“Lesona 95—Fotopampianarana sy Fanekempihavanana 84:33–44: Ny fianianana sy ny fanekempihavanan’ny fisoronana,” Boky torolalana ho an’ny mpampianatra seminera: Fotopampianarana sy Fanekempihavanana(2025)
“Fotopampianarana sy Fanekempihavanana 84:33–44,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 95: Fotopampianarana sy Fanekempihavanana 84
Fotopampianarana sy Fanekempihavanana 84:33–44
Ny fianianana sy ny fanekempihavanan’ny fisoronana
Ao amin’ny Fotopampianarana sy Fanekempihavanana 84:20, ny Mpamonjy dia nanambara fa “ao amin’ny ôrdônansi[n’ny fisoronana], dia miseho ny herin’ny toetra araka an’ Andriamanitra.” Io herin’ny fisoronana io dia afaka ny ho azon’ny mpikamban’ny Fiangonana rehetra izay manao sy mitandrina ny fanekempihavanan’ny batisa sy ny tempoly. Ao amin’ny Fotopampianarana sy Fanekempihavanana 84:33–44, ny Mpamonjy dia nampianatra fianianana sy fanekempihavanana izay mifehy ny fampiasana ny herin’ny fisoronany. Ity lesona ity dia afaka manampy ireo mpianatra hampitombo ny fahatakarany ny fianianana sy ny fanekempihavanan’ny fisoronana.
Sahanasa fianarana azo atao
Ny Ray any An-danitra dia mitahy ireo mpitandrina ny fanekempihavanana amin’ny heriny
Azonao atao ny manomboka ny fotoam-pianarana amin’ny fanaovana sarina lalana iray eny amin’ny solaitrabe izay maneho ny lalan’ny fanekempihavanana. Azonao atao ny manisy anarana hoe “fahaterahana” eo amin’ny fiandohan’ilay lalana ary “fiainana mandrakizay miaraka amin’ny Ray any An-danitra” eo amin’ny fiafaran’ilay lalana. Asao ny mpianatra mba ho eny amin’ny solaitrabe ary hanome anarana ireo fanekempihavanana ataontsika eny an-dalana amin’ny alalan’ny ôrdônansy toy ny batisa, ny fandraisana ho mpikambana, ny fanendrena ao amin’ny fisoronana ho an’ny lehilahy, ny fanafiana masina ary ny famehezana.
Raha mila fanampiana ny mpianatra amin’ny fahatakarana fa ny fanekempihavanana dia fampanantenana a amin’ Andriamanitra, dia hevero ny hifanakalo hevitra momba ireo fanontaniana toy izao manaraka izao alohan’ny hizarana ilay teny nambaran’ny Filoha Russell M. Nelson etsy ambany:
-
Inona avy ireo fampanantenana sasany ataontsika amin’ny Ray any An-danitra rehefa manaiky ny ôrdônansin’ny batisa isika? (Jereo ny Môzià 18:8–10 sy ny Fotopampianarana sy Fanekempihavanana 20:77–79.)
-
Inona no ampanantenain’ny Ray any An-danitra antsika rehefa miezaka ny mankatò io fanekempihavanana io isika?
Halalino ity teny manaraka avy amin’ny Filoha Russell M. Nelson ity, ka tadiavo ny fitahiana omen’ny Ray any An-danitra ho an’ireo izay manao fanekempihavanana Aminy sy mitandrina izany.
Ny olona tsirairay izay manao fanekempihavanana ao amin’ny dobo fanaovana batisa sy any amin’ny tempoly—ka mitandrina izany—dia mampitombo ny fahafahana hahazo ny herin’i Jesoa Kristy. Mba saintsaino io fahamarinana mampitolagaga io!
Ny valisoa amin’ny fitandremana ny fanekempihavanana amin’ Andriamanitra dia hery avy any an-danitra—hery izay mampatanjaka antsika mba hanohitra tsara kokoa ny fitsapana sy ny fakam-panahy ary ny ratram-pontsika. Manamora ny lalantsika io hery io. Ireo izay miaina ny lalàn’i Jesoa Kristy izay ambony kokoa dia afaka mahazo ny heriny ambony kokoa. (Russell M. Nelson, “Mandresy izao tontolo izao dia mahita fitsaharana,” Liahona, nôv. 2022, 96)
-
Nahoana ireo fitahiana avy amin’ny fanekempihavanana izay nofaritan’ny Filoha Nelson no ilaina eny amin’ny lalantsika hiverina any amin’ny Ray any An-danitra?
Ny fianianana sy ny fanekempihavanan’ny fisoronana
Ao amin’ny Fotopampianarana sy Fanekempihavanana 84, dia nanome “fanambarana momba ny fisoronana” an’i Joseph Smith i Jesoa Kristy (jereo ny sasin-tenin’ny fizarana). Ao anatin’ity fanambarana ity dia namaritra ny “fianianana sy fanekempihavanana” (andininy 39–40) izay an’ny fisoronana Izy. (Ny fianianana dia fanaovana fampanantenana lehibe.)
