74-р хичээл: Сургаал ба Гэрээ 60–62

Сургаал ба Гэрээ 60–62

“Бүх сүр хүч нь буй Түүний дуу хоолойг анхаарагтун”

1831 оны 8-р сард Аврагч хэсэг ахлагчийг Миссуригээс Огайо руу аялах хүнд хэцүү аянд нь хайраар зааварлажээ. Энэ зөвлөгөө нь гэртээ харихаар аялж байсан ахлагчдад Түүний хүлээлт, хүслийг ойлгоход тусалсан юм. Энэ хичээл нь суралцагчдад Аврагчийн хүлээлт, хүслийн талаар илүү ихийг ойлгоход туслах зорилготой.

Боломжит суралцах үйл ажиллагаа

Шийдвэр

Хичээлийн эхэнд дараах нөхцөл байдлыг харуулахыг бод.

Дотнын хоёр найз чинь шийдвэр гаргахаар хоёр өөр аргаар оролдож байна гэж төсөөлөөд үз. Нэг найз чинь Бурханаас тусламж, удирдамж ховорхон эрэлхийлдэг ба ихэнх шийдвэрийг өөрөө гаргахыг хичээдэг. Нөгөө найз чинь удирдамж гуйн залбирч, Их Эзэнийг өөрт нь хариулсан гэдэгт итгэлтэй болох хүртлээ ямар нэг шийдвэр гаргахаас тээнэгэлздэг.

• Хоёр найз чинь ямар шалтгаанаар ингэдэг байж болох вэ?

• Дээрх хоёр нөхцөл байдлын аль алинаас та нар ямар буруу ойлголтыг олж харж байна вэ?

Суралцагчдыг амьдралдаа гаргах ёстой шийдвэрүүдийнхээ талаар эргэцүүлээд, дээрх хоёр нөхцөл байдлын аль нэгд хамаарах эсэхийг бодоход урь. Шийдвэр гаргахад нь туслах үнэнийг өнөөдрийн хичээлээс хайхад тэднийг урамшуул.

“Та нарын хийх аяны талаар би та нарт хэлье” (Сургаал ба Гэрээ 60:5).

Суралцагчдад өнөөдөр судлах сургаалын нөхцөл байдлыг ойлгуулахын тулд дараах догол мөр дэх мэдээллийг уншиж өг эсвэл тоймлон ярьж өг.

1831 оны 8-р сард Иосеф Смит хэдэн ахлагчийн хамт Огайо мужийн Көртланд дахь гэр лүүгээ харих 800 миль (1287 км) гаруй замыг туулахаар аяллаа эхлүүлэв. Их Эзэн тэдэнд Сион хотыг байгуулахаар хөдөлмөрлөхийг зааварласан учир тэд хэдэн долоо хоногийг Миссурид өнгөрүүлээд байлаа. Гэртээ харих үед тэдэнд аялах арга хэрэгсэл, чиглэлийн талаар асуулт гарч ирэв. Зарим шийдвэрийн хувьд Их Эзэн тэднийг хамгийн сайнаараа шүүж тунгаан, өөрсдөө шийдэхэд урамшуулсан. Бусад шийдвэрийн хувьд Тэр тэднийг удирдан чиглүүлэх тусгай заавар, зарлигуудыг өгсөн.

Суралцагчид дараах хүснэгтийг ашиглан, жагсаасан шүлгүүдийг судалж болно. Суралцагчдыг судлах тэмдэглэлдээ хүснэгтийг хуулж бичихэд урь. Мөн самбар дээр зураад, хэд хэдэн суралцагчийг шүлгүүдийг судалсныхаа дараа хариултуудаа доор нь бичихэд урих талаар бодож үз. Та суралцагчдыг бүлгүүдэд хувааж, нэг юм уу бүх судрын хэсгийг хамтдаа судлахаар даалгаж болно.

