71-р хичээл: Сургаал ба Гэрээ 58–59

Сургаал ба Гэрээ 58:26–29

“Сайн зарчимд санаа сэтгэлээ бүрэн зориул”

Олон нийтэд үйлчилж буй өсвөр үеийн хүүхэд

Нью-Йоркийн Колесвиллын бүлгийнхэн гээд олон гэгээнтэн Миссурийн Жаксон гүнлэгээс дөнгөж ирээд удаагүй байв. Тэд Аврагчид Сионыг байгуулахад нь туслахыг хүсэж байсан ч юу хийхээ мэдэхгүй байв. Их Эзэн тэднээс тусалж, үйлчлэх арга замаа олохын тулд сонгох эрхээ ашиглахыг хүсэж байгаагаа тайлбарлав. Энэ хичээл суралцагчдад сайныг үйлдэж явахдаа Аврагчийн үлгэр жишээг хэрхэн дагахаа ойлгоход тусалж чадна.

Боломжит суралцах үйл ажиллагаа

Христийн амьдралын нэг өдөр

Хичээлийн өмнө Тэд сайныг үйлдэж явав гэж самбарт бичихийг бод. Суралцагч бүрийг амьдралаа энэ тодорхойлолттой нийцүүлдэг гэж мэддэг хүнийхээ нэрийг хуваалцахад урь. Хэдэн сайн дурын хүн энэ үг хэллэг яагаад тэдний сонгосон хүнийг тэдэнд сануулж байгаа тухай хуваалцаж болох юм.

Үйлс 10 бол Петрийн Кайсари дахь номлолын цэдэг билээ. Тэднийг Үйлс 10:38-ыг гаргахад уриад, Петр хэний нэрийг самбарт бичүүлмээр байгааг хараарай.

Есүс өнөө үед төрж, танай хороололд амьдарч эсвэл танай сургуульд явж байсан бол ямар байх байсныг төсөөл.

• Та Түүнийг “сайныг үйлдэн [явж]” гэж тодорхойлж болохуйц юу хийж байгаагаар төсөөлж байна вэ?

Аврагчийн үлгэр жишээг дагах хүсэлтэй болоход нь туслахын тулд суралцагчдад дараах өдөөлтийн талаар судлах тэмдэглэлдээ санаа бодлоо бичих цаг гаргаж өгөхийг бод.

Хэрэв та Есүстэй хамт сайныг үйлдэн бүхэл өдрийг өнгөрүүлсэн бол ямар санагдах байсныг төсөөлж бодохыг хичээгээрэй. Түүнтэй хамт байгаагүй ч гэсэн цагаа хэрхэн өнгөрүүлэхийг сонгоход энэ туршлага хэрхэн нөлөөлж болох вэ?

Сайныг үйлдэхээр сонгох

Сургаал ба Гэрээ 58-ыг хүлээн авахдаа Иосеф Смит болон Сүмийн хэдэн ахлагч Миссурид ирээд удаагүй байв. Тэд Сүмийг хэрхэн байгуулж мөн Сионыг тэр бүсэд хэрхэн байгуулах талаар заавар авахыг хүсэж байсан. Аврагч Өөрийнх нь ажлыг хийхэд сонгох эрхээ хэрхэн ашиглахыг тэдэнд заав.

Сургаал ба Гэрээ 58:26–29-ийг уншаад, Аврагч сонгох эрхээ ашиглах талаар гэгээнтнүүдэд юу гэж заасныг олж мэд. Дараах хүснэгтийн зохих хэсгээс олсон үг, хэллэгээ бич. (Анхаар: “Тохирохгүй бөлгөө” гэдэг нь шаардлагагүй эсвэл хүсдэггүй гэсэн үг юм.)

Дараах хүснэгтийг самбарт бичихийг эсвэл суралцагчдад хувилж өгөхийг бод. Хэрэв суралцагчдыг үүнийг хамтрагчтайгаа хийхэд уривал энэ үйл ажиллагаанд илүү олон хүн оролцох боломжтой болох юм.

