Lesson 89: Doktrina at mga Tipan 77–80

Doktrina at mga Tipan 78

Ang Kamalig ng Panginoon

Iniutos ng Panginoon kina Joseph Smith, Sidney Rigdon, Newel K. Whitney, at iba pang high priest na bumuo ng grupong tinatawag na Nagkakaisang Samahan [United Firm]. Pinamahalaan ng samahan ang mga ari-arian, kamalig, at paglalathala ng Simbahan at nagbigay ito ng resources upang makatulong na tugunan ang mga temporal na pangangailangan ng mga Banal. Ang lesson na ito ay makatutulong sa mga estudyante na madagdagan ang kanilang hangaring maging katulad ng Tagapagligtas sa pamamagitan ng pangangalaga sa mga nangangailangan.

Mga Posibleng Aktibidad sa Pag-aaral

Ang Nagkakaisang Samahan

Ang isang paraan para simulan ang lesson ay sa pamamagitan ng pagtulong sa mga estudyante na gumawa ng isang sitwasyon tungkol sa isang pamilyang may mga temporal na pangangailangan. Bilang bahagi ng sitwasyon, isama ang mga problemang pinansyal na kinakaharap ng pamilya at ang mga partikular na pangangailangan nila. Ang sitwasyong ito ay gagamitin kalaunan sa lesson.

Ipaliwanag na marami pang matututuhan ang mga estudyante tungkol sa mga paraan kung paano tayo tinutulungan ng Panginoon na pangalagaan ang mga nangangailangan habang pinag-aaralan nila ang Doktrina at mga Tipan 78. Anyayahan ang mga estudyante na maghangad ng paghahayag para malaman kung sino ang ninanais ng Panginoon na tulungan nila at kung ano ang magagawa nila.

Noong Marso 1, 1832, nakipagpulong si Propetang Joseph Smith sa isang grupo ng high priest sa Kirtland, Ohio. Sa pulong, idinikta ng Propeta ang paghahayag na nakatala sa Doktrina at mga Tipan 78. Kasunod nito, binuo ang Nagkakaisang Samahan. Batay sa batas ng paglalaan, pinamahalaan ng Nagkakaisang Samahan ang mga ari-arian, gawaing pinansyal, at paglalathala ng Simbahan sa Ohio at Missouri. Sa pamamagitan ng samahan, nagtatag ang Panginoon ng isang kamalig upang pangalagaan ang mga nangangailangan, at tinagubilinan sina Joseph Smith, Sidney Rigdon, at Newel K. Whitney na maglakbay patungong Missouri (Sion) upang isaayos ito.

Basahin ang Doktrina at mga Tipan 78:1–6, at alamin kung bakit ninais ng Panginoon na isaayos ng Kanyang mga tagapaglingkod ang kanilang sarili sa ganitong paraan.

• Ano ang itinuturo ng mga talatang ito tungkol sa mga hangarin ng Panginoon para sa Kanyang mga tao?

• Sa inyong palagay, bakit kailangang pangalagaan ang mga maralita upang “isulong ang adhikain” ng Sion? Paano ito makapagbibigay ng kaluwalhatian sa Ama sa Langit?

Ang kamalig ng Panginoon

Maaaring magdala ng kahon sa klase at lagyan ito ng label na “Ang Kamalig ng Panginoon.” Itanong sa mga estudyante kung ano sa palagay nila ang kamalig ng Panginoon. Maaari kang mag-anyaya ng isang bishop o branch president para talakayin kung paano ginagamit ang kamalig ng Panginoon sa inyong area.

Basahin ang sumusunod na kahulugan ng kamalig ng Panginoon, at alamin kung paano tinutulungan ng Tagapagligtas ang mga nangangailangan.

Ang lahat ng resources na magagamit ng Simbahan para matulungan ang mga taong may mga pangangailangan sa temporal na aspekto ng buhay ay tinatawag na storehouse o kamalig ng Panginoon (tingnan sa Doktrina at mga Tipan 82:18–19). Kabilang dito ang handog ng mga miyembro na oras, talento, pakikiramay, kagamitan, at pera para matulungan ang mga nangangailangan.

Mayroong kamalig ng Panginoon sa bawat ward at stake. Ang mga lider ay kadalasang tinutulungan ang mga indibiduwal at pamilya na makahanap ng mga solusyon sa kanilang mga pangangailangan sa pamamagitan ng paggamit sa kaalaman, kakayahan, at paglilingkod na ibinibigay ng mga miyembro ng ward at stake. (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 22.2.1, ChurchofJesusChrist.org)

Talakayin ang mga partikular na paraan na makapag-aambag ang kabataan sa kamalig ng Panginoon (ibig sabihin, oras, mga talento, pakikiramay, kagamitan, pera). Bigyan ng isang piraso ng papel ang mga estudyante. Sabihin sa mga estudyante na magsulat ng kahit isang partikular na bagay na personal nilang maiaambag sa kamalig ng Panginoon at pagkatapos ay ilagay ang kanilang papel sa kahon.

