« មេរៀនទី ៦៦—គោលលទ្ធិ និងសេចក្ដីសញ្ញា ៥០ ផ្នែកទី ២ ៖ អំណោយទាននៃព្រះវិញ្ញាណ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ៥០ ផ្នែកទី ២ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
មេរៀនទី ៦៦ ៖ គោលលទ្ធិ និង សេចក្តីសញ្ញា ៤៩–៥០
គោលលទ្ធិ និងសេចក្ដីសញ្ញា ៥០ ផ្នែកទី ២
បង្រៀន និងរៀនសូត្រដោយព្រះវិញ្ញាណ
នៅក្នុង គោលលទ្ធិ និងសេចក្តីសញ្ញា ៥០ ព្រះអង្គសង្គ្រោះបានបង្រៀនថា ពួកបរិសុទ្ធត្រូវតែបង្រៀន ហើយរៀនដំណឹងល្អដោយព្រះវិញ្ញាណនៃសេចក្តីពិត ។ ក្នុងនាមជាគ្រូបង្រៀនដ៏ចំណាន ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃការបង្រៀនដោយព្រះវិញ្ញាណ ។ សមាជិកទាំងអស់នៃសាសនាចក្ររបស់ព្រះអង្គសង្គ្រោះនឹងមានឱកាសដើម្បីបង្រៀន និងរៀនដោយព្រះវិញ្ញាណពេញមួយជីវិតរបស់ពួកគេ ។ មេរៀននេះអាចផ្តល់ឲ្យសិស្សនូវឱកាសដើម្បីអនុវត្តការបង្រៀន និងការរៀនដោយព្រះវិញ្ញាណនៃសេចក្តីពិត ។
សកម្មភាពរៀនសូត្រដែលអាចមាន
ព្រះយេស៊ូវគឺជាគ្រូបង្រៀនដំណឹងល្អដ៏ឥតខ្ចោះ
ដើម្បីចាប់ផ្ដើមថ្នាក់ សូមពិចារណាជួយសិស្សគិតអំពីព្រះអង្គសង្រ្គោះជាគ្រូដែលមានលក្ខណៈបែបណា ។ របៀបមួយដែលយើងអាចធ្វើការណ៍នេះគឺតាមរយៈការសរសេរចំណងជើងថា គុណលក្ខណៈសម្រាប់ការបង្រៀន និងការរៀនសូត្រដ៏ជោគជ័យ នៅលើក្ដារខៀន ។ នៅក្រោមចំណងជើងនេះ សូមបង្កើតជួរឈរបីដែលមានស្លាកទីមួយថា ព្រះយេស៊ូវគ្រីស្ទ ។
សូមអញ្ជើញសិស្សឲ្យពិភាក្សាអំពីគុណសម្បត្តិអ្វីដែលបានធ្វើឲ្យព្រះយេស៊ូវគ្រីស្ទជាគ្រូបង្រៀនដំណឹងល្អដ៏ឥតខ្ចោះ ហើយរាយបញ្ជីវានៅលើក្ដារខៀន ។ សូមមើលវីដេអូ « ការបង្រៀនតាមរបៀបរបស់ព្រះអង្គសង្គ្រោះ ជាមួយអែលឌើរ អុជដូហ្វ » ( ៥៣:៣៤ ) ចាប់ពីនាទីទី ១៩:០១ ដល់នាទីទី ២០:០៦ អាចជួយសិស្សឲ្យគិតអំពីសារៈសំខាន់នៃការបង្រៀនដូចជាព្រះអង្គសង្គ្រោះ ។
