73-р хичээл: Сургаал ба Гэрээ 58–59

Сургаал ба Гэрээ 59

Их Эзэний өдөр

Хүндэтгэлийн өдрөөр баясах

1831 онд Их Эзэн зарим гэгээнтнийг Сионыг байгуулахаар Миссурийн Жаксон гүнлэг рүү нүүхэд дуудсан. Бошиглогч Иосеф Смит эдгээр гэгээнтэнтэй хамт байхдаа Их Эзэнээс Хүндэтгэлийн өдрийг ариунаар сахих зааврыг хүлээн авчээ. Энэ хичээл суралцагчдад Хүндэтгэлийн өдрийг ариунаар сахихыг сонгосноор Их Эзэнийг хүндлэхэд тусалж чадна.

Боломжит суралцах үйл ажиллагаа

Хүндэтгэлийн өдрийн сонголт

Суралцагчдад Хүндэтгэлийн өдрийг ариунаар сахих зарлигийг дуулгавартай дагахад ямар адислал мөн сорилтууд ирдэг талаар бодоход тусал. Та Ерөнхий чуулган дээр хуваалцсан дараах туршлагыг ашиглаж болно. Бусдын нөхцөл байдлын талаар бодох нь суралцагчдыг өөрсдийн бодол, мэдрэмж, үйлдлүүдийг бодож үзэхэд бэлтгэж тусална.

Далын ахлагч Ларри Е.Вилсон дараах туршлагыг хуваалцжээ.

Ахлагч Ларри Е.Вилсон

Манай охин Мэри багаасаа гарамгай тоглогч байсан. Тэдний баг хожсоор байгаад аваргын шалгаруулалтад орох болсон ба тэмцээн нь ням гарагт болохоор таарлаа. Хүндэтгэлийн өдөр бол амрах, сүнслэг хүч чадлаа сэргээх өдөр болохоос зугаа цэнгэлийн өдөр биш гэдгийг өсвөр насны Мэри олон жилийн турш заалгасан байсан юм. Гэтэл дасгалжуулагч болон багийн гишүүд нь түүнийг шахаж байсан ба бас тэр өөрөө багийнхнаа гонсойлгохыг хүсэхгүй байлаа. (Ларри Е.Вилсон, “Зөвхөн шударга ёсны зарчмуудаар,” 2012 оны 4-р сарын Ерөнхий чуулган, 114)

• Яагаад зарим хүн үүнийг Мэригийн амьдралын чухал шийдвэр гэж үзэж байхад зарим нь тэгж бодохгүй вэ?

• Хэрэв та нар Мэригийн оронд байсан бол ийм шийдвэр гаргахаасаа өмнө юуг анхаарвал дээр гэж бодож байна вэ?

Хүндэтгэлийн өдөр ямар шийдвэр гаргадгаа хэдэн хором бод. Та нар сонголтоо чиглүүлэхийн тулд ихэвчлэн юу хийдэг вэ? Өнөөдрийн хичээлийг судлахдаа яагаад Хүндэтгэлийн өдрийг ариунаар сахих хэрэгтэй талаар болон хэрхэн сахихыг олж мэдэхэд туслах Ариун Сүнсний удирдамжийг эрэлхийл.

Их Эзэний зарлиг ба адислал

Дараах мөр нь Сургаал ба Гэрээ 59-ийг ойлгоход тусална.

Хэдийгээр Полли Найт 55 настай, эрүүл мэндийн асуудалтай байсан ч Их Эзэнд дуулгавартай байж, Сион руу явахаар шийдэн, Нью-Йоркийн Колесвилл дэх гэрээ орхин гарчээ. Полли Сионд (Миссурийн Жаксон гүнлэг) хүрч ирээд хэд хоногийн дараа нас барсан юм. Полли Найтыг оршуулсан өдөр буюу ням гарагт бошиглогч Иосеф Смит Сургаал ба Гэрээ 59-д цэдэглэгдсэн илчлэлтийг хүлээн авчээ. Энэхүү илчлэлтээр Их Эзэн Поллигийн гэр бүлийг тайвшруулах үнэнүүдийг заасан юм (1–2-р шүлгийг үзнэ үү). Тэрээр мөн Өөрийн зарлигуудыг, тэр дундаа Хүндэтгэлийн өдрийг онцлон ярьсан. Их Эзэн Хүндэтгэлийн өдрийг ариунаар сахидаг хүмүүст агуу адислалуудыг амлажээ.

