“Lesona 68—Fotopampianarana sy Fanekempihavanana 51: -Mahatoky, marina ary mpitantan-draharaha hendry,-” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 51,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 68: Fotopampianarana sy Fanekempihavanana 51–57
Fotopampianarana sy Fanekempihavanana 51
“Mahatoky, marina ary mpitantan-draharaha hendry”
Tamin’ny lohataonan’ny taona 1831 dia nahazo fanambarana i Joseph Smith. Nandidy ny mpikambana tao amin’ny sampana tao Colesville, New York, ny Tompo mba hiorim-ponenana ao amin’ny faritr’i Thompson, Ohio, ary hanatanteraka ny fitantanan-draharahan’izy ireo amin’ny alalan’ny fiainana ny lalàn’ny fanokanana. Ity lesona ity dia afaka manampy ireo mpianatra hahatakatra ny fomba ahafahany manaraka ny torohevitry ny Tompo mba ho mahatoky, ho marina ary ho mpitantan-draharaha hendry.
Sahanasa fianarana azo atao
Fanehoana ny fitantanan-draharaha
Mba hanomanana ireo mpianatra hianatra momba ny fitantanan-draharaha dia hevero ny hanatanteraka sahanasa toy ity manaraka ity.
Alaivo sary an-tsaina hoe nisy ray na reny nangataka ny zanany lahy na ny zanany vavy mba hiambina ny zandriny mandritra ny ora vitsivitsy tsy maha-eo ilay ray na reny.
-
Nahoana no tian’ny ray na reny be fitiavana iray hiaina izany andraikitra izany ny zanany hafa?
-
Inona araka ny eritreritrao no ho azon’ny ray na reny andrasana amin’ny zanany ao anatin’izany toe-javatra izany?
Hazavao fa ny Ray any An-danitra sy i Jesoa Kristy dia manankina andraikitra maro amintsika mandritra ny fiainantsika. Ireo andraikitra ireo dia azo antsoina hoe fitantanan-draharaha.
Ny Eveka Gérald Caussé ao amin’ny Episkôpà Mpiahy dia nizara ity famaritana ny teny hoe fitantanan-draharaha ity.
Ao amin’ny filazantsara, ny teny hoe fitantanan-draharaha dia manondro ireo andraikitra masina ara-panahy na ara-batana mba hikolokolo zavatra izay an’ Andriamanitra, izay maha-tompon’andraikitra antsika. (Gérald Caussé, “Ny adidintsika amin’ny fikolokoloana ny tany,” Liahona, nôv. 2022)
-
Inona avy ireo ohatra sasantsasany amin’ny fitantanan-draharaha omen’ Andriamanitra antsika eo amin’ny fiainantsika?
Soraty eny amin’ny solaitrabe ny valiny nomen’ny mpianatra an’ilay fanontaniana teo aloha, na azonao atao ny manasa azy ireo ho eny amin’ny solaitrabe sy hanoratra ny valinteniny.
Raha ilaina dia azonao atao ny mampiasa ireto manaraka ireto mba ho ohatra: ny ampahan’ny planeta onenantsika, ny fianakaviantsika, ny antso na asa nampiandraiketina ato amin’ny Fiangonana, ny fananantsika, ny vatantsika, ny fotoantsika.
Rehefa avy mamantatra ireo ohatra ireo ny mpianatra dia asao izy ireo hisaintsaina momba ireo fitantanan-draharaha sahanin’izy ireo eo amin’ny fiainany amin’ny alalan’ny fizarana izao manaraka izao:
Soraty ao anatin’ny diary fandalinanao ireo fitantanan-draharaha sasantsasany sahaninao na izay zavatra nankinin’ny Tompo taminao. Eo am-pandalinanao anio dia mitadiava fahamarinana izay afaka manampy anao ho lasa mpitantan-draharaha tsara kokoa amin’ireo zavatra nosoratanao tao amin’ny lisitra nataonao.
Ny fitantanan-draharahan’ny Olomasina tany am-boalohany
Mba hanampiana ny mpianatra hahatakatra ny sahan-kevitry ny tantara ao amin’ny Fotopampianarana sy Fanekempihavanana 51, dia vakio na fintino ity andiam-pehezanteny manaraka ity. Azonao atao ihany koa ny manasa mpianatra iray hamaky izany amin’ny iray kilasy.