Soraty ao anatin’ny diary fandalinanao ny hoe “Fianianana sy ny fanekempihavanan’ny fisoronana” eo amin’ny tampon’ny pejy iray. Manaova tsanganana roa eo ambanin’io lohateny io. Omeo anarana ny tsanganana iray hoe “Ireo fampanantenan’ny Ray any An-danitra” ary ilay iray hafa “Ireo fampanantenantsika.”
Azon’ny mpianatra atao ny mamita tsirairay ny sahanasa fandalinana etsy ambany. Afaka mizara amin’ny vondrona kely ny zavatra hitany izy ireo avy eo.
Raha tsy izany dia azonao zaraina tsiroaroa ny mpianatra, ka ny mpiara-miasa iray mitady ny fampanantenan’ny Ray any An-danitra ary ny iray hafa mitady ny fampanantenantsika. Afaka mifampizara izy ireo avy eo ary mirakitra ny zavatra resahiny ao amin’ny diary fandalinany.
Vakio ny Fotopampianarana sy Fanekempihavanana 84:33–44. Hevero ny hanisy marika amin’ny fomba iray ireo fampanantenana izay anasan’ny Ray any An-danitra antsika mba hatao sy hanisy marika amin’ny fomba hafa ny fitahiana atolony ho an’ireo izay mitandrina ny fanekempihavanany. Soraty ao amin’ireo tsanganana mifanaraka amin’izany ao anatin’ny diary fandalinanao ny zavatra hitanao.
Ho fotoana tsara hangatahana ireo mpianatra hanao fanazaran-tena hitady fitsipika izany. Afaka mitady fitsipika isan-karazany izy ireo. Azonao atao ny manasa azy ireo hitady fitsipika amin’ny alalan’ny fampiasana teny nambara izay manomboka amin’ny zavatra ampanantenaintsika fa hataontsika ary mifarana amin’ny zavatra ampanantenain’ Andriamanitra fa hataony. Ohatra, mety hahita ireto fitsipika manaraka ireto ny mpianatra:
-
Raha toa ka milofo amin’ny antsontsika sy ny andraikitsika ao amin’ny Fiangonana isika dia hanamasina antsika amin’ny alalan’ny Fanahiny Andriamanitra ary hanavao ny vatantsika.
-
Raha mandray amim-pahatokiana ny Fisoronana Aharôna sy ny Fisoronana Melkizedeka isika ary mandray ireo mpanompo nofidin’ Andriamanitra dia hanome antsika izay rehetra ananany ny Ray any An-danitra.
Omeo fotoana ny mpianatra mba hianarana ombam-bavaka ny momba ireo fampanantenana izay tena mahaliana azy ireo ny hahatakarana azy tsara kokoa. Afaka miara-miasa ao anaty vondrona kely miaraka amin’ireo mpianatra hafa izay nisafidy ny handalina ireo fampanantenana ireo koa ny mpianatra, na afaka mandalina manokana izy ireo.
Ny taratasy zaraina dia manome loharanom-pahalalana izay afaka manampy ireo mpianatra hahatakatra tsara kokoa ny sasany amin’ireo fampanantenana ao amin’ny fianianana sy ny fanekempihavanan’ny fisoronana. Azonao atao ny manome ny mpianatra ity taratasy zaraina ity raha tianao.
Raha toa ka liana amin’ny fandalinana andian-teny tsy tafiditra ao amin’ilay taratasy zaraina ireo mpianatra dia asao izy ireo mba hianatra izay rehetra azony ianarana amin’ny alalan’ny fikarohana lohahevitra iray na ireo lohahevitra izay nofidiny miaraka amin’ny loharanom-panampiana toy ireto:
-
ChurchofJesusChrist.org na ao amin’ny application Médiathèque de l’Évangile
Ampitomboy ny fahatakaranao ny fianianana sy ny fanekempihavanan’ny fisoronana
Nohamasinin’ny Fanahy ho amin’ny fanavaozana ny vatana (jereo ny andininy 33)
Raha niresaka momba ny fampanantenan’ny Ray any An-danitra ny Filoha Henry B. Eyring ao amin’ny Fiadidiana Voalohany dia nanazava hoe:
Hitako teo amin’ny fiainako manokana sy teo amin’ny fiainan’ny hafa ny fahatanterahan’izany fampanantenana izany. Nisy namako iray filohan’ny misiôna. Nolazainy tamiko fa isaky ny mifarana ny andro iray nandritra ny fotoana nanompoany, dia nila tsy ho tafakatra tany ambony rihana hatory izy amin’ny alina ka nanontany tena raha toa ka hanana hery hiatrehana andro iray hafa indray. Ary nony maraina, dia nahita ny heriny sy ny herim-pony niverina izy. Hitanareo izany teo amin’ny fiainan’ireo mpaminany efa antitra izay toy ny nohavaozina ireny ny heriny isaky ny nitsangana izy ireo mba hijoro ho vavolombelona momba an’i Jesoa Kristy Tompo sy ny filazantsara naverina tamin’ny laoniny. Fampanantenana ho an’ireo izay mandroso amim-pinoana ao amin’ny asa fanompoan’izy ireo ao amin’ny fisoronana izany. (Henry B. Eyring, “Faith and the Oath and Covenant of the Priesthood,” Liahona, May 2008, 62)
Ho mahatoky amin’ny fahazoana ny Fisoronana Aharôna sy ny Fisoronana Melkizedeka (jereo ny andininy 33)
Ny hoe mahatoky amin’ny “fahazoana ireo fisoronana roa ireo” (Fotopampianarana sy Fanekempihavanana 84:33) dia mitaky ny fahazoana hery sy fitahiana azo avy amin’ny fandraisana ireo ôrdônansin’ny Fisoronana Aharôna sy ny Fisoronana Melkizedeka ary ny fitandremana amim-pahatokiana ireo fanekempihavanana mifandray aminy. Nampianatra ny Mpaminany Joseph Smith fa ny olona iray dia mahazo ny fahafenoan’ny fisoronana “amin’ny alalan’ny fitandremana ny didy rehetra sy ny fankatoavana ny ôrdônansy rehetra ao amin’ny tranon’ny Tompo” (Teachings of Presidents of the Church: Joseph Smith [2007], 419).
