Lesson 88: Doktrina at mga Tipan 76

Doktrina at mga Tipan 76:71–112

“Matatatag sa Pagpapatotoo kay Jesus”

Matapos makakita ng iba’t ibang pangitain, kabilang na ang mga pangitain tungkol sa kaluwalhatian ng Ama at Anak, ang pagbagsak ni Lucifer, at ang kahariang selestiyal, nakita nina Joseph Smith at Sidney Rigdon ang mga magmamana ng kahariang terestriyal at telestiyal. Ang bukod-tanging katangian ng mga nasa kahariang terestriyal ay hindi sila matatag sa kanilang pagpapatotoo kay Jesus. Ang lesson na ito ay makatutulong sa mga estudyante na maging mas matatag sa kanilang pagpapatotoo kay Jesucristo.

Mga Posibleng Aktibidad sa Pag-aaral

Isang Pagpapatotoo kay Jesucristo

Maaari mong isulat ang mga salitang Pagpapatotoo kay Jesucristo sa pisara. Itanong sa mga estudyante kung ano sa palagay nila ang ibig sabihin ng pagkakaroon ng patotoo tungkol sa Tagapagligtas. Kung kinakailangan, ipaliwanag na ang patotoo ay isang bagay na alam nating totoo sa ating puso at isipan na ibinigay sa atin sa pamamagitan ng pagpapatunay ng Espiritu Santo (tingnan sa Doktrina at mga Tipan 8:2). Pagkatapos ay talakayin ang sumusunod na tanong:

Magtanong ng mga bagay na nag-aanyaya ng introspeksyon: Para sa karagdagang training kung paano ito gawin, tingnan ang training na may pamagat na “Lumikha ng mga kapaligiran at oportunidad upang maturuan ng Espiritu Santo ang mga mag-aaral” na makikita sa Mga Kasanayan para sa Pag-unlad ng Guro: Magturo sa Pamamagitan ng Espiritu. Maaari mong sanayin ang kasanayan sa pamamagitan ng paggawa ng mga pagsusuri sa sarili para sa estudyante tungkol sa isang doktrina, katotohanan, o alituntunin.

• Paano makakaapekto sa inyo ang patotoo tungkol sa Tagapagligtas sa buhay na ito at sa buong kawalang-hanggan?

Anyayahan ang mga estudyante na pag-isipan ang sarili nilang mga patotoo tungkol kay Jesucristo, pati na kung paano nakaapekto ang kanilang mga patotoo sa kanilang mga ginagawa. Maaari mo rin silang anyayahang pag-isipan ang mga ninanais nila para sa kanilang mga patotoo.

Hikayatin ang mga estudyante sa kanilang pag-aaral na maghanap ng mga turo na makatutulong sa kanila na maunawaan ang kahalagahan ng pagkakaroon ng patotoo tungkol kay Jesucristo at pamumuhay ayon sa nalalaman nila.

Pangitain tungkol sa mga kaharian ng kaluwalhatian

Maaari mong anyayahan ang mga estudyante na ibuod ang napag-aralan na nila tungkol sa pangitaing nakasulat sa Doktrina at mga Tipan 76. Pagkatapos ay ipaliwanag ang sumusunod.

Maaaring naaalala ninyo na ang Doktrina at mga Tipan 76 ay naglalaman ng paglalarawan tungkol sa isang dakilang pangitain na ibinigay ng Panginoon kina Joseph Smith at Sidney Rigdon. Bilang bahagi ng kanilang pangitain, nalaman nina Joseph at Sidney ang mga katangian ng mga taong mananahan sa iba’t ibang kaharian ng kaluwalhatian pagkatapos ng Pagkabuhay na Mag-uli.

Maaaring makatulong na ipaliwanag na hindi pag-aaralan ng mga estudyante ang lahat ng talatang naglalarawan sa mga kaharian ng kaluwalhatian sa lesson na ito. Ang kaluwalhatiang selestiyal ay inilarawan sa talata 50–70, 92–96; ang kaluwalhatiang terestriyal sa talata 71–80; at ang kaluwalhatiang telestiyal sa talata 81–90, 98–112. Maaari mong sabihin sa mga estudyante na markahan o lagyan ng label ang mga talatang ito sa kanilang mga banal na kasulatan upang mas detalyado nila itong mapag-aralan nang mag-isa.

