Lesona 62: Fotopampianarana sy Fanekempihavanana 46–48

Fotopampianarana sy Fanekempihavanana 46:7–33, Tapany 1

Fanomezam-pahasoavan’ny Fanahy

Ny Ray any An-danitra dia manome fanomezam-pahasoavana ara-panahy an’ireo mpikamban’ny Fiangonana mahatoky. Ireo fanomezam-pahasoavana ireo dia manome fahafahana antsika ho tonga tahaka ny Mpamonjy kokoa sy hitahy ireo manodidina antsika. Ity lesona ity dia afaka manampy ireo mpianatra hahatsapa ny fitiavan’ny Ray any An-danitra azy ireo rehefa mianatra ny antony anomezany antsika fanomezam-pahasoavana ara-panahy izy ireo.

Sahanasa fianarana azo atao

Lesona voalohany amin’ireo lesona roa momba ny fanomezam-pahasoavan’ny Fanahy ity. Ny Tapany 1 dia hifantoka amin’ireo tanjon’ny Ray any An-danitra amin’ny fanomezana antsika fanomezam-pahasoavana ara-panahy. Ny Tapany 2 dia hanampy ireo mpianatra hamantatra ny fomba ahafahan’izy ireo mikatsaka fanomezam-pahasoavana ara-panahy. Raha toa ka voafetra ny fotoam-pianarana ka lesona iray monja no azo ampianarina, dia hevero ny fomba hahafahana manambatra tsara ireo lesona ireo.

Porofon’ny fitiavan’ny Ray any An-danitra

Hevero ny hanomboka ny fotoam-pianarana amin’ny alalan’ny fihirana na fihainoana hira iray mikasika ny fitiavan’ny Ray any An-danitra ny zanany, toy ny hoe “Tia ahy ny Ray any An-danitra” (2:58). Raha nasaina nanao ilay sahanasa fanomanana ny mpianatra dia mety ho fotoana tsara hanaovana fanaraha-maso izao. Na azonao atao ny mangataka ny mpianatra hisaintsaina ary hizara ny valin’ny fanontaniana toy ireto manaraka ireto:

• Oviana ny Fanahy Masina no nitaona anao hieritreritra, na hiteny, na hanao zavatra izay nitahy ny fiainanao na ny fiainan’ny hafa?

• Inona no nampianarin’io zavatra niainanao io anao momba ny fitiavan’ny Ray any An-danitra ny zanany?

Fanomezam-pahasoavan’ny Fanahy

Ireo fitahiana sy fahafaha-manao omen’ Andriamanitra antsika amin’ny alalan’ny Fanahy Masina dia antsoina hoe fanomezam-pahasoavana ara-panahy.

• Inona no fantatrao momba ny fanomezam-pahasoavana ara-panahy sy ny tanjony?

Mba hanampiana ny mpianatra hahatakatra ny fanirian’ireo mpikamban’ny Fiangonana tany am-boalohany handray fanomezam-pahasoavan’ny Fanahy dia azonao atao ny mamaky ny Olomasina: Ny tantaran’ Ny Fiangonan’i Jesoa Kristy ho an’ny Olomasin’ny Andro Farany, boky 1, Ny fanevan’ny fahamarinana, 1815–1846 (2018), 111–13, (izay hita ao amin’ny saints.ChurchofJesusChrist.org). Raha tsy izany, dia azonao atao koa ny mizara ity famintinana manaraka ity.

Ireo vao niova fo tany am-piandohana tao amin’ny Fiangonana tao Kirtland dia nientanentana tamin’ilay fampanantenana fa afaka mahazo fanomezam-pahasoavana ara-panahy izy ireo. Na izany aza, ny sasany dia diso fandray ny fomba nisehoan’ireo fanomezam-pahasoavana ireo.