	Их Эзэнд чухал байсан зүйл	Их Эзэнд чухал биш байсан зүйл
Сургаал ба Гэрээ 60:5–8
Сургаал ба Гэрээ 61:21–22
Сургаал ба Гэрээ 62:5–7

• Та нар эдгээр шүлгийг уншаад, Их Эзэнд чухал, чухал бус зүйлсийн хооронд ямар ялгаа байгааг анзаарсан бэ?

• Эдгээр шүлэг дэх Их Эзэний сургаалыг амьдралдаа тулгардаг нөхцөл байдлууддаа хэрэгжүүлэх ямар арга замууд байгаа вэ?

Сургаал ба Гэрээ 62:8-ыг уншаад, тодорхой зааваргүйгээр шийдвэр гаргах шаардлага тулгарахад бидэнд тусалж болох Их Эзэний зөвлөгөөг олж мэд.

Суралцагчдыг энэ шүлэг дэх Их Эзэний зөвлөгөөнөөс сурсан үнэнээ хуваалцахад урь. Тэд дараахтай төстэй зарчмыг хэлж болно. Их Эзэн биднээс Сүнсний удирдамж болон өөрсдийн үнэлэмж дээр үндэслэн олон шийдвэр гаргаасай гэж хүсдэг.

Та суралцагчдыг Сургаал ба Гэрээ 58:26–29-ийг уншаад, Их Эзэн биднээс шийдвэр гаргахыг хэрхэн хүлээж байдгийг илүү сайн ойлгоход туслах сургаалуудыг хайж олоход урьж болно. Суралцагчдыг эдгээр шүлгийг Сургаал ба Гэрээ 62:8-тай хоршуулах юм уу холбон судлахад урьж болно.

Хөрвөлт рүү хөтөлдөг зарчмуудад төвлөр. Үүнийг хэрхэн хийх талаарх нэмэлт дадлагыг Багшийн хөгжүүлбэл зохих ур чадвар: Сургаалыг заа дахь “Хөрвөлтөд хөтөлж, Есүс Христэд итгэх итгэлийг хөгжүүлдэг үнэнүүдэд төвлөр” гарчигтай хичээлээс үзнэ үү. Хөрвүүлэх зарчмуудыг тодорхойлж, хэлэхэд туслах ур чадвараар дадлага хийж, асуулт тавих талаар бодож үз.

• Шийдвэр гаргахдаа өөрсдийн үнэлэмж болон Сүнсний удирдамжид тулгуурлах нь яагаад чухал гэж та нар бодож байна вэ?

• Энэ үнэн нь өөрсдийн жишиг эсвэл үнэт зүйлстэй холбоотой шийдвэр гаргахад бидэнд хэрхэн тусалж чадах вэ?

Суралцагчдыг өөрсдийн үнэлэмж болон Сүнсний удирдамжид үндэслэн шийдвэр гаргасан туршлагаасаа хуваалцахад урихыг бод. Эдгээр нөхцөл байдалд Их Эзэн хэрхэн адисалсан тухай хуваалцахад тэднийг урь. Та мөн өөрийн туршлагаас хуваалцаж болох юм.

Аврагч Өөрийнхөө талаар заадаг

Огайо руу аялах үедээ ахлагчид ядарч сульдан, тодорхойгүй, айдас түгшүүртэй нөхцөл байдалтай тулгарсан. Тэд бас санал зөрөлдөж, хэрүүл маргаантай байв. Тэдэнд туслахын тулд Аврагч Өөрийнхөө тухай олон чухал сургаалыг хуваалцжээ. Эдгээр сургаал нь Түүний хэн болохыг, Тэр бидний төлөө юу хийж чадахыг илүү сайн ойлгоход бидэнд тусалж чадна.