Anyayahan ang isang estudyante na tanggalin ang mga bagay sa kamalig at pangasiwaan ang talakayan tungkol sa kung paano makatutulong ang mga partikular na kontribusyon sa pamilya sa sitwasyong ginawa ng klase. Ulitin ang aktibidad na ito nang ilang beses.

Ang sumusunod na pahayag ay ginawa upang mapag-isipan ng mga estudyante nang mag-isa.

Isipin kung gaano ka kahandang mag-ambag ng iyong oras, mga talento, at resources para tulungan ang mga nangangailangan (handang-handa, medyo handa, o hindi masyadong handa).

Hikayatin ang mga estudyante na maghangad ng inspirasyon sa pamamagitan ng Espiritu Santo para matulungan sila na mas maging handang tulungan ang mga nangangailangan at para‌ din malaman ang mga paraan na makapag-aambag sila sa kamalig ng Panginoon.

Basahin ang Doktrina at mga Tipan 78:7–8, 14–15, at alamin ang mga pagpapalang ipinapangako ng Panginoon.

• Paano makakaimpluwensya ang mga pagpapalang ito sa inyo at sa mga taong kilala ninyo?

• Ano ang ipinangako ng Panginoon sa mga nangangalaga sa mga nangangailangan?

  Tulungan ang mga estudyante na matukoy ang katotohanan na tulad ng sumusunod: Ang pangangalaga sa mga maralita at nangangailangan ay nakatutulong sa ating maghanda para sa isang lugar sa kahariang selestiyal.

  Ang Mateo 25:31–40 ay magagamit upang matulungan ang mga estudyante na maunawaan ang alituntunin.

• Sa inyong palagay, paano nakatutulong ang pangangalaga sa mga nangangailangan na ihanda tayo sa pagmamana ng kahariang selestiyal?

• Paano naging halimbawa ang Tagapagligtas ng nangangalaga sa mga nangangailangan?

• Paano madaragdagan ng isang tao ang kanyang hangarin na mahalin at pangalagaan ang mga nangangailangan tulad ng ginagawa ng Tagapagligtas?

Ang magagawa natin

Basahin ang Doktrina at mga Tipan 78:17–22, at maghanap ng mahahalagang salita o parirala na makatutulong sa atin na sundin ang Tagapagligtas.

Upang matulungan ang mga estudyante na makibahagi sa talakayan, maaari mong i-display ang mga sumusunod na tanong at hayaang pag-isipan ng mga estudyante kung paano sila sasagot. Maaari kang random na pumili ng mga estudyante na sasagot sa pamamagitan ng paghiling sa isang tao na pumili ng isang buwan ng taon. Ang mga nakahandang estudyante na isinilang sa buwan na iyon ay maaaring pumili ng tanong na sasagutin ngunit hindi sila dapat mapilitang makibahagi.

Tulungan ang bawat estudyante na makapag-ambag sa karanasan sa pagkatuto: Para sa karagdagang pagsasanay dito, tingnan ang training na pinamagatang “Lumikha ng ligtas na kapaligiran kung saan iginagalang ang lahat at alam nilang pinahahalagahan ang kanilang kontribusyon” na matatagpuan sa Mga Kasanayan para sa Pag-unlad ng Guro: Mahalin ang mga Tinuturuan Mo. Maaari mong praktisin ang kasanayan sa pamamagitan ng pagpapabatid na pinahahalagahan mo ang mga estudyante bago pa man sila magkomento o kapag itinaas nila ang kanilang kamay para magkomento.

• Anong mga salita o parirala ang pinakamakabuluhan para sa inyo? Bakit?

• Ano ang natutuhan ninyo na makatutulong sa ating sundin ang kautusan ng Tagapagligtas na pangalagaan ang mga nangangailangan?

• Ano ang natutuhan ninyo na nagpapakita sa hangarin ng Tagapagligtas na maging katulad Niya tayo?

Bigyan ang mga estudyante ng isa pang piraso ng papel. Bigyan sila ng panahon upang matukoy ang mga pahiwatig na maaaring natanggap nila tungkol sa pagtulong sa isang taong nangangailangan o mga partikular na paraan na sa palagay nila ay makapag-aambag sila sa kamalig ng Panginoon. Anyayahan silang isulat ang kanilang mga impresyon. Pagkatapos ay maaaring ilagay ng mga estudyante ang kanilang papel sa kahon na kumakatawan sa kamalig ng Panginoon bilang paraan ng pagpapakita ng kanilang kahandaang tumulong, o maaari nilang iuwi ang papel bilang paalala.

