101-р хичээл: Сургаал ба Гэрээ 88

Сургаал ба Гэрээ 88:14–41

Селестиел хуулийг дагахыг хичээх

Залуу эмэгтэйн нүүрэн дээр нар тусаж байгаа нь

Сургаал ба Гэрээ 88-д Их Эзэн Амилуулалт ба алдар суугийн хаант улсууд, түүний дотор селестиел алдар суугийн тухай үнэнийг илчилсэн. Эдгээр үнэн нь Есүс Христийг итгэлтэйгээр дагадаг Сүмийн гишүүдийг нэгтгэж, адисалж чадна. Энэ хичээл нь суралцагчдад селестиел алдар сууг хүлээн авч чадна гэдэгтээ илүү итгэлтэй болоход тусалж чадна.

Боломжит суралцах үйл ажиллагаа

Селестиел алдар суугийн зорилго

Суралцагчдыг судлах тэмдэглэлдээ шат зураад, дээд хэсэгт нь “Селестиел хаант улс” гэж бичихэд урь. Суралцагчдаас өөрсдийгөө шатны аль хавьд байгаа гэж бодож буйгаа зурахыг хүс. Дараах асуултуудад хариулж, хариултаа тэмдэглэхэд тэднийг урамшуул.

• Та нарын бодлоор одоогийн сонголтууд тань селестиел хаант улсад орохоор урагшлахад тусалж байна уу? Яагаад тийм эсвэл яагаад үгүй вэ?

• Та нар Есүс Христийн тусламжтайгаар эцэстээ селестиел алдар сууг хүлээн авч чадна гэдэгтээ хэр итгэлтэй байна вэ?

Есүс Христ бидний Аврагч учраас Тэрээр бидэнд өөрчлөгдөж, наманчлахад маань туслан, селестиел алдар сууг олж авахаар хичээх үед хүч чадал өгнө гэдэгт найдаж болно гэдгийг суралцагчдад сануул.

Сургаал ба Гэрээ 88-д цэдэглэгдсэн Их Эзэний илчлэлт нь мөнхийн үнэнийг ойлгоход бидэнд туслах тэнгэрлэг гэрлийг өгдөг. 88-р хэсгээс бид Тэнгэрлэг Эцэгийнхээ төлөвлөгөө, Есүс Христийн тухай үнэн, мөн Тэдний оршихуйд эргэн очих арга замын талаар дэлгэрэнгүй сурч авдаг.

Та Тэнгэрлэг Эцэгийн төлөвлөгөөний гоо үзэсгэлэн, сүр жавхлангийн тухай юу мэдэрч байгаагаа хуваалцаж болно. Өнөөдрийн хичээлийн үеэр суралцагчдыг селестиел хаант улс өөд урагшлахдаа итгэлээр үйлдэж, Аврагчийн тусламжийг хүлээн авах арга замуудыг мэдэхийн тулд сүнслэг өдөөлтийг эрэлхийлэхэд урамшуул.

Бидний мөнх бус бие

Бид сүнс болон бие махбодын хувьд Түүнтэй адил болох нь Бурханы төлөвлөгөөний чухал хэсэг гэдгийг тайлбарла. Төрөхдөө бид бие махбодыг хүлээн авдаг. Энэ бие хэзээ нэгэн цагт үхэж бас амилуулагдах болно.

Дараах асуултад өгсөн суралцагчдын хариултыг самбарт бичих талаар бодож үз.

• Амилуулалтын тухай та нар юу мэддэг вэ?

Шаардлагатай бол суралцагчид хариултдаа topics.ChurchofJesusChrist.org-ын Topics and Questions, “Resurrection” гэснийг ашиглаж болно.

Суралцагчид дараах үйл ажиллагааг хамтрагчтайгаа гүйцэтгэж болно. Та тэдэнд асуултуудыг харуулж болох ба хамтрал бүр асуултуудын аль нэгд хариулах үүрэгтэй. Амьдруулах гэдэг нь амилуулах, сэргээх гэсэн утгатайг мэдэх нь суралцагчдад тустай байж болох юм.

Сургаал ба Гэрээ 88:14–17, 27–31-ийг унш. Уншиж байхдаа дараахыг тунгаан бод.

• Та нар Амилуулалтын талаар юу сурч мэдсэн бэ?

• Алдар суугийн гурван зэрэглэлийн талаар та нар юу сурсан бэ?

Суралцагчдаас олж мэдсэнээ тайлагнахыг хүс. Анхааралтай сонсож, шаардлагатай бол тэдний ойлголтыг тодруулахад туслах нэмэлт асуултуудыг тавь. Хэрэв тэдэнд өөр асуулт байвал ангиараа ярилцаж болно.

Суралцагчдын мэдлэгийг үнэлэх. Үүгээр илүү их дадлага хийх бол Багшийн хөгжүүлбэл зохих ур чадвар: Сүнсээр заа хэсгийн “Суралцагчдын хэрэгцээний талаарх сүнслэг өдөөлтөд хариулахад үргэлж бэлэн бай” гарчигтай сургалтыг үзнэ үү. “Хичээлдээ орохын өмнө суралцахуйг үнэлэх асуулт тавь” ур чадвараар дадлага хийх талаар бодож үз.

Бурханы хуулиудыг дагах нь алдар сууд хөтөлдөг

Суралцагчдыг селестиел биеийн талаарх төсөөлөл эсвэл яагаад Амилуулалтаар селестиел биеийг хүлээн авахыг хүсэж байгаагаа хуваалцахад урих талаар бодож үз.

Хэрэв тэд өмнөх үйл ажиллагааг хамтрагчтайгаа хийж гүйцэтгэсэн бол дараахыг өөр хамтрагчтай гүйцэтгэж болно.

