’t ibang ideya sa pagsasabuhay. Bilang alternatibo, ang mga grupo ay maaaring makipagpalitan ng papel sa isa’t isa.
Pumili ng isang aksiyon na sa palagay mo ay makabubuti sa iyo na isabuhay.
-
Ano ang gagawin mo upang maisabuhay ang aksiyong ito?
-
Paano makatutulong ang paggawa nito sa iyong paghahanda para sa Ikalawang Pagparito ng Tagapagligtas?
Sabihin sa mga estudyante na ibahagi ang natutuhan at nadama nila sa oras ng lesson. Sabihin sa kanila na kumilos ayon sa kanilang mga naisip at nadama. Para tapusin ang lesson, maaari mong ipakita muli ang assessment scale mula sa simula ng lesson. Sabihin sa mga estudyante na i-assess muli ang kanilang kumpiyansa sa paghahanda para sa Ikalawang Pagparito ng Tagapagligtas.