Karagdagang Resources

Paano tayo tinutulungan ng Simbahan ng Panginoon na pangalagaan ang mga nangangailangan?

Ipinaliwanag ni Pangulong Russell M. Nelson:

Para tulungan ang mga nagugutom, ang Simbahan ay nagpapatakbo ng 124 na mga bishop’s storehouse sa buong mundo. Sa pamamagitan ng mga ito, humigit-kumulang na 400,000 na mga kahilingan sa pagkain ang ibinibigay sa bawat taon sa mga indibiduwal na nangangailangan. Sa mga lugar kung saan walang storehouse, ang mga bishop at branch president ay kumukuha mula sa mga pondo ng handog-ayuno ng Simbahan para makapagbigay ng pagkain at suplay sa mga miyembrong nangangailangan. (Russell M. Nelson, “Ang Ikalawang Dakilang Kautusan,” Liahona, Nob. 2019, 98)

Itinuro ni Pangulong Henry B. Eyring ng Unang Panguluhan:

Dahil naririnig ng Panginoon ang kanilang pagtangis at ramdam ang habag ninyo sa [mga nangangailangan], sa simula pa lamang ay naglaan na Siya ng mga paraan para makatulong ang Kanyang mga disipulo. Inanyayahan Niya ang Kanyang mga anak na maglaan ng panahon, kabuhayan, at kanilang sarili upang tulungan Siyang maglingkod sa iba.

Ang paraan Niya ng pagtulong ay tinatawag kung minsan na pagsasabuhay ng batas ng lubos na paglalaan. Sa iba pang panahon tinawag ang Kanyang paraan na nagkakaisang orden. Sa ating panahon tinatawag itong programang pangkapakanan ng Simbahan.

Ang mga pangalan at detalye ng pagpapatakbo ay binago upang iakma sa mga pangangailangan at kalagayan ng mga tao. Ngunit sa tuwina ang paraan ng Panginoon sa pagtulong sa mga may temporal na pangangailangan ay nangangailangan ng mga tao na dahil sa pagmamahal ay inilaan ang sarili at kung ano ang mayroon sila sa Diyos at sa Kanyang gawain.

Inanyayahan at inutusan Niya tayong makilahok sa Kanyang gawaing tulungan ang mga nangangailangan. Nakikipagtipan tayong gawin iyon sa tubig ng binyag at sa mga banal na templo ng Diyos. Pinaninibago natin ang tipang iyon tuwing Linggo kapag tumatanggap tayo ng sacrament. (Henry B. Eyring, “Mga Pagkakataong Gumawa ng Mabuti,” Liahona, Mayo 2011, 22)

Doktrina at mga Tipan 78:3–4. Paano ginagamit ng Simbahan ang pinansyal na resources nito para isulong ang adhikain ng Tagapagligtas?

Ang sumusunod na resources ay makatutulong sa mga estudyante na maunawaan ang mga paraan kung paano pinagpapala ng temporal na resources ng Simbahan ang mga anak ng Ama sa Langit sa buong mundo.

• Church Finances—Commercial Businesses [Pananalapi ng Simbahan—Mga Komersyal na Negosyo] (ChurchofJesusChrist.org)

• Church Finances and a Growing Global Faith [Pananalapi ng Simbahan at isang Lumalawak na Pandaigdigang Pananampalataya] (ChurchofJesusChrist.org)

• The Church and Its Financial Independence [Ang Simbahan at ang Kakayahan Nitong Tustusan ang Sarili] (ChurchofJesusChrist.org)

• Russell M. Nelson, “Ang Ikalawang Dakilang Kautusan,” Liahona, Nob. 2019, 96–100

• Dallin H. Oaks, “Pagtulong sa mga Maralita at Naghihirap,” Liahona, Nob. 2022, 6–8

• newsroom.ChurchofJesusChrist.org

Doktrina at mga Tipan 78:5–6. Ano ang ibig sabihin ng maging “pantay sa mga bagay sa lupa”?

Ang maging “pantay sa mga bagay sa lupa” ay hindi nangangahulugang magiging pare-pareho ang materyal na pag-aari ng lahat, kundi magkakaroon sila ng pantay-pantay na karapatan sa resources alinsunod sa iba’t ibang kalagayan at pangangailangan nila (tingnan sa Doktrina at mga Tipan 51:3; 82:17). Nangako ang Panginoon sa mga Banal na namumuhay ayon sa alituntuning ito na Kanyang ibabahagi sa kanila ang lahat ng mayroon Siya at na sila ay magiging “pantay sa mga bigkis ng mga bagay na makalangit” (Doktrina at mga Tipan 78:5).

