“88-р хичээл—Сургаал ба Гэрээ 76:71–112: ‘Есүсийн тухай гэрчлэлд нэн хүчтэй,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 76:71–112,” Сургаал ба Гэрээний семинарын багшийн гарын авлага
88-р хичээл: Сургаал ба Гэрээ 76
Сургаал ба Гэрээ 76:71–112
“Есүсийн тухай гэрчлэлд нэн хүчтэй”
Эцэг, Хүү хоёрын алдар суу, Люсиферийн уналт, селестиел хаант улсын тухай хэд хэдэн үзэгдэл үзсэний дараа Иосеф Смит, Сидней Ригдон хоёр террестриел болон телестиел хаант улсыг өвлөн авах хүмүүсийг харсан. Террестриел хаант улс дахь хүмүүсийн нэг ялгарах шинж нь Есүсийг гэрчлэхдээ тийм ч хүчтэй байсангүй. Энэ хичээл нь суралцагчдад Есүс Христийг гэрчлэхдээ нэн хүчтэй болоход тусалж чадна.
Боломжит суралцах үйл ажиллагаа
Есүс Христийн тухай гэрчлэл
Самбарт Есүс Христийн тухай гэрчлэл гэсэн үгийг бичих талаар бодож үз. Суралцагчдаас Аврагчийн тухай гэрчлэлтэй байх нь юу гэсэн үг гэж бодож байгаа талаар асуу. Шаардлагатай бол Ариун Сүнсний гэрчлэлээр оюун, зүрх сэтгэлдээ үнэн гэдгийг мэдэх тэр зүйлийг гэрчлэл гэдгийг тайлбарла (Сургаал ба Гэрээ 8:2-ыг үзнэ үү). Дараа нь дараах асуултын дагуу ярилц.
Өөрийгөө шинжихэд урих асуултуудыг Багшийн хөгжүүлбэл зохих ур чадварын “Суралцагчдад Ариун Сүнсээр заалгах орчин мөн боломжийг бүрдүүлж өг” гарчигтай сургалтаас авна уу. Аливаа сургаал, үнэн эсвэл зарчимтай холбогдуулан суралцагчдаар өөрийг нь үнэлүүлж, уг ур чадвараар дадлага хийлгэхийг бод.
-
Аврагчийн тухай гэрчлэл та нарт энэ амьдралд хийгээд үүрд мөнхөд хэрхэн нөлөөлж чадах вэ?
Суралцагчдыг Есүс Христийн талаарх өөрсдийн гэрчлэлийг, тэр дундаа гэрчлэл нь тэдний үйлдэлд хэрхэн нөлөөлсөн талаар бодоход урь. Мөн та тэднийг гэрчлэл нь ямар байгаасай гэж хүсэж байгаагаа бодоход урьж болно.
Суралцагчдыг Есүс Христийн тухай гэрчлэлтэй байхын, мэддэг зүйлийнхээ дагуу амьдрахын ач холбогдлыг ухаарч ойлгоход туслах сургаалуудыг хайж олоход урамшуул.
Алдар суугийн хаант улсуудын тухай үзэгдэл
Суралцагчдыг Сургаал ба Гэрээ 76-д цэдэглэгдсэн үзэгдлийн талаар өнөөг хүртэл судалсан зүйлээ нэгтгэн дүгнэхэд урихыг бод. Дараа нь дараах зүйлийг тайлбарла.
Сургаал ба Гэрээ 76 нь Их Эзэний Иосеф Смит, Сидней Ригдон хоёрт өгсөн агуу үзэгдлийн дүрслэлийг агуулдаг гэдгийг та нар санаж байгаа байх. Иосеф, Сидней хоёр үзэгдлийн нэг хэсэгт Амилалтын дараа өөр өөр алдар суугийн хаант улсуудад амьдрах хүмүүсийн шинж чанарын талаар сурч мэдсэн.
Суралцагчдад энэ хичээлээр алдар суугийн хаант улсуудыг дүрсэлсэн бүх шүлгийг судлахгүй гэдгийг тайлбарлах нь тустай байж болох юм. Селестиел алдар сууг 50–70, 92–96; террестриел алдар сууг 71–80; телестиел алдар сууг 81–90, 98–112-р шүлгүүдэд тус тус дүрсэлсэн. Суралцагчдыг бие даан илүү нарийвчлан судлахын тулд эдгээр шүлгийг судар дээрээ тодруулах юм уу тэмдэглэхэд урьж болох юм.
Дараах судруудыг уншаад, алдар суугийн хаант улс бүрийн оршин суугчид хэрхэн гэрчлэлээрээ ялгаатай байгааг олж мэд.
