“Lesona 93—Tombano ny fianaranao 6: Fotopampianarana sy Fanekempihavanana 76–83,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Tombano ny fianaranao 6,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 93: Fotopampianarana sy Fanekempihavanana 81–83
Tombano ny fianaranao 6
Ny fakana fotoana hamantarana ny fitomboana sy ny fivoarana ara-panahy dia afaka manamafy ny fifandraisantsika amin’ny Ray any An-danitra sy i Jesoa Kristy ary mandrisika antsika hijanona eo amin’ny lalan’ny fanekempihavanana. Ity lesona ity dia afaka manampy ireo mpianatra hanombana ny fivoarany ara-panahy avy amin’ny fandalinany ny Fotopampianarana sy Fanekempihavanana hatramin’izao.
Sahanasa fianarana azo atao
Ity lesona ity dia natao hanampiana ireo mpianatra hanombantombana ny fahaizany manazava ireo fampianarana ao amin’ny Fotopampianarana sy Fanekempihavanana sy ireo tanjona napetrak’izy ireo, ary ny fiovan’ny toetrany sy ny faniriany ary ny fahafahany miaina ny filazantsara. Ny fandalinan’ny iray kilasy momba ny Fotopampianarana sy Fanekempihavanana 76–83 dia mety ho nifantoka tamin’ny fahamarinana hafa noho ireo nasongadina tao amin’ny lesona. Raha izany no izy dia eritrereto ny hanamboatra ireo sahanasa mba hampidirana ireo fahamarinana mahazatra kokoa ny mpianatrao.
Mankasitraka ny fitomboana sy ny fivoarana
Raha azo atao dia atombohy ny kilasy amin’ny fampisehoana sarin’olona manao fitsangantsanganana an-tongotra, mitaingina bisikileta ary mihazakazaka. Angataho ny mpianatra hanangana ny tanany raha toa ka nanao ny iray na maromaro tamin’ireo zavatra ireo izy ireo. Avy eo dia asao ireo mpianatra mba hanangana ny tanany ihany raha toa ka efa nandray anjara tamina hazakazaka, na fitsangantsanganana an-tongotra, na fitaingenana bisikileta tamina lalana lavitra na sarotra izy ireo. Manasà mpianatra vitsivitsy izay nanangan-tanana mba hilazalaza ny zavatra niainany. Hevero ny hametraka fanontaniana vitsivitsy toy izao manaraka izao:
-
Inona no azonao atao mba hankafizana ilay dia?
-
Ahoana no ahafahantsika mampitaha izany karazana dia izany amin’ny dingana arahina mba hahatongavana bebe kokoa tahaka an’i Jesoa Kristy?
-
Inona avy ireo fomba ahafahantsika mankafy sy mankasitraka bebe kokoa ny dingana arahina eo amin’ny fivoarana ara-panahy?
Asao ny mpianatra hisaintsaina ny zavatra nianarany tao amin’ny Fotopampianarana sy Fanekempihavanana, sy ny fomba nandraisany andraikitra teo anatrehan’izany ary ny diany ara-panahy. Mety hisaintsaina ny fomba nanampian’ny Mpamonjy tamin’izay fivoarana vao haingana niseho izy ireo.
-
Ahoana no ahatsapanao fa mivoatra sy mihamanakaiky kokoa ny Tompo ianao?
-
Ahoana ny fomba anampian’ny Tompo anao?
Ireto sahanasa manaraka ireto dia natao mba hanampiana ireo mpianatra hamantatra sy hankasitraka ary hanombantombana fivoarana sy fitomboana miavaka kokoa.
Manazava ny ambaratongam-boninahitra telo
Hevero ny hampiasa rafi-tantara iray tahaka izao manaraka izao mba hanampiana ireo mpianatra hamerina hijery sy hanombantombana ny fahatakarany ireo ambaratongam-boninahitra telo ao amin’ny drafitry ny Ray any An-danitra. Raha ilaina, dia azon’ny mpianatra atao ny manitsy ny antsipirian’ilay rafi-tantara mba hahazoana antoka fa toy ny tena marina izany amin’izy ireo.
Alaivo sary an-tsaina hoe manana namana akaiky antsoina hoe Olivia ianao, izay tsy mpikamban’ny Fiangonana saingy mino mafy an’i Jesoa Kristy. Indray andro dia nanatona anao izy ary nanontany hoe: “Inona no inoan’ny mpikamban’ny Fiangonanao momba ny fiainana aorian’ny fahafatesana? Nampianarina aho fa na ho any an-danitra na ho any amin’ny helo ny olona rehetra, saingy reko fa ny mpikamban’ Ny Fiangonan’i Jesoa Kristy ho an’ny Olomasin’ny Andro Farany dia mino ny fisian’ny lanitra maro. Inona izany rehetra izany?”
Mandania minitra vitsivitsy hanoratana valinteny ho an’i Olivia izay manazava ny fahatakaranao sy ny fahalalanao momba ireo ambaratongam-boninahitra telo. Raha tianao dia azonao atao ny mampiditra sary hanampiana an’i Olivia haka sary an-tsaina ny zavatra hazavainao.
Rehefa avy nahavita ny fanazavany ireo mpianatra dia hevero ny hanasa ny vitsivitsy amin’izy ireo mba hizara ny zavatra nosoratany na hilalao an-tsehatra ilay rafi-tantara eo anoloan’ny mpianatra.
