Lesona 75: Fotopampianarana sy Fanekempihavanana 60–63

Fotopampianarana sy Fanekempihavanana 63:1–23

Ny Lalàn’ny Tompo momba ny fahadiovam-pitondrantena

Tamin’ny fahavaratry ny taona 1831, dia niverina avy any Missouri ny Mpaminany Joseph Smith ary nahafantatra fa ny sasany tamin’ireo Olomasina tao Kirtland dia nanao fahotana goavana, anisan’izany ny fandikana ny lalàn’ny fahadiovam-pitondrantena. Ao amin’ireo fanambarana voarakitra ao amin’ny Fotopampianarana sy Fanekempihavanana 63, ny Tompo dia nampitandrina ny Olomasina momba ny halehiben’ny fahotan’izy ireo. Ity lesona ity dia afaka manampy ireo mpianatra hahatsapa ny maha-zava-dehibe ny fankatoavana manokana ny lalàn’ny fahadiovam-pitondrantena nomen’ny Tompo.

Sahanasa fianarana azo atao

Ny maha-zava-dehibe ny hatsaran-toetra

Mba hanombohana ny fotoam-pianarana, dia hevero ny hampiseho sary mampiseho ny Mpamonjy. Asao ny mpianatra hanoratra eny amin’ny solaitrabe ny valinteny omen’izy ireo an’ilay fanontaniana voalohany amin’ireto fanontaniana manaraka ireto. Azonao atao ny manasa mpianatra vitsivitsy hanazava ny zavatra nosoratany sy hizara ny fomba hamalian’izy ireo ilay fanontaniana faharoa.

• Inona avy ireo teny na andian-teny izay mamaritra ireo toetra tian’ny Mpamonjy hananantsika?

  Ampidiro eny amin’ny solaitrabe ny teny hoe manana hatsaran-toetra raha toa ka mbola tsy eo izany. Hazavao fa ny zavatra fonosin’ny fananana hatsaran-toetra dia ahitana ny fananana fahamendrehana ara-pitondrantena, ny fahadiovana ara-pitondrantena ary ny fananana hery sy tanjaka ara-panahy (jereo ny Torolalana ho an’ny Soratra Masina, “Hatsaran-toetra,” scriptures.ChurchofJesusChrist.org).

• Nahoana araka ny eritreritrao no tena manan-danja ny hananantsika hatsaran-toetra?

• Nahoana ny didin’ny Mpamonjy mba hanana hatsaran-toetra no iharan’ny fanafihana amin’izao androntsika izao?

Asao ny mpianatra hieritreritra ny maha-zava-dehibe ny fananana hatsaran-toetra sy ny fahadiovana ara-pitondrantena ho azy ireo. Azon’izy ireo atao koa ny mieritreritra ireo fanontaniana ananany na ireo sakana izay atrehany manokana mifandray amin’io didy io. Amporisiho ny mpianatra mba hifantoka amin’ireo bitsika ara-panahy izay afaka manampy azy ireo hahatsapa faniriana lehibe kokoa hiaina fiainana madio sy mendrika.

Manameloka ny fahotana mifandray amin’ny firaisana ara-nofo ny Mpamonjy

Ity fampahalalana ara-tsahan-kevitra ity dia afaka manampy ireo mpianatra hiomana handalina ny Fotopampianarana sy Fanekempihavanana 63.

Ao amin’ny fanambarana voarakitra ao amin’ny Fotopampianarana sy Fanekempihavanana 63, ny Mpamonjy dia niresaka momba ny fitondran-tena feno fahotana nataon’ny sasany tamin’ireo Olomasina tao Kirtland, Ohio. Nampitandrina ny amin’ny halehiben’ireo fahotana ireo Izy (jereo ny Fotopampianarana sy Fanekempihavanana 63:1–6) ary nizara fahamarinana momba ny maha-zava-dehibe ny fahadiovana ara-pitondrantena.

Halalino ny Fotopampianarana sy Fanekempihavanana 63:13–16 mba hitadiavana ireo fanasana sy fampitandremana nataon’ny Tompo.

Raha ilaina dia ampio ny mpianatra hahatakatra ny dikan’ireo teny na andian-teny manan-danja avy ao amin’ireo andininy ireo. Ohatra, mety hanampy ny manazava fa ny “fanitsakitsaham-bady” dia entina ilazana ny firaisana ara-nofo ataon’ny olona iray manambady sy ny olona iray hafa ankoatra ny vadiny. Ny hoe “mitsiriritra” olona iray dia midika hoe mijery olona iray amin’ny fomba izay mamoha ny filan’ny nofo. Tafiditra ao anatin’izany ny fijerena pôrnôgrafia. “Ny lalan’ny fahadiovam-pitondrantena dia milaza fa Andriamanitra dia tsy manome fankatoavana ny hanaovana firaisana ara-nofo raha tsy eo amin’ny lehilahy iray sy ny vehivavy iray vita fanambadiana ihany” (Ho zatovo mahery: Torolalana amin’ny fanaovana safidy [2022], 23).