Сонгох эрх ашиглан … бол

Есүстэй илүү адилхан	Есүстэй адилгүй

Суралцагчдыг хийж дуусахад олсон үг хэллэгийнхээ утгыг эргэцүүлэн бодож, ойлгоход нь туслах хэдэн асуулт тавихыг бод. Жишээлбэл:

• “Санаа сэтгэлээ зориулах” эсвэл “сайныг үйлдэхийг идэвхтэй эрэлхийлэх” гэдэг нь ямар утгатай гэж та бодож байна вэ?

• Бид яагаад сайныг үйлдэхэд албадуулж эсвэл шахуулахаас зайлсхийх ёстой гэж та бодож байна вэ?

• Яагаад сайныг үйлдэхэд өдөөх нь чухал гэж та нар боддог вэ?

Эдгээр шүлгээс Аврагчид чухал гэж хэлж болохоор нэг, хоёр үнэнийг судлах тэмдэглэл юм уу судар дээрээ өөрийн үгээр бичиж тэмдэглэ.

Суралцагчдыг тэмдэглэсэн үнэнүүдээ хуваалцахад эсвэл самбарт бичихэд урь. Тэдний илэрхийлж болох нэг үнэн бол Бурхан зөв шударга байдлыг улируулан авчрахаар эрэлхийлэгч хүмүүсийг шагнадаг гэдэг үнэн юм.

Та Бурханд болон бусдад зориулан юу хийх талаар хэн нэгний хэлэхийг хүлээлгүй үйлчлэх арга замуудыг хэр ойрхон идэвхтэй эрэлхийлдгээ тунгаан бодох эсвэл тэмдэглэхэд суралцагчдыг урьж болно. Тэднийг үргэлжлүүлэн судлах үедээ сайн зарчимд санаа сэтгэлээ бүрэн зориулахын тулд хичээж болох арга замууд дээрээ анхаарлаа хандуулахад урь.

• Эдгээр шүлэг дээрх Аврагчийн сургаалаар хэн нэгэн амьдарсан ямар жишээг та судраас бодож олж чадах вэ?

• Аврагч сайныг үйлдэх боломжуудыг анзаарч, үйлдэхийн тулд сонгох эрхээ ашигласан ямар жишээнүүд байдаг вэ?

Та ChurchofJesusChrist.org“ дээрээс Jesus Christ Has Compassion and Heals the People” (6:32) видеог суралцагчдад үзүүлэх тухай бодож үзэж болно. Энд Аврагч нифайчуудад үйлчилж, тэднийг эдгээхийн тулд тэдний дунд илүү удаан хугацаагаар үлдэхийг сонгож байгааг харуулдаг.

Эсвэл та ChurchofJesusChrist.org“ дээрх Widow of Nain” (2:22) видеог үзүүлэхийг сонгож болно. Энд Аврагч гашуудаж буй нэгэн эх хүнийг анзаарч, түр азнаад, түүнийг тайтгаруулж, хүүг нь эдгээхийг сонгож байгааг харуулдаг.

Бидний амьдрал дахь Аврагчийн сургаал

26–29-р шүлэг дээрх Аврагчийн сургаал бодит амьдралын нөхцөл байдал дээр ямархуу харагдаж болохыг олж мэдэхэд суралцагчдад тусал. Та дараах нөхцөл байдлуудаас заримыг нь эсвэл танай суралцагчидтай илүү холбоотой хэдэн нөхцөл байдлыг ашиглаж болно.

Суралцагчдыг жижиг бүлгүүдэд хуваагаад, нөхцөл байдал бүр дээр аль шүлэг эсвэл үг хэллэг илүү тохирч байгааг авч үзэн ярилц. Хүн бүр сайн үйлсэд оролцохын тулд сонгох эрхээ ашиглаж болох олон арга замыг бодож үзэхэд суралцагчдыг урамшуул.

Дараа нь бүлэг бүрийг өсвөр үеийнхэн 58-р хэсэг дээрх Аврагчийн сургаалыг хэрэгжүүлж болох өөрсдийн жишээг зохиосноор энэ үйл ажиллагааг давтахад урихыг бод.

