Lesson 74: Doktrina at mga Tipan 60–62

Doktrina at mga Tipan 60–62

“Pakinggan ang Tinig Niya na Nagtataglay ng Lahat ng Kapangyarihan”

Noong Agosto 1831, mapagmahal na tinagubilinan ng Tagapagligtas ang isang grupo ng mga elder sa kanilang mahirap na paglalakbay mula Missouri patungong Ohio. Ang Kanyang payo ay nakatulong sa mga elder na maunawaan ang Kanyang mga inaasahan at ninanais para sa kanila habang naglalakbay sila pauwi. Layunin ng lesson na ito na tulungan ang mga estudyante na mas maunawaan pa ang mga inaasahan at ninanais ng Tagapagligtas para sa kanila.

Mga Posibleng Aktibidad sa Pag-aaral

Mga Desisyon

Para simulan ang klase, maaari mong i-display ang mga sumusunod na sitwasyon:

Ipagpalagay na nahihirapan ang dalawa sa malalapit mong kaibigan sa pagdedesisyon sa magkaibang paraan. Bihirang humingi ng tulong o patnubay ang isang kaibigan mula sa Diyos at sinusubukan niyang gawin ang karamihan ng mga desisyon nang mag-isa. Ang isa pang kaibigan ay nanalangin para mapatnubayan at nag-aalangang kumilos sa anumang desisyon hanggang hindi niya natitiyak na sinagot siya ng Panginoon.

• Ano ang ilang dahilan kung bakit nadarama ng bawat kaibigan ang nadarama niya?

• Ano ang ilang maling pag-unawa na nakikita mo sa dalawang sitwasyon?

Sabihin sa mga estudyante na isipin ang mga desisyong kailangan nilang gawin sa kanilang buhay at isipin kung may kaugnayan ang mga ito sa alinman sa mga sitwasyong ito. Hikayatin silang maghanap ng mga katotohanan sa lesson ngayon na makatutulong sa kanilang mga desisyon.

“Ako’y mangungusap sa inyo hinggil sa inyong paglalakbay” (Doktrina at mga Tipan 60:5)

Upang matulungan ang mga estudyante na maunawaan ang konteksto ng mga turong pag-aaralan nila ngayon, basahin o ibuod ang impormasyon sa sumusunod na talata.

Noong Agosto 1831, nagsimulang maglakbay si Joseph Smith at ang ilang elder nang mahigit 800 milya (1,287 km) patungo sa kanilang mga tahanan sa Kirtland, Ohio. Ginugol nila ang nakaraang ilang linggo sa Missouri, kung saan iniutos sa kanila ng Panginoon na pagsikapang itayo ang lunsod ng Sion. Habang naglalakbay pauwi, may mga tanong ang grupo tungkol sa paraan at direksyon nila sa paglalakbay. Para sa ilang desisyon, hinikayat sila ng Panginoon na gamitin ang kanilang pinakamahusay na paghatol at magpasiya para sa kanilang sarili. Para sa iba pang mga desisyon, nagbigay Siya ng mga partikular na tagubilin at kautusan na gagabay sa kanila.

Maaaring gamitin ng mga estudyante ang sumusunod na chart para pag-aralan ang mga talatang nakalista. Sabihin sa mga estudyante na kopyahin ang chart sa kanilang study journal. Maaari mo rin itong kopyahin sa pisara at anyayahan ang iba’t ibang estudyante na isulat ang mga sagot matapos nilang pag-aralan ang mga talata. Maaari mong ilagay ang mga estudyante sa mga grupo at ipaaral sa kanila ang isa o lahat ng passage nang sama-sama.

	Ang mahalaga sa Panginoon	Ang hindi mahalaga sa Panginoon
Doktrina at mga Tipan 60:5–8
Doktrina at mga Tipan 61:21–22
Doktrina at mga Tipan 62:5–7

• Anong mga pagkakaiba ang napansin mo sa mga talatang ito sa kung ano ang mahalaga sa Panginoon at kung ano ang hindi?

• Ano ang ilang paraan na magagamit mo ang mga turo ng Panginoon sa mga talatang ito sa mga sitwasyong kinakaharap mo sa iyong buhay?

Basahin ang Doktrina at mga Tipan 62:8, at alamin ang payo ng Panginoon na makatutulong sa atin kapag kailangan nating gumawa ng mga desisyon nang walang partikular na patnubay.