• Inona no ampianarin’ireo andininy ireo anao momba ny fiantraikan’ny fahotana mifandray amin’ny firaisana ara-nofo eo amintsika?

• Inona no azontsika ianarana momba ny Mpamonjy avy amin’ny teniny ao amin’ireo andininy ireo?

Fahamarinana iray izay mety tsara hohamafisina mandritra ity fifanakalozan-kevitra ity ny hoe manameloka ny fitsiriritana sy ny endrika hafa rehetra amin’ny fahotana mifandray amin’ny firaisana ara-nofo ny Mpamonjy.

Mampitombo ny fahatakarana mikasika ny lalàn’ny fahadiovam-pitondrantena

Ampio ny mpianatra hahatakatra fa ny didin’ny Mpamonjy mba hadio ara-nofo dia antsoina matetika hoe lalàn’ny fahadiovam-pitondrantena. Ity asa atao manaraka ity dia afaka manampy ny mpianatra hampitombo ny fahatakarany mikasika ny maha-zava-dehibe ny fankatoavana io lalàna io.

Asao ny iray kilasy hieritreritra fanontaniana vitsivitsy izay mety hananan’ny zatovo mikasika ny lalàn’ny fahadiovam-pitondrantena nomen’ny Tompo. Mety ho mora kokoa amin’ny mpianatra ny mametraka fanontaniana tsy mitonona anarana amin’ny alalan’ny fanoratana ny fanontanian’izy ireo. Misafidiana fanontaniana vitsivitsy mifanentana amin’izany ary tanisao eny amin’ny solaitrabe izany.

Mba hanampiana anao hiomana hamaly ireo fanontaniana anananao na ny hafa mikasika ny lalàn’ny fahadiovam-pitondrantenan’ny Tompo dia halalino ireto fizarana manaraka ireto ao amin’ny Ho zatovo mahery: Torolalana amin’ny fanaovana safidy (2022): “Mandehana ao amin’ny fahazavan’ Andriamanitra” (pejy 16–21) sy ny “Masina ny vatanao” (pejy 22–29).

Afaka miara-miasa amina namana iray na ao anatina vondrona kely ny mpianatra mba hitady ny valin’ireo fanontaniana izay nofidiny hifantohana. Ankoatra ny fandalinana ireo fizarana ao amin’ny Ho zatovo mahery: Torolalana amin’ny fanaovana safidy (2022), dia azo asaina hikaroka loharanom-pitaovana hafa ao amin’ny filazantsara ihany koa ireo mpianatra.

Loharanom-pitaovana fanampiny maromaro azonao zaraina amin’ny mpianatra no hita ao amin’ny “Sahanasa fianarana fanampiny” any amin’ny faran’ny lesona.

Rehefa ampy tsara ny fotoana nomena ny mpianatra, dia asao ny mpianatra mba hifanakalo hevitra momba ny zavatra hitany rehefa nandalina izy ireo. Manasà mpianatra maromaro mba hizara ny zavatra nianaran’izy ireo. Ny fanontaniana toy izao manaraka izao dia afaka manampy amin’ny fitarihana ny fifanakalozan-kevitra.

• Inona no hitanao ka nampitombo ny fahatakaranao mikasika ny antony andidiana antsika hiaina ny lalàn’ny fahadiovam-pitondrantena?

Fitahiana nampanantenaina ho an’ireo izay mankatò ny lalàn’ny fahadiovam-pitondrantena

Rehefa avy nampitandrina ny Olomasina momba ny maha-zava-dehibe ny fandikana ny lalàn’ny fahadiovam-pitondrantena ny Mpamonjy, dia namporisika azy ireo ny Mpamonjy mba hitandrina ny didiny, ary nampanantena fitahiana noho ny fankatoavana Izy.

Vakio ny Fotopampianarana sy Fanekempihavanana 63:19–20, 23 mba hitadiavana ny zavatra nampianarin’ny Mpamonjy.

• Inona avy ireo fitahiana ampanantenain’ny Tompo ho an’ireo izay mitandrina ny didiny?

• Ahoana no ahafahan’ny fahatsiarovana ireo fitahiana ireo mitaona antsika hiaina fiainana feno fahamendrehana?

Mety hisy mpianatra vitsivitsy efa nanao fahotana mifandray amin’ny lalàn’ny fahadiovam-pitondrantena. Ampahatsiahivo ny iray kilasy fa rehefa miezaka amin-kitsim-po ny hibebaka amin’ny fahotantsika isika dia tanterahin’ny Mpamonjy ny famelan-keloka tanteraka sy ny fanasitranana tanteraka. Mba hanampiana ny olona izay matahotra fa efa nanao fahadisoana, dia azonao atao ny manantitrantitra ny Fotopampianarana sy Fanekempihavanana 58:42–43.

