“Lesona 85—Fotopampianarana sy Fanekempihavanana 76:1–19: -Nosokafana ny mason’ny fahatakaranay,-” Boky torolalana ho an’ny mpampianatra seminera: Fotopampianarana sy Fanekempihavanana(2025)
“Fotopampianarana sy Fanekempihavanana 76:1–19,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 85: Fotopampianarana sy Fanekempihavanana 76
Fotopampianarana sy Fanekempihavanana 76:1–19
“Nosokafana ny mason’ny fahatakaranay”
Tamin’ny janoary 1832 dia nisaintsaina ny dikan’ny Jaona 5:29 i Joseph Smith sy i Sidney Rigdon raha teo am-panaovana ny fandikana ny Baiboly araka ny fitaoman’ny Fanahy. Rehefa nisaintsaina izy ireo dia nahita fahitana nitohitohy izay nanambaran’ny Tompo fahamarinana manan-danja momba ny drafiny. Ity lesona ity dia afaka manampy ny mpianatra hianatra amin’ny alalan’ny herin’ny Fanahy Masina rehefa manokana fotoana hisaintsainana ny tenin’ny Mpamonjy izy ireo.
Sahanasa fianarana azo atao
Fikatsahana fanambarana ho an’ny tena manokana
Hevero ny hampiseho eny amin’ny solaitrabe ireto fanontaniana manaraka ireto. Azon’ny mpianatra atao ny mirakitra an-tsoratra ao amin’ny diary fandalinan’izy ireo ny valiny omen’izy ireo an’ireo fanontaniana. Hevero ny hangataka mpianatra vitsivitsy izay manaiky ny hizara valinteny izay tsy mahakasika tena manokana loatra.
-
Inona ireo toe-javatra izay atrehinao na mety hatrehinao izay tianao handraisana fitarihana avy amin’ny Tompo amin’ny alalan’ny Fanahy Masina?
-
Nahoana ianao no maniry ny handray ny fanampian’ny Tompo amin’ireo zavatra ireo?
Androany ianao dia hianatra momba ny fomba iray ahafahanao manasa ny Tompo hiresaka aminao amin’ny alalan’ny Fanahy Masina. Rehefa mandalina ianao dia henoy tsara ireo bitsika avy amin’ny Fanahy izay mety hanampy anao amin’ny iray amin’ireo toe-javatra na fanontaniana izay nofaritanao.
Ilay fahitana
Ity famintinana manaraka ity dia afaka manampy amin’ny fanomanana ny mpianatra handalina ny Fotopampianarana sy Fanekempihavanana 76. Hevero raha toa ka mety ho tsara kokoa ny hamakianao na hamintinanao izany na ny hanasana mpianatra iray hanao izany.
Niaraka tao amin’ny efitrano ambony rihana tao amin’ny tranon’i John sy i Elsa Johnson tao Hiram, Ohio, i Joseph Smith sy i Sidney Rigdon ary ireo lehilahy niisa 12 hafa tamin’ny 16 febroary 1832. Raha teo am-panaovana ny fandikana ny Baiboly araka ny fitaoman’ny Fanahy i Joseph sy i Sidney dia nandalina ny Jaona 5:29 izy ireo, izay soratra masina iray namariparitra ny lanitra ary naniry ny hahafantatra misimisy kokoa izy ireo. Rehefa nisaintsaina izy ireo dia nahita fahitana iray izay voarakitra ao amin’ny Fotopampianarana sy Fanekempihavanana 76. Nampiseho fahitana tena miavaka nitohitohy tamin’i Joseph sy i Sidney ny Mpamonjy izay nampianatra azy ireo fahamarinana manan-danja momba ny drafitry ny famonjen’ny Ray any An-danitra.
Hazavao fa rehefa mandalina ny Fotopampianarana sy Fanekempihavanana 76 ny mpianatra mandritra ny herinandro dia hanana fahafahana ny hianatra momba ireo ampahany maro amin’io fahitana io izy ireo. Ny lesona androany dia hifantoka amin’ny fampianaran’ny Mpamonjy sy ireo zavatra niainana izay voarakitra ao amin’ny fiandohan’ny fizarana 76.
Ny Fotopampianarana sy Fanekempihavanana 76 dia manomboka amin’ny fizaran’ny Tompo fahamarinana manan-danja momba ny Tenany.
Vakio ny Fotopampianarana sy Fanekempihavanana 76:1–10: mba hikarohana ireo teny sy andian-teny izay tsapanao fa maneho ny zavatra tian’i Jesoa Kristy ho takatsika momba Azy. Marihina fa ny hoe matahotra an’ Andriamanitra (andininy 5) dia midika hoe mitsaoka sy mitia ary mankamamy Azy.
Rehefa nomena fotoana ampy handalinana ny mpianatra dia asao izy ireo hizara ny zava-baovao noraisiny. Ny fanontaniana toy ireto manaraka ireto dia mety hanampy ireo mpianatra hifanakalo hevitra momba ny fanirian’ny Mpamonjy hanambara fahamarinana amin’izy ireo amin’ny alalan’ny Fanahy Masina.
-
Manampy anao hahatakatra tsara kokoa inona momba ny Mpamonjy ireo andininy ireo?
-
Ahoana no ahafahan’ny fahafantarana ireo zavatra momba ny Mpamonjy ireo hisy fiantraikany eo aminao?
Ny fisaintsainana ny soratra masina dia mitarika any amin’ny fanambarana
Vakio ny Fotopampianarana sy Fanekempihavanana 76:11–19 mba hitadiavana ny zavatra nataon’i Joseph sy i Sidney mialoha ny nahitan’izy ireo ilay fahitana.
