87-р хичээл: Сургаал ба Гэрээ 76

Сургаал ба Гэрээ 76:50–70

“Есүсээр дамжин төгс болгогдсон”

Иосеф Смит, Сидней Ригдон хоёрын үзсэн алдар суугийн хаант улсуудын талаарх үзэгдлээс бид селестиел хаант улсыг өвлөн авах бүх хүний амьдралд Есүс Христ ямар чухал үүрэг гүйцэтгэдэг талаар ойлголтыг олж авдаг. Энэ хичээл нь суралцагчдад Есүс Христээр дамжуулан өргөмжлөлийг хүлээн авч чадна гэсэн итгэл найдварыг мэдрэхэд туслах зорилготой.

Боломжит суралцах үйл ажиллагаа

Селестиел хаант улсыг олж авах боломжтой юу?

Дараах жишээг хуваалцаад, дагалдах асуултуудыг ярилцах талаар бодож үз. Хичээлийн төгсгөлд суралцагчид энэ жишээний талаар санал бодлоо илүү чөлөөтэй хуваалцах боломжтой болно.

Лук бол Бурханд итгэдэг, зөв шударга амьдрахын тулд чадах бүхнээ хийдэг залуу эрэгтэй юм. Тэрээр энэ амьдралын дараа Бурхантай хамт амьдрахуйц зохистой байхыг хүсдэг. Гэсэн хэдий ч Лук зарлигуудыг үргэлж дагаж чаддаггүйгээ, төгс төгөлдрөөс хол байгаагаа ухаарчээ. Заримдаа тэрээр сул дорой байдлаасаа болж шантарч, өөрийгөө селестиел хаант улсад тэнцэх боломжгүй гэж боддог.

• Бусад өсвөр насныхан хэрхэн Луктай адил мэдэрдэг бол?

• Түүний бодлуудаас аль нь зөв, аль нь буруу вэ? Яагаад?

Суралцагчдыг өөрсдийн мэдрэмжийн эсвэл Бурханы оршихуйд эргэн ирж, өргөмжлөлийн адислалуудыг хүлээн авах боломжтой холбоотой асуултуудын талаар бодоход урь. Өргөмжлөл гэдэг нь селестиел хаант улсад Тэнгэрлэг Эцэгтэй хамт мөнхөд орших гэсэн утгатай гэдгийг та тайлбарлаж болно. Судруудад энэ адислалыг мөнх амьдрал гэж бас дурдсан байдаг.

Суралцагчдыг суралцаж байхдаа Есүс Христээр дамжуулан тэд болон бусад хүн энэ адислалыг хүлээн авч чадна гэсэн илүү их найдварыг мэдрэхэд тусалж болох үнэнүүдийг олж мэдэхэд урамшуул.

Селестиел хаант улсын тухай үзэгдэл

Иосеф Смит, Сидней Ригдон хоёр Библийн орчуулга дээр сүнслэгээр өдөөгдөн ажиллаж байхдаа гайхалтай үзэгдэл харсан гэдгийг та нар санаж байгаа байх. Энэ үзэгдлийн нэг хэсэг болгон тэд тэнгэр нь өөр өөр зэрэглэл буюу алдар суугийн хаант улсуудтай гэдгийг мэдэж авсан. Энэ хичээлээр бид Иосеф, Сидней хоёр селестиел хаант улс болон үүнийг өвлөн авах хүмүүсийн талаар юу сурсанд анхаарлаа хандуулах болно.

Суралцагчдад үзэгдлийн энэ хэсгийг судлахаар бэлтгэхэд нь туслахын тулд дараах гарчиг бүхий хоёр баганатай хүснэгтийг судлах тэмдэглэлийнхээ нэг нүүрэнд зурахад урь.

Хүмүүс селестиел хаант улсад хэрхэн орох тухай	Селестиел хаант улсад орсон хүмүүсийн хүлээн авах адислал

Сургаал ба Гэрээ 76:50–70-ыг уншаад, сурч мэдсэн зүйл дээрээ үндэслэн хүснэгтийг гүйцээ.

Та тэднийг хамтрагчтайгаа шүлгүүдийг уншиж, хүснэгтийг бөглөхөд урьж болно. Та суралцагчдыг уншсан зүйлийнх нь талаар асуулт байвал асуухад урьж болно.

