“Lesson 86—Doktrina at mga Tipan 76:19–24: ‘Ito ang Patotoo … Na Aming Ibibigay tungkol sa Kanya,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 76:19–24,” Manwal ng Titser ng Seminary para sa Doktrina at mga Tipan
Lesson 86: Doktrina at mga Tipan 76
Doktrina at mga Tipan 76:19–24
“Ito ang Patotoo … Na Aming Ibibigay tungkol sa Kanya”
Sa mga pangitaing nakasulat sa Doktrina at mga Tipan 76, nakita nina Joseph Smith at Sidney Rigdon si Jesucristo mismo. Nalaman nila kung paano naging pinakamahalaga ang Tagapagligtas sa ating kaligtasan at pagkatapos ay nagpatotoo sila tungkol sa Kanya. Ang lesson na ito ay makatutulong sa mga estudyante na makadama ng ibayong pagmamahal kay Jesucristo at sa Kanyang tungkulin sa plano ng Ama sa Langit.
Mga Posibleng Aktibidad sa Pag-aaral
Si Jesucristo ay mahalaga sa akin
Bigyan ng pagkakataon ang mga estudyante na talakayin kung bakit mahalaga sa kanila si Jesucristo. Maaari mong gamitin ang sumusunod na sitwasyon, o maaari mong anyayahan ang mga estudyante na gumawa ng ibang sitwasyon.
Magkasama sina Abbey at Sarika sa ilang klase sa paaralan. Isang araw, nang tanghalian, tumingin si Sarika kay Abbey at sinabing, “Sa buong buhay ko, naririnig kong pinag-uusapan ng mga tao si Jesus. Narinig pa nga kita na sinasabi mong naniniwala ka sa Kanya. Wala talaga akong alam tungkol kay Jesus, at gusto kong malaman ang tungkol sa Kanya. Ano ang masasabi mo sa akin tungkol sa Kanya, o kung bakit siya mahalaga sa iyo?”
-
Kung ikaw si Abbey, ano ang sasabihin mo kay Sarika?
Bago sabihin sa ilang estudyante na sumagot, maaari mo silang bigyan ng oras na pag-isipan ang sasabihin nila. Maaaring makatulong sa mga estudyante na gumawa ng listahan sa kanilang study journal tungkol sa mga bagay na sa tingin nila ay dapat malaman ng lahat ng tao tungkol kay Jesus.
Isipin kung ano ang nadarama mo tungkol kay Jesucristo at kung gaano ka kakomportableng magsalita sa iba ng tungkol sa Kanya. Sa pag-aaral mo ngayon, hanapin ang mga turo na tutulong sa iyo na makadama ng higit na pagmamahal kay Jesucristo.
Pangitain tungkol sa Anak ng Diyos
Maaaring makatulong na anyayahan ang mga estudyante na ibahagi ang naaalala nila tungkol sa mga kalagayang humantong sa pagkakita nina Joseph Smith at Sidney Rigdon sa pangitaing isinulat sa Doktrina at mga Tipan 76. Kung kinakailangan, ipaalala sa kanila na habang pinagninilayan nina Joseph Smith at Sidney Rigdon ang mga banal na kasulatan, “hinipo ng Panginoon ang mga mata ng [kanilang] pang-unawa” (Doktrina at mga Tipan 76:19), at nakakita sila ng kamangha-manghang pangitain.
Ang Doktrina at mga Tipan 76:22–24 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Basahin ang Doktrina at mga Tipan 76:1–6, 19–24, at alamin ang ipinahayag nina Joseph at Sidney tungkol sa Ama sa Langit at kay Jesucristo.
Hikayatin ang mga estudyante na tandaan ang malalaman nila sa kanilang banal na kasulatan. Halimbawa, maaari silang gumawa ng listahan ng mga malalaman nila sa kanilang study journal.
Bilang alternatibo, maaari kang magbigay ng ilang malalaking papel kung saan maisusulat ng mga estudyante ang natutuhan nila. Kapag tapos na ang mga estudyante, maaari mong ipaskil ang mga papel sa mga pader sa silid-aralan. Maaaring lumibot ang mga estudyante sa silid para basahin ang natuklasan ng iba at pagkatapos ay magdrowing ng puso sa tabi ng nagustuhan nila o ng gusto nilang malaman pa. Bigyan ng oras ang mga estudyante na talakayin ang natuklasan nila.
-
Anong mga katotohanan mula sa mga talatang ito ang pinakanapansin mo? Bakit?
Maaaring marami kang nakitang katotohanan sa mga talatang ito. Sa mga ito, maaaring napansin mo na:
-
Si Jesucristo ay maawain at nalulugod Siya na pagpalain tayo kapag iginagalang at pinaglilingkuran natin Siya (talata 5).
-
Si Jesucristo ay isang buhay at niluwalhating nilalang (talata 22).
-
Si Jesucristo ang Bugtong na Anak ng Ama (talata 23).