សូមអញ្ជើញសិស្សឲ្យអនុវត្តគុណសម្បត្ដិនៃការបង្រៀន និងការរៀនសូត្រនៃដំណឹងល្អដូចជាព្រះគ្រីស្ទ នៅពេលពួកគេអនុវត្តការបង្រៀន និងការរៀនសូត្រនៅសព្វថ្ងៃ ។
សូមអានសេចក្តីថ្លែងការណ៍ខាងក្រោមដោយគណៈប្រធានទីមួយ ដោយរកមើលថាតើឱកាសបង្រៀនដំណឹងល្អអ្វីខ្លះដែលអ្នកនឹងមាននៅពេលនេះ និងនៅពេលអនាគត ។
ឱវាជាឱកាសដ៏រុងរឿងមួយដែលអ្នកមានដើម្បីបង្រៀនដំណឹងល្អរបស់ព្រះយេស៊ូវគ្រីស្ទ ! មិនថាអ្នកមាន ឬគ្មានការហៅបម្រើជាក់លាក់ដើម្បីបង្រៀនក៏ដោយ ក៏អ្នក គឺជា គ្រូបង្រៀនមួយរូបដែរ ។ ក្នុងនាមជាសិស្សរបស់ព្រះយេស៊ូវគ្រីស្ទដែលជាគ្រូបង្រៀនដ៏កំពូល នោះអ្នកមានឱកាសដើម្បីចែកចាយពន្លឺរបស់ទ្រង់នៅគ្រប់ទីកន្លែងដែលអ្នកទៅ—នៅក្នុងគេហដ្ឋាន ព្រះវិហារ នៅពេលអ្នកផ្តល់ការងារបម្រើដល់អ្នកដទៃ និងក្នុងចំណោមមិត្តភក្តិរបស់អ្នក ។ ការបង្រៀនដំណឹងល្អគឺជាការទុកចិត្តដ៏ពិសិដ្ឋមួយ ។ វាជាផ្នែកដ៏ចាំបាច់មួយនៃកិច្ចការរបស់ព្រះអម្ចាស់ ហើយវាដំណើរការបានយ៉ាងល្អបំផុត នៅពេលយើងធ្វើកិច្ចការនេះតាមរបៀបរបស់ទ្រង់ ។ ( ការបង្រៀនតាមរបៀបរបស់ព្រះអង្គសង្រ្គោះ [ ឆ្នាំ ២០២២ ] ទំព័រ ១ )
-
ហេតុអ្វីបានជាការបង្រៀនដំណឹងល្អរបស់ព្រះយេស៊ូវគ្រីស្ទអាចចាត់ទុកថាជា «ការទុកចិត្តដ៏ពិសិដ្ឋ » ?
-
តើអ្នកមានអារម្មណ៍យ៉ាងណាចំពោះការបង្រៀនដំណឹងល្អ ?
យើងបង្រៀន និងរៀនដោយព្រះវិញ្ញាណ
ប្រសិនបើអ្នកបានបង្កើតជួរឈរបីនៅលើក្ដារខៀនរួចហើយ សូមដាក់ស្លាកជួរឈរពីរទៀតថា គ្រូបង្រៀន និង អ្នករៀន ។ សូមអញ្ជើញសិស្សឲ្យបន្ថែមគុណលក្ខណៈរបស់គ្រូបង្រៀន ឬអ្នករៀនដែលពួកគេរកឃើញនៅក្នុងខគម្ពីរខាងក្រោម ។
សូមអាន គោលលទ្ធិ និងសេចក្តីសញ្ញា ៥០:១៣–១៤, ១៧–២២ ដោយរកមើលអំពីរបៀបដែលព្រះអង្គសង្គ្រោះចង់ឲ្យបង្រៀនដំណឹងល្អរបស់ទ្រង់ ។
-
តើអ្នកគិតថាវាមានន័យយ៉ាងណា ដើម្បីបង្រៀននិងរៀនដោយព្រះវិញ្ញាណ ?
-
តើយើងទទួលបានពរជ័យអ្វីខ្លះ នៅពេលយើងបង្រៀន និងរៀនដោយព្រះវិញ្ញាណ ?
