Семинар
76-р хичээл— Сургаал ба Гэрээ 63:57–64: Есүс Христийн ариун нэрийг бишрэн хүндэтгэх

“Сургаал ба Гэрээ 63:57–64: Есүс Христийн ариун нэрийг бишрэн хүндэтгэх,” Сургаал ба Гэрээний семинарын багшийн гарын авлага (2025)

“Сургаал ба Гэрээ 63:57–64,” Сургаал ба Гэрээний семинарын багшийн гарын авлага

76-р хичээл: Сургаал ба Гэрээ 60–63

Сургаал ба Гэрээ 63:57–64

Есүс Христийн ариун нэрийг бишрэн хүндэтгэх

Зураг
Аврагч зааж байгаа нь

Сургаал ба Гэрээ 63-т цэдэглэгдсэн илчлэлтээр Аврагч дагалдагчдадаа “[Түүний] нэрийг уруулдаа хэрхэн авахад болгоомжлог” (Сургаал ба Гэрээ 63:61) хэмээн Өөрийн хүслийг илэрхийлсэн. Энэ хичээл нь суралцагчдад Аврагчийн нэрийг бишрэл хүндэтгэлтэйгээр ашиглахын ач холбогдлыг мэдрэхэд тусалж чадна.

Боломжит суралцах үйл ажиллагаа

Хайхрамжгүй бус хянамгай

Самбарт Хайхрамжгүй бус хянамгай гэсэн үгсийг бич. Дараа нь суралцагчдаас дараах асуултуудын дагуу ярилцахыг хүс.

  • Хайхрамжгүй бус хянамгай байх нь чухал ямар нөхцөл байдлууд байдаг вэ? Яагаад?

    Тэдэнд энэ талаар эргэцүүлэн бодоход тусламж хэрэгтэй бол та машин жолоодох, интернэтээр хайх, үсээ тайрах, мэс ажилбар хийх гэх мэт цөөн хэдэн жишээг дурдаж болно.

  • Аврагч биднийг амьдралдаа ямар зүйлсэд хянамгай байхыг хүсдэг гэж та нар бодож байна вэ?

Залуу эмэгтэйчүүдийн ерөнхий ерөнхийлөгчийн зөвлөлийн Рэбэкка Л.Крэйвэн эгч дараах асуултыг тавьжээ.

Зураг
Рэбэкка Л.Крэйвэн эгч

Бид хэл яриандаа хянамгай байна уу? Эсвэл балмад, бүдүүлэг зүйлийг хайхрамжгүйхэн хүлээн зөвшөөрч байна уу? (Рэбэкка Л.Крэйвэн, “Хянамгай ба хайхрамжгүй,” 2019 оны 4-р сарын Ерөнхий чуулган, 8.)

Бурханыг болон ариун нандин зүйлсийг үл хүндэтгэсэн үг хэллэгийг ашигладаг ямар нөхцөл байдлууд та нар тохиолдож болох вэ?

Суралцагчдыг ийм үг хэллэгтэй тулгарах үед ямар мэдрэмж төрдөг талаар бодоход урь. Тэднийг судалж байх явцдаа ариун нандин зүйлсийн талаар, ялангуяа Тэнгэрлэг Эцэг, Есүс Христ хоёрын нэрийг хэрхэн ашиглах тал дээр хянамгай байхын чухлыг мэдрэхэд туслах сургаалуудыг хайж олоход урамшуул.

Есүс Христийн нэрийг бишрэн хүндэтгэх

Дараах тайлбар нь Сургаал ба Гэрээ 63-аас судлах шүлгүүдийн агуулгыг ойлгоход суралцагчдад тусална.

Сургаал ба Гэрээ 63-т цэдэглэгдсэн илчлэлт ирэх үеэр Огайогийн Көртланд дахь гэгээнтнүүдийн зарим нь санваарын зохих эрх мэдэлгүйгээр Их Эзэний нэрийг хэрэглэсэн байв (Сургаал ба Гэрээ 63:62-ыг үзнэ үү). Их Эзэн эдгээр үйлдлийг буруушааж, Түүний нэрийг хэрхэн хэрэглэх тухай чухал үнэнийг гэгээнтнүүдэд заасан.

Сургаал ба Гэрээ 63:58–64-ийг уншаад, Их Эзэн гэгээнтнүүдээс Түүний талаар юуг ойлгохыг хүссэнийг олж мэд.

  • Эдгээр шүлэг Есүс Христийн тухай юуг ойлгоход та нарт тусалж байна вэ?

  • Бид Аврагчийн нэрийг хэрхэн хэрэглэх талаар 61–64-р шүлгээс та нар юу сурч мэдсэн бэ?

    Эдгээр шүлгээс суралцагчид Есүс Христийн нэр ариун нандин ба үүнийг анхаарал болгоомжтой хэрэглэх ёстой гэсэн үнэнийг тодорхойлж магадгүй.

  • Аврагчийн нэрийг анхаарал болгоомжтой хэрэглэнэ гэдэг нь ямар утгатай гэж та нар бодож байна вэ?

  • Эдгээр шүлгээс сурсан зүйлийн тань талаар ямар асуулт байна вэ?

