Lesona 84: Fotopampianarana sy Fanekempihavanana 71–75

Tombano ny fianaranao 5

Fotopampianarana sy Fanekempihavanana 51–75

Ny fisaintsainana sy ny fanombantombanana ny fianarana ara-panahy dia afaka manampy antsika hanakaiky kokoa ny Mpamonjy. Ity lesona ity dia afaka manampy ny mpianatra hahatsiaro sy hanombantombana ny fomba nanampian’ny zavatra niainan’izy ireo tamin’ny fandalinana ny Fotopampianarana sy Fanekempihavanana azy ireo hivoatra ara-panahy.

Sahanasa fianarana azo atao

Fanamarihana: Mety tsy ho ampy ny fotoanao mandritra ny fotoam-pianarana hanaovana ireo fanombantombanana rehetra omena ao amin’ity lesona ity. Safidio ireo fizarana izay tsapanao fa tena hitondra tombontsoa lehibe ho an’ny mpianatra amin’ny fanombantombanana ny fianaran’izy ireo.

Tombano ny fivoaranao

Hevero ny hanome ireo mpianatra fahafahana hizara ny valintenin’izy ireo amin’ireto fanontaniana manaraka ireto amin’ny mpiara-mianatra aminy maromaro. Azo atao izany amin’ny alalan’ny fanomezana azy ireo iray minitra hiarahana amin’ny mpiara-mianatra iray sy hizarana ny valintenin’izy ireo. Azo averina imbetsaka izany.

(Azonao atao ny manome ohatra amin’ny alalan’ny fizarana zavatra iray izay mahafinaritra anao ny manao azy. Hevero ny hampiseho sarina fitaovana iray izay ampiasaina amin’ny fandrefesana fivoarana ao amin’ilay zavatra izay mahafinaritra anao ny manao azy. Ohatra, raha tia mihazakazaka ianao dia afaka mampiseho famantaranandro fandrefesam-potoana iray ary manazava ny fomba fampiasa izany handrefesana ny fivoaranao.)

• Inona ny zavatra iray ataonao izay tianao ny mandray anjara aminy?

• Ahoana no ahafantaranao raha mivoatra ianao amin’izany? Misy fitaovana miavaka ve izay ampiasainao mba handrefesana ny fivoaranao?

Toy ny fanampian’ny fandrefesana ny fivoarantsika ara-batana antsika mba hahita ny fitomboantsika, dia ilaintsika koa ny maka fotoana mba hanombantombanana ny fivoarantsika ara-panahy. Ny Fanahy Masina dia fitaovana fampiasa amin’ny fanampiana antsika handrefy ny fivoaransika ara-panahy. Fomba iray ahafahantsika manasa ny Fanahy Masina hanampy antsika hahita ny fivoarantsika ny fandinihana ombam-bavaka ireo lesona ara-panahy izay nianarantsika sy ny fieritreretana ny fomba nivoarantsika ara-panahy rehefa nampihatra ireo lesona ireo teo amin’ny fiainantsika isika.

Asao ny mpianatra mba hamaky ny zavatra noraisin’izy ireo an-tsoratra sy ireo soratra masina tamin’ny herinandro lasa nandritra ny seminera (Fotopampianarana sy Fanekempihavanana 51–75), ka handinika ireo lesona izay nianaran’izy ireo sy ny tanjona napetrak’izy ireo. Asehoy ireto fanontaniana manaraka ireto mba hanampiana ny mpianatra hisaintsaina momba ny fivoaran’izy ireo ara-panahy. Afaka misafidy ny hanoratra ny valintenin’izy ireo anaty diary fandalinany ny mpianatra na hisaintsaina ireo valinteniny ireo.

• Inona ireo zavatra sasantsasany efa nataonao mba hampiharana ireo fahamarinana ara-panahy izay nianaranao nandritra ny seminera? Amin’ny fomba ahoana no anampian’ny fampiharana ireo fahamarinana ireo anao hivoatra ara-panahy?

• Ahoana no nahitanao fa rehefa mampihatra ny zavatra izay nianaranao ianao, ny Ray any An-danitra sy ny Mpamonjy dia manampy anao amin’ny ezaka ataonao mba ho tonga kokoa tahaka Azy ireo?

Omeo fahafahana ny mpianatra hizara ny valintenin’izy ireo izay tsy mahakasika ny tena manokana loatra. Amporisiho ny mpianatra mba hihaino kokoa ny Fanahy eo am-pikatsahan’izy ireo ny hampihatra kokoa ireo lesona ireo eo amin’ny fiainan’izy ireo.