សូមជួយសិស្សឲ្យរកឃើញគោលការណ៍មួយដូចជា នៅពេលយើងបង្រៀន និងរៀនដោយព្រះវិញ្ញាណ នោះយើងយល់ពីគ្នាទៅវិញទៅមក ហើយយើងត្រូវបានស្អាងឡើង ហើយត្រេកអរជាមួយគ្នា ។ អ្នកអាចនឹងរំឭកសិស្សថា ដើម្បីបានស្អាងឡើងមានន័យថា ត្រូវបានលើកឡើង ឬស្ថាបនាឡើង ។
ដើម្បីជួយសិស្សឲ្យយល់អំពីអត្ថន័យនៃការបង្រៀន និងរៀនដោយព្រះវិញ្ញាណ អ្នកអាចផ្តល់នូវឯកសារយោងបទគម្ពីរមួយចំនួនដូចជា អាលម៉ា ៣១:៥; គោលលទ្ធិ និងសេចក្តីសញ្ញា ៤២:១៤; ៨៨:១១៨, ១២២ និង ១៣០:១៨–១៩ ។ សូមអញ្ជើញសិស្សឲ្យធ្វើការជាមួយដៃគូ ឬជាក្រុមតូចៗ ដើម្បីកំណត់អំពីរបៀបដែលយើងបង្រៀន និងរៀនដោយព្រះវិញ្ញាណ ។ សូមបន្ថែមគំនិតនានាទៅនឹងជួរឈរ « គ្រូបង្រៀន » និង « អ្នករៀន » នៅលើក្ដារខៀន ។
ដើម្បីជួយសិស្សឲ្យយល់ពីសារៈសំខាន់នៃគោលការណ៍នេះ អ្នកអាចបង្ហាញវីដេអូ « Come, Follow Me: Rejoice Together » ( ១:២០ ) នៅលើគេហទំព័រ ChurchofJesusChrist.org ឬពិភាក្សាជាថ្នាក់នូវសំណួរដូចខាងក្រោម ។ សិស្សអាចនឹងពេញចិត្តស្តាប់អ្នកចែកចាយអំពីរបៀបដែលអ្នកបានទទួលពរជ័យដោយការស្តាប់ និងការរៀនសូត្រពីពួកគេនៅក្នុងថ្នាក់សិក្ខាសាលា ។
-
តើនៅពេលណាដែលអ្នកបានដកពិសោធន៍នូវពរជ័យទាំងនេះក្នុងនាមជាគ្រូបង្រៀន ឬអ្នកសិក្សាដំណឹងល្អ ?
-
តើយើងអាចធ្វើអ្វីខ្លះនៅក្នុងថ្នាក់សិក្ខាសាលារបស់យើង ដើម្បីធ្វើឲ្យប្រាកដថាមនុស្សគ្រប់គ្នាអាចទទួលបានពរជ័យទាំងនេះ ?
យើងអាចបង្រៀនតាមរបៀបរបស់ព្រះអង្គសង្គ្រោះ
សូមអញ្ជើញសិស្សឲ្យរៀបចំមេរៀនដំណឹងល្អខ្លីមួយដើម្បីបង្រៀន ។ សិស្សអាចធ្វើការរៀងៗខ្លួន ឬជាមួយដៃគូ ។ សូមអញ្ជើញសិស្សឲ្យពិចារណាអំពីតម្រូវការរបស់មិត្តរួមថ្នាក់ប្រកបដោយការអធិស្ឋាន ហើយដើម្បីស្វែងរកសារលិខិត ឬប្រធានបទដែលអាចថ្លែងទៅកាន់តម្រូវការទាំងនោះ ។
ជម្រើសមេរៀនមួយចំនួនអាចរួមបញ្ចូល ៖
-
វគ្គបទគម្ពីរចំណេះចំណានខាងគោលលទ្ធិ ។
-
ខគម្ពីរ ឬដំណើររឿងដែលចូលចិត្ត ។
-
ផ្នែក « សេចក្តីពិតដ៏អស់កល្បជានិច្ច » ចេញមកពី ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស ។
-
ផ្នែកមួយនៃមេរៀនប្រចាំសប្តាហ៍នេះនៅក្នុង ចូរមកតាមខ្ញុំ—សម្រាប់គេហដ្ឋាន និងសាសនាចក្រ ។