Sabihin sa mga estudyante na ibahagi ang isang katotohanang natutuhan nila mula sa payo ng Panginoon sa talatang ito. Maaari nilang ipahayag ang alituntuning tulad ng sumusunod: Inaasahan ng Panginoon na gagawa tayo ng maraming desisyon batay sa mga patnubay ng Espiritu at sa ating sariling paghatol.

Maaari mong sabihin sa mga estudyante na basahin ang Doktrina at mga Tipan 58:26–29, at alamin ang mga turong makatutulong sa kanila na mas maunawaan kung paano inaasahan ng Panginoon na gagawa tayo ng mga desisyon. Maaaring anyayahan ang mga estudyante na i-cross reference o iugnay ang mga talatang ito sa Doktrina at mga Tipan 62:8.

Magtuon sa mga alituntuning nagpapabalik-loob: Para sa karagdagang pagsasanay kung paano ito gawin, tingnan ang training na may pamagat na “Magtuon sa mga katotohanang humahantong sa pagbabalik-loob at nagpapalakas ng pananampalataya kay Jesucristo” sa Mga Kasanayan para sa Pag-unlad ng Guro: Ituro ang Doktrina. Maaari mong sanayin ang kasanayan at pagtatanong na makatutulong sa mga estudyante na matukoy at maipahayag ang mga alituntuning nagpapabalik-loob.

• Sa iyong palagay, bakit mahalagang magtiwala sa ating paghatol pati na rin sa mga patnubay ng Espiritu kapag nagdedesisyon tayo?

• Paano tayo matutulungan ng katotohanang ito sa mga desisyong may kaugnayan sa ating mga pamantayan o pinahahalagahan?

Maaari mong anyayahan ang mga estudyante na magbahagi ng mga karanasan kung saan nagdesisyon sila batay sa kanilang sariling paghatol at sa mga patnubay ng Espiritu. Anyayahan silang ibahagi kung paano sila pinagpala ng Panginoon sa mga sitwasyong ito. Maaari ka ring magbahagi ng sarili mong mga karanasan.

Nagturo ang Tagapagligtas tungkol sa Kanyang Sarili

Sa paglalakbay patungong Ohio, nakaranas ang mga elder ng kawalang-katiyakan, pagod, at ilang nakatatakot na sitwasyon. Nagkaroon din sila ng mga di-pagkakasundo at pag-aaway. Para matulungan sila, nagbahagi ang Tagapagligtas ng maraming mahahalagang turo tungkol sa Kanyang sarili. Ang mga turong ito ay makatutulong sa atin na mas maunawaan kung sino Siya at kung ano ang magagawa Niya para sa atin.

Upang matulungan ang mga estudyante na maghandang pag-aralan ang mga sumusunod na talata, maaari mong ipasulat sa kanila ang Jesucristo sa gitna ng isang pahina sa kanilang study journal. Maaari mo rin itong isulat sa pisara. Habang pinag-aaralan ng mga estudyante ang mga sumusunod na scripture passage, maaari nilang isulat ang mga salita o pariralang naglalarawan sa Tagapagligtas sa palibot ng kanyang pangalan.

Basahin ang Doktrina at mga Tipan 60:1–4; 61:1–2, 36–39; 62:1–3, 9. Pagtuunan ng pansin ang natutuhan mo tungkol kay Jesucristo mula sa mga talatang ito. Isulat ang mga natuklasan mo sa iyong study journal.

Bigyan ang mga estudyante ng pagkakataong ibahagi ang natutuhan at nadama nila tungkol kay Jesucristo mula sa aktibidad sa pag-aaral na ito. Maaari nilang sama-samang talakayin ang mga tanong na tulad ng mga sumusunod bilang isang klase, bilang magkakapartner, o sa maliliit na grupo.

• Ano ang nakita mo na maaaring nakatulong sa mga elder na ito sa kanilang paglalakbay?

• Ano ang natutuhan mo tungkol sa Tagapagligtas na makatutulong sa iyo o sa iba sa buhay?

Tapusin ang lesson sa pag-anyaya sa mga estudyante na isipin ang anumang pahiwatig na maaaring natanggap nila mula sa Espiritu Santo batay sa napag-aralan at tinalakay nila ngayon. Hikayatin sila na isulat sa kanilang study journal ang mga naisip at impresyon nila.

Karagdagang Resources

Paano ko malalaman kung tama ang mga desisyon ko?