Ho an’ny lehilahy dia tafiditra ao anatin’izany koa ny fanomezana ny fisoronana sy ny fanokanana azy ireo ho amin’ny anjara fanompoan’ny fisoronana.
Hilofo amin’ny antso ananantsika (andininy 33)
Fahafahana mandray antso sy fandraisana anjara amin’ny asa famonjen’ny Tompo
Nampianatra izao ny Filoha M. Russell Ballard ao amin’ny Kôlejin’ny Apôstôly Roambinifolo:
Rehefa milofo amin’ny antsontsika isika dia tokony hikatsaka ny fitaoman’ny Fanahy mba hamahana ireo olana amin’ny fomba izay tena hanampy ny olona tompointsika. Manana boky torolalana isika, ary tokony harahina ny torolalana anatin’izy ireo. Saingy ao anatin’izany rafitra izany dia misy fahafahana lehibe hieritreretana, hamoronana, ary hampiasana ny talentan’ny tsirairay. Ilay toromarika hoe milofo amin’ny antsontsika dia tsy didy iray mba hanaingoana sy hanasarotana izany. Ny hoe mampiditra zavatra vaovao dia tsy voatery midika hoe mampivelatra; matetika dia midika hoe manatsotra izany. (M. Russell Ballard, “O Be Wise,” Liahona, Nov. 2006, 19)
Izay rehetra ananan’ny Ray any An-danitra (jereo ny andininy 38)
Fotopampianarana sy Fanekempihavanana 76:55–60; 81:6
Ny Loholona Ronald A. Rasband ao amin’ny Kôlejin’ny Apôstôly Roambinifolo dia nizara izao:
Ny fahafantarana fa manana Ray any An-danitra isika ary i Jesoa Kristy no Zanany Lahitokana dia midika fa mijery lavitra kokoa eo amin’ny lalan’ny fanekempihavanana isika fa tsy ny toerana ijoroantsika amin’izao fotoana izao fotsiny. Midika izany fa mankasitraka isika fa mpandova izay rehetra ananan’ny Ray; fanjakana tsy hita isa ireo fanjakany ary afaka ny ho antsika. Nampanantena ny Mpamonjy hoe: “Ary raha mahatoky hatramin’ny farany ianao dia hanana ny satroboninahitry ny tsy fahafatesana sy ny fiainana mandrakizay ao amin’ireo fitoerana izay efa nomaniko ao an-tranon-dRaiko.” (Ronald A. Rasband, “The Divine Destiny of His Daughters” [BYU Women’s Conference, Apr. 30, 2021], broadcasts.ChurchofJesusChrist.org)
Rehefa avy nomena fotoana ampy handalinana ireo mpianatra, dia asao izy ireo hizara ny zavatra nianarany amin’ilay namana mpiara-miasa aminy na amin’ny vondrona kely. Azonao atao ny mampiasa tari-dresaka toy ireto manaraka ireto mba hitarihana ny fifanakalozan-kevitra:
-
Nahoana io fitahiana io no ho manan-danja aminao amin’izao fotoana izao?
-
Inona no ampianarin’io fitahiana io anao momba ny Ray any An-danitra?
Mizarà ohatra iray (avy amin’ny soratra masina na avy amin’ny fiainanao) momba ny olona iray izay hitanao fa nampiseho ny fitandremana ilay fampanantenana nofidinao.
Mba hamaranana ny fotoam-pianarana dia azonao atao ny mizara ny fomba nitahiana anao tamin’ny alalan’ny herin’ny fisoronana rehefa niezaka nitandrina tamim-pahatokiana ireo fanekempihavanana nataonao tamin’ny Ray any An-danitra ianao. Asao ny mpianatra hitady fahafahana azo araraotina mba hampiasana ny herin’ny fisoronana izay nampanantenain’ Andriamanitra ireo zanaky ny fanekempihavanany.