Суралцагчдад дараах шүлгүүдийг судлахаар бэлтгэхэд нь туслахын тулд тэднээс судлах тэмдэглэлийнхээ хуудасны голд Есүс Христ гэж бичихийг хүс. Мөн та үүнийг самбарт бичиж болно. Суралцагчид дараах судрын хэсгүүдийг судлаад, Аврагчийн нэрийн эргэн тойронд Түүнийг дүрсэлсэн үг хэллэгийг бичиж болох юм.

Сургаал ба Гэрээ 60:1–4; 61:1–2, 36–39; 62:1–3, 9-ийг унш. Эдгээр шүлгээс Есүс Христийн талаар сурсан зүйлдээ анхаарлаа хандуул. Сурсан зүйлээ судлах тэмдэглэлдээ бичиж тэмдэглэ.

Суралцагчдад энэхүү суралцах үйл ажиллагаанаас Есүс Христийн талаар сурч, мэдэрсэн зүйлээ хуваалцах боломжийг олго. Тэд дараахтай төстэй асуултуудыг ангиараа, хоёр хоёроороо эсвэл жижиг бүлгээр ярилцаж болно.

• Эдгээр ахлагчид аян замд нь тус болох юуг та нар олж мэдсэн бэ?

• Аврагчийн талаар та нарт болон бусдын амьдралд тус болох юуг та нар сурч мэдсэн бэ?

Суралцагчдыг өнөөдөр судалж, ярилцсан зүйл дээрээ үндэслэн, Ариун Сүнснээс хүлээн авсан өдөөлтүүдийнхээ талаар бодоход уриад, хичээлээ дуусга. Тэднийг бодол, сэтгэгдлээ судлах тэмдэглэлдээ бичиж тэмдэглэхэд урамшуул.

Нэмэлт эх сурвалж

Би зөв шийдвэр гаргаж байгаа эсэхээ хэрхэн мэдэх вэ?

Арван хоёр төлөөлөгчийн чуулгын ахлагч Ричард Г.Скотт (1928–2015) ийн заасан.

Хэрэв [Бурхан] хариулахгүй байвал бид Түүнд итгэх итгэлээрээ дамжуулан өсөж хөгжих, Түүний зарлигуудад дуулгавартай байх, үнэн дээр үйлдэх хүсэлтэй байх зэргийг сануулж байна гэсэн үг. Ямарваа урьдчилсан баталгаагүйгээр, Түүний сургаалуудтай нийцсэн шийдвэрийн дагуу үйлдсэнээр хариуцлагыг өөртөө авахыг Тэр биднээс хүсэн хүлээдэг. Бид Их Эзэнийг хариулахгүй байна хэмээн гомдоллон дургүйцэж, идэвхгүй хүлээж сууж болохгүй. Бид үйлдэх хэрэгтэй.

Бидний сонголт ихэнхдээ зөв байдаг. Харин үүнийг Их Эзэн Өөрийн арга замаар баталгаажуулдаг юм. Тэрхүү баталгаа нь ерөнхийдөө тусламж болж бидэнд ирдэг. Бид сүнслэг мэдрэмжтэй байснаар үүнийг олж авна. Энэ нь хайраар дүүрэн Тэнгэрлэг Эцэг бидний сонголтуудыг баталсны тэмдэг болж бидэнд ирдэг. Хэрэв биднийг зөв гэж бодон буруу зүйл хийж эхэлбэл Тэрээр хэт оройтохоос өмнө бидэнд үүнийг мэдүүлэх болно. Бид түгшүүртэй, тайван бус мэдрэмжүүдийг таньснаар энэ тусламжийг анзаардаг. (Ричард Г.Скотт, “Сонгох эрх ба хариултууд: Илчлэлтийг таних нь,” Лиахона, 2014 оны 6-р сар, 50)

Сургаал ба Гэрээ 60:2–3. Би итгэл, гэрчлэлээ бусадтай хэрхэн хуваалцах вэ?

Арван хоёр төлөөлөгчийн чуулгын ахлагч Гари Э.Стивэнсон ийн заасан.

