Seminera
Lesona 82—Fotopampianarana sy Fanekempihavanana 71: Fihetsika aseho manoloana ireo mitsikera ny Fiangonan’ny Mpamonjy

“Lesona 82—Fotopampianarana sy Fanekempihavanana 71: Fihetsika aseho manoloana ireo mitsikera ny Fiangonan’ny Mpamonjy,” Boky torolalana ho an’ny mpampianatra seminera: Fotopampianarana sy Fanekempihavanana (2025)

“Fotopampianarana sy Fanekempihavanana 71,” Boky torolalana ho an’ny mpampianatra seminera: Fotopampianarana sy Fanekempihavanana

Lesona 82: Fotopampianarana sy Fanekempihavanana 71–75

Fotopampianarana sy Fanekempihavanana 71

Fihetsika aseho manoloana ireo mitsikera ny Fiangonan’ny Mpamonjy

i Joseph Smith mitory teny

Tamin’ny ririnin’ny 1831 dia nisy taratasy nahitana fampahalalana diso momba an’i Joseph Smith sy ny Fiangonana izay naparitaka tao amin’ny faritr’i Kirtland. Ao amin’ny Fotopampianarana sy Fanekempihavanana 71, dia nanome torolalana an’i Joseph Smith sy i Sidney Rigdon ny Tompo mba handeha manerana ilay faritra ka hanitsy ireo fahadisoan-kevitra (jereo ny adininy 1–2). Ity lesona ity dia afaka manampy ny mpianatra hahatakatra ny fihetsika tian’i Mpamonjy hasehontsika rehefa mitsikera ny zavatra inoantsika ny olona.

Sahanasa fianarana azo atao

Mamaly ireo mpitsikera ny Fiangonan’ny Mpamonjy

Mba hanampiana ny mpianatra hahatakatra ny sahan-kevitry ny Fotopampianarana sy Fanekempihavanana 71, dia zarao ireto andiam-pehezan-teny manaraka ireto ary fintino amin’ny teninao manokana.

Nitombo izaitsizy ny fanenjehana an’i Joseph Smith sy ireo Olomasina tao Kirtland tamin’ny ririnina 1831. Nanomboka nandao ny Fiangonana ny Olomasina sasany, tao anatin’izany i Ezra Booth sy i Symonds Ryder. Nanomboka namoaka taratasy izay nanenjika an’i Joseph sy niezaka nandrava ny asan’ny Tompo i Booth (jereo ny History, 1838–1856 [Manuscript History of the Church], volume A-1, 153–54, josephsmithpapers.org). Nangataka torohevitra tamin’ny Tompo i Joseph ary dia voaray ny Fotopampianarana sy Fanekempihavanana 71.

  • Ahoana no mety ho fihetsika tianao naseho nanoloana ireo fanenjehana natao tamin’ny fiangonan’ny Mpamonjy sy i Joseph Smith?

    Asao ny mpianatra mba hizara ohatrana fotoana izay nanatrehan’izy ireo maso fitsikerana ny Fiangonana na ny filazantsara. Asao ny mpianatra mba hisaintsaina ny fihetsika tian’ny Mpamonjy hasehon’izy ireo rehefa maneho haratsiam-panahy momba ny zavatra inoan’izy ireo ny olona. Manaova fifanakalozan-kevitra fohy eo am-pamalian’ny mpianatra ireto fanontaniana manaraka ireto.

  • Ahoana no ahafahantsika mahafantatra ny fomba tsara indrindra hiatrehana ireo toe-javatra izay ahitana ny fitsikeran’ny hafa ireo zavatra inoantsika na fizaran’izy ireo fampahalalana diso momba ny Fiangonan’ny Mpamonjy?

  • Amin’ny fotoana toy ny ahoana no tsara kokoa ny tsy miraharaha ny fisikerana araka ny eritreritrao?

Saintsaino ny fahatokian-tenanao eo anatrehan’ny fahafantarana ny fihetsika tian’i Jesoa hasehonao. Rehefa mandalina ianao dia tadiavo ireo karazana fihetsika ampianarin’ny Mpamonjy izay tokony hasehontsika.