1. Жулиэт хэзээ ч уулзаж байгаагүй гэр бүлдээ тохинуулахаар саяхан томилогджээ. Тэр яаж эхлэхээ ч мэдэхгүй байгаа.

2. Аннагийн Ням гаргийн ангийн багш сайн хүн боловч туршлагагүй багш юм. Ангиас олон хүүхэд хичээлдээ сонирхолгүй, хичээлд оролцох хүсэлгүй болсон мэт санагджээ.

3. Жасмин ээжийгээ ердийнхөөс илүү ядрангуй байгааг анзаарав.

4. Хавиэр өөр нэг суралцагч сошиал медиа дээр муухай пост нийтэлснийг олж мэдэв.

5. Жаред үдээс хойш юу хийх, хаашаа явахаа мэдэхгүй ч завтай байна.

Эцэст нь суралцагчдыг энэ хичээл дээр сурсан зарчмаа баталгаажуулсан сүмийн дууллыг дуулах юм уу сонсоход урихыг бод. Санал болгох нэг дуу бол Өнөөдөр би сайн үйл бүтээсэн бил үү? (Дуулал, д. 118) юм. Тэднээс дууны үг нь хэрхэн 58-р хэсэгт заасан Аврагчийн зарчмуудтай нийцэж байгааг тунгаан бодохыг хүс. Аврагч тэднийг өнөөдрийн сурсан зүйлээсээ юуг санахыг хүсэж байгаа тухай бодол мэдрэмжээ ангийнхантайгаа хуваалцахад нэг юм уу хоёр суралцагчийг урь. Заримыг нь чангаар хуваалцахад урихаасаа өмнө бодлоо бичих хэдэн минут гаргаж өгөх хэрэгтэй байж болох юм.

Та суралцагчдыг дараагийн семинарын хичээлээс өмнө сурсан зүйлсээ үйлдэх боломжийг эрэлхийлэхэд урьж болно. Та бэлэн болсон суралцагчдыг ангийнхантайгаа туршлагаа хуваалцахад урин шалгаж болно.

Нэмэлт эх сурвалж

Бид Сургаал ба Гэрээ 58:26–29-ийг амьдралдаа ямар арга замаар хэрэгжүүлж болох вэ?

Арван хоёр төлөөлөгчийн чуулгын ахлагч Жэффри Р.Холланд Сүмийн удирдагчид тохинууллын хөтөлбөрийг танилцуулсны дараахан ийн хэлсэн. Олон гишүүн бусдад үр дүнтэй тохинуулах талаар асуудаг.

Ахлагч Жэффри Р.Холланд

… Илүү олон заавар ирэхийг бүү хүлээгээрэй хэмээн бид зөвлөж байна. Шууд л усан сан руу үсрээд, сэл. Тусламж хэрэгтэй байгаа хүмүүс рүү чиглэ. Араараа сэлэх үү эсвэл нохой самардах уу гэж бодон, битгий хөдлөхгүй зогсоод бай. Хэрвээ бид заасан үндсэн зарчмуудыг даган, санваарын түлхүүрүүдээр тааруулан тохируулж, биднийг удирддаг Ариун Сүнсийг эрэлхийлэх аваас бүтэлгүйтэхгүй. (Жэффри Р.Холланд, “Эвлэрлийн тохинуулал,” 2018 оны 10-р сарын Ерөнхий чуулган, 73)

Тэргүүн зөвлөлийн ерөнхийлөгч Даллин Х.Өүкс эдгээр зарчим нь Бурханаас илчлэл, удирдамж эрэлхийлэхтэй ямар холбоотой болохыг ийн тайлбарлажээ.

Ерөнхийлөгч Даллин Х.Өүкс

Илчлэл хүлээн авах аливаа хүчин чармайлтын хамгийн чухал хэсэг нь бидний хувьд өөрсдийн хүчин чармайлт, ойлголтоор чадах бүхнээ хийх амлалт байдаг. Энэ нь бид үйлчлэх, ажиллах хэрэгтэй гэсэн үг.