-
Sa ilalim ng pamamahala ng Ama sa Langit, si Jesucristo ang Lumikha ng lahat ng bagay (talata 24).
-
Ano ang ipinauunawa sa iyo ng mga katotohanang ito tungkol sa kung paano makatutulong si Jesucristo sa iyo at sa iba?
Ang sumusunod na mga aktibidad ay makatutulong sa mga estudyante na mapalalim ang kanilang pang-unawa at madama ang kahalagahan ng dalawa sa mga katotohanang itinuturo ng mga talatang ito. Maaari kang pumili ng isa o dalawang aktibidad na sama-samang pag-aaralan bilang isang klase. O maaari mong ipakita ang mga tagubilin sa aktibidad at i-assign ang maliliit na grupo o magkakapartner para kumpletuhin ang isa o lahat ng aktibidad nang magkasama.
Aktibidad A: Si Jesucristo ay buhay!
Kung kinakailangan, magbigay ng naka-print na kopya ng mga titik ng himnong “Buhay ang Aking Manunubos” (Mga Himno, blg. 78) para magamit ng mga estudyante. Kung sama-sama ninyong gagawin ang aktibidad na ito bilang isang klase, maaari ninyong kantahin ang himno sa bahaging ito ng lesson.
Bukod pa sa pag-aaral ng mga estudyante ng himno sa hakbang 3, maaari mo rin silang anyayahang maghanap ng mga banal na kasulatan o pahayag mula sa mga lider ng Simbahan na naglalarawan kung ano ang magagawa ng Tagapagligtas para sa atin dahil Siya ay buhay. Kabilang sa mga halimbawa ng mga banal na kasulatan na maaari mong imungkahi ang Juan 6:40; Filipos 4:13; Doktrina at mga Tipan 58:42; 84:88.
Maaari mo ring gamitin ang isa sa mga video sa ilalim ng heading na “Mga karagdagang video: Siya ay buhay!” sa “Mga Karagdagang Aktibidad sa Pag-aaral.”
-
Maaari mong markahan ang mga salitang “siya ay buhay!” sa talata 22 sa paraang magiging kapansin-pansin ang mga ito sa iyong banal na kasulatan.
-
Isulat ang pariralang Dahil si Jesucristo ay buhay … sa iyong study journal.
-
Basahin ang mga titik ng himnong “Buhay ang Aking Manunubos” (Mga Himno, blg. 78), at hanapin ang mga halimbawa ng kung paano ka matutulungan ni Jesucristo dahil Siya ay buhay.
-
Magsulat ng kahit limang paraan na makukumpleto mo ang pariralang pinakamahalaga sa iyo.
Aktibidad B: Si Jesucristo ang Lumikha ng lahat ng bagay
Upang matulungan ang mga estudyante na mas makapaghandang tumugon sa hakbang 4, maaari mong ibahagi ang pahayag ni Pangulong Boyd K. Packer sa “Karagdagang Resources.”
-
Maaari mong markahan ang pariralang “sa kanya, at sa pamamagitan niya, at mula sa kanya, ang mga daigdig ay nililikha at nalikha” (talata 24) sa paraang magiging kapansin-pansin ang pariralang ito sa iyong mga banal na kasulatan.
-
Maghanap ng mga banal na kasulatan o pahayag mula sa mga lider ng Simbahan na nagpapalalim sa iyong pag-unawa sa tungkulin ni Jesucristo bilang Tagapaglikha. Kabilang sa mga halimbawa ng mga banal na kasulatan na maaari mong pag-aralan ang Juan 1:1–3; 3 Nephi 9:15; Doktrina at mga Tipan 93:9–10; Moises 1:33; 7:30.
-
Talakayin ang ilan sa mga nilikha ng Tagapagligtas na nakatutulong sa iyo na madama ang pagmamahal ng Ama sa Langit at ni Jesucristo. Ipaliwanag kung bakit.
-
Magsulat ng kahit tatlong paraan na nadarama mo na matutulungan ka ni Jesucristo dahil Siya ang Lumikha ng lahat ng bagay.
Kapag nakumpleto na ng mga estudyante ang aktibidad o mga aktibidad, ipabahagi sa kanila ang natutuhan at nadama nila. Tiyaking anyayahan silang ibahagi ang natutuhan nila tungkol sa kung paano sila matutulungan ni Jesucristo dahil Siya ay buhay at dahil Siya ang Tagapaglikha. Maaaring ibahagi ng mga estudyante ang kanilang mga ideya nang nakaupo sa kanilang upuan, o maaari mong anyayahan ang mga estudyante na pumunta sa harapan ng silid upang ibahagi ang kanilang patotoo tungkol kay Jesucristo.
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at balikan ang mga ito sa mga susunod na lesson. Ang mahalagang parirala ng banal na kasulatan ay “Sa pamamagitan [ni Jesucristo] ang mga daigdig ay nililikha at nalikha.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”