Lesona 74: Fotopampianarana sy Fanekempihavanana 60–62

Fotopampianarana sy Fanekempihavanana 60–62

“Mihainoa ny feon’ilay manana ny hery rehetra”

Tamin’ny Aogositra 1831 dia nampianatra tamim-pitiavana andiana loholona iray ny Mpamonjy nandritra ny dia sarotra nataon’izy ireo avy tany Missouri nankany Ohio. Ny torohevitra nomeny dia nanampy ireo loholona hahatakatra ny zavatra andrasany sy ny faniriany ho azy ireo rehefa nody izy ireo. Ity lesona ity dia natao hanampiana ireo mpianatra hahatakatra bebe kokoa momba ny zavatra andrasan’ny Mpamonjy sy ny faniriany ho azy ireo.

Sahanasa fianarana azo atao

Fanapahan-kevitra

Mba hanombohana ny fotoam-pianarana, dia hevero ny hampiseho ireto toe-javatra manaraka ireto:

Alaivo sary an-tsaina hoe samy manana olana eo amin’ny fandraisana fanapahan-kevitra ny roa amin’ireo namanao akaiky. Mahalana ilay namana iray vao mitady fanampiana na fitarihana avy amin’ Andriamanitra, ary ny ankamaroan’ireo fanapahan-kevitra dia ezahiny raisina samirery. Ilay namana iray hafa dia mivavaka mba hahazo fitarihana ary misalasala ny handroso amin’izay fanapahan-kevitra tokony horaisina mandra-pahazoany antoka fa namaly azy ny Tompo.

• Inona ireo antony mety mahatonga ireo namana tsirairay ireo hahatsapa fomba fihevitra toy izany?

• Inona avy ireo fahadisoan-kevitra hitanao amin’ireo toe-javatra roa ireo?

Asao ny mpianatra hieritreritra ireo fanapahan-kevitra ilainy raisina eo amin’ny fiainany ary hanontany tena raha toa ka miaina ny iray amin’ireo toe-javatra ireo izy ireo. Amporisiho izy ireo hitady ireo fahamarinana ao amin’ny lesona androany izay afaka manampy azy ireo amin’ny fanapahan-kevitra horaisiny.

“Fa hiteny aminareo marina tokoa momba ny dianareo … Aho” (Fotopampianarana sy Fanekempihavanana 60:5)

Mba hanampiana ny mpianatra hahatakatra ny sahan-kevitr’ireo andininy izay hohalalinin’izy ireo androany, dia vakio na fintino ny fampahalalana ao amin’ity andiam-pehezan-teny manaraka ity.

Tamin’ny Aogositra 1831 i Joseph Smith sy ny loholona maromaro dia nandeha nanao dia teo amin’ny 1287 km mahery nankany an-tranon’izy ireo tany Kirtland, Ohio. Nijanona herinandro vitsivitsy tany Missouri izy ireo, izay toerana nandidian’ny Tompo azy ireo mba hiasany amin’ny fanorenana ny tanànan’i Ziona. Nandritra ny dian’izy ireo nody, dia nanana fanontaniana momba ny fomba hanatanterahan’izy ireo ilay dia sy ny lalan-kalehan’izy ireo ao anatin’ilay dia ilay vondrona. Ho an’ny fanapahan-kevitra sasany dia namporisika azy ireo ny Tompo mba hahay handanjalanja sy hisafidy ho an’ny tenany. Ho an’ny fanapahan-kevitra hafa, dia nanome toromarika sy didy manokana Izy mba hitarihana azy ireo.

Afaka mampiasa ity tabilao manaraka ity ny mpianatra mba handalinana ireo andininy voatanisa. Asao ireo mpianatra mba handika ilay tabilao ao amin’ny diary fandalinany. Hevero koa ny handika izany eny amin’ny solaitrabe ary asao ny mpianatra hanoratra ny valiny rehefa avy nandalina ireo andininy. Azonao atao ny mametraka mpianatra ao anatina vondrona, ary mangataka azy ireo mba hiara-handalina andinin-tsoratra masina iray na ireo andinin-tsoratra masina rehetra.