Ny Olomasina sasany tao Kirtland dia nitondra ny finoan’izy ireo tamin’ny fomba tafahoatra, nifalifaly tamin’ny zavatra noraisiny ho fanomezam-pahasoavan’ny Fanahy. Olona maro no nilaza fa manana fahitana izay tsy azony hazavaina. Ny hafa kosa nino fa ny Fanahy Masina no nahatonga azy ireo hikisakisaka amin’ny tany. Nitsambikina nanodidina ny efitrano ny lehilahy iray na nitsambikina avy teo amin’ny tohin’ny valin-drihana isaky ny nihevitra izy fa nahatsapa ny Fanahy. Ny iray hafa kosa nanao fihetsika toy ny babakoto.

Rehefa nahita izany fihetsika izany ireo niova fo sasany dia nanjary kivy ka niala tao amin’ilay fiangonana vaovao. (Saints, 1:112)

• Inona avy ireo fanontaniana na tsy fahatakarana sasany mety hananan’ny olona momba ny fanomezam-pahasoavan’ny Fanahy amin’izao androntsika izao?

Azo asaina hizara ny fanontaniany manokana momba ny fanomezam-pahasoavana ara-panahy ny mpianatra. Amporisiho ny mpianatra hitady ireo fampianarana izay afaka manampy azy ireo hahatakatra tsara kokoa ireo fanomezam-pahasoavana ara-panahy sy ny maha-porofon’ny fitiavan’ Andriamanitra ireo fanomezam-pahasoavana ireo.

Nanambara fahamarinana momba ny fanomezam-pahasoavana ara-panahy ny Tompo

Nikatsaka fitarihana avy any an-danitra mikasika ny fomba hanampiana ny Olomasina tao Kirtland ny Mpaminany Joseph Smith. Ao anatin’ny fanambarana voarain’ny Mpaminany dia nampianatra fitsipika izay hanampy ny Olomasina tsy ho voafitaka ny Tompo, ary hanampy azy ireo hahatakatra ireo tena fanomezam-pahasoavan’ny Fanahy.

Vakio ny Fotopampianarana sy Fanekempihavanana 46:7–8mba hitadiavana ny fampitandremana nomen’ny Tompo ny Olomasina.

• Inona no nampianarin’ny Tompo ao amin’ireo andininy ireo mikasika ny fomba ahafahantsika misoroka ny famitahana?

Vakio ny Fotopampianarana sy Fanekempihavanana 46:9–12, 26. Tadiavo ny valin’ireto fanontaniana manaraka ireto:

• Iza no omena fanomezam-pahasoavana ara-panahy?

• Nahoana ny Ray any An-danitra no manome fanomezam-pahasoavana ara-panahy ho an’ireo zanany?

  Asehoy ireo fanontaniana roa teo aloha mba hojeren’ny mpianatra rehefa mandalina izy ireo. Afaka mianatra samirery izy ireo na ao anaty vondrona kely. Rehefa avy nomena fotoana ampy nandalinana izy ireo dia asao izy ireo hifanakalo hevitra momba ireo valin’ny fanontaniana nomen’izy ireo.

  Ao anatin’ny fifanakalozan-kevitra ataonao dia ampio ny mpianatra hamantatra ity fahamarinana manaraka ity: Ny Ray any An-danitra dia mitahy ny zanany amin’ny fanomezana fanomezam-pahasoavana ara-panahy mba hahazoan’ny rehetra tombontsoa.

• Ahoana no ahafahan’ny fahafantarana ny tanjon’ny fanomezam-pahasoavana ara-panahy manampy antsika hamantatra azy ireo eo amin’ny fiainantsika?

Fahatakarana kokoa ny momba ireo fanomezam-pahasoavana ara-panahy

Mba hanampiana ny mpianatra hianatra momba ireo fanomezam-pahasoavana ara-panahy voalaza ao amin’ny Fotopampianarana sy Fanekempihavanana 46, dia omeo azy ireo ilay taratasy zaraina mitondra ny lohateny hoe “Avy amin’ Andriamanitra ireo fanomezam-pahasoavana ireo.” Afaka mamita izany samirery na ao anatina vondrona ny mpianatra. Mety hanampy koa ny fanehoana ireto famaritana manaraka ireto:

• Mahafantatra ny maha-samihafa ny asa fanompoana (andininy 15): Io fanomezam-pahasoavana io dia afaka manampy ireo mpitarika hahafantatra ireo fanomezam-pahasoavana ara-panahin’ny hafa sy ny fomba ahafahan’izy ireo manampy amin’ny asa fanompoana isan-karazany.

