Lesson 85: Doktrina at mga Tipan 76

Doktrina at mga Tipan 76:1–19

“Ang mga Mata ng Aming Pang-unawa ay Nabuksan”

Noong Enero 1832, pinagnilayan nina Propetang Joseph Smith at Sidney Rigdon ang kahulugan ng Juan 5:29 habang ginagawa ang inspiradong pagsasalin ng Biblia. Habang nagninilay sila, nakaranas sila ng sunud-sunod na mga pangitain kung saan inihayag ng Panginoon ang mahahalagang katotohanan tungkol sa Kanyang plano. Ang lesson na ito ay makatutulong sa mga estudyante na matuto sa pamamagitan ng kapangyarihan ng Espiritu Santo kapag nag-ukol sila ng oras na pagnilayan ang mga salita ng Tagapagligtas.

Mga Posibleng Aktibidad sa Pag-aaral

Paghahangad ng personal na paghahayag

Maaari mong idispley sa pisara ang mga sumusunod na tanong. Maaaring isulat ng mga estudyante sa kanilang study journal ang kanilang mga sagot sa mga tanong. Maaari mong hilingin sa ilang handang estudyante na magbahagi ng mga sagot na hindi masyadong personal.

• Ano ang ilang kalagayan o sitwasyon na kinakaharap mo, o maaaring makaharap mo, kung saan gusto mong makatanggap ng patnubay mula sa Panginoon sa pamamagitan ng Espiritu Santo?

• Bakit nais mong tulungan ka ng Panginoon sa mga bagay na ito?

Ngayon ay malalaman mo ang isang paraan na maaanyayahan mo ang Panginoon na mangusap sa iyo sa pamamagitan ng Espiritu Santo. Sa iyong pag-aaral, bigyang-pansin ang mga pahiwatig ng Espiritu na makatutulong sa iyo sa isa sa mga sitwasyon o tanong na natukoy mo.

Ang pangitain

Ang sumusunod na buod ay makatutulong na maihanda ang mga estudyante na pag-aralan ang Doktrina at mga Tipan 76. Isipin kung pinakamainam na ikaw mismo ang magbasa o magbuod nito o ipagawa ito sa isang estudyante. Bilang alternatibo, maaari mong anyayahan ang mga estudyante na magbasa mula sa Mga Banal, 1:168 para malaman ang tungkol sa mga sitwasyong humantong sa paghahayag na ito.

Noong Pebrero 16, 1832, sina Joseph Smith, Sidney Rigdon, at 12 iba pang kalalakihan ay nasa silid sa itaas ng tahanan nina John at Elsa Johnson sa Hiram, Ohio. Habang ginagawa nina Joseph at Sidney ang inspiradong pagsasalin ng Biblia, pinag-aaralan nila ang Juan 5:29, isang talata sa banal na kasulatan na naglalarawan sa langit, at gusto pa nilang malaman ang higit pa tungkol dito. Habang nagninilay-nilay sila, nakakita sila ng isang pangitain, na isinulat sa Doktrina at mga Tipan 76. Ipinakita ng Tagapagligtas kina Joseph at Sidney ang magkakasunod na magkakaibang pangitain na nagturo sa kanila ng mahahalagang katotohanan tungkol sa plano ng kaligtasan ng Ama sa Langit.

Ipaliwanag na sa pag-aaral ng mga estudyante ng Doktrina at mga Tipan 76 sa buong linggo, magkakaroon sila ng mga pagkakataong malaman ang tungkol sa maraming iba’t ibang bahagi ng pangitaing ito. Ang lesson ngayon ay nakatuon sa mga turo ng Tagapagligtas at sa mga karanasang nakasulat sa simula ng bahagi 76.

Ang Doktrina at mga Tipan 76 ay nagsimula sa pagbabahagi ng Panginoon ng mahahalagang katotohanan tungkol sa Kanyang sarili.

Basahin ang Doktrina at mga Tipan 76:1–10, at hanapin ang mga salita o parirala na sa palagay mo ay nagpapakita ng nais ni Jesucristo na maunawaan natin tungkol sa Kanya. Tandaan na ang ibig sabihin ng matakot sa Diyos (talata 5) ay sambahin, mahalin, at pagpitaganan Siya.

Kapag nabigyan na ang mga estudyante ng sapat na oras para aralin ang mga talatang ito, sabihin sa kanila na ibahagi ang kanilang mga nalaman. Ang mga tanong na tulad ng mga sumusunod ay maaaring makatulong sa mga estudyante na talakayin ang hangarin ng Tagapagligtas na ihayag ang katotohanan sa kanila sa pamamagitan ng Espiritu Santo.