	Ny zavatra nanan-danja tamin’ny Tompo	Ny zavatra tsy nanan-danja tamin’ny Tompo
Fotopampianarana sy Fanekempihavanana 60:5–8
Fotopampianarana sy Fanekempihavanana 61:21–22
Fotopampianarana sy Fanekempihavanana 62:5–7

• Inona no fahasamihafana tsikaritrao ao amin’ireo andininy ireo, eo amin’ny zavatra nanan-danja tamin’ny Tompo sy ny zavatra tsy nanan-danja Taminy?

• Inona avy ireo fomba azonao ampiharana ny fampianaran’ny Tompo ao amin’ireo andininy ireo ao anatin’ny toe-javatra izay atrehinao eo amin’ny fiainanao?

Vakio ny Fotopampianarana sy Fanekempihavanana 62:8 mba hitadiavana ny torohevitry ny Tompo izay afaka manampy antsika rehefa tsy maintsy mandray fanapahan-kevitra tsy misy torolalana manokana isika.

Asao ny mpianatra hizara fahamarinana iray izay nianarany avy amin’ny torohevitry ny Tompo ao amin’io andininy io. Afaka maneho fitsipika mitovy amin’izao manaraka izao izy ireo: Ny Tompo dia manantena antsika handray fanapahan-kevitra maro mifototra amin’ny fitarihan’ny Fanahy sy ny fahaizantsika mandanjalanja manokana.

Azonao atao ny manasa ny mpianatra mba hamaky ny Fotopampianarana sy Fanekempihavanana 58:26–29 mba hitadiavana fampianarana izay afaka manampy azy ireo hahatakatra tsara kokoa ny fomba antenain’ny Tompo handraisantsika fanapahan-kevitra. Azonao atao ny manasa ny mpianatra hampifandray ireo andinin-tsoratra masina ireo amin’ny Fotopampianarana sy Fanekempihavanana 62:8.

Mifantoha amin’ireo fitsipika mitondra fiovam-po: Raha mila fanazaran-tena bebe kokoa momba ny fomba hanaovana izany dia jereo ny fanofanana mitondra ny lohateny hoe “Mifantoha amin’ireo fahamarinana izay mitondra ho amin’ny fiovam-po sy manorina finoana an’i Jesoa Kristy” ao amin’ny Fahaiza-manao ho fampivoarana ny mpampianatra: Ampianaro ny Fotopampianarana. Hevero ny hanao fanazaran-tena miompana amin’ilay fahaiza-manao sy amin’ny fametrahana fanontaniana izay manampy ny mpianatra hamantatra sy hilaza ireo fitsipika mitondra fiovam-po.

• Araka ny hevitrao, nahoana no manan-danja ny miantehitra amin’ny fahaizantsika mandanjalanja sy amin’ny fitarihan’ny Fanahy rehefa mandray fanapahan-kevitra isika?

• Ahoana no ahafahan’io fahamarinana io manampy antsika handray fanapahan-kevitra mifandray amin’ny fenitra arahintsika na ny soatoavintsika?

Hevero ny hanasa ny mpianatra hizara zavatra niainana izay nandraisan’izy ireo fanapahan-kevitra nifototra tamin’ny fahaizany mandanjalanja manokana sy ny fitarihan’ny Fanahy. Asao izy ireo hizara ny fomba nitahian’ny Tompo azy ireo tao anatin’ireo toe-javatra ireo. Azonao atao koa ny mieritreritra ny hizara zavatra niainanao manokana.

Mampianatra momba ny Tenany ny Mpamonjy

Nandritra ny dia nankany Ohio dia niaina fisalasalana sy harerahana ary toe-javatra nampahatahotra ireo loholona. Nisy ihany koa ny tsy fitovian-kevitra sy ny fifandirana teo amin’izy ireo. Mba hanampiana azy ireo, dia nizara fampianarana manan-danja maro momba ny Tenany ny Mpamonjy. Ireo fampianarana ireo dia afaka manampy antsika hahatakatra bebe kokoa hoe iza Izy ary inona no azony atao ho antsika.