Самбарт заавар, адислал гэсэн гарчигтай хоёр багана зурж болно. Суралцагчдыг жижиг бүлэгт хуваагдан дараах шүлгүүдийг судлаад, олж мэдсэн зүйлээ самбар дээрх баганад жагсаан бичихэд урь. Мөн тэд судлах тэмдэглэл дээрээ үүнтэй ижил жагсаалт гаргаж болно.

Сургаал ба Гэрээ 59:9–20-ийг уншаад, Хүндэтгэлийн өдөр бид хэрхэн үйлдэж, ямар хандлагатай байвал зохих талаар Их Эзэний өгсөн заавар ба Түүний бидэнд санал болгодог адислал гэсэн хоёр жагсаалтыг гарга.

Суралцагчдыг сурч мэдсэн зүйлээ хуваалцахад урь. Мөн тэдэнд асуумаар санагдсан зүйлсээ асууж, хамтдаа авч үзэн ярилцах боломжийг олго. Шаардлагатай үед хэцүү үгсийн тодорхойлолтуудыг харах нь тэдэнд тустай байж болох юм. Суралцагчид “Бүхний Дээдэд чи бүхнээ зориулахаар” (10-р шүлэг) болон “өөрийнхөө өргөлүүд хийгээд өөрийнхөө ариун ёслолуудыг Бүхний Дээдэд өргөх” (12-р шүлэг) гэдэг нь юу гэсэн үг болохыг ярилцаж, олж мэдэж болно. Та дараахтай адил асуултуудыг ашиглан тэдний ярилцлагыг чиглүүлж тусалж болох юм.

• Бид эдгээр шүлгээс Хүндэтгэлийн өдрийн зорилгын талаар ямар үнэнийг олж тодорхойлж болох вэ?

  Суралцагчдыг олж мэдсэн үнэнүүдээ хуваалцахад урь. Та олж мэдсэн үнэнээ яагаад чухал гэж бодож байгаагаа ярихыг суралцагчдаас хүсэж болно. Суралцагчдын хуваалцах бусад үнэний зэрэгцээ ангийн гишүүдэд Хүндэтгэлийн өдөр бол бидний Бурханд бүхнээ зориулах өдөр (10-р шүлгийг үзнэ үү) гэдгийг олж тогтоон ярилцахад тусал.

• Бурханыг гэсэн хайр, бишрэлд анхаарлаа төвлөрүүлэх өдөртэй байх нь та нарын амьдралд хэрхэн тус болох вэ?

Хүндэтгэлийн өдөр Их Эзэнд хүндэтгэлтэй хандах

Дараах үйл ажиллагаа нь Хүндэтгэлийн өдөр хийдэг сонголтуудаараа дамжуулан Их Эзэнд хэрхэн хүндэтгэлтэй хандахыг ойлгоход суралцагчдад тусалж чадна. Та доорх ариун сүмийн зөвшөөрлийн бичгийн асуултыг самбарт бичиж болно.

Ариун сүмийн зөвшөөрлийн бичгийн ярилцлагын үеэр та нарт дараах асуултыг тавина.

Та Хүндэтгэлийн өдрийг гэртээ ч сүмд ч ариунаар сахиж, цуглаануудад оролцон, ариун ёслолд бэлдэж мөн түүнээс зохистой хүртэн, сайн мэдээний хууль, зарлигуудад нийцүүлэн амьдрахыг хичээдэг үү?

Хүндэтгэлийн өдрийг ариунаар сахиснаар Их Эзэнд хэрхэн хүндэтгэлтэй байж болох тухай санаануудыг судлах тэмдэглэлдээ бичих нь уг зарлигийг хэрхэн дагах талаар бодоход та нарт тусална.