Itinuro ni Elder Richard G. Scott (1928–2015) ng Korum ng Labindalawang Apostol:

Kapag ipinagkait [ng Diyos] ang sagot, iyon ay para palaguin tayo sa pamamagitan ng pagsampalataya sa Kanya, pagsunod sa Kanyang mga utos, at kahandaang kumilos ayon sa katotohanan. Inaasahang mananagot tayo sa pagkilos ayon sa pasiya na naaayon sa Kanyang mga turo nang walang paunang kumpirmasyon. Hindi tayo dapat maupo at maghintay na lang o bumulung-bulong dahil hindi nangusap ang Panginoon. Dapat tayong kumilos.

Kadalasan ang naipasiya nating gawin ay tama. Pagtitibayin Niya ang katumpakan ng ating mga pasiya sa Kanyang paraan. Ang pagpapatibay na iyon ay karaniwang dumarating sa paunti-unting tulong na natatagpuan habang daan. Natutuklasan natin ang mga ito sa pagiging sensitibo sa espiritu. Parang maiikling liham ito mula sa mapagmahal na Ama bilang katibayan ng Kanyang pagsang-ayon. Kung, dahil sa tiwala, nagsimula tayong gumawa ng hindi tama, ipapaalam Niya iyon sa atin bago mahuli ang lahat. Nadarama natin ang tulong na iyan kapag naligalig o naasiwa tayo. (Richard G. Scott, “Kalayaan at mga Sagot: Pagkilala sa Paghahayag,” Liahona, Hun. 2014, 50)

Doktrina at mga Tipan 60:2–3. Paano ko maibabahagi ang aking pananampalataya at patotoo sa iba?

Itinuro ni Elder Gary E. Stevenson ng Korum ng Labindalawang Apostol:

Bilang miyembro ng Simbahan, dumarating ang mga pagkakataong magpatotoo sa mga pormal na miting ng Simbahan o sa di-gaanong pormal at personal na pakikipag-usap sa pamilya, mga kaibigan, at iba pa.

Isa pang paraan na maibabahagi ninyo ang inyong patotoo ay sa pamamagitan ng mabuting pag-uugali. Ang inyong patotoo kay Jesucristo ay hindi lang ang kung ano ang sinasabi ninyo—ito ay kung sino kayo.

Tuwing magpapatotoo kayo o ipinapakita sa inyong mga gawa ang inyong katapatan na sundin si Jesucristo, inaanyayahan ninyo ang iba na “lumapit kay Cristo” [Moroni 10:32]. (Gary E. Stevenson, “Pangalagaan at Ibahagi ang Inyong Patotoo,” Liahona, Nob. 2022, 112)

Doktrina at mga Tipan 61:5–19. Dapat bang iwasan ng lahat ng tao ang paglalakbay sa tubig?

Ang mga salita ng Panginoon sa Doktrina at mga Tipan 61:5–19 ay hindi nagbabawal sa mga Banal sa mga Huling Araw na maglakbay o lumangoy sa tubig. Sa paglalarawan sa sumpa sa mga tubig sa mga huling araw, maaaring tinutukoy ng Panginoon ang mga talata sa aklat ng Apocalipsis kung saan inilarawan ni Apostol Juan ang pagkawasak na magaganap sa mga tubig bago ang Ikalawang Pagparito ni Jesucristo (tingnan sa Apocalipsis 8:8–11;16:1–6). Sa Doktrina at mga Tipan 61, partikular na binanggit ng Panginoon ang panganib sa “mga tubig na ito,” ibig sabihin ang Ilog ng Missouri (tingnan sa Doktrina at mga Tipan 61:5, 18).

Doktrina at mga Tipan 62:1. Paano tayo matutulungan ng Tagapagligtas sa ating mga kahinaan?

Ipinahayag ni Pangulong Dallin H. Oaks ng Unang Panguluhan:

Dinanas at pinagdusahan ng ating Tagapagligtas ang kabuuan ng lahat ng pagsubok sa buhay “ayon sa laman” para malaman Niya “ayon sa laman” kung paano “tutulungan [na ibig sabihin ay paginhawahin o saklolohan] ang kanyang mga tao alinsunod sa kanilang mga kahinaan” [Alma 7:12]. Alam Niya kung gayon ang ating mga paghihirap, dalamhati, tukso, at pagdurusa, sapagkat kusang-loob Niyang dinanas ang lahat ng ito bilang mahalagang bahagi ng Kanyang Pagbabayad-sala. At dahil dito, binigyang-kapangyarihan Siya ng Kanyang Pagbabayad-sala na tulungan tayo—na bigyan tayo ng lakas na tiisin ang lahat. (Dallin H. Oaks, “Pinalakas ng Pagbabayad-sala ni Jesucristo,” Liahona, Nob. 2015, 61–62)