“Нэмэлт эх сурвалж” дахь зарим эх сурвалж тэдний асуултад хариулахад тусалж магадгүй.

• Та нарт энэ шүлгүүдээс юу нь чухал санагдсан бэ? Яагаад?

• Та нар селестиел хаант улсыг өвлөн авах хүмүүсийн амьдралд үзүүлж буй Есүс Христийн нөлөөг хэрхэн дүрслэх вэ?

  Өмнөх асуулттай холбоотой ярилцлагаас суралцагчид дараах үнэнийг ойлгосон байхад анхаар. Есүс Христээр дамжин бид төгс болж, өргөмжлөлийн адислалуудыг хүлээн авч чадна.

• Есүс Христээр дамжин төгс болгогдоно гэдэг нь юу гэсэн үг гэж та нар бодож байна вэ?

• Бид болон бусад хүн хэзээ нэгэн цагт селестиел хаант улсыг өвлөн авна гэсэн итгэл найдварыг мэдрэхэд энэ үнэн хэрхэн тусалж чадах вэ?

Есүс Христээр дамжин ирэх найдвар

Суралцагчдад Есүс Христээр дамжин бидэнд ирэх найдварыг илүү сайн ойлгоход туслахын тулд тэднийг дагалдах тараах материал дээрх үгсийг судлахад урих талаар бодож үз. Өөрсдөд нь чухал санагдсан хэллэгүүдийг тэмдэглэхэд тэднийг урь. Суралцагчдаар ахлагч Ж.Дэвн Корнишийн хэлсэн үгийг уншуулахын оронд ChurchofJesusChrist.org дээрээс “Am I Good Enough?” (3:28) видеог үзүүлж болох юм.

Есүс Христээр дамжин ирэх найдвар

Төгс төгөлдөр болохын тулд Есүс Христийн тусламж яагаад надад хэрэгтэй байна вэ?

Далын ахлагч Ж.Дэвн Корниш ийн хуваалцсан.

Манай гишүүд ихэвчлэн “Би хангалттай сайн хүн мөн үү?” эсвэл “Би үнэхээр селестиел хаант улсад орж чадах уу?” гэж асуудаг. Мэдээж, “хангалттай сайн байна” гэж байдаггүй. Бидний хэн ч авралаа “олж авч” эсвэл “хүртэж” хэзээ ч чадахгүй. Гэхдээ миний ойлгож байгаагаар бид Их Эзэний өмнө хүлээн авагдах эсэхэд гайхах нь хэвийн үзэгдэл юм. …

Би шууд бөгөөд тодорхой хэлье. “Би хангалттай сайн байна уу?” эсвэл “Би хаант улсад орж чадах уу?” гэдэг асуултуудын хариулт нь “Тийм ээ! Та хангалттай сайн хүн болох болно” мөн “Тийм ээ, та өөрийгөө зөвтгөх юм уу Бурханы эсрэг бослого гаргахгүйгээр үргэлжлүүлэн наманчилбал хаант улсад орох болно” гэсэн хариулт юм. Тэнгэрийн Бурхан бол биднийг тоглоомоос хасахын тулд ямар нэгэн шалтаг хайж буй зүрх сэтгэлгүй шүүгч биш юм. Тэр бол бүх хүүхэд нь гэртээ эргэн ирж, гэр бүлийнхэнтэйгээ Өөртэй нь хамт үүрд амьдраасай хэмээн юу юунаас илүү хүсэж тэмүүлдэг, төгс хайраар дүүрэн бидний Эцэг билээ. Тэрээр үнэхээр биднийг мөхөөхгүй, харин мөнх амьтай болгохын төлөө Төрсөн Ганц Хүүгээ өгсөн! Энэхүү мөнхийн үнэнд итгэж, эндээс итгэл найдвар, тайтгарлыг авна уу. Тэнгэрлэг Эцэг маань биднийг Өөр лүү нь буцаж ирнэ гэж хүлээдэг юм шүү! Энэ бол Түүний ажил бөгөөд алдар суу бөлгөө. (Ж.Дэвн Корниш, “Би хангалттай сайн байна уу? Би хаант улсад орж чадах уу?,” 2016 оны 10-р сарын Ерөнхий чуулган, 19–20)

Би “Есүсээр дамжин төгс болгогдох”-ын тулд юу хийж чадах вэ?