Tadidio ny zavatra nianaranao

Omeo fotoana ny mpianatra hisaintsainana ny zavatra nianarany sy tsapany nandritra ny fianarany androany. Fomba iray hanaovana izany ny fanasana azy ireo hanoratra ny valinteniny amin’ny iray na maromaro amin’ireto fanontaniana manaraka ireto ao amin’ny diary fandalinany.

• Inona avy ireo fihetseham-po na fahatsapana nanananao rehefa avy nandalina ianao androany?

• Inona no nianaranao momba ny maha-zava-dehibe ny fahadiovam-pitondrantena sy ny fiantraikan’izany safidy izany eo amin’ny fiainanao?

• Inona no zavatra tsapanao fa tokony hataonao na tokony hovainao?

Farano ny lesona amin’ny fampahatsiahivana ireo mpianatra ny fampanantenan’ny Mpamonjy hoe hitahy ireo rehetra izay miezaka amim-pahatokiana hankatò ny lalàn’ny fahadiovam-pitondrantena nomen’ny Tompo.

Loharanom-pitaovana fanampiny

Inona no atao hoe lalàn’ny fahadiovam-pitondrantena nomen’ny Mpamonjy?

Ny fahadiovam-pitondrantena dia fahadiovana mifandray amin’ny firaisana ara-nofo. Ireo izay madio ara-pitondrantena dia madio ao amin’ny eritreritr’izy ireo, sy ny fitenin’izy ireo ary ny fihetsik’izy ireo. Ny fahadiovam-pitondrantena dia midika ho tsy fanaovana firaisana ara-nofo mialoha ny fanambadiana. Midika ho fanehoana fahatokiana tanteraka amin’ny vady mandritra ny fanambadiana ihany koa izany. topics.ChurchofJesusChrist.org)

Ahoana raha nandika ny lalàn’ny fahadiovam-pitondrantena aho?

Nampianatra izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:

Eo anivontsika Andriamanitra

Mampianatra antsika hanana fanantenana, tsy ho kivy, ary hahita ireo fomba isehoan’ Andriamanitra eto anivontsika ny Loholona Uchtdorf.

Ny Sorompanavotana tsisy fetra nataon’ny Mpamonjy dia manova tanteraka ny fomba fijerintsika ny fandikan-dalantsika sy ny tsy fahatanterahantsika. Afaka mianatra avy amin’izy ireny isika ka ho feno fanantenana toy izay hitanondrika ao amin’izy ireny ka hahatsapa ho tsy azo havotana na very fanantenana. [jereo ny Almà 36:17–20]. Ny fanomezana manadion’ny fibebahana dia manafaka antsika hamela any amin’ny lasa ireo fahotantsika ka ho tonga olom-baovao isika.[jereo ny 2 Korintiana 5:17].

Noho i Jesoa Kristy, ireo tsy fahombiazantsika dia tsy voatery hamaritra antsika. Afaka manefy antsika izy ireny. (Dieter F. Uchtdorf, “Eo anivontsika Andriamanitra,” Liahona, mey 2021, 8–9)

Inona no tokony hataoko raha nahita pôrnôgrafia aho?

Nampianatra izao ny Filoha Dallin H. Oaks ao amin’ny Fiadidiana Voalohany:

Mino aho fa samy efa tafajery pôrnôgrafia tsy nahy ny rehetra. Tsy misy fahotana ny amin’izany raha miala isika ka tsy manaraka izany. Toy ny fahadisoana izay mila fanitsiana fa tsy fibebahana izany. …

Ny loza avy amin’ny fampiasana ny pôrnôgrafia amin’ny nahim-po, na imbetsaka na tsindraindray, dia ny fitarihany hijery matetika hatrany, izay tsy azo ihodivirana fa hampitombo ny fieritreretana tsy tapaka ireo fahatsapana te hanao firaisana ara-nofo sy fitondran-tena vetaveta. Hitan’ny mpahay siansa fa ny sary maneho firaisana ara-nofo dia mamokatra zavatra simika ao amin’ny atidoha izay manome valisoa ny fihetseham-po ara-nofo, izay mamporisika ny olona hifantoka bebe kokoa amin’ny fitondran-tena ara-nofo. Ny fahalotoam-pitondrantena na inona na inona karazany na ambaratongany dia miteraka fahatsapana henatra, izay, rehefa mandeha ny fotoana, dia mety hiorina ao anatin’ny olona iray. …