Үйлчилж, ажиллах замаар урагшлах нь илчлэл хүлээн авах шаардлагад нийцэх чухал арга зам юм. Би судраас судалж байхдаа ихэнх илчлэл Бурханы хүүхдүүдэд Их Эзэн үйлдэх анхны алхмыг нь заахыг хүлээн хаашаа ч хөдлөлгүй суухад ирдэг юм биш, харин биднийг үйлдэх үед ирдгийг мэдэж авсан. (Dallin H. Oaks, “In His Own Time, in His Own Way,” Ensign, Aug. 2013, 22)

Залуу эмэгтэйчүүдийн ерөнхий ерөнхийлөгчийн зөвлөлийн Рэбэкка Л.Крэвэн эгч эдгээр зарчим нь гэрчлэл олж авахтай хэрхэн холбогддог талаар ийн хуваалцсан юм.

Бэки Крэйвин эгч

Нэг удаа нэгэн хайр татам залуу эмэгтэй надаас “Крэйвэн эгч ээ, та Сүмийн талаарх аливаа зүйл үнэн гэдгийг яаж мэддэг вэ? Учир нь би юу ч мэдрэхгүй байна” гэж чин сэтгэлээсээ асуусан юм.

Хариулахаасаа өмнө би түүнээс хэдэн зүйл асуув. “Судрыг хувиараа хэрхэн судалдаг тухайгаа ярьж өгөөч” гэхэд

тэр: “Би судар уншдаггүй” гэж хариулав.

Би үргэлжлүүлэн, “Чи гэр бүлийнхэнтэйгээ судар уншдаг уу? Ирээд, Намайг дага гарын авлагаас хамтдаа суралцдаг уу?” гэж асуув.

“Үгүй” гэж тэр хэллээ.

Намайг түүнээс “Чи залбирахдаа юу мэдэрдэг вэ?” гэж залбирлын талаар асуухад,

тэр “Би залбирдаггүй” гэв.

Би түүнд “Хэрэв чи ямар нэгэн зүйлийг мэдэхийг хүсвэл ямар нэгэн зүйл хийх хэрэгтэй” гэсэн энгийн хариулт өгсөн юм.

Энэ нь бидний сурч, мэдэхийг хүсдэг бүх зүйлийн хувьд адилхан биш гэж үү? Би шинэ найзыгаа залбирах, судлах, бусдад үйлчлэх, Их Эзэнд итгэх гэх зэргээр Есүс Христийн сайн мэдээний дагуу үйлдэж эхлэхэд урьсан. Юу ч хийхгүй суугаад байвал хөрвөлт ирэхгүй. Биднийг асуух, хайх, тогших замаар мэдэж авахын тулд зорилготой үйлдэх үед Ариун Сүнсний хүчээр хөрвөлт ирдэг. Хөрвөлт үйлдлээр дамжин ирдэг. (Рэбэкка Л.Крэйвэн, “Хамгийн их хамаатай зүйлээ хий”, Лиахона, 2022 оны 5-р сар, 62)

Нэмэлт суралцах үйл ажиллагаа

Хичээлийг эхлүүлэх өөр хувилбар

Та хэн нэгэн сайн зүйл хийхийн тулд сонгох эрхээ ашиглах эсвэл албадуулахаас нааш үйлдэхгүй байхыг сонгож буй дараахтай адил жишээгээр хичээлээ эхэлж болно.

Та нар гудамжинд алхаж яваад нэг настай хүн унахыг харлаа гэж төсөөл. Та нар дараах зүйлүүдийн алиныг нь хийх ёстой вэ?

1. Тэнгэрлэг Эцэг таныг тусал гэж байна уу үгүй юу гэдгийг харахын тулд түр азнана.

2. Тухайн настай хүнийг танаас шууд тусламж хүсэх эсэхийг харахын тулд хүлээнэ.

3. Хэн нэгэн танд юу хийхийг хэлэх байх гэж найдна.

4. Унасан хүнд яаж туслахаа шууд харна.