Залуу эмэгтэйчүүдийн ерөнхий ерөнхийлөгч асан Кэрол Ф.Макконки эгч ийн заасан.

Бидний ариун байх итгэл найдвар Христэд мөн Түүний нигүүлсэл, ач ивээлд төвлөрдөг. Есүс Христэд болон Түүний Цагаатгалд итгэн, бурханлаг бусаас өөрсдөө татгалзаж [Моронай 10:32–33-ыг үзнэ үү], чин сэтгэлээсээ наманчлах үед цэвэр ариун, толбогүй болох боломжтой. Бид нүглээсээ ангижрахын тулд усанд умбуулах баптисм хүртдэг. Биднийг зүрх сэтгэлээ нээж, Ариун Сүнсийг хүлээн авах үед бодгаль маань ариусдаг юм. Долоо хоног бүр бид ариун ёслолоос хүртдэг. Бид Түүний Сүнсийг өөрсөдтэйгөө үргэлж хамт байлгаж болохын тулд зөв шударга байх чин хүсэлтэй байж, наманчлалын сүнсээр өөрсдөдөө Христийн нэрийг авч, Түүнийг дурсан санаж, зарлигуудыг нь дагахад бэлэн хэмээн гэрээ байгуулдаг. Бид Эцэг, Хүү, Ариун Сүнстэй нэг болохыг үргэлжлүүлэн хичээх явцдаа Тэдний бурханлаг зан чанараас хүртэгчид болдог [2 Петр 1:4-ийг үзнэ үү]. (Кэрол Ф.Макконки, “Ариун байдлын гоо үзэсгэлэн,” 2017 оны 4-р сарын Ерөнхий чуулган, 127–128)

Арван хоёр төлөөлөгчийн чуулгын ахлагч Дэйл Г.Рэнланд ийн заасан.

Бурхан биднийг хэзээ нэгэн цагт ямар хүн байснаас маань илүүтэй, одоо ямар хүн байгаа мөн ямар хүн болж байгааг анхаардаг. Тэр бидний хичээл зүтгэлийг л анхаардаг. (Дэйл Г.Рэнланд, “Хожмын үеийн гэгээнтнүүд шантралгүй хичээсээр байдаг,” 2015 оны 4-р сарын Ерөнхий чуулган, 43)

Суралцагчдад судлах цаг олгосны дараа тэднийг юу сурч, мэдэрсэн тухайгаа ярилцахад урь. Үүнийг хийх нэг арга бол хичээлийн эхэнд энэ жишээг сануулах явдал юм. Та тэднийг Лукт хандан, селестиел хаант улсад орж чадна гэсэн итгэл найдварыг мэдрэхэд туслах хариу бичихэд урьж болно. Хариундаа Сургаал ба Гэрээ 76 дахь сургаал, түүнчлэн судалсан нэг юм уу хэд хэдэн үгээс сурсан ямар нэг зүйлийг оруулахад тэднийг урь. Суралцагчид хариултаа хамтрагчтайгаа хуваалцаж эсвэл нэгтгэн дүгнэж болно. Эсвэл хуваалцах хүсэлтэй суралцагчид хариултаа ангийнхантайгаа хуваалцаж болох юм.

Ойлгож мэдсэн зүйлээ эргэцүүл

Өнөөдөр сурч мэдсэн, мэдэрсэн зүйлээ эргэцүүлэн бодох цагийг суралцагчдадаа олгоод хичээлээ дуусга. Дараах асуултуудыг үзүүлж, суралцагчдад хариултаа судлах тэмдэглэлдээ бичих цаг гаргаж өгч болох юм.

• Та нар өнөөдөр Есүс Христээр дамжуулан найдвар төрүүлэх юуг сурч, мэдэрсэн бэ?

• Та нарын сурсан эсвэл мэдэрсэн зүйл өдөр тутмын чинь амьдралд хэрхэн нөлөөлж болох вэ?

Нэмэлт эх сурвалж

Төгс төгөлдөр болохын тулд Есүс Христийн тусламж яагаад надад хэрэгтэй байна вэ?

Далын ахлагч Пол В.Жонсон ийн хэлсэн.