• Mahafantatra ny maha-samihafa ny asa (andininy 16): Io fanomezam-pahasoavana io dia manampy ny tsirairay hamaritra raha avy amin’ Andriamanitra ny fampianarana na fitaomana iray na avy amin’ny loharano hafa.

• Fanomezam-pahasoavan’ny faminaniana (andininy 22): “Ny fijoroana ho vavolombelon’i Jesoa dia fanahin’ny faminaniana” (Apokalypsy 19:10). Ny fanambarana ho an’ny tena manokana no loharanon’ny fijoroana ho vavolombelona, ary ny fijoroana ho vavolombelona dia ahafahan’ny olona iray maminany na mijoro ho vavolombelona momba ny asan’ Andriamanitra.

• Ny famantarana ireo fanahy (andininy 23): Io fanomezam-pahasoavana io dia manome fahafahana ny olona iray hamantatra ny tena fikasana marina ananan’ny hafa sy ny zavatra miafina mandrisika azy ireo. Io fanomezam-pahasoavana io dia manampy ny olona iray hamantatra ireo faharatsiana miafina sy hahita ny tsara ao amin’ny hafa.

“Avy amin’ Andriamanitra ireo fanomezam-pahasoavana ireo”

Vakio ny Fotopampianarana sy Fanekempihavanana 46:13–26 ary fantaro ireo fanomezam-pahasoavana ara-panahy samihafa omen’ Andriamanitra ny zanany. Mba hahatakarana kokoa ny fomba ahafahan’ireo fanomezam-pahasoavana ireo hitondra soa ho an’ireo zanak’ Andriamanitra, dia ampifanaraho amin’ny toe-javatra mifanaraka aminy ny andininy tsirairay.