Tamin’ny lohataonan’ny taona 1831 dia Olomasina maro no nanomboka tonga tao Ohio rehefa avy nifindra monina avy tany amin’ny faritra atsinanan’i Etazonia. Avy tany Colesville, New York, ny vondrona iray izay nahafoy zavatra maro be tokoa. Nomena torolalana hipetraka ao Thompson, Ohio io vondrona io ka hiaina ny lalàn’ny fanokanana. Ny fanambarana voarakitra ao amin’ny Fotopampianarana sy Fanekempihavanana 51 dia mirakitra ny torolalan’ny Tompo ho an’ny Olomasina.
Asao ny mpianatra handika ity tabilao manaraka ity ao amin’ny diary fandalinany ary hameno izany eo am-pandalinany ny Fotopampianarana sy Fanekempihavanana 51.
|
Ny andraikitry ny Eveka Partridge |
Ny andraikitry ny Olomasina |
|---|---|
Vakio ny Fotopampianarana sy Fanekempihavanana 51:1–4 mba hitadiavana ny zavatra nampianarin’ny Tompo ny Eveka Edward Partridge momba ny andraikiny.
-
Inona no andraikitra nomen’ny Tompo ny Eveka Partridge?
Rehefa mamaly ny mpianatra dia mety hanampy ny manazava fa ilay hoe “manendry amin’ity vahoaka ity ny anjarany” (Fotopampianarana sy Fanekempihavanana 51:3) dia ilazana ny tany sy fananana ho azon’ny Olomasina ao anatin’ny lalàn’ny fanokanana. Alohan’ny hanohizana dia mety hanampy ny manasa ny mpianatra hizara ny zavatra fantany na tsaroany momba ny lalàn’ny fanokanana.
Raha ilaina dia hazavao fa ao anatin’ny lalàn’ny fanokanana, ny Olomasina dia hanokana ny taniny sy ny fananany ho an’ny Tompo. Avy eo, amin’ny alalan’ny eveka, dia hahazo tany sy fananana izy ireo ho fitantanan-draharaha hokarakaraina sy hampiasaina. Ny Olomasina koa dia hanome ny ambim-bavany amin’izay namboleny, na nompiany, na noraisiny ho an’ny eveka mba homena ny mahantra.
Vakio ny Fotopampianarana sy Fanekempihavanana 51:9, 12–15, 19, ary fenoy ny tabilao mifototra amin’ny zavatra hitanao.
Mety hahasoa ny mpianatra ny mahafantatra fa ilay trano fitehirizana voalaza ao amin’ny andininy 13 dia toerana hitehirizan’ny eveka sakafo sy fitaovana hikarakarana ny mahantra sy ny sahirana.
-
Inona no torohevitra avy amin’ireo andininy ireo izay mety ho nanampy ny Olomasina handresy ireo fahasahiranana natrehin’izy ireo tamin’ny fiainana ny lalàn’ny fanokanana?
-
Inona no fitahiana nampanantenain’ny Tompo ao amin’ny andininy 19 ho an’ireo mahatoky sy marina ary mpitantan-draharaha hendry?
Asao ireo mpianatra hitady fahamarinana iray izay miantefa amin’ny fitantanan-draharaha sahanin’izy ireo mifototra amin’ny fampianaran’ny Tompo ao amin’ny andininy 19. Mety hahita zavatra toy izao manaraka izao izy ireo: Rehefa lasa mahatoky sy marina ary mpitantan-draharaha hendry isika, dia afaka mahatsapa ny fifalian’ny Tompo sy mandray ny fanomezana ny fiainana mandrakizay.
Raha ilaina dia asao ny mpianatra haka fotoana kely hamaritana ny iray amin’ireto teny manaraka ireto: mahatoky, na marina, na hendry. Afaka mizara ny fahatakarany ny mpianatra, na mampiasa ny Torolalana ho an’ny Soratra Masina, na mampiasa rakibolana.
-
Inona no ireo ohatra sasantsasany maneho ny fifaliana mety ho tsapantsika na ny fitahiana mety ho azontsika rehefa mahatoky amin’ny fitantanan-draharahantsika isika?