Суралцагчид “Их Эзэний нэрийг … дэмий хоосон” (62-р шүлэг) хэрэглэх гэдэг нь юу гэсэн утгатайг асуувал, энэ нь Тэнгэрлэг Эцэг, Есүс Христ хоёрын талаар хүндэтгэлгүй ярих явдал байж болохыг тайлбарла (Dallin H. Oaks, “Reverent and Clean,” Ensign, May 1986, 49–50-ыг үзнэ үү). Үүнд мөн Аврагчийн санваарын эрх мэдлийг зохисгүй ашиглах явдал орж болно (Нийл Л.Андэрсэн, “Санваар дахь хүч,” 2013 оны 10-р сарын Ерөнхий чуулган, х. 106-г үзнэ үү). Бид сайн мэдээний талаар ярихдаа эсвэл өдөр тутмын харилцаандаа Аврагчийн талаар ярих бол хайр, хүндэтгэлтэйгээр ярих нь зүйтэй гэдгийг суралцагчид ойлгосон эсэхийг нягтал.

Дараах асуултыг тавихаасаа өмнө суралцагчдаас Аврагчийн нэрийг бишрэл хүндэтгэлтэйгээр ашиглахын чухлыг ойлгодоггүй найзтай гэж төсөөлөхийг хүсэх нь тустай байж магадгүй. Тэд энэ хүнийг дотроо төсөөлөөд ярилцаж болно.

  • Бидэнд Есүс Христийн нэрийг бишрэл хүндэтгэлтэйгээр ашиглах хүслийг мэдрэхэд юу тусалж чадна гэж та нар бодож байна вэ?

Есүс Христийг илүү их хайрлаж, бишрэн хүндэтгэх

Есүс Христ гэж хэн болохыг мөн Түүний бидний төлөө хийсэн зүйлсийг илүү сайн ойлгох нь Түүнийг илүү их хайрлаж, хүндэтгэхэд тусалдаг гэдгийг тайлбарла.

Дараах судлах үйл ажиллагааг танилцуулахаас өмнө суралцагчдыг Есүс Христийн тухай бишрэл хүндэтгэлтэйгээр бодож, ярихад урамшуулдаг туршлага эсвэл судруудаас олж мэдсэн үнэнээ хуваалцахад урих талаар бод. Та мөн өөрийн амьдралаас жишээ хуваалцаж болно.

Есүс Христийг илүү их хайрлаж, Түүний тухай бишрэл хүндэтгэлтэйгээр ярих хүслийг тань нэмэгдүүлэх тэнгэрлэгээр томилогдсон эх сурвалжийг хайж олоход цаг гарга. Та Түүний хэн болохыг болон юу хийснийг дүрсэлсэн судар, Сүмийн удирдагчдын хэлсэн үг, дуулал, бусад тустай эх сурвалжийг хайж болно. Төрсөн бодол, мэдрэмжээ судлах тэмдэглэлдээ бичиж тэмдэглэ.

Тэд эх сурвалжуудыг дангаараа эсвэл хамтрагчтайгаа хамт хайж болно. Шаардлагатай бол та тэдэнд Есүс Христийн ариун нандин мөн чанарыг заасан дууллууд болон Матай 8:23–27; 2 Нифай 25:13; Сургаал ба Гэрээ 18:23–25; 35:1–2; 110:1–5 зэрэг судалж болох эх сурвалжуудын цөөн жишээг өгч болно.

Хангалттай цаг гаргаж өгсний дараа олж мэдсэн, мэдэрсэн зүйлээ хуваалцахыг суралцагчдаас хүс. Хэрэв тэд утга агуулга бүхий дууллуудыг олсон бол ангиараа нэг юм уу хэд хэдийг нь хамтдаа дуулж болно. Мөн та суралцагчдыг олсон судраа уншаад, яагаад тэдэнд утга учиртай санагдсаныг хуваалцахад урьж болно.

Дараах асуултууд нь суралцагчдад ойлгосон зүйлээ хуваалцахад тусална.

  • Та нар Аврагчид талархах, хүндэтгэх сэтгэлийг төрүүлсэн юуг судалсан бэ?

  • Сурсан зүйлээ санах нь та нарын сонголтод хэрхэн нөлөөлөх вэ?

Та хоёр дахь асуултын талаар өргөн хэмжээний ярилцлага өрнүүлэхийн тулд суралцагчдыг жижиг бүлгүүдэд хувааж, Тэнгэрлэг Эцэг, Есүс Христ хоёрыг илүү их хүндэтгэснээр амьдралынх нь тодорхой тал дээр ямар нөлөө үзүүлэх талаар ярилцахад урьж болно. Тэдний ярьж болох амьдралын тал бүрийн жишээнд:

  • Медиа хэрэглээтэй холбоотой тэдний сонголт

  • Бусадтай харилцах тэдний харилцаа

  • Сайн мэдээг хуваалцах тэдний хүсэл

  • Тэнгэрлэг Эцэгт хандан залбирах тэдний арга барил орж болно.

Амьдралтайгаа холбох

Сурсан зүйлээ эргэцүүлэн бодоход нь суралцагчдад туслахын тулд судлах тэмдэглэлдээ доорх асуултуудын ядаж нэгд нь хариулахад тэднийг урь.

  • Өнөөдөр Сүнснээс эсвэл ангийнхнаасаа сурсан зүйл дээрээ үндэслэн Аврагчийн талаарх мэдрэмж эсвэл үзэл бодолд тань ямар өөрчлөлт гарсан гэж та нар анзаарч байна вэ?

  • Өнөөдөр сурсан зүйлийнхээ үр дүнд илүү сайн эсвэл өөрөөр хийхийг хүсэж буй зүйл юу вэ?

Бичсэн зүйлээ хуваалцахад цөөн суралцагчийг урь. Тэнгэрлэг Эцэг болон Есүс Христийн талаар гэрчлэлээ хуваалцаж, Тэдний нэрс таны хувьд яагаад ариун нандин болохыг тайлбарлаад хичээлээ дуусга.

Хэвлэх