-
Сургаал ба Гэрээ 76:51–52 (селестиел)
-
Сургаал ба Гэрээ 76:75, 79 (террестриел)
-
Сургаал ба Гэрээ 76:82, 101–103 (телестиел)
Суралцагчдыг судалж дуусаад ангиараа эсвэл жижиг бүлгээрээ дараах асуултуудын дагуу ярилцахад урь.
-
Та нар эдгээр хэсэг бүлэг хүний гэрчлэлээс ямар ялгааг анзаарсан бэ?
-
Селестиел хаант улсыг өвлөн авахын тулд ямархуу гэрчлэлтэй байвал зохих талаар та нар юу сурсан бэ?
Суралцагчдад дараахтай адил үнэнийг тодорхойлоход тусал. Хэрэв бид Есүс Христийн тухай гэрчлэхдээ нэн хүчтэй байвал Бурханы селестиел хаант улсыг өвлөн авч чадна.
Есүс Христийн тухай гэрчлэлдээ нэн хүчтэй байх
-
Есүс Христийг гэрчлэхдээ нэн хүчтэй байх гэдэг нь юу гэсэн үг гэж та нар бодож байна вэ?
Өмнөх асуултын талаар ярилцахдаа суралцагчдыг 2 Нифай 31:20–21-ийг судлаад, ойлгоход нь нэмэр болох сургаалыг хайж олоход урих талаар бодож үз. Дараах мэдэгдэл мөн тустай байж болно.
Арван хоёр төлөөлөгчийн чуулгын ахлагч Квинтин Л.Күк бидэнд Есүсийн тухай гэрчлэхдээ нэн хүчтэй байх нь юу гэсэн утгатайг ойлгоход тусалсан.
Сургаал ба Гэрээний 76-р хэсэгт “Есүсийн тухай гэрчлэлд нэн хүчтэй” [Сургаал ба Гэрээ 76:79] байх нь селестиел хаант улсын адислалыг өвлөн авах болон арай доогуур террестриел хаант улсад байх тэдний хоорондох энгийн бөгөөд чухал шалгалт гэдгийг тодорхой харуулдаг. Бид нэн хүчтэй байхын тулд Есүс Христэд болон үхлийг давж, наманчлалаар дамжуулан биднийг нүглээс цэвэршүүлэх Түүний цагаатгах золиослолын хүчинд анхаарлаа хандуулан, Христийн сургаалыг дагах хэрэгтэй [2 Нифай 31:17–21-ийг үзнэ үү]. Түүнчлэн бидэнд ариун сүмийн ариун нандин ёслолууд зэрэг гэрээгээ дагахад удирдан чиглүүлэх Аврагчийн амьдрал болоод сургаалын гэрэл, мэдлэг хэрэгтэй. Бид Христэд тууштай итгэн, үгнээс нь зооглож, эцсээ хүртэл тэвчих ёстой [2 Нифай 31:20–21-ийг үзнэ үү]. (Квинтин Л.Күк, “Есүсийн тухай гэрчлэлд нэн хүчтэй байх нь,” 2016 оны 10-р сарын Ерөнхий чуулган, 31)
-
Та нарт болон бусдад Есүс Христийн тухай гэрчлэлдээ нэн хүчтэй үлдэхэд юу саад болж болох вэ?
-
Аврагчийг гэрчлэхдээ нэн хүчтэй байхыг хичээхэд юу тусалдаг вэ?
Суралцагчдыг Есүс Христийг гэрчлэхдээ нэн хүчтэй байхад урамшуулах судруудыг олж, өмнөх асуултын дагуу ярилцах үедээ хуваалцахад урих талаар бодож үз. Та тэднийг Хиламан 5:12-оос эхлэхийг санал болгож болно.
Төлөвлөгөө гаргах
Есүс Христийг гэрчлэхдээ нэн хүчтэй байхын тулд юу хийж болох талаар эргэцүүлэн бодоход ганц хором зарцуул. Судлах тэмдэглэлдээ дараах гурван өгүүлбэрийг гүйцээж бич.
-
Би өнөөдөр …-аар/ээр Есүсийн тухай гэрчлэхдээ нэн хүчтэй байж чадна.
-
Би дараагийн хэдэн сарын турш …-аар/ээр Есүсийн тухай гэрчлэхдээ нэн хүчтэй байж чадна.
-
Би …-аар/ээр Есүсийн тухай гэрчлэхдээ нэн хүчтэй үлдэхэд нь бусдад тусалж чадна.
Гүйцээж бичсэн нэг эсвэл түүнээс олон өгүүлбэрээ хуваалцах хүсэлтэй цөөн хэдэн суралцагчийг хуваалцахад урих талаар бодож үз. Хэн нэгнийг Есүс Христийн тухай гэрчлэлээ хуваалцахад урьж эсвэл Түүний талаарх өөрийн гэрчлэлийг хуваалцсанаар хичээлээ дуусга.