… toy ny fihetsika feno fahotana rehetra, ny fampiasana ny pôrnôgrafia amin’ny nahim-po dia mandroaka ny Fanahy Masina. Ny sasany izay efa niaina izany dia hahatsapa ho voatosika mba hibebaka. Ny hafa indray anefa dia mety hahatsapa ho afa-baraka ka hanafina ny fahatsapany ho meloka amin’ny alalan’ny fitaka. Mety hanomboka hahatsiaro tena ho menatra ihany koa izy ireo izay hitarika any amin’ny fahatsapana ho rikoriko amin’ny tena. Raha mitranga izany dia mety hanomboka hino ny iray amin’ireo lainga lehiben’i Satana ilay mpampiasa izany: fa ny zavatra izay nataony na ny zavatra izay mbola ataony dia mahatonga azy ireo ho olona ratsy, tsy mendriky ny fahasoavan’ny Mpamonjy ary tsy afaka ny hibebaka. Tsy marina tsotra izao izany. Tsy mba lavitra loatra velively ka tsy takatry ny Mpamonjy sy ny Sorompanavotany isika. (Dallin H. Oaks, “Afaka amin’ny fandriky ny Pôrnôgrafia,” Liahona, ôkt. 2015, 34–35)

Sahanasa fianarana fanampiny

Loharanom-pahalalana fanampiny momba ny lalàn’ny fahadiovam-pitondrantena

Mba hanampiana ireo mpianatra hamaly fanontaniana mikasika ny lalàn’ny fahadiovam-pitondrantena, dia azonao atao ny manome ireto loharano manaraka ireto:

• topics.ChurchofJesusChrist.org

• topics.ChurchofJesusChrist.org

• topics.ChurchofJesusChrist.org

• Pôrnôgrafia,” Fanampiana amin’ny fiainana, ChurchofJesusChrist.org

• “Mandehana ao amin’ny fahazavan’ Andriamanitra” (Ho zatovo mahery: Torolalana amin’ny fanaovana safidy [2022], 16–21)

• Boky torolalan’ny Fiangonana maneran-tany: Manompo ao amin’ Ny Fiangonan’i Jesoa Kristy ho an’ny Olomasin’ny Andro Farany, 38.6.5, ChurchofJesusChrist.org

• Andinin-tsoratra masina toy ireto manaraka ireto: Matio 5:27–28; 1 Korintiana 6:18–20; 10:13; Jakôba 2:28, 31–35; Almà 7:21; 13:28; 39:8–9; Fotopampianarana sy Fanekempihavanana 59:6; 121:45

• Inona no tokony hataoko rehefa mahita pôrnôgrafia aho?

  Goavana ireo olana mifandray amin’ny pôrnôgrafia atrehan’ny ankizy ankehitriny. Kanefa rehefa fantany tsara izay tokony hatao raha sendra pôrnôgrafia izy ireo dia afaka mandresy tsara ireo olana izy ireo ary hanana fiainana voaro sy feno fifaliana.

• Stay within the Lines

  Just as athletes must stay within lines to compete in sports, those who are called to labor in the Lord's work must stay within the lines of worthiness.

• Atonement - Not a One-Time Thing

  A young man shares how with the help of his bishop, he is experiencing the blessings of the Atonement of Jesus Christ.

• I Choose to be Pure

  Six interfaith youth speak candidly on why they have chosen to be sexually pure.

Manameloka ny fitadiavana famantarana ny Tompo

Raha misafidy ny hampifantoka ny ampahany amin’ny lesona amin’ny Fotopampianarana sy Fanekempihavanana 63:6–12 ianao, dia mety handray soa avy amin’ny fifanakalozan-kevitra momba an’i Ezra Booth ny mpianatra. Niova fo ho amin’ny filazantsaran’i Jesoa Kristy izy rehefa avy nanatri-maso ny fanasitranana mahagaga niseho tamin’ny sandrin’i Elsa Johnson. Saingy fotoana fohy taorian’ny nidirany tao amin’ny Fiangonan’i Jesoa Kristy dia nanjary diso fanantenana noho ny tsy fisian’ny fisehoan-javatra ara-panahy i Ezra ary nanakina ny Fiangonana sy ny Mpaminany Joseph Smith (jereo ny Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 146). Niala tao amin’ny Fiangonana i Ezra ary lasa iray amin’ireo mpitsikera mivantambantana indrindra ny Mpaminany Joseph Smith izy.

Asao ny mpianatra hamaky ny Fotopampianarana sy Fanekempihavanana 63:6–12 mba hitadiavana ireo fahamarinana nampianarin’ny Tompo momba ny famantarana sy ny finoana. Ny fahamarinana iray izay mety ho hitan’ny mpianatra dia ny hoe ny finoana an’i Jesoa Kristy dia tsy tonga amin’ny alalan’ny famantarana, fa ny famantarana dia manaraka ireo izay mino Azy.