Mampianatra antsika hanambara amim-pahasahiana sy hizara ny filazantsarany ny Mpamonjy

Vakio ny Fotopampianarana sy Fanekempihavanana 71:1–3 mba hitadiavana ny fihetsika tian’ny Mpamonjy nasehon’i Joseph sy i Sidney nanoloana ireo fahadisoan-kevitra izay niparitaka momba ny Fiangonana tamin’izany fotoana izany.

  • Inona no zavatra nanaitra anao?

  • Inona no natolotry ny Mpamonjy mba hanampiana an’i Joseph sy i Sidney hahafantatra ny fihetsika tokonyhasehon’izy ireo araka ny andininy 1?

  • Ahoana no fomba hanampian’ny torohevitry ny Mpamonjy antsika amin’izao androntsika izao?

    Ampio ny mpianatra mba hamantatra ilay fahamarinana hoe, ny Mpamonjy dia hampianatra antsika ny fomba hamaliana ireo izay mitsikera ny Fiangonany amin’ny alalan’ny soratra masina sy ny Fanahy.

  • Nahoana araka ny eritreritrao no fomba tsara indrindra hamaliana ny fitsikerana ny fampiasana ny soratra masina sy ny fanarahana ny bitsiky ny Fanahy?

  • Amin’ny fomba ahoana no hisian’ny fitaoman’ny Fanahy fiantraikany eo amin’ny fihetsika asehontsika manoloana ny fitsikerana?

Hevero ny hanasa mpianatra iray hanoratra eny amin’ny tampon’ny solaitrabe ny hoe “Fihetsika aseho araka ny fomban’ny Mpamonjy.” Azonao angatahina koa ny mpianatra mba hanoratra io lohateny io ao anatin’ny diary fandalinan’izy ireo. Afaka manomboka manao lisitra ny mpianatra ka manoratra ny hoe “mampiasa ny soratra masina” sy ny hoe “manaraka ny Fanahy” eo ambanin’io lohateny io. Hanana fahafahana ny hanao fanazaran-tena amin’ny fiatrehana ireo toe-javatra araka ny fomban’ny Mpamonjy ireo mpianatra amin’ny alalan’ilay lisitra nataon’izy ireo.

Nampiasa ilay fanehoana an’ohatra ao amin’ny soratra masina hoe zana-tsipika mirehitra ny Loholona Neil L. Andersen ao amin’ny Kôlejin’ny Apôstôly Roambinifolo raha namariparitra ny fitsikeran’ny hafa ny finoantsika. Rehefa mandalina ity fanambarana ity ianao dia eritrereto ny zavatra azonao ampiana ao amin’ilay lisitra hoe “Fihetsika aseho araka ny fomban’ny Mpamonjy.”

Loholona Neil L. Andersen

Amin’ny alalan’ny ampingan’ny finoantsika an’i Jesoa Kristy, dia lasa mpampihavana isika, mandresy … ny zana-tsipika mirehitra rehetra an’ny fahavalo [jereo ny Efesiana 6:16; Fotopampianarana sy Fanekempihavanana 3:8]. …

Ahoana no ataon’ny mpampihavana mba hampitoniana sy hanalefahana ny zana-tsipika mirehitra? Azo antoka fa tsy amin’ny alalan’ny fihemorana eo anatrehan’ireo izay manao tsinontsinona antsika. Fa amin’ny alalan’ny fijanonana ho matoky tena amin’ny finoantsika kosa, ny fizarana ny finoantsika amin’ny faharesen-dahatra, nefa tsy misy fahatezerana na faniriana hanao ratsy. …

Tsy mipetra-potsiny ny mpampihavana fa mandresy lahatra amin’ny fomban’ny Mpamonjy izy ireo.