Mga Karagdagang Aktibidad sa Pag-aaral

Doktrina at mga Tipan 60:1–3. Buksan ang iyong bibig upang ibahagi ang ebanghelyo

Ipaliwanag na noong unang iutos sa mga elder ng Simbahan na lisanin ang kanilang mga tahanan sa Ohio at maglakbay patungong Missouri, iniutos sa kanila na ipangaral ang ebanghelyo sa daan (tingnan sa Doktrina at mga Tipan 52:9–10, 21–23, 25–27).

Ipabasa sa mga estudyante ang Doktrina at mga Tipan 60:1–3, at alamin ang mga salita ng Tagapagligtas sa ilan sa mga taong ito.

Upang matulungan ang mga estudyante na maunawaan kung paano nauugnay ang mga turong ito sa kanilang buhay, maaari mong itanong ang tulad ng mga ito:

• Ano ang maaaring magpahirap sa atin na buksan ang ating bibig para maibahagi ang ebanghelyo ng Tagapagligtas?

• Paano tayo tinutulungan ng Tagapagligtas na madaig ang mga balakid na kinakaharap natin?

• Ano ang ilang halimbawa ng mga paraan na mabubuksan natin ang ating bibig para maibahagi ang ebanghelyo ngayon?

Doktrina at mga Tipan 60:13. Pag-iwas sa katamaran

Maaaring makinabang ang mga estudyante sa pagtalakay ng tungkol sa utos ng Panginoon na “huwag ninyong sayangin ang inyong panahon” (Doktrina at mga Tipan 60:13).

Ipaliwanag na bahagi ng payo ng Panginoon na nakatala sa Doktrina at mga Tipan 60 ay para sa mga darating sa Missouri upang tumulong sa pagtatayo ng lunsod ng Sion.

Sabihin sa mga estudyante na basahin ang Doktrina at mga Tipan 60:13, at alamin kung ano ang iniutos Niya sa ilan sa mga Banal na ito. Maaaring makatulong na ipaliwanag na ang ibig sabihin ng salitang tamad ay ayaw magtrabaho o nakikibahagi sa mga bagay na di-gaanong mahalaga.

• Sa iyong palagay, bakit ayaw ng Panginoon na maging tamad ang Kanyang mga Banal sa kanilang mga paglalakbay?

• Paano naaangkop sa atin ang payo na ito sa ating mortal na paglalakbay?

Maaari mong anyayahan ang mga estudyante na pag-aralan ang ilan pang mga talata sa banal na kasulatan na makatutulong sa kanila na mas maunawaan kung paano nais ng Panginoon na gamitin natin ang ating oras. Kabilang sa mga halimbawa ang Alma 34:32–33; Doktrina at mga Tipan 58:27; 75:3–4; 88:124.

• Paano maaaring maapektuhan ng katamaran ang iyong ugnayan sa Ama sa Langit at kay Jesucristo?

Anyayahan ang mga estudyante na isipin ang ilang paraan na maaaring sinasayang nila ang kanilang oras at magtakda ng mithiin para sa pag-unlad.

Doktrina at mga Tipan 62:1. Pagtanggap ng tulong mula kay Jesucristo

Maaaring makinabang ang mga estudyante sa pagsusuri sa itinuro ng Tagapagligtas sa Doktrina at mga Tipan 62:1 tungkol sa Kanyang sarili at sa Kanyang kakayahang tulungan tayo. Maaari mong ipabasa sa mga estudyante ang talatang ito at i-cross reference ito sa Alma 7:11–13. Maaari mo silang bigyan ng ilang sandali para tahimik na pagnilayan kung paano nakatulong ang Tagapagligtas sa kanila o sa kanilang mga mahal sa buhay. Hikayatin silang isulat ang mga karanasan at damdamin sa kanilang journal, at ibahagi sa kanila ang pahayag ni Pangulong Dallin H. Oaks sa “Karagdagang Resources.” Anyayahan ang ilang handang estudyante na magbahagi ng mga paraan na pinalalakas at sinusuportahan sila ng Tagapagligtas sa pamamagitan ng kanilang mga kahinaan at pagsubok.