“Lesona 69—Fotopampianarana sy Fanekempihavanana 57: Ny fomba anorenan’ny Tompo an’i Ziona,” Boky torolalana ho an’ny mpampianatra seminera: Fotopampianarana sy Fanekempihavanana(2025)
“Fotopampianarana sy Fanekempihavanana 57,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 69: Fotopampianarana sy Fanekempihavanana 51–57
Fotopampianarana sy Fanekempihavanana 57
Ny fomba anorenan’ny Tompo an’i Ziona
Rehefa nanambara misimisy kokoa momba an’i Ziona tamin’ny Mpaminany Joseph Smith ny Tompo dia tsindrin-daona sy nientanentana ny Olomasina ny ho anisan’ny ao anatin’ny fiarahamonina toy izany. Rehefa nambara ny toerana hanorenana an’i Ziona, dia nanome toromarika olona vitsivitsy ny Tompo mba hanomboka hanorina ilay fiarahamonina. Ity lesona ity dia natao hanampiana ny mpianatra hanana faniriana kokoa ho lasa vahoakan’ny Tompo amin’ny alalan’ny fanorenana an’i Ziona.
Sahanasa fianarana azo atao
Ziona
Hevero ny hampiseho sarin’ny Mpamonjy iray.
Alaivo sary an-tsaina hoe nanana fahafahana hiaina eo akaikin’i Jesoa Kristy ianao.
-
Inona avy ireo toetra ananany izay hahatonga ny fiainana eo akaikiny hahafinaritra?
Alaivo sary an-tsaina izao hoe manao ahoana izany miaina ao anatin’ny fiarahamonina feno olona izay miezaka manaraka ny fampianaran’i Jesoa Kristy sy ny ohatra nasehony izany. Ohatra iray amin’ny fiarahamonina toy izany ny nitranga tamin’ny vaninandron’ny Testamenta Taloha tamin’ny vahoakan’i Enoka.
Hevero ny hampiseho ny sarin’i Enoka sy ny olony sy hanontany ny mpianatra ny zavatra fantany momba io tantara ao amin’ny soratra masina io.
Vakio ny Mosesy 7:18 mba hitadiavana ny toetran’ireo olona ireo.
-
Inona avy ireo olana atrehintsika ankehitriny ka ho voavaha na hihena ao anatin’ny fiarahamonina toy izany?
-
Inona araka ny eritreritrao no nilaina nataon’ireo olona ireo vao tonga teo amin’io toerana io izy ireo?
Makà fotoana kely hieritreretana ny fomba mety hitahiana ny fiainanao noho ny fiainanao amin’ny fomba mitovy kokoa amin’ny an’i Kristy tahaka ny vahoakan’i Ziona. Mandritra ny fandalinana androany dia mitadiava fampianarana izay afaka manampy anao hahatakatra kokoa ny zavatra azonao atao mba hanorenana an’i Ziona manodidina anao.
Ny tanànan’i Ziona
Mba hanampiana ny mpianatra hahatakatra ny sahan-kevitr’ireo andininy izay hohalalinin’izy ireo androany, dia vakio na fintino ireto fampahalalana manaraka ireto. Azonao atao koa ny mamaky ny Olomasina, 1:118–19.
Fotoana fohy taorian’ny nandrindrana ny Fiangonana dia maro tamin’ireo Olomasina no lasa nientanentana momba ny fananganana fiarahamonin’i Ziona iray tahaka ny an’ny vahoakan’i Enoka. Nampanantena ny Tompo fa hisy tanànan’i Ziona haorina amin’ny andro farany (jereo ny Fotopampianarana sy Fanekempihavanana 45:65–71; Mosesy 7:62).
Tamin’ny jona 1831, dia nandidy an’i Joseph Smith sy ny andiana loholona iray ny Tompo mba hanao dia tokony ho 1287 km avy any Ohio mankany Missouri, izay toerana hanaovany fihaonambe sy hamantarany momba ny tany lovany (jereo ny Fotopampianarana sy Fanekempihavanana. 52:1–2, 5). Ny fanambarana voarakitra ao amin’ny Fotopampianarana sy Fanekempihavanana 57 dia voaray tamin’ny fotoana nahatongavan’i Joseph Smith sy ireo loholona tao Missouri tamin’ny jolay 1831.
Vakio ny Fotopampianarana sy Fanekempihavanana 57:1–3 mba hahitana ny zavatra nianaran’ny Olomasina.
-
Taiza no nanambaran’ny Tompo fa hanorenana ny tanànan’i Ziona?
-
Inona no takatrao momba ny maha-zava-dehibe ny tempoly noho ny fanampiana avy amin’ny andininy 3?
Mety hanana fanontaniana mikasika ny fampianaran’ny Mpamonjy ao amin’ny andininy 1–3 ny mpianatra. Mety hanampy ny manazava fa ny ezaka nataon’ny Olomasina tany amin’ny taona 1830 mba hanorina ny tanànan’i Ziona tao Independence, Missouri, dia tsy nahomby noho ny fanenjehana. Tamin’ny taona 1838 dia noroahin’ny fahavalony hiala tao Missouri ny Olomasina.
Na dia nampanantena aza ny Tompo fa hisy tanànan’i Ziona haorina eo amin’ny kaontinanta Amerikana (jereo ny Fanekem-pinoana 1:10), ankehitriny dia toroina hevitra isika mba hanorina an’i Ziona any amin’izay misy antsika amin’ny alalan’ny fiezahana hiaina amim-pahamarinana sy hanorina ny Fiangonana manerana an’izao tontolo izao.topics.ChurchofJesusChrist.org
Manorina ny tanànan’i Ziona
Ao amin’ny fanambarana voarakitra ao amin’ny Fotopampianarana sy Fanekempihavanana 57 dia nanome torolalana olona vitsivitsy ny Tompo mba hanomboka hanorina an’i Ziona.