Inona no manome antsika hery anaty mba hanalefaka sy hampitony ary hamono ireo zana-tsipika mirehitra mikendry ny fahamarinana izay tiantsika? Ilay hery dia avy amin’ny finoantsika an’i Jesoa Kristy sy ny finoantsika ny teniny. (Neil L. Andersen, “Manaraka an’i Jesoa: mpampihavana,” Liahona, mey 2022, 17–18)

Asao ny mpianatra hifanakalo hevitra momba an’izay mety hampidirin’izy ireo ao amin’ilay lisitra rehefa avy namerina namaky ny fanambarana nataon’ny Loholona Andersen izy ireo. Afaka mametraka fanontaniana toy izao ianao:

  • Ahoana no ahafahahanao ho mpampihavana rehefa mamaly ny hafa?

Vakio ny Fotopampianarana sy Fanekempihavanana 71:4–7, ary karohy ny zavatra nampianarin’ny Tompo an’i Joseph Smith sy i Sidney Rigdon tao anatin’io toe-javatra manokana io mba hiatrehana ny fanaparitahana fampahalalana diso.

  • Inona no hitanao?

  • Inona ireo fifandraisana hitanao eo amin’ny torohevitry ny Tompo ao amin’ireo andininy ireo sy ny fampianaran’ny Loholona Andersen?

sary famantarana ny fanofanana Antitrantero ny ohatra nasehon’i Jesoa Kristy: Ity sahanasa manaraka ity dia fahafahana iray azo araraotina hanantitranterana ny ohatra nasehon’i Jesoa Kristy. Mba hanaovana fanazaran-tena misimisy kokoa momba ity dia jereo ny fanofanana mitondra ny lohateny hoe “Antitrantero ny ohatra nasehon’i Jesoa Kristy” ao amin’ny Fahaiza-manao ho fampivoarana ny mpampianatra: Mifantoha amin’i Jesoa Kristy. Hevero ny hampihatra ilay fahaiza-manao “Ampio ny mpianatra hampifandray ny zavatra ianaran’izy ireo amin’ny fomba anehoan’i Kristy ilay fitsipika.”

Mba hanampiana ny mpianatra hamantatra fomba famaly maro arak’i Kristy izay afaka manampy azy ireo hiaro ny zavatra inoany, dia hevero ny hizara ho vondrona ny mpianatra mba hanaovana ity sahanasa manaraka ity.

Amporisiho ny mpianatra hampiasa ny soratra masina mba hitadiavana ohatra na fampianarana izay mampiseho fomba maro samihafa namalian’ny Mpamonjy sy ireo mpianany ny fitsikerana. Raha mila fitarihana fanampiny ny mpianatra dia azonao atao ny mampiseho ny sasany amin’ireto andinin-tsoratra masina manaraka ireto izay mamariparitra ny zavatra niainan’ny Mpamonjy sy ny fampianarany mba handalinan’izy ireo izany.

Asao ny mpianatra hifanakalo hevitra momba ny zavatra hitan’izy ireo tao anatin’ny vondrona misy azy ary avy eo hifantina olona iray izay hitarika ny fifanakalozan-kevitra ka hizara ilay fampahalalana amin’ny iray kilasy.

Hevero ny hanasa ireo mpitarika ny vondrona mba hizara ny zavatra nifampiresahan’izy ireo ary hampiditra izany ao anatin’ny lisitr’ireo fomba famaliana mifanaraka amin’ny tokony ho izy eny amin’ny solaitrabe. Ampahatsiahivo ny mpianatra fa indraindray dia mety hitarika antsika hitoetra mangina ny Fanahy toy izay hanitsy ampahibemaso ny zavatra izay voalaza.