Raha toa ka tsy lazain’ny mpianatra ity, dia anontanio azy ireo ny fomba anehoan’ireo ambaratongam-boninahitra telo ny fitiavana sy ny famindrampon’ny Ray any An-danitra sy i Jesoa Kristy (jereo ny Fotopampianarana sy Fanekempihavanana 76:40–43). Ataovy mazava tsara fa amin’ny alalan’i Jesoa Kristy ihany no ahafahana mandova fanjakam-boninahitra iray, tafiditra ao anatin’izany ny voninahitra selestialy (jereo ny Fotopampianarana sy Fanekempihavanana 76:69–70).
Anontanio ny mpianatra ny zavatra nianarany avy tamin’io traikefa io. Raha manana fanontaniana mikasika ireo ambaratongam-boninahitra telo ireo mpianatra dia anontanio ny iray kilasy raha afaka mahita andininy ao amin’ny Fotopampianarana sy Fanekempihavanana 76 izy ireo mba hanampiana amin’ny famaliana ny fanontanian’izy ireo. Azonao atao ihany koa ny mamerina mijery ny sasany amin’ireo fitaovana avy amin’ny lesona teo aloha.
Fanehoana fanajana ny Ray any An-danitra sy an’i Jesoa Kristy
Hevero ny hanasa ny mpianatra hanao lisitra an’izay zavatra nianarany vao haingana tao amin’ny Fotopampianarana sy Fanekempihavanana izay nampitombo ny fitiavany sy ny fankasitrahany ary ny fanehoany fanajana ny Ray any An-danitra sy an’i Jesoa Kristy. Mety hampiditra zavatra niainana tao an-tokantrano, na tany am-piangonana, na tany an-toeran-kafa koa ireo mpianatra izay nanamafy orina ny fifandraisany tamin’ny Ray any An-danitra sy i Jesoa Kristy.
Mety hanampy ny manasa ireo mpianatra hamerina hijery ny Fotopampianarana sy Fanekempihavanana 63:58–64; 76:19–24 sy izay fanamarihana mety ho noraisin’izy ireo nandritra ny fandalinany ireo andininy ireo teo aloha.
Azonao atao ny mampiseho ity fanontaniana manaraka ity ary asao ireo mpianatra hamaly mba hanampiana azy ireo hanombantombana ny ezaka ataony sy ny faniriany ary ny fivoarany ankehitriny:
-
Inona no ianaranao momba ny Ray any An-danitra sy i Jesoa Kristy izay mampitombo ny fitiavanao sy ny fankasitrahanao ary ny fanehoanao fanajana Azy Ireo?
Mamporisiha mpianatra maromaro hizara. Hevero ny hizara ihany koa ny eritreritrao.
Mandalina sy misaintsaina ny soratra masina
Hevero ny hampiseho ny sary etsy ambony ary apetraho ireto fanontaniana manaraka ireto:
-
Inona no nataon’i Joseph Smith sy i Sidney Rigdon talohan’ny nahazoan’izy ireo ny fahitana momba ny ambaratongam-boninahitra telo?
-
Inona no nianaranao avy amin’ny zavatra niainan’izy ireo?
Raha tsy mahatadidy ny mpianatra dia asao izy ireo hamerina hijery ny Fotopampianarana sy Fanekempihavanana 76:15–19. Ataovy izay hahatakaran’izy ireo fa talohan’ny nisokafan’ireo fahitana tamin’i Joseph sy i Sidney dia nandalina sy nisaintsaina ny soratra masina izy roa lahy. Ny iray amin’ireo fahamarinana izay mety nianaran’ny mpianatra dia ity: Rehefa mandalina sy misaintsaina ombam-bavaka ny soratra masina isika dia manomana ny tenantsika handray fahatakarana avy amin’ny Tompo amin’ny alalan’ny Fanahy Masina.
Omeo fotoana ny mpianatra hisaintsainana ny fahombiazan’ny fandalinany ny soratra masina. Mety hisaintsaina izy ireo hoe aiza ho aiza ny fandalinan’izy ireo ombam-bavaka ny soratra masina. Raha ilaina dia azonao atao ny mampiseho ity sary manaraka ity ary asao ireo mpianatra hizara ny fomba ahafahan’ny singa tsirairay manampy azy ireo amin’ny fandalinany soratra masina. Afaka mizara ny zavatra ataon’izy ireo izay tsapany fa manampy azy ireo ny mpianatra.
Ny mpianatra koa dia mety hahazo tombontsoa amin’ny alalan’ny fifanakalozan-kevitra amin’ny mpianatra hafa momba ireo olana sy mety ho vahaolana. Azonao zaraina ho vondrona kely ny mpianatra ary asao izy ireo hiresaka momba ireo olana atrehin’izy ireo rehefa miezaka mandalina sy misaintsaina ny soratra masina. Amporisiho ny vondrona tsirairay hisafidy olana iray ary hieritreritra dingana tsotra vitsivitsy azony atao mba handresena izany olana izany sy hampitomboana ny fiantraikan’ny fandalinany ny soratra masina. Asao ny vondrona tsirairay mba hizara amin’ny mpianatra ambiny.
Hamaranana dia asao ny mpianatra vitsivitsy hijoro ho vavolombelona momba ny fomba hitahian’ny fisaintsainana sy ny fandalinana ny soratra masina ny fiainan’izy ireo sy hanampian’izany azy ireo hahatsapa ho akaiky kokoa an’i Jesoa Kristy.