Hazavao ny tanjon’ny didy

Asehoy ilay fehezan-teny voalohany amin’ity teny nambaran’ny Filoha Russell M. Nelson ity ka soloy ho faritra banga ny teny hoe “lalàna.” Afaka manolotra teny azo apetraka eo amin’ilay teny banga ny mpianatra. Rehefa avy niezaka namantatra ilay teny banga ny mpianatra dia asehoy ilay teny nambara iray manontolo.

Satria tia antsika amin’ny fitiavana tsy manam-petra sy lavorary ny Ray sy ny Zanaka ary satria fantatr’Izy Ireo fa tsy afaka mahita ny zavatra rehetra hitany isika, dia nanome antsika lalàna izay hitarika sy hiaro antsika Izy Ireo. Misy fifandraisana mafy orina eo amin’ny fitiavan’ Andriamanitra sy ny lalàny. (Russell M. Nelson, “The Love and Laws of God” [Brigham Young University devotional, Sept. 17, 2019], 2, speeches.byu.edu)

• Inona ny didy iray izay nanampy anao hahatsapa ho voaro sy ho tian’ Andriamanitra?

  Asao ny mpianatra hampiasa ny soratra masin’izy ireo sy ny firaketany an-tsoratra mba hitadiavana valiny amin’ity fanontaniaa manaraka ity.

• Inona ny sasany amin’ireo lalàn’ Andriamanitra izay nohalalinintsika vao haingana tao amin’ny Fotopampianarana sy Fanekempihavanana?

Afaka mangataka mpianatra iray ianao hanoratra ilay fanontaniana eny amin’ny solaitrabe. Mety hilaza ny sasany amin’ireto manaraka ireto izy ireo: ny fibebahana (58:42–43), ny fitandremana ny andro Sabata ho masina (59:9–13), ny lalàn’ny fahadiovam-pitondrantena (63:13–16), ary ny famelana ny hafa (64:9–11).

Mampisehoa rafi-tantara iray toy ity manaraka ity. Asao ny mpianatra mba hanao fanazaran-tena mikasika ny fomba hanazavan’izy ireo ny tanjon’ny didy amin’ny naman’izy ireo iray. Ilay fanontaniana manaraka ilay rafi-tantara dia afaka manampy amin’ny fahazoana fitarihana eo amin’ny valinteny omen’izy ireo.

Alaivo sary an-tsaina hoe ny iray amin’ireo namanao dia mizara aminao ny fahasorenany momba ny didy iray. Manontany tena izy hoe nahoana Andriamanitra no handany fotoana hanome antsika didy.

Misafidiana didy iray izay nianaranao tao amin’ny Fotopampianarana sy Fanekempihavanana tamin’ity taona ity ary zarao:

• Ny maha-fiarovana sy maha-tari-dalana avy amin’ny Ray any An-danitra an’io didy io.

• Ny maha-porofom-pitiavan’ Andriamanitra an’io didy io.

Manome ny fonao sy ny sainao marisika ho an’ny Tompo

Tao anatin’ny fandalinana ny Fotopampianarana sy Fanekempihavanana 64:20–43, dia mety nasaina hanao sary tahaka ity manaraka ity ny mpianatra ao anaty diary fandalinan’izy ireo. Asehoy ilay sary ary angataho ny mpianatra hizara ny zavatra tsaroan’izy ireo momba ilay lesona. Nasaina izy ireo handoko ny fatran’ny saina sy fo izay tsapan’izy ireo fa omen’izy ireo ny Tompo.

Asao ny mpianatra hitady ilay sary nataon’izy ireo na hiezaka hitadidy ny endrik’ilay sary. Ampio ny mpianatra hitadidy fa ny fomba nandokon’izy ireo ny fony sy ny sainy dia sombiny fotsiny ihany ao anatin’ny fotoana. Azo ovaina izany fa tsy maharitra. Afaka mikatsaka ny fanampian’ny Tompo izy ireo mba hahavonona azy ireo hanome misimisy kokoa amin’ny sainy sy ny fony ho Azy. Amporisiho ny mpianatra hisaintsaina ny zavatra niainan’izy ireo amin’ny alalan’ny famaliana ny sasany amin’ireto fanontaniana manaraka ireto ao anaty diary fandalinan’izy ireo.

• Inona no nataonao na azonao atao mba hampitomboana ny fanirianao hanome ny fonao sy ny sainao ho an’ny Mpamonjy?

• Inona ireo fiovana izay tsikaritrao teo amin’ny fanirianao hanome ny fonao sy ny sainao ho an’ny Mpamonjy?

• Inona no fiantraikan’ny eritreritrao sy ny zavatra natanao teo amin’ny fifandraisanao tamin’ny hafa sy tamin’i Jesoa Kristy?