• Ano ang mas naipaunawa sa iyo ng mga talatang ito tungkol sa Tagapagligtas?

• Paano makakaimpluwensya sa iyo ang mga bagay na ito na nalaman mo tungkol sa Tagapagligtas?

Ang pagninilay sa mga banal na kasulatan ay humahantong sa paghahayag

Basahin ang Doktrina at mga Tipan 76:11–19, at alamin ang ginawa nina Joseph at Sidney bago nila naranasan ang kanilang pangitain.

• Ano sa palagay mo ang mga ginawa nina Joseph at Sidney at naranasan nila ang mga naranasan nila?

  Maaari mong ipaliwanag na bagama’t maaaring hindi natin maranasan ang uri ng pangitain na naranasan nina Joseph at Sidney, ang kanilang karanasan ay makapagtuturo sa atin ng isang alituntunin tungkol sa paghahanda sa ating sarili na tumanggap ng paghahayag mula sa Panginoon sa pamamagitan ng Espiritu Santo.

• Anong katotohanan ang natutuhan mo mula sa mga talatang ito tungkol sa isang paraan na maihahanda natin ang ating sarili na tumanggap ng paghahayag sa pamamagitan ng Espiritu Santo?

Maaaring mabanggit ng mga estudyante ang katotohanang tulad ng sumusunod: Kapag pinag-aralan at pinagnilayan natin ang mga banal na kasulatan nang may panalangin, inihahanda natin ang ating sarili sa pagtanggap ng pang-unawa mula sa Panginoon sa pamamagitan ng Espiritu Santo.

Inilarawan ni Elder D. Todd Christofferson ng Korum ng Labindalawang Apostol kung paano natin mapag-aaralan at mapagninilayan ang mga banal na kasulatan sa paraang humahantong sa paghahayag sa pamamagitan ng Espiritu Santo.

Kapag sinabi kong “pag-aralan,” higit pa ito sa pagbabasa. … Kung minsa’y nawawari kong nagbabasa kayo ng ilang talata, tumitigil sandali para pag-isipan ito, at muling binabasa ang talata, at habang pinag-iisipan ang kahulugan nito, ay nagdarasal kayong maunawaan ito, nag-iisip ng mga tanong, naghihintay ng espirituwal na mga paramdam, at isinusulat ang damdamin at kabatirang dumarating para mas matandaan ito at matuto pa kayo. Sa ganitong pag-aaral, maaaring ilang kabanata o talata lang ang mabasa ninyo sa kalahating oras, pero bibigyan ninyo ng puwang sa inyong puso ang salita ng Diyos, at kakausapin Niya kayo. (D. Todd Christofferson, “Kapag Ikaw ay Nagbalik-loob,” Liahona, Mayo 2004, 11)

• Ano ang ilang balakid na maaaring makahadlang kung minsan sa pagninilay natin? Ano ang makatutulong sa atin na madaig ang mga hadlang na ito?

Maaari kang magbahagi ng karanasan kung saan pinag-aralan at pinagnilayan mo nang may panalangin ang mga banal na kasulatan at nakatanggap ka ng paghahayag. Sabihin sa mga estudyante na magbahagi rin ng anumang karanasan nila.

Sanayin ang pag-aaral at pagninilay nang may panalangin

Maaari mong bigyan ng oras ang mga estudyante sa klase, marahil 7–10 minuto, para mapanalanging pag-aralan at pagnilayan ang mga banal na kasulatan. Ibahagi ang mga sumusunod na tagubilin:

Maglaan ng oras na magsanay sa pag-aaral at pagninilay ng mga banal na kasulatan. Isipin ang kalagayan o sitwasyon na tinukoy mo kanina kung saan gusto mong tulungan ka ng Panginoon. Manalangin na mapatnubayan, pagnilayan ang binabasa mo, at bigyang-pansin ang mga pahiwatig ng Espiritu na makapagbibigay sa iyo ng patnubay o tulong na kailangan mo. Isulat ang mga naisip at impresyon mo sa iyong study journal.

Bigyan ang mga estudyante ng opsiyon na piliin ang mga banal na kasulatan na pag-aaralan nila sa aktibidad na ito. Para sa mga estudyanteng gustong may pagpipilian na mga scripture passage, maaari kang magbigay ng ilang opsiyon, tulad ng mga sumusunod:

• Enos 1:1–17 (Nanalangin si Enos sa Diyos.)

• Mosias 3:1–20 (Nagpropesiya si Haring Benjamin tungkol kay Jesucristo.)