Дараах эх сурвалжууд нь гэртээ ч сүмд ч Хүндэтгэлийн өдрийг ариунаар сахих илүү олон арга замыг олж мэдэхэд суралцагчдад тусална. Тэдгээрийг харуулсны дараа суралцагчдад судлах болон өөрсдийн санааг жагсаалтдаа нэмж бичих хугацаа гаргаж өгөх талаар бодож үз.

Дараах судруудыг уншаад, Хүндэтгэлийн өдөр Есүс Христ юу хийснийг олж мэд.

• Maтай 12:9–13

• Лук 4:16

Хүндэтгэлийн өдрийг ариунаар сахих талаар нэмэлт санаа авахын тулд дараах эх сурвалжуудаас судал.

• Өсвөр үеийнхний бат бөх байдлын төлөө: Сонголт хийхэд туслах хөтөч (2022), “Бурханаа хайрла, хөршөө хайрла,” 10–14

• Topics and Questions, “Sabbath Day” мөн “Sacrament,” topics.ChurchofJesusChrist.org

  Мөн та нэмэлт зөвлөгөөг ахлагч Жэффри Р. Холландын “Upon My Holy Day—Honoring the Sabbath” (1:30) бичлэгээс үзүүлж болох юм.

  ChurchofJesusChrist.org дахь “Goal: Honor and Enjoy the Sabbath Day” болон “Prepare for the Sacrament All Week Long” нийтлэлүүдийг эх сурвалж болгон хуваалцах нь тустай байж магадгүй.

  Суралцагчдад суралцах хангалттай цаг гаргаж өгсний дараа тэднийг сурч мэдсэн зүйлээ хуваалцахад урихыг бод. Та олж мэдсэн хэдэн зүйлээ самбарт бичихийг тэднээс хүсэж болох юм. Суралцагчдад өөрсдийн туршлагыг хуваалцахад нь туслахын тулд дараах асуултуудыг тавьж болно.

• Хүндэтгэлийн өдөр Бурханд бишрэлээ харуулахад юу тусалсан бэ? Эдгээр зан байдал танд ямар өөрчлөлт авчирсан бэ?

Суралцагчид хичээлийн эхэнд танилцуулсан Мэригийн туршлагаас илүү ихийг мэдэх сонирхолтой байж магадгүй. Та тэдэнд ChurchofJesusChrist.org дээрээс “Зөвхөн шударга ёсны зарчмуудаар” видеоны 5:24-өөс 6:26 секунд хүртэлх хэсгийг үзүүлэн түүхийн төгсгөлийг мэдүүлж болно.

Төлөвлөгөө гаргах

Дараах урилгыг харуулахыг бод. Та төлөвлөгөөгөө боловсруулж дууссан, хуваалцах хүсэлтэй хэдэн суралцагчийг урьж болно.

Судлах тэмдэглэлдээ Хүндэтгэлийн өдөр Аврагчид хэрхэн хүндэтгэлтэй хандахыг хичээх тухай төлөвлөгөө гарга. Та нар гэртээ болон сүм дээр юу хийж эхлэх, юуг үргэлжлүүлэн хийх эсвэл болих тухай санаагаа тодорхойлж болно.

Нэмэлт эх сурвалж

Христэд итгэгчид яагаад ням гаргийг Хүндэтгэлийн өдөр гэж үздэг вэ?

“Хуучин Гэрээний үед Бурханы гэрээт хүмүүс долоо хоногийн долоо дахь өдөр Хүндэтгэлийн өдрийг сахидаг байжээ. Учир нь Бурхан газар дэлхийг бүтээж дуусаад, долоо дахь өдрөө амарсан байдаг (Эхлэл 2:2-ыг үзнэ үү). Долоо хоногийн эхний өдөр тохиосон Есүс Христийн Амилалтын дараа (Марк 16:2-ыг үзнэ үү) Их Эзэний шавь нар долоо хоногийн эхний өдөр буюу ням гарагт Хүндэтгэлийн өдрийг сахиж эхэлсэн (Үйлс 20:7-г үзнэ үү)” (Topics and Questions, “Sabbath Day,” topics.ChurchofJesusChrist.org).