Ampiharo ny fihetsika aseho araka ny fomban’ny Mpamonjy

Mba hanampiana ny mpianatra haneho ny fahatakaran’izy ireo ilay fitsipika izay nianarana androany dia azonao omena na aseho ity rafi-tantara manaraka ity. Rehefa mifanakalo hevitra momba ireo fomba maro samihafa azontsika hamaliana ny mpianatra, dia amporisiho izy ireo hijery ao amin’ilay lisitra nataon’izy ireo teo aloha mba hahitana hevitra. Ampio izy ireo hahatakatra fa mety hisy fihetsika mety maromaro mifanaraka amin’ny tokony ho izy eo amin’ny fiatrehana ny toe-javatra tsirairay. Afaka manampy antsika hahafantatra ny zavatra tian’ny Ray any An-danitra hataontsika na holazaintsika ny Fanahy rehefa miseho ilay toe-javatra.

Afaka mamorona toe-javatra hafa ianao mba hifanaraka amin’ny zavatra ilain’ny mpianatrao izany, na manampy pitsipitsiny amin’ilay rafi-tantara etsy ambany mba hampitomboana ny fahalianan’ireo mpianatra. Afaka manasa ny mpianatra ihany koa ianao mba hamorona ny rafi-tantaran’izy ireo manokana avy amin’ny zavatra niainan’izy ireo. Mety ho tsara raha manasa ireo mpianatra mba hizara ny zavatra niainan’izy ireo taloha ianao.

Mizarà fomba vitsivitsy hafa izay mety hamalianao ny tsirairay amin’ireto toe-javatra manaraka ireto araka ny fomban’i Kristy:

  • Mamoaka sarin’ny tempoly ao amin’ny tambajotran-tserasera ianao, ary misy olona mitsikera ny Fiangonana ao momba ny fametrahan’ny Fiangonana fitsipika ambony mba hidirana ny tempoly.

  • Milaza zavatra ratsy mifono haratsiam-panahy momba ny Mpaminany Joseph Smith ny dadatoanao mandritra ny fivoriam-pianakaviana iray.

  • Milaza ny namanao iray fa hadalana ny finoana Andriamanitra iray izay tsy azo porofoina ny fisiany.

  • Milaza amin’ireo mpiara-miasa aminao ny olona iray ao amin’ny toeram-piasanao fa ny Olomasin’ny Andro Farany dia tsy Kristiana.

Amin’ny fotoana mahamety izany amin’ny Mpamonjy

Nankatò ny fanambarana noraisain’izy ireo i Joseph Smith sy i Sidney Rigdon. Nitety ilay faritra iray manontolo izy ireo ary nitory ny filazantsaran’ny Mpamonjy sady nanitsy ireo fahadisoan-kevitra izay naparitaka.

Vakio ny Fotopampianarana sy Fanekempihavanana 71:8–11, ary tadiavo ny fanomezan-toky atolotry ny Mpamonjy amin’ireo rehetra izay miaro ny Fiangonany sy ny filazantsarany.

  • Mampianatra anao inona momba an’i Jesoa Kristy sy ny asany ireo andininy ireo?

  • Inona araka ny hevitrao ny dikan’ny hoe tsy misy feo na fiadiana izay hiroborobo amintsika (jereo ny andininy 9–10)?

Ampio ny mpianatra hahatakatra fa na tsy manana ny valiny tonga lafatra ho an’olona iray aza izy ireo dia tsy hamela ireo fahavalon’ny Fiangonany hiroborobo mandrakizay Izy. Mampanantena ny Mpamonjy fa “hatao mangaihay amin’ny fotoana mahamety izany [Aminy]” ireo mpitsikera (andininy 10).

  • Inona ny zavatra nianaranao androany ka afaka manampy anao hiatrika ireo toe-javatra izay ahitana olona fantatrao mitsikera ny Fiangonana na ny fampianaran’ny Mpamonjy?

Azonao faranana ny fotoam-pianarana amin’ny alalan’ny famporisihana ny mpianatra hanaraka ny torohevitry ny Mpamonjy rehefa miatrika toe-javatra izay ahitana ny fitsikerana ny Fiangonana sy ny filazantsara ataon’ny hafa izy ireo. Azonao atao ny mizara ny fijoroanao ho vavolombelona momba ny hery omena ireo izay miaro ny zavatra inoan’izy ireo tahaka ny hataon’ny Mpamonjy.