• Alma 36:1–30 (Inilarawan ni Alma ang kapatawaran ng kanyang mga kasalanan.)

• Moises 1:1–39 (Nakipag-usap si Moises sa Diyos at napaglabanan niya si Satanas.)

Pagkatapos ng sapat na oras, ipakita ang mga sumusunod na tanong at sabihin sa mga estudyante na isulat ang kanilang mga sagot sa kanilang study journal.

• Paano nakatulong ang pag-aaral at pagninilay ng mga banal na kasulatan para maihanda ka sa pagtanggap ng paghahayag sa pamamagitan ng Espiritu Santo?

• Ano ang itinuro sa iyo ng karanasang ito tungkol sa Ama sa Langit, kay Jesucristo, at sa Espiritu Santo?

• Ano ang maaari mong gawin, o patuloy na gawin, para makatanggap ng karagdagang tulong at paghahayag mula sa Panginoon?

Patotohanan kung paanong ang pagninilay at pag-aaral ng mga banal na kasulatan nang mas may determinasyon at nang mas madalas ay makapagpapalapit sa mga estudyante sa Ama sa Langit at kay Jesucristo. Hikayatin ang mga estudyante na patuloy na mapanalanging maghangad ng paghahayag sa pamamagitan ng regular na pag-aaral at pagninilay ng mga banal na kasulatan.

Karagdagang Resources

Ano kaya ang naramdaman nina Joseph Smith at Sidney Rigdon nang maranasan nila ang pangitaing ito?

Ang sumusunod na salaysay mula sa Mga Banal, tomo 1 ay naglalarawan ng pag-uusap nina Joseph Smith at Sidney Rigdon nang maranasan nila ang pangitain:

“Ano itong nakikita ko?” Tanong ni Joseph habang siya at si Sidney ay namangha sa mga kagila-gilalas na bagay na nakita nila. Pagkatapos ay kanyang inilarawan kung ano ang nakita niya sa pangitain, at sinabi ni Sidney na, “iyon din ang nakikita ko.” Pagkatapos ay nagtanong din nang gayon si Sidney at inilarawan ang tagpo sa kanyang harapan. Nang matapos siya, sinabi ni Joseph, “iyon din ang nakikita ko.”

Nagsalita sila nang ganito sa loob ng isang oras. …

Nang natapos na ang pangitain, mukhang hinang-hina at maputla si Sidney, pinangibabawan ng kanyang nakita. Ngumiti si Joseph at nagsabing, “hindi sanay si Sidney rito na katulad ko.” (Mga Banal, 1:168–69)

Ano ang naging epekto ng pangitain sa iba?

Tinawag ni Pangulong Brigham Young (1801–1877) ang pangitaing ito na “ang pinakadakilang pangitaing nalaman ko na ibinigay sa mga anak ng tao” (Journal of Discourses, 8:34).

Ipinaliwanag ni Pangulong Wilford Woodruff (1807–1898):

Tutukuyin ko lang ang “Pangitain” [sa bahagi 76], bilang isang paghahayag na nagbibigay ng higit na liwanag, higit na katotohanan at higit na alituntunin kaysa alinmang paghahayag na nasa alinmang aklat na nabasa natin. Malinaw na ipinauunawa sa atin nito ang ating kasalukuyang kalagayan; saan tayo galing, bakit tayo naririto, at saan tayo pupunta. Maaaring malaman ng sinuman ang kanyang magiging bahagi at kalagayan sa pamamagitan ng paghahayag na iyon. (Mga Turo ng mga Pangulo ng Simbahan: Wilford Woodruff [2004], 132)

Anong mga pagpapala ang nagmumula sa pagninilay at pag-aaral ng mga banal na kasulatan?

Ibinahagi ni Pangulong Thomas S. Monson (1927–2018):

Kapag binasa at pinagnilayan natin ang mga banal na kasulatan, madarama natin ang magiliw na mga bulong ng Espiritu sa ating kaluluwa. Mahahanap natin ang mga sagot sa ating mga katanungan. (Thomas S. Monson, “Hindi Tayo Kailanman Nag-iisa,” Liahona, Nob. 2013, 122.)

Itinuro ni Elder Robert D. Hales (1932–2017) ng Korum ng Labindalawang Apostol:

Kapag nais nating kausapin ang Diyos, nagdarasal tayo. At kapag gusto nating kausapin Niya tayo, sinasaliksik natin ang mga banal na kasulatan; dahil ang Kanyang mga salita ay inihahayag sa pamamagitan ng Kanyang mga propeta. Sa gayo’y tuturuan Niya tayo habang nakikinig tayo sa mga panghihikayat ng Banal na Espiritu. (Robert D. Hales, “Holy Scriptures: The Power of God unto Our Salvation,” Liahona, Nob. 2006, 26–27)

Paano ako mas epektibong makapagninilay-nilay?