Fanomezam-pahasoavana ara-panahy		Fanomezam-pahasoavana ara-panahy
Fanomezam-pahasoavana ara-panahy Fotopampianarana sy Fanekempihavanana 46:13	Fanomezam-pahasoavana ara-panahy Fony filohan’ny kilasin’ny Zatovovavy i Michelle dia afaka nahafantatra ireo zavatra samihafa hain’ny mpianatra. Ny fahafantarana izany dia nanampy azy hanome asa iandraiketana izay ahafahan’ny mpianatra sahaniny mitondra anjara biriky sy manompo amin’ny fomba manan-danja.
Fanomezam-pahasoavana ara-panahy Fotopampianarana sy Fanekempihavanana 46:14	Fanomezam-pahasoavana ara-panahy Teo am-pihainoana ny fijoroana ho vavolombelona ananan’ny hafa, dia tsy nahazo antoka loatra i Samantha hoe afaka ny hanatevin-daharana azy ireo amin’ny filazana fa fantany fa marina ny Fiangonana. Saingy ny fihainoana ny fijoroana ho vavolombelona ananan’izy ireo dia mampitombo ny finoany ny Mpamonjy. Izany finoana izany dia manentana azy hanohy hiaina amim-pahatokiana.
Fanomezam-pahasoavana ara-panahy Fotopampianarana sy Fanekempihavanana 46:15	Fanomezam-pahasoavana ara-panahy Nasaina hanatrika fety iray i Lucy. Na dia tsy nisy nanome antsipiriany momba izany aza dia nahatsapa ho tsy nahazo aina izy hanatrika izany. Nolaviny tamim-pahalalam-pomba ilay fanasana, ary na dia sarotra aza izany, dia tsapany fa nety ny nataony.
Fanomezam-pahasoavana ara-panahy Fotopampianarana sy Fanekempihavanana 46:16	Fanomezam-pahasoavana ara-panahy Nanampy mpaminany maro ny Tompo mba hilaza mialoha izay hitranga any aoriana, anisan’izany ny asa fanompoan’i Jesoa Kristy (jereo ny Isaia 7:14; 1 Nefia 11:27–28; Môzià 3:5–10).
Fanomezam-pahasoavana ara-panahy Fotopampianarana sy Fanekempihavanana 46:17–18	Fanomezam-pahasoavana ara-panahy Rehefa niezaka niaina ny filazantsara sy nivavaka tsy tapaka ary nandalina ny soratra masina i Robert dia nanjary fantany fa i Jesoa Kristy no Mpamonjy azy.
Fanomezam-pahasoavana ara-panahy Fotopampianarana sy Fanekempihavanana 46:19–20	Fanomezam-pahasoavana ara-panahy Nandalo fahasarotana i Elder Vasquez sy i Elder Cox teo amin’ny asa fitoriana. Na izany aza, dia tapa-kevitra ny hanompo amim-pinoana an’i Jesoa Kristy izy ireo. Rehefa nandeha ny fotoana dia nanomboka nahita fo nihanalefaka izy ireo ary nisy fahagagana niseho teo amin’ny fiainan’ireo olona nampianariny.
Fanomezam-pahasoavana ara-panahy Fotopampianarana sy Fanekempihavanana 46:21	Fanomezam-pahasoavana ara-panahy Rehefa marary i Mark dia fantany fa afaka mangataka tsodranon’ny fisoronana amin-drainy izy. Imbetsaka no dia nitondra fiadanana sy hery fanampiny ho azy ireo tsodrano ireo.
Fanomezam-pahasoavana ara-panahy Fotopampianarana sy Fanekempihavanana 46:22	Fanomezam-pahasoavana ara-panahy Nisy lahatsoratra iray tao amin’ny tambajotran-tserasera nahatonga ny iray tamin’ireo naman’i Alice hanana ahiahy momba ny finoany. Rehefa nizara ilay lahatsoratra tamin’i Alice izy, dia fantatr’i Alice fa tsy avy amin’ Andriamanitra ilay fampahalalana.
Fanomezam-pahasoavana ara-panahy Fotopampianarana sy Fanekempihavanana 46:23	Fanomezam-pahasoavana ara-panahy Nasaina nampianatra ny kilasin’ny Zatovovavy i Judie. Rehefa nikatsaka ny fanampian’ny Ray any An-danitra izy dia nahatsapa ho notarihina tao anatin’ny fiomanany ary afaka nampianatra lesona iray mitondra fankaherezana.
Fanomezam-pahasoavana ara-panahy Fotopampianarana sy Fanekempihavanana 46:24–25	Fanomezam-pahasoavana ara-panahy Rahavavy Erickson dia voantso hanao asa fitoriana any amin’ny firenena hafa. Rehefa nikatsaka ny fanampian’ Andriamanitra izy ary niezaka nianatra ilay fiteny dia hitany fa afaka nahatakatra ny hafa sy nizara ny fijoroana ho vavolombelona nananany tamin-kery.

Rehefa vitan’ny mpianatra ilay sahanasa dia zarao amin’izy ireo ny valiny: 1f, 2b, 3a, 4i, 5j, 6h, 7g, 8e, 9d, 10k. Manolora fanazavana araka izay ilaina.

• Inona no nianaranao mikasika ny fomba itahian’ny Ray any An-danitra ny zanany amin’ny alalan’ny fanomezam-pahasoavan’ny Fanahy?

  Hazavao fa ny mpianatra dia mety hahafantatra fa ny Ray any An-danitra dia manome azy ireo fanomezam-pahasoavana ara-panahy mihoatra noho ireo voatanisa ao amin’ny soratra masina. Ohatra, amin’ny alalan’ny Fanahy Masina, dia mety hanome azy ireo faharetana ao anatin’ny toe-javatra sarotra Izy, na fahafahana mamela heloka ny olona iray izay nanafintohina azy, na herim-po mandritra ny fotoan-tsarotra, na amin’ny faniriana lehibe kokoa hanompo olona iray. Asao ny mpianatra hieritreritra ireo fanomezam-pahasoavana ara-panahy fanampiny ananantsika sy ny fomba hanehoan’izy ireo ny fitiavan’ Andriamanitra. Azonao tanisaina eny amin’ny solaitrabe ny sasany amin’ireo.