Ny fomba iray ahafahanao manampy ny mpianatra hianatra zavatra avy amin’ireto andininy manaraka ireto dia ny fandrindrana azy ireo ho ao anatina vondrona misy olona efatra ary ny fizarana amin’ireo mpikambana ao amin’ny vondrona ireo andininy ireo (andininy 6–7, 8–10, 11–12, 13–14). Ny mpikambana tsirairay ao amin’ny vondrona dia afaka mamantatra ilay olona na ireo olona noresahina sy ny zavatra nasaina nataony. Afaka mizara ny zavatra hitany amin’ireo mpikambana ao amin’ny vondrona misy azy ireo ny mpianatra avy eo.
Vakio ny Fotopampianarana sy Fanekempihavanana 57:6–14 mba hitadiavana ny zavatra nangatahin’ny Tompo mba hataon’ny tsirairay amin’izy ireo.
-
Nahoana araka ny eritreritrao no nasain’ny Tompo nanao asa samy hafa ny olona samy hafa?
-
Inona no ampianarin’izany antsika momba ny fomba anorenan’ny Tompo an’i Ziona, ny fanjakany, eto an-tany?
Ampio ny mpianatra hamantatra ity fitsipika ity: Ny Mpamonjy dia manorina an’i Ziona amin’ny alalan’ny fampiasana ny fahaizantsika manokana.
Hazavao fa nandeha niasa ireo lehilahy ireo ary nanatanteraka ny zavatra nasain’ny Tompo nataon’izy ireo. Nahafoy zavatra betsaka izy ireo ka “[n]iorim-ponenana” (jereo ny Fotopampianarana sy Fanekempihavanana 57:8, 11, 14, 15) tao Missouri, toerana tsy dia nahafinaritra loatra teo amin’ny sisintany andrefan’i Etazonia tamin’izany fotoana izany.
-
Ahoana no ahafahan’izany manampy antsika hahatakatra fa amin’izany fomba izany no anorenan’ny Mpamonjy ny fanjakany?
Mety tsy hanome anao andraikitra mitovy amin’ny an’ireo olona voalaza ao amin’ireo andininy ireo ny Tompo amin’ny fananganana an’i Ziona. Na izany aza dia mangataka antsika Izy mba hanorina an’i Ziona ankehitriny. Tamin’ny alalan’ireo mpaminaniny dia namporisika antsika Izy hanorina an’i Ziona na aiza na aiza misy antsika (jereo ny D. Todd Christofferson, “Come to Zion,” Liahona, Nov. 2008, 38).
-
Inona avy ireo fomba sasantsasany ahafahanao manorina an’i Ziona manodidina anao ankehitriny?
Azonao atao ny manasa ireo mpianatra hieritreritra lafin-javatra manokana eo amin’ny fiainan’izy ireo izay ahafahan’izy ireo manorina an’i Ziona, toy ny ao an-tokantrano, ao amin’ny paroasy na ny sampana misy azy ireo, na any am-pianarana, na ao anatin’ireo fifandraisan’izy ireo hafa.
Ao anatin’ity fifanakalozan-kevitra ity dia hevero ny hampiasa ny iray amin’ireto ohatra manaraka ireto na izy roa. Asao ny mpianatra hieritreritra ny fomba anampian’ireo ohatra ireo azy ireo mba hahatakatra kokoa ny fomba ahafahan’izy ireo manorina an’i Ziona manodidina azy ireo.
Jereo ny “Maso hahita” manomboka eo amin’ny mari-potoana 4:54 hatramin’ny 6:54. ChurchofJesusChrist.org.
Manorina an’i Ziona manodidina anao
Hevero ny hanasa ny mpianatra hizara ny zavatra niainany na fantany teo amin’ny fitondran’izy ireo na ny hafa fanampiana tamin’ny fanorenana an’i Ziona. Asao izy ireo hizara ireo fitahiana izay niainany noho ireo ezaka ireo.
Ampio ny mpianatra hiezaka amin’ny nahim-pony hitovy kokoa amin’i Jesoa Kristy: Rehefa mizara ireo zavatra niainana ireo ny mpianatra dia mety hahita fomba hahatonga azy ireo na ny hafa hitovy kokoa amin’i Kristy. Mba hanaovana fanazaran-tena bebe kokoa momba ny fomba ahafahanao milaza ny fiovan’izy ireo ho lasa tahaka an’i Kristy kokoa dia jereo ny fanofanana “Diniho ireo toetra tahaka ny an’i Kristy ao amin’ny mpianatra ary zarao ny zavatra tsikaritrao amin’ny fomba izay manentana azy ireo hanohy ny ho tahaka Azy,” izay hita ao amin’ny fampiofanana Fahaiza-manao ho fampivoarana ny mpampianatra: Mifantoha amin’i Jesoa Kristy.
Avy eo dia asao ireo mpianatra hamaly ny iray na ny roa amin’ireto fanontaniana manaraka ireto ao anatin’ny diary fandalinany.
-
Inona no nianaranao na tsapanao momba ny Ray any An-danitra sy i Jesoa Kristy tamin’ny alalan’ny fandalinanao androany?
-
Inona no tsapanao fa tokony hataonao noho ny zavatra nianaranao androany?
Raha tsy zavatra mikasika azy ireo manokana loatra, dia asao hizara ny eritreritr’izy ireo ny mpianatra vitsivitsy. Mijoroa ho vavolombelona momba ireo fahamarinana noresahinao, ary asao ireo mpianatra mba hanao zavatra mifanaraka amin’izay bitsika mety ho nananany tamin’ny alalan’ny Fanahy Masina mba hanorina an’i Ziona.