Panoorin ang “Paano Ko Nagagawang Pakinggan Siya sa pamamagitan ng Personal na Pag-aaral at Panalangin” (3:01) para makakita ng halimbawa mula kay Elder Dale G. Renlund ng Korum ng Labindalawang Apostol.

Tingnan ang artikulong “Pagninilay: Pagbibigay sa Panginoon ng Inyong Buong Pansin” para sa mga mas kapaki-pakinabang na ideya.

Mga Karagdagang Aktibidad sa Pag-aaral

Iba pang mga halimbawa ng pagninilay na humahantong sa paghahayag

Maaaring makatulong sa mga estudyante na pag-aralan ang iba pang mga halimbawa ng mga tao sa mga banal na kasulatan na nakatanggap ng paghahayag mula sa Panginoon bilang resulta ng pagninilay. Maaari mo silang anyayahang pag-aralan ang mga sumusunod na scripture passage, at hanapin ang mga pagkakatulad ng mga salaysay na ito at ng salaysay nina Joseph Smith at Sidney Rigdon sa Doktrina at mga Tipan 76.

• 1 Nephi 10:17–19; 11:1–6

• Doktrina at mga Tipan 138:1–11

• Joseph Smith—Kasaysayan 1:11–17

Maaaring ilista ng mga estudyante ang mga talatang ito bilang mga cross-reference sa tabi ng Doktrina at mga Tipan 76:19.

Doktrina at mga Tipan 76:5–7. Ihahayag ng Panginoon ang Kanyang mga hiwaga sa mga taong gumagalang at naglilingkod sa Kanya.

Maaaring gamitin ang mga tanong na tulad ng mga sumusunod upang matulungan ang mga estudyante na pag-aralan at talakayin ang Doktrina at mga Tipan 76:5–7:

• Sa iyong palagay, bakit nalulugod ang Panginoon na itanghal at ihayag ang katotohanan sa mga nagmamahal at naglilingkod sa Kanya?

Ang mga hiwaga ay maaaring tumukoy sa mga espirituwal na katotohanan na malalaman lamang sa pamamagitan ng paghahayag.

• Ano ang ilang halimbawa ng mga hiwaga na maaaring ihayag ng Diyos sa mga naglilingkod sa Kanya?

Sabihin sa mga estudyante na bumuo ng maliliit na grupo at maglaan ng ilang minuto upang ilista ang mga paraan na patuloy nilang mapaglilingkuran ang Panginoon nang may lubos na kabutihan. Kapag tapos na sila, maaari nilang ibahagi sa klase ang natukoy nila.

Isang pagkakataon na ipaliwanag at ipamuhay

Ang magasing Para sa Lakas ng mga Kabataan ay may bahaging “Mga Tanong at mga Sagot” kung saan nagtatanong ang mga kabataan at sasagutin ang mga ito ng iba pang kabataan. (Para sa halimbawa, tingnan sa “Mga Tanong at mga Sagot” sa isyu ng Oktubre 2022.)

Sabihin sa mga estudyante na kunwari ay kailangan nilang sagutin ang tanong na “Paano ako makatatanggap ng paghahayag mula sa Panginoon?” Sabihin sa kanila na maglaan ng ilang minuto na mapanalanging sumulat ng sagot batay sa itinuturo sa Doktrina at mga Tipan 76:1–19. Sabihin sa kanila na pag-isipang isama sa kanilang sagot ang sumusunod:

• Mga partikular na salita o parirala mula sa Doktrina at mga Tipan 76:1–19

• Ang nalalaman nila tungkol sa Ama sa Langit, kay Jesucristo, at sa Espiritu Santo na nagbibigay sa kanila ng tiwala na makatutulong ang mga ibinigay na mungkahi

• Mga karanasan mula sa sarili nilang buhay o sa buhay ng iba na naglalarawan ng mga puntong sinasabi nila

Bigyan ang mga estudyante ng sapat na oras na isulat ang kanilang mga sagot. Maaari mong anyayahan ang lahat ng estudyante na isulat ang kanilang mga sagot sa isang papel at sama-samang gumawa ng “magasin” ng klase tungkol sa kung paano tumanggap ng paghahayag. Maaaring sumangguni rito ang mga estudyante kapag kailangan nila ito. Maaari mong anyayahan ang mga estudyante na magtakda ng mithiin sa kung paano maglaan ng oras na pagnilayan ang mga salita ng Tagapagligtas.