-
Inona ny asa nataon’i Joseph sy i Sidney araka ny eritreritrao izay nitarika azy ireo hiaina ny zavatra niainany?
Hevero ny hanazava fa na dia tsy mahita ny karazana fahitana izay hitan’i Joseph sy i Sidney aza isika dia afaka mampianatra antsika fitsipika momba ny fiomanantsika handray fanambarana avy amin’ny Tompo amin’ny alalan’ny Fanahy Masina ny zavatra niainan’izy ireo.
-
Inona ny fahamarinana iray izay nianaranao avy amin’ireo andininy ireo momba ny fomba iray ahafahantsika miomana handray fanambarana amin’ny alalan’ny Fanahy Masina?
Mety handroso karazana fahamarinana mitovitovy amin’ity manaraka ity ny mpianatra: Rehefa mandalina sy misaintsaina ombam-bavaka ny soratra masina isika dia manomana ny tenantsika handray ny fahatakarana avy amin’ny Tompo amin’ny alalan’ny Fanahy Masina isika.
Ny Loholona D. Todd Christofferson avy ao amin’ny Kôlejin’ny Apôstôly Roambinifolo dia namariparitra ny fomba ahafahantsika mandalina sy misaintsaina ny soratra masina izay hitondra any amin’ny fanambarana amin’ny alalan’ny Fanahy Masina.
Rehefa miteny aho hoe “mandalina,” dia zavatra mihoatra noho ny hoe mamaky no tiako holazaina. … Indraindray dia azoko sary an-tsaina ianareo mamaky andininy vitsivitsy, miato mba handinika izany, mamaky amim-pitandremana indray ireo andininy, ary rehefa iny mieritreritra momba ny hevitra tian’izy ireo ambara iny, mivavaka mba hahatakatra izany, mametra-panontaniana ao an-tsainareo, miandry fahatsapana ara-panahy, ary manoratra ireo zavatra tsapa sy hevi-baovao izay tonga mba hahafahanareo mitadidy sy mianatra bebe kokoa. Rehefa mandalina toy izany ianareo, dia mety tsy mamaky toko na andininy maro ao anatin’ny antsasan-kadiny, saingy hanisy toerana ho an’ny tenin’ Andriamanitra ao am-ponareo ianareo ary hiresaka aminareo Izy. (D. Todd Christofferson, “When Thou Art Converted,” Liahona, mey 2004, 11)
-
Inona avy ireo sakana sasantsasany izay mety hanakana antsika tsy hisaintsaina indraindray? Inona no afaka manampy antsika handresy ireo sakana ireo?
Hevero ny hizara zavatra niainana iray izay nandalinanao sy nisaintsainanao ombam-bavaka ny soratra masina ary nandraisanao fanambarana. Asao ny mpianatra mba hizara ny zavatra efa niainan’izy ireo ihany koa.
Manaova fanazaran-tena amin’ny fandalinana sy fitsaintsainana ombam-bavaka
Hevero ny hanome fotoana eo amin’ny 7–10 minitra eo ny mpianatra mba hanaovan’izy ireo fanazaran-tena eo amin’ny fandalinana sy fisaintsainana ombam-bavaka ny soratra masina. Zarao ireto toromarika manaraka ireto:
Makà fotoana hanaovana fanazaran-tena eo amin’ny fandalinana sy fisaintsainana ny soratra masina. Eritrereto ilay toe-javatra izay nofaritanao teo aloha ka nilanao ny fanampian’ny Tompo. Mivavaha mba handray fitarihana, saintsaino ny zavatra vakinao, ary henoy tsara ny bitsiky ny Fanahy izay afaka manolotra ny fitarihana na ny fanampiana ilainao. Raketo ao anatin’ny diary fandalinanao ny eritreritrao sy ny zavatra tsapanao.
Omeo fahafahana hisafidy ny soratra masina izay hianarany mandritra ity sahanasa ity ny mpianatra. Ho an’ireo mpianatra izay mila fitarihana momba ny andinin-tsoratra masina tokony hosafidiny dia omeo safidy vitsivitsy toy ireto manaraka ireto izy ireo:
-
Enôsa 1:1–17 (Mivavaka amin’ Andriamanitra i Enôsa.)
-
Môzià 3:1–20 (Maminany momba an’i Jesoa Kristy i Benjamina Mpanjaka.)
-
Almà 36:1–30 (Mamariparitra ny famelana ny fahotana i Almà.)
-
Mosesy 1:1–39 (Miresaka amin’ Andriamanitra sy manda an’i Satana i Mosesy.)
Rehefa ampy ny fotoana nanaovana izany dia asehoy ireto fanontaniana manaraka ireto ary asao ny mpianatra hirakitra an-tsoratra ny valintenin’izy ireo ao amin’ny diary fandalinan’izy ireo.
-
Tamin’ny fomba ahoana no nanampian’ny fandalinana sy ny fisaintsainana ny soratra masina tamin’ny fanomanana anao handray fanambarana amin’ny alalan’ny Fanahy Masina?
-
Inona no nampianarin’izany zavatra niainana izany anao momba ny Ray any An-danitra sy i Jesoa Krity ary ny Fanahy Masina?
-
Inona no azonao atao na tokony hotohizanao mba handraisana fanampiana sy fanambarana fanampiny avy amin’ny Tompo?
Mijoroa ho vavolombelona momba ny fahafahan’ny fisaintsainana sy fandalinana ny soratra masina amin’ny fomba misy tanjona kokoa sy matetika kokoa mampanakaiky kokoa ny mpianatra amin’ny Ray any An-danitra sy i Jesoa Kristy. Amporisiho ny mpianatra mba hanohy hikatsaka fanambarana ombam-bavaka amin’ny alalan’ny fandalinana sy fisaintsainana tsy tapaka ny soratra masina.