Бид өөрсдийгөө төгс болгох ёстой гэж боддог ч ийм байх боломжгүй. Өөртөө туслах бүх номыг авч, заавар бүрийг ягштал дагаад ч төгс төгөлдөр болохгүй. Төгс болох цорын ганц зам, цорын ганц нэр өгөгдсөн. Бид бол “шинэ гэрээний зууч Есүсээр дамжин төгс болгогдсон хүмүүс юм. [Тэрээр] өөрийнхөө цус урсгалтаар дамжуулан энэхүү төгс цагаатгалыг үйлдсэн” [Сургаал ба Гэрээ 76:69]. Бурханы ач ивээлээр л бид төгс болох боломжтой. (Пол В.Жонсон, “Түүгээр төгөлдөржигтүн,” Лиахона, 2022 оны 11-р сар, 40–41)

Миний хувьд өргөмжлөлийг олж авах найдвар байгаа юу?

Арван хоёр төлөөлөгчийн чуулгын ахлагч Жэффри Р.Холланд ийн заасан.

Дэндүү оройтчихсон гэж бодож байсан ч, өчнөөн олон боломжоо алдсан гэж бодож байсан ч, би чинь олон алдаа гаргасан шүү дээ гэж бодож байсан ч, ямар нэг авьяас чадваргүй эсвэл гэр орон, гэр бүл, Бурханаасаа хэчнээн их холдчихсон мэт санагдаж байсан ч тэнгэрлэг хайрын хүрэх хязгаарын цаад талд та нар гараагүй шүү гэдгийг би та нарт гэрчилж байна. Христийн Цагаатгалын хязгааргүй гэрэл гэрэлтүүлж чадахааргүй тийм гүнзгий ангал руу та нар орно гэж байхгүй шүү.

Та нар манай шашинд хараахан ороогүй байсан ч эсвэл бидэнтэй хамт байж байгаад тасран явсан байсан ч та нар засаж залруулшгүй алдаа гаргасан байна гэж байхгүй шүү. Ялан дийлж чадахгүй бэрхшээл гэж байхгүй. Цаг хугацаа болон мөнх байдал улиран өнгөрөх тутам олж авч чадахгүй мөрөөдөл гэж байхгүй шүү. (Жэффри Р.Холланд, “Tалбайд хөдөлмөрлөгсөд,” 2012 оны 4-р сарын Ерөнхий чуулган, 34)

Сургаал ба Гэрээ 76:53. “Амлалтын Ариун Сүнсээр лацдагдсан” гэдэг нь юу гэсэн утгатай вэ?

Арван хоёр төлөөлөгчийн чуулгын ахлагч Дэвид А.Бэднар ийн заасан.

Амлалтын Ариун Сүнс бол Ариун Сүнсний батлах хүч юм. Амлалтын Ариун Сүнсээр лацдагдсан үед ёслол, тангараг, гэрээ нь газарт бас тэнгэрт холбодог. (С ба Г 132:7-г үзнэ үү.) Ариун Сүнснээс энэхүү “зөвшөөрлийн тамга”-ыг хүлээн авах нь сайн мэдээний гэрээнүүдэд “цаг хугацааны явцад” (Мосе 7:21) итгэлтэй, үнэнч шударга, хүндэтгэлтэй, тууштай байгаагийн үр дүн юм. Гэсэн хэдий ч энэ лацдан холболтыг зөвт бус байдал, зөрчлийн улмаас алдаж болно. (David A. Bednar, “Ye Must Be Born Again,” Liahona, May 2007, 22)

Сургаал ба Гэрээ 76:54. “Ууган Хүүгийн cүм”-ийн гишүүн байх гэдэг нь юу гэсэн үг вэ?

Ууган Хүүгийн Сүм нь “дараагийн амьдралдаа Бурхан Эцэгийн бүрэн байдлыг, мөн түүний алдар сууг хүлээн авах хүмүүсийг тодорхойлсон нэр томьёо юм” (Glossary, “Church of the Firstborn,” The Joseph Smith Papers, josephsmithpapers.org).

Сургаал ба Гэрээ 76:64–65. “Шударга хүмүүсийн амилуулалт” буюу “анхны амилуулалт” гэж юу гэсэн үг вэ?