Ohatra maneho ireo mahatoky sy marina ary mpitantan-draharaha hendry
Ireto sahanasa manaraka ireto dia afaka manampy ny mpianatra hahatakatra kokoa ny dikan’ny hoe mahatoky sy marina ary mpitantan-draharaha hendry. Hevero ny hampiseho ireo sahanasa ary zarao ho vondrona kely ireo mpianatra mba hamita izany miaraka. Raha atao anaty vondrona ity asa ity dia ataovy izay hanendrena mpitarika ny fifanakalozan-kevitra ho an’ny vondrona tsirairay.
Sahanasa A: Ny ohatry nasehon’ny Mpamonjy
Ny Mpamonjy no ohatra tonga lafatra eo amin’ny hoe mahatoky sy marina ary mpitantan-draharaha hendry.
Mitadiava ohatra iray ao amin’ny soratra masina ahitana an’i Jesoa Kristy manatanteraka ny iray amin’ireo andraikiny hikarakara sy hanampy antsika. Tafiditra ao anatin’ny ohatrana soratra masina azonao halalinina ny Ezekiela 34:11–16; Jaona 6:38–39; 17:1–4; 3 Nefia 17:6–9; ary ny Fotopampianarana sy Fanekempihavanana 19:16–19.
Saintsaino ny naha-mahatoky sy naha-marina ary naha-mpitantan-draharaha hendry ny Mpamonjy teo aminao.
-
Ahoana no nitondran’ny ezaka nataon’ny Mpamonjy fifaliana sy fitahiana ho anao?
-
Amin’ny fomba ahoana no mety hanosehan’ny ohatra nasehon’ny Mpamonjy anao ho lasa mahatoky sy marina ary mpitantan-draharaha hendry?
Sahanasa B: Fitantanan-draharaha ankehitriny
Asaina hanaraka an’i Jesoa Kristy koa isika ka ho mahatoky sy ho marina ary ho mpitantan-draharaha hendry.
Mifidiana ohatra vitsivitsy amin’ireo fitantanan-draharaha omen’ny Tompo antsika izay voatanisa eny amin’ny solaitrabe (na ohatra iray hafa neritreretinao).
Farito ny zavatra azon’ny olona iray atao mba ho mahatoky sy marina ary mpitantan-draharaha hendry amin’ireo zavatra ireo. Azonao atao ny mampiditra ohatra efa hitanao na fomba niezahanao natao mba ho lasa mpitantan-draharaha tsara.
-
Nahoana ny Tompo no mety haniry olona amin’izao andro izao hiezaka ho mahatoky sy marina ary mpitantan-draharaha hendry araka izany fomba izany?
-
Ahoana no mety hitondran’ny ezaka ataon’izy ireo fifaliana sy fitahiana?
Manasà mpianatra samihafa hizara ny hevi-baovao azony avy amin’ireo fifanakalozan-kevitra. Asao ny mpianatra vitsivitsy hizara soratra masina hitan’izy ireo tao amin’ny Sahanasa A izay hitany fa tena sarobidy na tena manan-danja. Azonao atao koa ny mangataka ny mpianatra hizara ny zavatra nianarany avy amin’ny mpiara-mianatra iray niara-niasa taminy.
Ny zavatra izay nianaranao
Mba hanampiana ny mpianatra hampihatra ny zavatra nianarany tato amin’ity lesona ity dia asao izy ireo hamaly ireto fanontaniana manaraka ireto ao amin’ny diary fandalinany.
-
Inona no nianaranao androany ka tianao hotsaroana momba ny fitantanan-draharaha?
-
Inona no azonao atao mba ho mahatoky sy marina ary mpitantan-draharaha hendry kokoa eo amin’ny lafiny iray amin’ny fiainanao?
Ho an’ireo fanontaniana roa teo aloha dia asao ny mpianatra vitsivitsy izay vonona hizara ny zavatra nosoratany. Mijoroa ho vavolombelona ny amin’ny fifaliana izay tonga aminao rehefa miezaka manatanteraka ny fitantanan-draharahanao avy amin’ny Tompo ianao.