Сүмийн гишүүний хувиар танд Сүмийн албан ёсны хурал, албан бус хурал дээр мөн гэр бүлийнхэн, найз нөхөд, бусадтай ганц ганцаараа ярилцах үед гэрчлэлээ хэлэх, хуваалцах боломж гардаг.

Гэрчлэлээ хуваалцах өөр нэг арга зам нь таны зөв шударга зан чанар юм. Есүс Христийн талаарх таны гэрчлэл зөвхөн юу хэлж, ярьдгийг чинь бус, мөн хэн гэдгийг чинь илтгэдэг.

Та дуу хоолойгоороо гэрчлэлээ хуваалцан, үйлдлээрээ Есүс Христийг дагах амлалтаа харуулах болгондоо бусдыг “Христэд ир” [Моронай 10:32] гэж урьж байдаг. (Гари Э.Стивэнсон, “Гэрчлэлээ тордох ба хуваалцах нь,” 2022 оны 10-р сарын Ерөнхий чуулган, 80.)

Сургаал ба Гэрээ 61:5–19. Бүх хүн усаар аялахаас зайлсхийх ёстой юу?

Сургаал ба Гэрээ 61:5–19 дэх Их Эзэний үгс хожмын үеийн гэгээнтнүүдийг усаар аялах, усанд сэлэхийг хориглодоггүй. Хожмын өдрүүдэд зүхэгдсэн усны тухай дүрслэх үедээ Их Эзэн Илчлэлт ном дахь шүлгийн тухай ярьсан байж болно. Энэ шүлэгт төлөөлөгч Иохан Есүс Христийн Хоёр дахь ирэлтийн өмнө усан дээр тохиох устгалыг дүрсэлсэн байдаг (Илчлэлт 8:8–11; 16:2–6-г үзнэ үү). Сургаал ба Гэрээ 61 дээр Их Эзэн “их ус” буюу Миссури мөрний аюулыг онцлон хэлжээ (Сургаал ба Гэрээ 61:5, 18-ыг үзнэ үү).

Сургаал ба Гэрээ 62:1. Аврагч биднийг сул дорой үед хэрхэн халамжилдаг вэ?

Тэргүүн зөвлөлийн ерөнхийлөгч Даллин Х.Өүкс ийн тунхагласан.

Бидний Аврагч “өөрийн хүмүүсийг тэдний сул байдлуудынх нь дагуу хэрхэн халамжлахыг [тайвшрал өгөх, туслах гэсэн утгатай]” [Алма 7:12] мэдэж болохын тулд мөнх бус байдлын сорилт бэрхшээлийг бүрэн байдлаар “бие махбод”-оороо мэдэрч даван туулсан. Тиймээс Тэрээр бидний тэмцэж байгаа асуудал, зүрх сэтгэлийн шаналал, биднийг уруу татах зүйлс, өвдөлт, зовлон бүгдийг мэддэг. Учир нь Тэрээр Өөрийн хүслээр Цагаатгалын чухал хэсэг болгон энэ бүгдийг мэдэрч туулсан билээ. Үүний улмаас, Түүний Цагаатгал Түүнд биднийг халамжлах мөн энэ бүгдийг даван туулах хүчийг бидэнд өгөх боломжийг олгодог. (Даллин Х.Өүкс, “Есүс Христийн Цагаатгалаар хүчирхэгжсэн,” 2015 оны 10-р сарын Ерөнхий чуулган, 50–51.)

Нэмэлт суралцах үйл ажиллагаа

Сургаал ба Гэрээ 60:1–3. Сайн мэдээг хуваалцахаар амаа нээ

Сүмийн ахлагчид Огайо дахь гэр орноо орхин, Миссури руу аялах зарлигийг анх хүлээн авахдаа замдаа сайн мэдээг номлохоор зарлигдуулсан гэдгийг тайлбарла (Сургаал ба Гэрээ 52:9–10, 21–23, 25–27-г үзнэ үү).