Хүндэтгэлийн өдрийг хүндэтгэх нь Бурханд сүсэг бишрэлээ илэрхийлэхэд надад хэрхэн тусалж чадах вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан.

Ахлагч Дэвид А.Бэднар

Бид Хүндэтгэлийн өдөр ёслолуудад оролцож, гэрээнүүдийн талаар суралцан, тэдгээрийг хүлээн авч, дурсан санаж, шинэчлэх замаар Хүүгийн нэрээр Эцэгийг шүтэн биширдэг. Түүний ариун өдрөөр бидний бодол, үйлс, зан байдал Бурханд үзүүлж буй тэмдэг бөгөөд Түүнийг гэсэн хайрын маань илрүүлэгч юм. (Дэвид А.Бэднар, “Үнэтэй бөгөөд гайхамшигт амлалтууд,” 2017 оны 10-р сарын Ерөнхий чуулган, 88.)

Аврагч биднийг Хүндэтгэлийн өдрийн талаар юуг ойлгоосой хэмээн хүсдэг вэ?

Ерөнхийлөгч Рассэлл М.Нэлсон ийн тайлбарласан.

Ерөнхийлөгч Рассэлл М.Нэлсон

[Есүс Христ] Хүндэтгэлийн өдөр нь Түүний бидэнд өгсөн бэлэг бөгөөд өдөр тутмын амьдралаас амрах цаг мөн сүнс, бие махбодоо шинэчлэх боломж гэдгийг ойлгоосой хэмээн хүс[дэг] гэдэгт би итгэдэг. Бурхан биднийг зугаа цэнгэл хөөх юм уу ажил хөдөлмөр хийлгэхийн тулд бус, харин ажил хөдөлмөрөөсөө амарч, бие махбодын хувьд болон сүнслэг байдлаар амраахын тулд энэ онцгой өдрийг өгсөн. (Рассэлл М.Нэлсон, “Хүндэтгэлийн өдөр нь баясгалант өдөр билээ,” 2015 оны 4-р сарын Ерөнхий чуулган, 122)

Хүндэтгэлийн өдөр хэрхэн амрах өдөр байж болох вэ?

Ерөнхийлөгч Рассэл М.Нэлсон туршлагаасаа хуваалцан ийн заажээ.

Ерөнхийлөгч Рассэлл М.Нэлсон

Би олон жилийн өмнө завгүй ажилладаг мэс засалч байхдаа Хүндэтгэлийн өдрөөс анх баяр баясгаланг олж, энэ өдөр хувийн эдгээлтийн өдөр минь болдог байв. Долоо хоногийн сүүлчээр ус, саван, ширүүн сойз зэрэгт үрэгдсэн гар минь хөндүүрлэж, хүнд ажлын ачааллаас амсхийх амралт надад хэрэгтэй байдаг байлаа. Ням гараг надад тун хэрэгтэй байсан тэр амралтыг өгдөг байсан юм.

Еврей хэлэнд Sabbath буюу Хүндэтгэлийн өдөр гэдэг нь “амрах” гэсэн утгатай. Хүндэтгэлийн өдрийн зорилго нь дэлхийн бүтээлтийн үед илчлэгдсэн бөгөөд Их Эзэн зургаан өдөр хөдөлмөрлөснийхөө дараа бүтээх ажлаасаа амарсан юм. (Рассэлл М.Нэлсон, “Хүндэтгэлийн өдөр нь баясгалант өдөр билээ,” 2015 оны 4-р сарын Ерөнхий чуулган, 122)

Хүндэтгэлийн өдрийг “их инээдтэйгээр бус” баяр хөөртэйгөөр сахих гэдэг нь юу гэсэн үг вэ? (Сургаал ба Гэрээ 59:15)

Арван хоёр төлөөлөгчийн чуулгын ахлагч Ричард Г.Скотт (1928–2015) ийн заасан.