Суралцагчдыг хариулсны дараа тэднийг өөр өөр сонголт хийх болсон шалтгаанаа хуваалцахыг хүс. Дараа нь тэднийг Сургаал ба Гэрээ 58:26–29-ийг уншаад, сонголтууд маань эцэст нь бидний хэн болоход хэрхэн нөлөөлөхийг тунгаан бодоход урь.

“Зовлонд итгэлтэй байх нь”

Суралцагчдыг хүний авах оноог шийдэхдээ шүүгчид хүндийн зэргийг нь авч үздэг тэмцээнийг тунгаан бодоход урь. Жишээ нь: Гимнастик, цас мөсөн дээр гулгадаг спорт байж болно. Дэлхийн хүн бүрийн даван туулж буй хүнд хэцүүг бүрэн ойлгож, ухаардаг бидний төгс Шүүгч, Есүс Христтэй үүнийг холбоход суралцагчдад тусал. Дараа нь суралцагчдыг Сургаал ба Гэрээ 58:1–4-ийг уншаад, Аврагчийн шүүлтийн талаар мэддэг зүйлээ хайж олоход урь.

Орчин үед 26–29-р шүлгийг хэрэгжүүлэх

Аврагчийн сургаалын орчин үеийн хамаарлыг олж харахад нь суралцагчдад туслах нэг арга зам бол бүлгүүдийг “Нэмэлт эх сурвалж” хэсэгт буй мэдэгдлүүдээр хангах явдал юм. Бүлэг бүр мэдэгдлүүдийг уншаад, Сургаал ба Гэрээ 58:26–29-ийн ямар үг хэллэгүүд хамгийн сайн тохирч байгааг шийдэж болно. Дараа нь суралцагчдыг өсвөр насны хүүхэд тэдгээр хэллэг, мэдэгдлийн заадаг зүйлийг ашиглаж болох өөр өөр нөхцөл байдлыг хуваалцахад урь.

Холбогдох үйл ажиллагаа

Жижиг цаасан дээр сурагч бүр дараагийн долоо хоногт байх газраа (гэр, сургууль, сүм, ажил, хөл бөмбөгийн талбай гэх мэт) бичиж, хувиндаа хийж болно. Цааснуудыг санамсаргүйгээр хувингаас гаргаж ирээд, ангийнхныг тухайн нөхцөл эсвэл газар хэн нэгэнд сайн зүйлийг санаачилга гарган үйлдэхээр сонгож болох бүтээлч аргуудыг хуваалцахад урь.

Суралцахад идэвхтэй оролцох

Суралцагчдад 58-р хэсгийн үнэнүүд семинарын туршлагатай нь хэрхэн холбогдож болохыг ярилцахад туслахын тулд Арван хоёр төлөөлөгчийн чуулгын ахлагч Дэвид А.Бэднарын мэдэгдлийг үзүүлэхийг бод.

“Зөв зарчмуудын дагуу чөлөөтэй сонгодог суралцагч нь өөрийн зүрх сэтгэлийг Ариун Сүнсэнд нээж, Түүний гэрчлэгч хүч болон нотлогч гэрчийг урьдаг. Итгэлээр суралцахад зөвхөн идэвхгүй хүлээн авах биш, харин үүнд сүнсний болон оюун санааны мөн бие бялдрын хувьд хичээж чармайх шаардлагатай. …

… Суралцагч өөртөө мэдлэг олж авахын тулд итгэлээ ашиглаж мөн үйлдэх ёстой байдаг” (David A. Bednar, “Seek Learning by Faith,” Ensign, Sept. 2007, 64).

Суралцагчдыг хичээлийн өмнө, хичээлийн үеэр болон хичээлийн дараа семинарт сурсан, мэдэрсэн зүйлийг нь нэмэгдүүлж эсвэл багасгахад тусалж болох сонголтуудыг тайлбарлахад урь.

Хэрэв тустай бол суралцагчид 58-р хэсгийн зарчмууд болон ахлагч Бэднарын мэдэгдэл сургуулийн орчинд суралцах туршлагыг нь бас хэрхэн сайжруулж болохыг ярилцаж болно.