Суралцагчдыг Сургаал ба Гэрээ 60:1–3-ыг уншаад, эдгээр ахын заримд хэлсэн Аврагчийн үгийг олж мэдэхэд урь.

Суралцагчдад эдгээр сургаал тэдний амьдралтай хэрхэн холбогдож болохыг ойлгоход туслахын тулд дараах асуултуудыг тавь.

• Аврагчийн сайн мэдээг хуваалцахаар амаа нээхэд бидэнд юу саад болж болох вэ?

• Эдгээр саад бэрхшээлийг даван туулахад Аврагч бидэнд хэрхэн тусалж чадах вэ?

• Бид өнөөдөр сайн мэдээг хуваалцахын тулд амаа нээж болох ямар арга замууд байна вэ?

Сургаал ба Гэрээ 60:13. Залхуурлаас зайлсхийх

“Цагаа дэмий үрэх ёсгүй” (Сургаал ба Гэрээ 60:13) гэсэн Их Эзэний зарлигийн талаар ярилцах нь суралцагчдад үр өгөөжтэй байж болно.

Сургаал ба Гэрээ 60-д цэдэглэгдсэн Их Эзэний зөвлөгөөний нэг хэсэг нь Сион хотыг байгуулахад туслахаар Миссурид ирэх хүмүүст зориулагдсан байсныг тайлбарла.

Суралцагчдыг Сургаал ба Гэрээ 60:13-ыг уншаад, эдгээр гэгээнтний заримд Түүний өгсөн зарлигийг олж мэдэхэд урь. Залхуурах гэдэг үг нь ажил хийхээс зайлсхийх, үнэ цэн багатай зүйлд оролцох гэсэн утгатай болохыг тайлбарлах нь тустай байж болох юм.

• Их Эзэн яагаад гэгээнтнүүдээ аялалдаа залхуурахгүй байхыг хүссэн гэж та нар бодож байна вэ?

• Энэ зөвлөгөөг бид мөнх бус амьдралынхаа аянд хэрхэн хэрэгжүүлж болох вэ?

Их Эзэн биднийг цагаа хэрхэн ашиглаасай гэж хүсдэгийг илүү сайн ойлгоход суралцагчдад туслах өөр хэдэн судрыг судлахад тэднийг урих талаар бодож үз. Жишээ нь: Алма 34:32–33; Сургаал ба Гэрээ 58:27; 75:3–4; 88:124.

• Залхуурал нь та нарын Тэнгэрлэг Эцэг, Есүс Христ хоёртой харилцах харилцаанд хэрхэн нөлөөлж болох вэ?

Суралцагчдыг цагаа дэмий өнгөрөөж байж болох зарим үйлдлийнхээ талаар эргэцүүлэн бодож, сайжруулах зорилго тавихад урь.

Сургаал ба Гэрээ 62:1. Есүс Христээс тусламж хүлээн авах

Суралцагчид Сургаал ба Гэрээ 62:1-д Аврагч Өөрийнхөө ба бидэнд туслах чадварынхаа талаар юу заасныг судлах нь үр өгөөжтэй байж болно. Суралцагчдыг энэ шүлгийг уншаад, Алма 7:11–13-тай харьцуулахад урих талаар бодож үз. Аврагч тэднийг болон тэдний хайртай хүмүүсийг хэрхэн халамжилсан талаар хувьдаа тунгаан бодоход зориулан суралцагчдад хэдэн хором өг. Тэднийг туршлага, мэдрэмжээ тэмдэглэлдээ бичихэд урамшуулж, “Нэмэлт эх сурвалж” дахь ерөнхийлөгч Даллин Х.Өүксийн үгийг тэдэнтэй хуваалц. Аврагч сул дорой байдал, сорилт бэрхшээлүүдээр нь дамжуулан тэднийг хүчирхэгжүүлж, дэмжиж байгаа тухай хуваалцах хүсэлтэй цөөн суралцагчийг урьж хуваалцуул.