Mba hanampiana ireo mpianatra hiomana handalina ireto andininy manaraka ireto dia asaivo manoratra hoe Jesoa Kristy eo afovoan’ny pejy iray ao amin’ny diary fandalinany izy ireo. Azonao atao koa ny manoratra izany eny amin’ny solaitrabe. Rehefa mandalina ireto andinin-tsoratra masina manaraka ireto ny mpianatra dia afaka manoratra teny na andian-teny izay mamaritra ny Mpamonjy manodidina ny anarany izy ireo.

Vakio ny Fotopampianarana sy Fanekempihavanana 60:1–4; 61:1–2, 36–39; 62:1–3, 9. Mifantoha amin’ny zavatra ianaranao momba an’i Jesoa Kristy avy amin’ireo andininy ireo. Raketo ao anatin’ny diary fandalinanao ny zavatra hitanao.

Omeo fahafahana ny mpianatra hizara ny zavatra nianaran’izy ireo na tsapany momba an’i Jesoa Kristy avy amin’ity sahanasa fandalinana ity. Azon’izy ireo atao ny mifanakalo hevitra momba ny fanontaniana toy ireto manaraka ireto miaraka amin’ny kilasy, na miaraka amin’ny mpianatra iray voatendry hiara-hiasa aminy, na ao anatina vondrona kely.

• Inona no hitanao fa mety ho nanampy ireo loholona ireo nandritra ny diany?

• Inona no nianaranao momba ny Mpamonjy izay afaka manampy anao na ny hafa eo amin’ny fiainana?

Farano ny lesona amin’ny fanasana ireo mpianatra hieritreritra momba izay bitsika mety ho efa azony avy tamin’ny Fanahy Masina izay mifototra amin’ny zavatra nianarany sy noresahiny androany. Asao izy ireo hirakitra an-tsoratra ny eritreriny sy ireo zavatra tsapany ao amin’ny diary fandalinan’izy ireo.

Loharanom-pitaovana fanampiny

Ahoana no ahafahako mahafantatra raha toa ka tsara ny fanapahan-kevitra raisiko?

Ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo dia nampianatra izao:

Rehefa [Andriamanitra] no tsy manome valiny, dia mba hahafahantsika mitombo amin’ny alalan’ny finoana Azy, mankatò ny didiny ary manana fahavononana handray andraikitra eo anatrehan’ny fahamarinana izay. Takina amintsika ny hanaiky ho tompon’andraikitra amin’ny fanatanterahana ny fanapahan-kevitra iray izay mifanaraka amin’ny fampianarany kanefa tsy nahazoana fanamafisana mialoha. Tsy natao hipetra-potsiny hiandry na himonomonona isika satria tsy niteny ny Tompo. Mila miasa isika.

Mazàna ireo zavatra nosafidintsika dia marina. Hanamafy ny fahamarinan’ireo safidy nataontsika araka ny fombany Izy. Izany fanamafisana izany amin’ny ankapobeny dia tonga amin’ny alalan’ny firotsahan’ireo fanampiana eny an-dalana eny. Tsikaritsika izy ireo amin’ny alalan’ny fananana toetra mora mahatsapa zavatra ara-panahy. Toy ny fanamarihana avy amin’ny Ray be fitiavana izy ireo ho porofon’ny fankasitrahany. Raha manomboka amim-pahatokiana zavatra tsy mety isika, dia hampahafantatra antsika izany Izy dieny tsy mbola lasa lavitra loatra. Mahatsapa izany fanampiana izany isika amin’ny alalan’ny fahafantarana fahatsapana mifono korontana na tebiteby. (Richard G. Scott, “Agency and Answers: Recognizing Revelation,” Ensign, Jun. 2014, 50)

Fotopampianarana sy Fanekempihavanana 60:2–3. Ahoana no ahafahako mizara ny finoako sy ny fijoroana ho vavolombelona ananako amin’ny hafa?