Basahin ang mga sumusunod na banal na kasulatan, at alamin ang mga pagkakaiba sa mga patotoo ng mga nananahan sa bawat isa sa mga kaharian ng kaluwalhatian:

• Doktrina at mga Tipan 76:51–52 (selestiyal)

• Doktrina at mga Tipan 76:75, 79 (terestriyal)

• Doktrina at mga Tipan 76:82, 101–103 (telestiyal)

Kapag tapos nang mag-aral ang mga estudyante, anyayahan silang talakayin ang mga sumusunod na tanong bilang isang klase o sa maliliit na grupo:

• Anong mga pagkakaiba ang napansin ninyo sa pagitan ng mga patotoo ng mga grupong ito?

• Ano ang maituturo nito sa inyo tungkol sa uri ng patotoo na kinakailangan upang mamana ang kahariang selestiyal?

Tulungan ang mga estudyante na tumukoy ng katotohanan na tulad ng sumusunod: Kung tayo ay matatag sa pagpapatotoo kay Jesucristo, makakamtan natin ang kahariang selestiyal ng Diyos.

Matatag sa ating pagpapatotoo kay Jesucristo

• Ano sa inyong palagay ang ibig sabihin ng pagiging matatag sa ating mga pagpapatotoo kay Jesucristo?

Bilang bahagi ng inyong talakayan tungkol sa naunang tanong, maaari mong anyayahan ang mga estudyante na pag-aralan ang 2 Nephi 31:20–21 at hanapin ang mga turo na makadaragdag sa kanilang pang-unawa. Maaari ding makatulong ang sumusunod na pahayag.

Tinutulungan tayo ni Elder Quentin L. Cook ng Korum ng Labindalawang Apostol na maunawaan ang ibig sabihin ng pagiging matatag sa pagpapatotoo kay Jesus:

Nilinaw sa ika-76 na bahagi ng Doktrina at mga Tipan na ang pagiging “matatatag sa pagpapatotoo kay Jesus” [Doktrina at mga Tipan 76:79] ang simple at mahalagang pagsubok sa pagitan ng mga magmamana ng mga pagpapala ng kahariang selestiyal at ng mga mapupunta sa kahariang terestriyal. Upang maging matatag, kailangan nating magtuon sa kapangyarihan ni Jesucristo at sa Kanyang nagbabayad-salang sakripisyo upang mapagtagumpayan ang kamatayan at, sa pamamagitan ng pagsisisi, malinis tayo mula sa kasalanan, at kailangan nating sundin ang doktrina ni Cristo. [tingnan sa 2 Nephi 31:17–21]. Kailangan din natin ang liwanag at kaalaman tungkol sa buhay at mga turo ng Tagapagligtas na gagabay sa atin sa pagtupad ng tipan, pati na sa mga sagradong ordenansa sa templo. Dapat tayong maging matatag kay Cristo, magpakabusog sa Kanyang salita, at magtiis hanggang wakas [2 Nephi 31:20–21]. (Quentin L. Cook, “Matatag sa Pagpapatotoo kay Jesus,” Liahona, Nob. 2016, 43)

• Sa anong dahilan maaaring maging mahirap para sa inyo o sa iba na manatiling matatag sa inyong pagpapatotoo kay Jesucristo?

• Ano ang tumutulong sa inyo na magsikap na maging matatag sa inyong pagpapatotoo sa Tagapagligtas?

Bilang bahagi ng talakayan tungkol sa naunang tanong, maaari mong anyayahan ang mga estudyante na maghanap at magbahagi ng mga banal na kasulatan na humihikayat sa kanila na maging matatag sa kanilang pagpapatotoo kay Jesucristo. Maaari mong imungkahi na magsimula sila sa Helaman 5:12.

Gumawa ng plano

Pagnilayan sandali kung ano ang magagawa ninyo para maging mas matatag sa inyong pagpapatotoo kay Jesucristo. Kumpletuhin ang tatlong sumusunod na pahayag sa inyong study journal.