• Inona avy ireo fanomezam-pahasoavana ara-panahy izay nomen’ny Ray any An-danitra anao?

• Tamin’ny fomba ahoana no nitahiana anao tamin’ny alalan’ny fanomezam-pahasoavana ara-panahin’ny hafa?

• Inona no fiantraikan’ny zavatra niainanao tamin’ireo fanomezam-pahasoavana ara-panahy teo amin’ny fifandraisanao amin’ny Ray any An-danitra?

Loharanom-pitaovana fanampiny

Aiza no ahafahako mianatra misimisy kokoa momba ireo fanomezam-pahasoavana ara-panahy?

Raha mila fanazavana amin’ny antsipiriany momba ireo fanomezam-pahasoavana ara-panahy sasany voalaza ato amin’ity lesona ity dia jereo ny tabilao ao amin’ny Boky torolalana ho an’ny mpianatra: Testamenta Vaovao (2018), “1 Korintiana 12–14.”

Fotopampianarana sy Fanekempihavanana 46:7–8: Ahoana no amitahan’ny fahavalo ny olona mba hinoan’izy ireo fa mahatsapa ny Fanahy izy ireo?

Na dia tsy fahita loatra ato amin’ny Fiangonana amin’izao fotoana izao aza ny fitaka ara-panahy niainan’ireo Olomasina sasantsasany tao Kirtland, dia mbola mamitaka ny olona ihany ny fahavalo, izay mitarika amin’ny fananana fitondran-tena tsy mifanaraka amin’ny filazantsaran’i Jesoa Kristy.

Nizara izao manaraka izao ny Loholona Dale G. Renlund ao amin’ny Kôlejin’ny Apôstôly Roambinifolo:

Indray mandeha nisy lehilahy nitantara tamiko momba ny fasahiranany mandamina ny toe-bolam-pianakaviany. Fanodinkodinam-bola no vahaolana tonga tao an-tsainy. Nivavaka momba izany izy ka dia nahatsapa fa efa nandray fanambarana nanamafy ny hanaovany izany. Fantatro fa voafitaka izy satria nikatsaka fanambarana mifanohitra amin’ny didin’ Andriamanitra. Nampitandrina ny Mpaminany Joseph Smith hoe: “Tsy misy zavatra mampidi-doza kokoa ny zanak’ olombelona mihoatra noho ny hoe entanina fanahy sandoka, kanefa mihevitra fa manana ny Fanahin’ Andriamanitra” [Joseph Smith, ao amin’ny Times and Seasons, 1 apr. 1842, 744, josephsmithpapers.org]. (Dale G. Renlund, “Ireo fitsipika mifehy ny fahazoana fanambarana ho an’ny tena manokana,” Liahona, nôv. 2022)

Ilaina ve ny fanomezana ny Fanahy Masina mba hahazoana fanomezam-pahasoavana ara-panahy?

Nampianatra ny Mpaminany Joseph Smith hoe:

[Isika dia mino] ny faminaniana, ny fiteny tsy fantatra, ny fahitana, ny fanambarana, ny fanomezam-pahasoavana ary ny fanasitranana; ary tsy afaka mahazo ireo zavatra ireo ny olona raha tsy misy ny fanomezana ny Fanahy Masina. (Teachings of Presidents of the Church: Joseph Smith [2007], 117)

Inona avy ireo fanomezam-pahasoavana ara-panahy hafa azontsika ananana?