Omeo fahafahana ny mpianatra vitsivitsy mba hizara ny zavatra manan-danja taminy momba ity traikefa ity sy ny fiantraikan’izany teo amin’izy ireo.

Afaka manao sarina fo sy saina faharoa ao anaty diary fandalinan’izy ireo eo akaikin’ilay sary voalohany nataon’izy ireo ny mpianatra avy eo. Asao izy ireo handoko ny fatran’ny fo sy saina izay omen’izy ireo ny Mpamonjy ankehitriny vokatry ny ezaka nataon’izy ireo mba hivoatra. Afaka mampitaha ireo sary roa ny mpianatra ary mamaritra raha toa ka nivoatra ny fahavononan’izy ireo hanome ny fony sy ny sainy ho an’ny Mpamonjy.

Mitandrina ny andro Sabata ho masina

Hevero ny hampiseho ity ampahany amin’ny fanontaniana amin’ny fahazoan-dalana hidirana ny tempoly manaraka ity ary asao ny mpianatra mba hizara ny zavatra nianarany momba ny fitandremana ny andro Sabata ho masina tamin’ity taona ity. (Raha ilaina dia azonao omena fotoana ny mpianatra hamerenan’izy ireo mamaky ny Fotopampianarana sy Fanekempihavanana 59 na ny zavatra nosoratan’izy ireo tao anatin’ny diarin’izy ireo nandritra ilay lesona tao amin’io fizarana io.)

Miezaka ny mitandrina ny andro Sabata ho masina ve ianao any an-tokantrano sy any am-piangonana…

Ao anatin’ny lesona momba ny Fotopampianarana sy Fanekempihavanana 59 dia mety nasaina ny mpianatra hanao drafitra mba hanaja ny Mpamonjy mandritra ny andro Sabata. Raha izany dia asao izy ireo hisaintsaina ny zavatra nataon’izy ireo vokatr’izany. Mety hanampy ireo mpianatra manolo-tena ny fizarana ampahany amin’ny drafitr’izy ireo amin’ny iray kilasy.

Hevero ny hampiseho ireto fanontaniana manaraka ireto mba hanampiana ny mpianatra hanombantombana ny ezaka ataon’izy ireo eo amin’ny fitandremana ny andro Sabata ho masina. Asao ny mpianatra mba hisafidy fanontaniana roa na telo avy amin’ilay lisitra mba hovalin’izy ireo ao anaty diary fandalinan’izy ireo.

• Mieritrereta zavatra iray nataonao mba hitandremana ny andro Sabata ho masina. Ahoana ny fomba nanatsaran’ny fanaovana io zavatra io ny zavatra iainanao amin’ny andro Sabata?

• Ahoana ny fomba nampanakaikezan’ny ezaka ataonao mba hitandremana ny andro Sabata ho masina anao tamin’ny Ray any An-danitra sy ny Mpamonjy?

• Inona ireo olana sasantsasany izay atrehinao eo amin’ny fitandremana ny andro Sabata ho masina?

• Inona ny zavatra iray izay tianao hatomboka mba hitandremana ny andro Sabata ho masina?

• Nahoana no zava-dehibe ny mitandrina ny andro Sabata ho masina?

• Inona ny zavatra iray ao anatin’ilay lisitra nataonao ka tsy mbola nataonao kanefa azonao atao amin’ny alahady ho avy izao mba hitandremana ny andro Sabata ho masina?

• Tamin’ny fomba ahoana no nahafahanao nanaja kokoa ny Ray any An-danitra sy i Jesoa Kristy rehefa nanomboka nanao na nitsahatra tsy nanao zavatra sasantsasany ianao mandritra ny andro Sabata?

Na dia natao ho an’ny mpianatra aza ireo fanontaniana ireo mba hanombantombanan’izy ireo ny ezaka ataon’izy ireo amin’ny fitandremana ny andro Sabata ho masina, dia afaka manasa mpianatra izay manolo-tena ianao mba hizara ny sasany amin’ny valinteniny sy ny zavatra niainany raha mety izany.

Amporisiho ny mpianatra amin’ny ezaka ataon’izy ireo mba handraisany ny fitahiana avy amin’ny fanajana ny andro Sabata, indrindra indrindra ho an’ireo izay tsy mbola nanao na inona na inona eo anatrehan’izany. Afaka manasa azy ireo hanisy fampahatsiahivana ao amin’ny telefaoniny ianao mba hanaovany zavatra izay hanampy azy ireo hitandrina kokoa ny andro Sabata manaraka ho masina. Mijoroa ho vavolombelona momba ny fanirian’ny Mpamonjy mba hanatonan’izy ireo Azy sy momba ny hoe fomba iray ahafahantsika manakaiky Azy ny fitandremana ny andro Sabata ho masina.