1. Maaari akong maging matatag sa aking pagpapatotoo kay Jesus ngayon sa pamamagitan ng …

2. Maaari akong maging matatag sa aking pagpapatotoo kay Jesus sa susunod na ilang buwan sa pamamagitan ng …

3. Matutulungan ko ang iba na manatiling matatag sa kanilang mga pagpapatotoo kay Jesus sa pamamagitan ng …

Maaari mong anyayahan ang ilang estudyante na komportableng magbahagi ng isa o mahigit pa sa kanilang mga nakumpletong pahayag. Para tapusin ang lesson, anyayahan ang isang tao na ibahagi ang kanyang patotoo tungkol kay Jesucristo o magbahagi ka ng sarili mong patotoo tungkol sa Kanya.

Karagdagang Resources

Ano ang naging epekto ng mga turo ng Doktrina at mga Tipan 76 sa mga naunang miyembro ng Simbahan?

Nagsalita si Pangulong Wilford Woodruff (1807–1898) tungkol sa kanyang mga impresyon sa paghahayag na ito:

Itinuro sa akin noong bata pa ako na may isang Langit at isang Impiyerno, at sinabi sa akin na ang masasama ay may isang kaparusahan at ang mabubuti ay may isang kaluwalhatian. …

… Nang mabasa ko ang pangitain … , binigyang-linaw nito ang aking isipan at nakaramdam ako ng labis na kagalakan, at para sa akin ang Diyos na nagpahayag ng alituntuning ito sa tao ay matalino, makatarungan at totoo, taglay ang pinakamagagandang katangian at mabuting isipan at kaalaman. Nadama kong hindi pabagu-bago ang kanyang pagmamahal, awa, katarungan at paghatol, at minahal ko nang higit ang Panginoon. (Wilford Woodruff, “Remarks,” Deseret News, Mayo 27, 1857, 91)

Doktrina at mga Tipan 76:72–74. Ano ang ibig sabihin ng mamanahin ng mga “namatay nang walang batas” ang kahariang terestriyal?

Mula sa Doktrina at mga Tipan 76:72–74, nalaman natin na ang ilang tao sa kahariang terestriyal ay ang mga “namatay nang walang batas” at “hindi tumanggap ng patotoo ni Jesus sa laman” ngunit ginawa ito sa daigdig ng mga espiritu. Gayunpaman, mahalagang maunawaan na ang ilang taong tinuturuan ng ebanghelyo sa daigdig ng mga espiritu ay magmamana ng kahariang selestiyal. Sa pamamagitan ni Propetang Joseph Smith, inihayag ng Panginoon na “lahat ng nangamatay na walang kaalaman sa ebanghelyong ito, na kanilang tatanggapin ito kung sila lamang ay pinahintulutang manatili, ay magiging mga tagapagmana ng kahariang selestiyal ng Diyos” (Doktrina at mga Tipan 137:7).

Doktrina at mga Tipan 76:79. Paano ako magiging matatag sa aking pagpapatotoo kay Jesus?

Ipinaliwanag ni Pangulong Ezra Taft Benson (1899–1994):

Yaong [matatatag sa pagpapatotoo kay Jesus] ay matapang sa pagtatanggol sa katotohanan at kabutihan. Sila ay mga miyembro ng Simbahan na tumutupad sa kanilang mga tungkulin sa Simbahan (tingnan sa Doktrina at mga Tipan 84:33), nagbabayad ng kanilang ikapu at mga handog, namumuhay nang may malinis na moralidad, sinasang-ayunan ang kanilang mga lider ng Simbahan sa salita at gawa, iginagalang ang araw ng Sabbath, at sinusunod ang lahat ng kautusan ng Diyos. (Ezra Taft Benson, “Valiant in the Testimony of Jesus,” Ensign, Mayo 1982, 63)

Paano makakaapekto sa buhay ko ang aking pagpapatotoo kay Jesucristo?

Itinuro ni Elder Dieter F. Uchtdorf ng Korum ng Labindalawang Apostol:

Ang patotoo ay nagbibigay ng wastong pananaw, paghihikayat, at matibay na pundasyong pagtatatagan ng buhay na may layunin at personal na pag-unlad. Palagian itong pinagmumulan ng tiwala, tunay at tapat na [kasama] sa mga oras ng kaligayahan at kalungkutan. Ang patotoo ay nagbibigay sa atin ng dahilan para umasa at magalak. Tinutulungan tayo nitong magkaroon ng magandang pananaw at kaligayahan at nakapagpapagalak sa atin sa ganda ng kalikasan. Ang patotoo ay naghihikayat sa ating piliin ang tama sa lahat ng oras at sa lahat ng sitwasyon. Hinihikayat tayo nitong lumapit pa sa Diyos, [na nagbibigay-daan upang mas makalapit] Siya sa atin (tingnan sa Santiago 4:8).