Шударга хүмүүсийн амилуулалтыг бас “анхны амилуулалт” (Сургаал ба Гэрээ 76:64) гэж нэрлэдэг ба селестиел, террестриел хаант улсуудыг өвлөн авах бүх хүнийг хэлж буй (Сургаал ба Гэрээ 88:96–99-ийг үзнэ үү). Есүс Христийг амилсны дараа зөв шударга хүмүүсийн булш нээгдсэнээр Анхны амилуулалт эхэлсэн (Матай 27:52–53; Мозая 15:21–24; 3 Нифай 23:9–10-ыг үзнэ үү). Сургаал ба Гэрээнд Есүс Христийн Хоёр дахь ирэлтээр зөвт хүмүүс булшнаасаа гарч ирэх цагийг Анхны амилуулалт гэж үздэг (Сургаал ба Гэрээ 29:13; 45:54; 88:96–99-ийг үзнэ үү). Шударга бус хүмүүсийн амилуулалт буюу “сүүлчийн амилуулалтад” (Сургаал ба Гэрээ 76:85) телестиел хаант улсыг өвлөн авах хүмүүс болон мөхлийн хөвгүүд багтах бөгөөд энэ нь Мянган жилийн төгсгөлд тохиох болно (Сургаал ба Гэрээ 76:85; 88:32, 100–102-ыг үзнэ үү). (Сургаал ба Гэрээний суралцагчийн гарын авлага [2018], 400)

Нэмэлт суралцах үйл ажиллагаа

51–53-р шүлгийг судлах өөр арга

Сургаал ба Гэрээ 76:51–53 нь Бурханы Өөртэй нь адил болоход туслахын тулд бидэнд өгсөн дэмжлэгийг харуулахаас гадна селестиел хаант улс дахь хүмүүсийн сонголтыг ойлгоход бидэнд тусалж чадна. Та суралцагчдыг шүлгийг уншаад, эдгээр шүлэгт дүрслэгдсэн хүмүүсийн сонголтыг хайж олоход урьж болно. Дараа нь суралцагчдыг хамтрагчтайгаа хамтдаа селестиел хаант улсад орох хүмүүс мөнх бус байдалд хэрхэн амьдарч байсан талаар илүү ерөнхий дүгнэлтийг гаргаж ирэхэд урьж болно. Тэд энэ хүмүүсийг алдаа гаргадаг гэж төсөөлж байгаа юу? Тэд өдөр тутмынхаа амьдралын хэв маягтай холбоотой сул талуудыг төсөөлж байна уу?

Сургаал ба Гэрээ 76:53. “Итгэлээр ялж гарах нь.”

Суралцагчдад хэрхэн “итгэлээр ялж гарч” болохыг ойлгоход нь туслахын тулд юуг ялж гарах шаардлагатай байгаа талаар тэднээс асуу. Та тэднийг Мозая 3:19 рүү чиглүүлснээр, эгэл хүнээ ялан дийлэх бидний хэрэгцээний талаар хаан Бенжамин юу заасныг харах боломжтой. Түүнчлэн ерөнхийлөгч Рассэлл М.Нэлсон дэлхийг ялж гарахын ач холбогдлын талаар юу ярьсныг тэдэнтэй хуваалцаарай. Түүний үгээс дараах эсвэл өөрийн сонгосон хэсгийг хуваалцах талаар бодож үз.

Тэгвэл бид ертөнцийг хэрхэн ялах вэ? Бенжамин хаан бидэнд яаж гэдгийг заасан. Тэр бидэнд “эгэл хүн бол Бурханы дайсан” бөгөөд “тэрээр Ариун Сүнсний таталтанд автагдан, эгэл хүмүүнээ орхиж мөн Их Эзэн Христийн цагаатгалаар гэгээнтэн болох … бус аваас үүрд мөн үргэлж тийм байх болно” [Мозая 3:19] хэмээн хэлсэн. Та Сүнсний өдөөлтийг эрэлхийлж, дагах бүрдээ “эгэл хүн[ий]” хийхгүй зүйлийг буюу ямар нэгэн сайн зүйлийг хийх бүрдээ ертөнцийг ялдаг. (Рассэлл М.Нэлсон, “Ертөнцийг ялж, амралтыг олох нь, ”Лиахона, 2022 оны 11-р сар, 97)

Суралцагчдыг сүүлийн үед хийсэн сайн үйлийнхээ (эгэл эрэгтэй, эмэгтэй хүн хийхгүй) жишээг хуваалцахад урих талаар бод.