Nampianatra izao ny Loholona Gary E. Stevenson ao amin’ny Kôlejin’ny Apôstôly Roambinifolo:

Amin’ny maha-mpikamban’ny Fiangonana, dia manana fahafahana hizara ny fijoroana ho vavolombelona am-bava ianao mandritra ireo fivoriana ôfisialin’ny Fiangonana voalahatra na mandritra ireo fotoana tsotsotra, na mandritra ny fifampiresahana manokana amin’olona ao amin’ny fianakaviana, sy ny namana, ary ny olon-kafa.

Fomba iray hafa hizaranao ny fijoroana ho vavolombelona anananao ny fitondran-tena tsara. Tsy izay lazainao no fijoroana ho vavolombelona anananao momba an’i Jesoa Kristy, fa ny maha-ianao anao.

Isak’izay mijoro ho vavolombelona am-bava na maneho amin’ny alalan’ny zavatra ataonao ny fanolorantenanao hanaraka an’i Jesoa Kristy ianao dia manasa ny hafa mba “hanatona an’i Kristy” [Môrônia 10:32]. (Gary E. Stevenson, “Mikolokolo sy mizara ny fijoroana ho vavolombelona anananao,” Liahona, nôv. 2022, 112)

Fotopampianarana sy Fanekempihavanana 61:5–19. Tokony tsy handeha ambonin’ny rano ve ny olona rehetra?

Ny tenin’ny Tompo ao amin’ny Fotopampianarana sy Fanekempihavanana 61:5–19 dia tsy mandrara ny Olomasin’ny Andro Farany handeha ambonin’ny rano na hilomano anaty rano. Rehefa nanoritsoritra ny ozon’ny rano amin’izao andro farany izao ny Tompo dia mety te hilaza ny andinin-tsoratra masina ao amin’ny bokin’ny Apokalypsy Izy, izay nilazalazan’ny Apôstôly Jaona ny fandringanana izay hitranga ao amin’ny rano mialoha ny Fiavian’i Jesoa Kristy Fanindroany (jereo ny Apokalypsy 8:8–11;16:1–6). Ao amin’ny Fotopampianarana sy Fanekempihavanana 61, ny Tompo dia milaza mazava tsara ny loza aterak’“ireto rano ireto,” izany hoe ny Reniranon’i Missouri (jereo ny Fotopampianarana sy Fanekempihavanana 61:5, 18).

Fotopampianarana sy Fanekempihavanana 62:1. Ahoana no ahafahan’ny Mpamonjy manampy antsika amin’ny fahalementsika?

Nanambara izao ny Filoha Dallin H. Oaks ao amin’ny Fiadidiana Voalohany:

Ny Mpamonjintsika dia niaina sy nizaka ny fahafenoan’ny olan’ny fiainana an-tany rehetra “araka ny nofo” mba hahafantarany “araka ny nofo” ny fomba “hanampiana [izay midika hoe hanomezana fanamaivanana] ny vahoakany arakaraka ny rofiny.” [Almà 7:12]. Noho izany dia mahafantatra ny fahasahiranantsika, ny alahelontsika, ny fakam-panahintsika ary ny fijaliantsika Izy, satria niaina izany rehetra izany tamim-tsitrapo ho fanatanterahana ny ampahany manan-danja iray ao amin’ny Sorompanavotany. Koa satria nahavita izany Izy dia manome hery Azy mba hanampiana antsika ny Sorompanavotany—mba hanomezana antsika ny hery hahafahana mizaka ny zava-drehetra. (Dallin H. Oaks, “Ankaherezin’ny sorompanavotan’i Jesoa Kristy,” Liahona, nôv. 2015, 61–62)

Sahanasa fianarana fanampiny

Fotopampianarana sy Fanekempihavanana 60:1–3. Sokafy ny vavanao mba hizara ny filazantsara

Hazavao fa rehefa nodidina voalohany handao ny tranony tany Ohio sy handeha ho any Missouri ireo loholon’ny Fiangonana, dia nodidina izy ireo hitory ny filazantsara teny an-dalana. (jereo ny Fotopampianarana sy Fanekempihavanana 52:9–10, 21–23, 25–27).