Ang personal nating patotoo ay pananggalang, at gaya ng gabay na bakal ligtas tayo nitong ginagabayan sa gitna ng kadiliman at pagkalito. (Dieter F. Uchtdorf, “Ang Bisa ng Personal na Patotoo,” Liahona, Nob. 2006, 39)

Mga Karagdagang Aktibidad sa Pag-aaral

Doktrina at mga Tipan 76:40–43. Mabubuting balita para sa lahat

Maaaring maghanda ang mga estudyante na pag-aralan ang talata 40–43 sa pamamagitan ng pagtalakay sa mga tanong na gaya ng mga sumusunod:

• Ano ang ilang mabuting balita na natanggap ninyo kamakailan?

• Ano ang ilang halimbawa ng mga pinakadakilang balita na ibinigay sa mundo?

Sabihin sa mga estudyante na basahin ang Doktrina at mga Tipan 76:40–43, at hanapin ang mabubuting balita mula sa langit. Ipaliwanag na ang salitang ebanghelyo sa talata 40 ay nangangahulugang “mabubuting balita.”

• Anong mabubuting balita ang nakita ninyo sa mga talatang ito?

Upang matulungan ang mga estudyante na maunawaan ang ibig sabihin ng “inililigtas [ni Jesucristo] ang lahat ng gawa ng kanyang mga kamay” (Doktrina at mga Tipan 76:43), ipaliwanag na ang mga magmamana ng kahariang selestiyal ay tatanggap ng mga pagpapala ng kadakilaan, o buhay na walang hanggan, sa piling ng Ama sa Langit. Ngunit dahil sa Kanyang awa, nagbibigay din ang Tagapagligtas ng iba’t ibang pagpapala ng kaligtasan sa iba pang kaharian ng kaluwalhatian sa mga taong hindi karapat-dapat para sa kahariang selestiyal.

Maaari mong ipanood ang video na “Salvation and Exaltation” mula sa time code na 2:55 hanggang 6:05 upang matulungan ang mga estudyante na mas maunawaan ang kaligtasang ibinibigay ng Tagapagligtas sa mga anak ng Ama sa Langit.

Doktrina at mga Tipan 76:75. “Nabulag ng panlilinlang ng mga tao”

Upang matulungan ang mga estudyante na mas maunawaan ang simbolismo sa talata 75, maaari mong anyayahan ang isang estudyante na handang mapiringan ang kanyang mga mata. Pagkatapos, sabihin sa isa pang estudyante na bigyan ang unang estudyante ng mga tagubilin para sa mga simpleng gawain, tulad ng pagdodrowing ng isang simpleng larawan o paglalagay ng isang bagay sa isang bahagi ng silid. Pagkatapos ng sapat na oras, alisin ang piring at sabihin sa estudyanteng ito na ilarawan kung ano ang naranasan niya.

Pagkatapos ay maaaring pag-aralan ng mga estudyante ang Doktrina at mga Tipan 76:75, at alamin ang paglalarawan sa mga taong magmamana ng kahariang terestriyal. Maaari mong sabihin sa mga estudyante na talakayin kung ano sa palagay nila ang ibig sabihin ng pagiging bulag sa espirituwal at kung paano sila maaaring limitahan ng espirituwal na pagkabulag. Pagkatapos ay sabihin sa mga estudyante na tukuyin ang ilan sa mga bagay na maaaring magdulot ng espirituwal na pagkabulag sa mga tinedyer ngayon.

Doktrina at mga Tipan 76:111. “Sa mga mansiyong inihanda”

Matapos pag-aralan ng mga estudyante ang tatlong antas ng kaluwalhatian, maaari mo silang tulungang maiugnay ang natutuhan nila sa mga turo ng Tagapagligtas sa Bagong Tipan. Ipabasa nang malakas sa isang estudyante ang Juan 14:2 at sabihin sa mga miyembro ng klase na ibahagi kung ano ang nauunawaan nila mula sa mga salita ng Tagapagligtas. Sabihin sa kanila na i-cross reference ang Juan 14:2 sa Doktrina at mga Tipan 76:111 at hanapin ang mga pagkakatulad ng dalawang passage.