Nampianatra ny Loholona John C. Pingree Jr. ao amin’ny Fitopololahy hoe:

Maro ny fanomezam-pahasoavana ara-panahy voarakitra ao amin’ny soratra masina [jereo ny 1 Korintiana 12:1–11, 31; Môrônia 10:8–18; Fotopampianarana sy Fanekempihavanana 46:8–26], kanefa mbola misy maro hafa ihany koa. Ny sasany amin’izany dia mety ahitana ny fananana fitserana, ny fanehoana fanantenana, ny fifandraisana tsara aman’olona, ny fahaizana mandrindra amin’ny fomba mahomby, ny fitenenana na fanoratana feno fandresen-dahatra, ny fampianarana mazava tsara, ary ny fiasana mafy. (John C. Pingree Jr., “Manana asa ho anao Aho,” Liahona, nôv. 2017)

Ny Loholona Marvin J. Ashton (1915–1994) tao amin’ny Kôlejin’ny Apôstôly Roambinifolo dia niresaka momba ireo fanomezam-pahasoavana ara-panahy fanampiny:

Sahanasa fianarana fanampiny

Samy manana fanomezam-pahasoavana samihafa isika tsirairay avy nefa samy ilaina avokoa izany

Ity sahanasa ity dia azo ampiasaina ho solon’ilay taratasy zaraina.

Mialoha ny fampianarana dia soraty amin’ny toerana an-kisendrasendra eo amin’ny taratasy iray ny isa 13 ka hatramin’ny 25. Hetezo ho lasa vakivakina piozila miisa 13 ilay taratasy avy eo, ka ahitana isa iray eo amin’ny vakivakin’ny piozila tsirairay avy.

Rehefa nofantarina ilay fahamarinana natao sora-matevina ao amin’ny lesona dia zarao amin’ny mpianatra ireo vakivakina piozila. Hazavao fa ireo isa eo amin’ireo vakivakina piozila dia maneho ireo andininy ao amin’ny Fotopampianarana sy Fanekempihavanana 46 ary milaza fanomezam-pahasoavan’ny Fanahy iray ny tsirairay amin’izy ireo. Asao ny mpianatra hamaky mafy ireo andininy mifanandrify amin’ireo isa nomena azy ireo.

Rehefa voavaky ny andininy tsirairay dia asao ny mpianatra hanolotra toe-javatra miseho iray izay hitondran’izany fanomezam-pahasoavana izany tombontsoa ho an’ireo zanak’ Andriamanitra. Rehefa mizara izy ireo, dia asao ny mpianatra rehetra hiara-hiasa hanambatra ilay piozila. Hamafiso fa tahaka ny nanomezana ny mpianatra rehetra tapatapana taratasy samihafa mba hamenoana ilay piozila, dia nomena fanomezam-pahasoavana ara-panahy samihafa isika rehetra mba hifanasoavana (jereo ny andininy 12).

Fahafantarana sy finoana

Ny mpianatra dia afaka mandray soa avy amin’ny fahafantarana fa ny fanomezam-pahasoavan’ny finoana an’i Jesoa Kristy dia fanomezana manan-danja avy amin’ Andriamanitra, na dia mbola tsy ananantsika aza ny fanomezam-pahasoavan’ny fahafantarana fa Izy no Zanak’ Andriamanitra (jereo ny Fotopampianarana sy Fanekempihavanana 46:13–14).

Nizara izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Vao tsy ela no nisy zazalahy 14 taona iray nilaza tamiko sady somary nisalasala hoe, “Rahalahy Holland, mbola tsy afaka miteny aho hoe mahafantatra fa marina ny Fiangonana, saingy inoako izany.” Nofihiniko mafy io zazalahy io mandra-pivontiriky ny voamasony. Nolazaiko azy tamin’ny hafanam-po rehetra nananako fa ny hoe mino dia teny sarobidy, fihetsika iray mbola sarobidy kokoa aza ary tsy mila miala tsiny velively izy hoe “mino fotsiny ihany.” (Jeffrey R. Holland, “Tompo ô, mino aho,” Liahona, mey 2013)

Afaka mikaroka loharano notendren’ Andriamanitra ireo mpianatra mba hahatakarana kokoa ny fomba hanomezan’ny Tompo haja ireo izay manana ny fanomezam-pahasoavan’ny finoana. Ohatra, afaka mandalina misimisy kokoa ny lahatenin’ny Loholona Holland manao hoe “Tompo ô, mino aho” na ny Almà 32:16–27 izy ireo.