Saan ko malalaman ang iba pa tungkol sa Nagkakaisang Samahan?

Tingnan sa Mga Paksa sa Kasaysayan ng Simbahan, “United Firm o Nagkakaisang Samahan (“Nagkakaisang Orden”),” ChurchofJesusChrist.org.

Mga Karagdagang Aktibidad sa Pag-aaral

Mga video tungkol sa pagtulong sa mga nangangailangan

Maaari kang gumamit ng isa o mahigit pa sa mga sumusunod na video upang matulungan ang mga estudyante na maunawaan ang mga paraan na matutulungan natin ang mga nangangailangan. Maaaring ipalabas ang mga ito kapag itinuturo na ang kamalig ng Panginoon sa lesson o upang ihanda ang mga estudyante na isulat ang mga paraan na makapag-aambag sila sa kamalig ng Panginoon.

Pumili ng isang video mula sa koleksyon ng video ng Community Outreach [Programang Pangkomunidad] na nauugnay sa iyong mga estudyante.

Para makakita ng halimbawa ng isang pamilya na pinagpala sa pamamagitan ng kamalig ng Panginoon, maaari mong panoorin ang “Caring for the Poor and Needy” (5:40).

Para makakita ng mga halimbawa ng mga paraan ng pangangalaga ng Simbahan sa mga nangangailangan sa buong mundo, maaari mong panoorin ang “Humanitarian Center Film” (3:13) o “Welfare Square Tour” (6:02)

Doktrina at mga Tipan 78:15. Ang Banal ng Sion

Upang matulungan ang mga estudyante na malaman ang tungkol sa Tagapagligtas sa pamamagitan ng pagtuon sa Kanyang mga titulo at tungkulin, maaari mong pag-aralan ang Kanyang titulong Ang Banal ng Sion. Maaaring makatulong na basahin at talakayin ang Doktrina at mga Tipan 97:19–21; Moises 7:18, 53. Matutukoy ng mga estudyante ang mga katangiang kakailanganin para maitayo ang Sion at kung paano naging halimbawa ng mga katangiang iyon ang Tagapagligtas.

Doktrina at mga Tipan 78:18. “Akin kayong aakayin”

Maaari mong tulungan ang mga estudyante na mapalakas ang kanilang tiwala na gagabayan at papatnubayan ng Ama sa Langit ang kanilang buhay. Matapos basahin ang Doktrina at mga Tipan 78:18, maaari mong talakayin ang mga paraan na inaakay tayo ng Ama sa Langit (sa pamamagitan ng Espiritu Santo, mga magulang, mga lider ng Simbahan, mga patriarchal blessing, at iba pa). Maaaring magbahagi ang mga estudyante ng mga personal na karanasan. Maaari mo ring talakayin kung paano nagpapagalak sa atin ang kaalamang aakayin tayo ng Ama sa Langit. Ang sumusunod na pahayag ay maaaring magpalawak sa talakayan.

Ibinahagi ni Elder Ronald A. Rasband ng Korum ng Labindalawang Apostol:

Nawa’y lubos nating pagtuunan ng pansin ang pagtawag ng Panginoon na “magalak, sapagkat akin kayong aakayin” [Doktrina at mga Tipan 78:18]. Inaakay Niya tayo sa pamamagitan ng Espiritu Santo. Nawa’y mamuhay tayo nang malapit sa Espiritu, mabilis na kumikilos ayon sa mga unang pahiwatig sa atin, dahil alam nating nagmula ang mga ito sa Diyos. Pinatototohanan ko ang kapangyarihan ng Espiritu Santo na gumagabay sa atin, nagbabantay sa atin, at palaging nasa atin. (Ronald A. Rasband, “Hayaang Patnubayan ng Espiritu Santo,” Liahona, Mayo 2017, 96.)

Doktrina at mga Tipan 78:19. Tumatanggap ng lahat ng bagay nang may pasasalamat

Upang madama ang kahalagahan ng pagiging mapagpasalamat, maaaring basahin at talakayin ng mga estudyante ang Doktrina at mga Tipan 78:19. Habang tinatalakay nila ang ibig sabihin ng “tumatanggap ng lahat ng bagay nang may pasasalamat,” gumawa ng listahan ng maaari nilang ipagpasalamat sa Panginoon at alamin ang mga pagpapalang ipinangangako ng Panginoon sa mga taong “tumatanggap ng lahat ng bagay nang may pasasalamat.”

Maaari ka ring pumili ng isa sa mga video mula sa koleksyong Gratitude sa Media Library.