សំណៅចែកខាងក្រោមអាចជួយសិស្សរៀបចំមេរៀនរបស់ពួកគេបាន ។ នៅពេលពួកគេរៀបចំបង្រៀន អ្នកអាចរំឭកសិស្សអំពីបុគ្គលិកលក្ខណៈរបស់គ្រូបង្រៀនដំណឹងល្អ និងអ្នករៀនដែលពួកគេបានរាយបញ្ជីនៅលើក្ដារខៀន ។ អ្នកអាចអញ្ជើញពួកគេឲ្យខិតខំធ្វើជាអ្នកសិក្សាដំណឹងល្អ នៅពេលមិត្តរួមថ្នាក់ចែកចាយមេរៀនរបស់ពួកគេ ។ នៅពេលពួកគេមានពេលរៀបចំគ្រប់គ្រាន់ហើយ សូមអញ្ជើញសិស្សឲ្យបង្រៀនសារលិខិតរបស់ពួកគេទៅកាន់ដៃគូ ឬនៅក្នុងក្រុមតូចមួយ ។ តាមដែលសមរម្យ អ្នកអាចអញ្ជើញសិស្សដែលស្ម័គ្រចិត្តពីរបីនាក់ឲ្យបង្រៀនសារលិខិតរបស់ពួកគេទៅកាន់ថ្នាក់ ។
ការបង្រៀនតាមរបៀបរបស់ព្រះអង្គសង្គ្រោះ
សូមបង្កើតមេរៀនដំណឹងល្អខ្លីមួយ ដើម្បីជួយអ្នកដទៃឲ្យរៀនអំពីព្រះយេស៊ូវគ្រីស្ទ ។ សូមស្វែងរកការបំផុសគំនិតមកពីព្រះវិញ្ញាណបរិសុទ្ធ នៅពេលអ្នករៀបចំ និងបង្រៀនមេរៀនរបស់អ្នក ។ គ្រោងមេរៀនខាងក្រោមអាចជួយអ្នករៀបចំខ្លួនបង្រៀនបាន ។
-
ប្រធានបទមេរៀន និង/ឬ ឯកសារយោងបទគម្ពីរ ៖
-
សេចក្តីពិត ឬគោលការណ៍សំខាន់ៗដែលខ្ញុំនឹងបង្រៀន ៖
-
របៀបដែលខ្ញុំនឹងផ្តោតលើមេរៀននេះ អំពីព្រះយេស៊ូវគ្រីស្ទ ៖
-
សំណួរ(ទាំងឡាយ)ដែលខ្ញុំនឹងសួរ ៖
-
តើខ្ញុំបានទទួលអារម្មណ៍យ៉ាងណាចំពោះអានុភាពនៃសេចក្តីពិតនេះនៅក្នុងជីវិតរបស់ខ្ញុំ ( ទីបន្ទាល់ ) ៖
-
អ្វីដែលខ្ញុំនឹងអញ្ជើញអ្នកសិក្សាឲ្យធ្វើ ៖
យើងរៀនសេចក្តីពិតនៃដំណឹងល្អដោយព្រះវិញ្ញាណ
បន្ទាប់ពីសកម្មភាពនេះ សូមអញ្ជើញសិស្សឲ្យវាយតម្លៃបទពិសោធន៍នៃការបង្រៀន និងការរៀនសូត្រ ។ អ្នកអាចយោងទៅបញ្ជីនៅលើក្ដារខៀន ហើយពិភាក្សាអំពីរបៀបដែលសិស្សព្យាយាមអនុវត្តតាមគុណលក្ខណៈទាំងនេះ ។ ពួកគេអាចឆ្លើយសំណួរដូចខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកសង្កេតឃើញអ្វីខ្លះអំពីការបង្រៀនតាមរបៀបរបស់ព្រះអង្គសង្គ្រោះអំឡុងពេលធ្វើសកម្មភាពនេះ ? តើអ្នកបានកត់សម្គាល់ឃើញអ្វីខ្លះអំពីការរៀនដោយព្រះវិញ្ញាណ ?
-
បន្ទាប់ពីសកម្មភាពនេះ តើអ្នកមានអារម្មណ៍យ៉ាងណាអំពីសមត្ថភាពរបស់អ្នកក្នុងការបង្រៀនដោយព្រះវិញ្ញាណ ?
សូមផ្ដល់ការសរសើរដល់សិស្សក្នុងការខិតខំរបស់ពួកគេដើម្បីបង្រៀន និងរៀនដោយព្រះវិញ្ញាណ ។ អ្នកអាចអញ្ជើញសិស្សឲ្យបន្តអនុវត្តអ្វីដែលពួកគេបានរៀន នៅពេលពួកគេបង្រៀន និងសិក្សាដំណឹងល្អ ។