Ахлагч Ричард Г.Скотт

Хошигнохдоо болгоомжтой бай. Чанга, зохисгүй инээд Сүнсийг гомдоох болно. Хошин шогийн мэдрэмжтэй байх нь илчлэлт авахад тусалдаг бол чанга инээд тэгдэггүй. Хошин шогийн мэдрэмж амьдралын дарамтыг чөлөөлөх суваг болж чаддаг. (Ричард Г.Скотт, “Хувийн амьдралдаа илчлэлт, Сүнсний удирдамжийг хэрхэн авах вэ,” 2012 оны 4-р сарын Ерөнхий чуулган, 46–47)

Нэмэлт суралцах үйл ажиллагаа

Хүндэтгэлийн өдрийг ариунаар сахиж сурах

Хэрэв та Мэригийн ням гарагт хөл бөмбөг тоглосон эсэх шийдвэрийг суралцагчдад хэлсэн бол хичээлийн төгсгөлд тэднээс Мэрид зөвлөгөө өгч байна гэж төсөөлөхийг хүс. Тэд Хүндэтгэлийн өдрийн талаар сурсан зүйлээ, энэ нь тэдний сонголтод хэрхэн нөлөөлж болох талаар хуваалцаж болно. Тэд жижиг бүлгээрээ дүрд тоглож эсвэл сурсан зүйлээ ярилцаж болно.

“Миний алдар суугийн төлөө бүхнээ зориулах” (Сургаал ба Гэрээ 59:1)

Энэ үйл ажиллагаа нь суралцагчдад Бурханы алдар суугийн төлөө бүхнээ зориулах гэдэг нь ямар утгатай болохыг тунгаан бодоход тусалж чадна.

Аврагчийн зургийг үзүүл. Суралцагчдыг нэг нүдээ аньж, нэг гараа сул зангидаж жижиг нүх гаргаад, тэр нүхээрээ энэ зургийг харахад урь. Суралцагчдаас юу харж байгаагаа дүрслэхийг хүс. Дараа нь суралцагчдыг нөгөө нүдээ нээж, Аврагчид анхаарлаа төвлөрүүлэхэд саад болж буй, нүдэнд нь харагдах бүх зүйлийг нэрлэхэд урь.

Энэ үйл ажиллагаа нь сүнслэг байдлын хувьд Бурханы алдар суугийн төлөө бүхнээ зориулахтай хэрхэн холбогдож болохыг тайлбарлахад суралцагчдыг урь. Суралцагчдыг Аврагчаас, ялангуяа Түүний ариун өдрөөс анхаарлыг нь сарниулах зүйлсийг багасгах арга замыг хуваалцахад урь.

“Чи … энэ мэт ямар ч зүйлийг үйлдэх ёсгүй” (Сургаал ба Гэрээ 59:6)

Их Эзэн гэгээнтнүүдэд хулгайлах, завхайрах, хүн алах ёсгүй гэж зарлигласныхаа дараа “тэрчлэн энэ мэт ямар ч зүйлийг үйлдэх ёсгүй” (Сургаал ба Гэрээ 59:6) хэмээн нэмж хэлжээ. Суралцагчдад энэ хэллэгийн утга санааг болон бидний сонголтод үзүүлэх нөлөөг тунгаан бодоход тусал. Та тэднээс хулгайлах гэдэг нь ямар утгатайг ярилцахыг хүсэж болно. Дараа нь хулгай биш ч “энэ мэт” үйлдлийн талаар бодохыг хүс. Завхайрах, хүн алах тухайд ч мөн адил. Эдгээр зарлигийг өгөх замаар Бурханы бидэнд санал болгодог хамгаалалтыг олж мэдэхэд суралцагчдад тусал.

Бурханд “бүх зүйлд” талархаж, “бүх зүйл дээр” Түүний мутрыг хүлээн зөвшөөр (Сургаал ба Гэрээ 59:7, 21)

Ангиараа Сургаал ба Гэрээ 59:7, 21-ийг уншаад, Их Эзэний өгсөн зарлигийг олж мэд. Бурханаас өгсөн удирдамж, адислалуудыг үргэлж хүлээн зөвшөөрөх нь бидэнд хэрхэн нөлөөлж болох талаар бодоход суралцагчдыг урь. Суралцагчдад Бурханаас хүлээн авсан адислалуудаа тунгаан бодох цаг гаргаж өгснийхөө дараа Түүнд талархах тодорхой арга замуудыг сонгоход тэднийг урамшуул.