Asao ny mpianatra hamaky ny Fotopampianarana sy Fanekempihavanana 60:1–3 mba hitadiavana ny tenin’ny Mpamonjy tamin’ny sasany tamin’ireo lehilahy ireo.

Mba hanampiana ny mpianatra hahita ny fomba ifandraisan’ireo fampianarana ireo amin’ny fiainany dia hevero ny hametraka fanontaniana toy izao:

• Inona no mety hahasarotra ny fanokafantsika ny vavantsika hizara ny filazantsaran’ny Mpamonjy?

• Ahoana no anampian’ny Mpamonjy antsika handresy ireo sakana atrehintsika?

• Inona avy ireo ohatra sasantsasany maneho ireo fomba ahafahantsika manokatra ny vavantsika mba hizarana ny filazantsara amin’izao fotoana izao?

Fotopampianarana sy Fanekempihavanana 60:13. Misoroka ny fandanilaliana foana ny fotoana

Afaka mahazo tombontsoa avy amin’ny fifanakalozan-kevitra momba ny didin’ny Tompo hoe “tsy [mandanidany] foana ny fotoana” ny mpianatra (Fotopampianarana sy Fanekempihavanana 60:13).

Hazavao fa ny ampahany amin’ny torohevitry ny Tompo voarakitra ao amin’ny Fotopampianarana sy Fanekempihavanana 60 dia ho an’ireo izay ho avy any Missouri mba hanampy amin’ny fanorenana ny tanànan’i Ziona.

Asao ny mpianatra hamaky ny Fotopampianarana sy Fanekempihavanana 60:13 mba hitadiavana ny zavatra nandidiany ny sasany tamin’ireo Olomasina ireo.

• Nahoana araka ny eritreritrao no tsy tian’ny Tompo hidonana-poana ny Olomasiny mandritra ny dian’izy ireo?

• Ahoana no mety hampiharana io torohevitra io amintsika mandritra ny diantsika eto an-tany?

Hevero ny hanasa ny mpianatra handalina soratra masina vitsivitsy hafa izay afaka manampy azy ireo hahatakatra bebe kokoa ny fomba tian’ny Tompo hampiasantsika ny fotoanantsika. Ohatra amin’izany ny Almà 34:32–33; Fotopampianarana sy Fanekempihavanana 58:27; 75:3–4; 88:124.

• Inona no mety ho fiantraikan’ny fidonanaham-poana eo amin’ny fifandraisanao amin’ny Ray any An-danitra sy i Jesoa Kristy?

Asao ireo mpianatra hieritreritra ireo fomba mety handanilanian’izy ireo foana ny fotoanany ary hametraka tanjona mba hisorohana na hanatsarana izany.

Fotopampianarana sy Fanekempihavanana 62:1. Mandray fanampiana avy amin’i Jesoa Kristy

Afaka mandray soa avy amin’ny fandinihana ny zavatra nampianarin’ny Mpamonjy ao amin’ny Fotopampianarana sy Fanekempihavanana 62:1 momba ny Tenany sy ny fahafahany manampy antsika ny mpianatra. Hevero ny hanasa ny mpianatra hamaky ity andinin-tsoratra masina ity ary hampifandray izany amin’ny Almà 7:11–13. Azonao atao ny manome azy ireo fotoana fohy hisaintsainana amim-pahanginana ny fomba nanampian’ny Mpamonjy azy ireo na ireo olon-tiany. Amporisiho izy ireo hirakitra ireo zavatra niainany sy ireo zavatra tsapany ao amin’ny diariny ary zarao amin’izy ireo ny teny nambaran’ny Filoha Dallin H. Oaks ao amin’ny “Loharanom-pitaovana fanampiny.” Asao ny mpianatra vitsivitsy izay vonona mba hizara ny fomba ampaherezan’ny Mpamonjy azy ireo sy hanohanany azy ireo anatin’ny fahalemen’izy ireo sy ny fitsapana atrehin’izy ireo.