Сургаал ба Гэрээ 88:21–24, 34–36, 38–39-ийг уншаад, бид хэрхэн селестиел биетэй амилуулагдах боломжтойг олж мэд. Онцгой санагдсан үг, хэллэгүүдийг тэмдэглэх талаар бодож үз.

• Эдгээр эшлэлээс юуг ойлгох нь чухал гэж та нар бодож байна вэ?

• Эцсийн шүүлтийн дараа бидний хүлээн авах алдар сууг юу тодорхойлдог вэ? Яагаад?

Суралцагчдад суралцсан зүйлсээ ярилцах цаг гаргаж өг. Тэд хэрэв бид селестиел хуулиудыг дагавал селестиел алдар сууг хүлээн авна эсвэл Амилуулалтаар бид сахидаг хуулийнхаа дагуу алдар сууг хүлээн авах болно зэрэг янз бүрийн үнэнийг илэрхийлж магадгүй. Та эдгээр үнэнийг самбарт бичиж болно.

Суралцагчдад тэнгэрлэг хуулиудын ач холбогдлыг ойлгож, мэдрэхэд нь туслахын тулд та дараах мэдэгдлийг хуваалцаж болох юм.

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Ахлагч Д.Тодд Кристоффэрсон

Мэдээж хэрэг селестиел хаант улсын хууль бол сайн мэдээний хууль юм. Бидний гэрээнүүд Аврагчийг байнга санаж байх болон дуулгавартай байдал, золиослол, өргөл, шударга үнэнч байдлын талаарх Селестиел хаант улсын хуульд багтдаг. (Д.Тодд Кристоффэрсон, “Сионд ирэгтүн,” 2008 оны 10-р сарын Ерөнхий чуулган, 46)

• Та нар Тэнгэрлэг Эцэгийн хайр, шударга ёс, нигүүлслийн талаар юу сурч байна вэ?

• Тэрээр хүүхэд бүртэйгээ хэрхэн ажилладаг талаар та нарт ямар мэдрэмж төрж байна вэ?

Замын дагуух тусламж

Сэтгэлээр унаж, өөрийгөө селестиел алдар сууг хүлээн авахад хангалтгүй гэж бодож байгаа найздаа юу гэж хэлэх талаар тунгаан бодоход суралцагчдыг урь. Та суралцагчдыг дараах шүлгийг уншаад, найзынхаа санаа зовнилд туслах богино хариулт бичихэд урьж болно.

3 Нифай 27:19–20-ийг уншаад, Тэнгэрлэг Эцэг хүүхдүүддээ селестиел алдар сууг хүлээн авах боломжийг хэрхэн олгосон талаар олж мэд. Та эдгээр шүлгийг Сургаал ба Гэрээ 88:21, 34-тэй холбож болох юм.

Суралцагчдыг 3 Нифай 27:19 дэх бусад юу ч гэсэн үгийг тэмдэглэхэд урихыг бод. Энэ үг нь “бусдаар” эсвэл “үгүй бол” гэсэн утгатайг онцол. Энэ нь Есүсийн нифайчуудад хандан хэлсэн үгийг ойлгоход хэрхэн тусалж буй талаар суралцагчдаас асууж болно.

Суралцагчдад Есүс Христээр дамжин ирэх найдвар, өөрчлөлтийг танихад туслахын тулд та дараах мэдэгдлийг хуваалцаж болно.

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Ахлагч Д.Тодд Кристоффэрсон

Бид нигүүлслийн төлөө залбирдаг шигээ нүглийг даван гарч, хөдөлмөрлөж, хичээхийн төлөө залбирах ёстой. Сул талаа хүчтэй болгохын төлөө өөртөө зохистойгоор шүүмжтэй хандаж, өдөр бүр няцашгүй хөдөлмөрлөж буй хүмүүсийг хараад, Их Эзэн гарцаагүй баярлаж байгаа. Жинхэнэ наманчлал, жинхэнэ өөрчлөлт олон удаагийн хичээл зүтгэлийг шаардаж магадгүй. Гэвч ийм хичээл зүтгэлд ямар нэгэн сайн сайхан, цэвэр ариун зүйл байдаг бөгөөд ийм нэгэнд тэнгэрлэг өршөөл, эдгэрэл аяндаа урсан ирдэг. Учир нь үнэхээр “ариун журам ариун журмаа хайрладаг; гэрэл гэрэлтэй нэгдэн нийлдэг, [мөн] нигүүлсэл нь нигүүлслийн өрөвч сэтгэлийг агуулж, мөн өөрийнхөндөө үзүүлдэг” (С ба Г 88:40).

Наманчлалаар бид селестиел хуулийн дагуу амьдрах чадвараа тасралтгүй сайжруулж чадна. Учир нь “селестиел хаант улсын хуулийг мөрдөх боломжгүй тэд селестиел алдар сууг тэсэн гарч чадахгүй” (С ба Г 88:22) гэдгийг бид хүлээн зөвшөөрдөг. (Д.Тодд Кристоффэрсон, “Наманчлалын бурханлаг бэлэг,” 2011 оны 10-р сарын Ерөнхий чуулган, 46)

• Аврагчийн Цагаатгалыг ойлгох нь селестиел алдар сууд хүрч чадна гэсэн итгэлд тань хэрхэн нөлөөлж болох вэ?

• Та нар өнөөдөр судалсан зүйл дээрээ үндэслэн селестиел алдар сууд хүрч чадахгүй хэмээн айж байгаа хүнд юу гэж хэлж болох вэ?

Суралцагчдыг хичээлийн эхэнд зурсан шатаа дахин харахад урь. Тэднийг селестиел хаант улсад ойртоход нь тусалж болох сурсан зүйлээ шатан дээр эсвэл эргэн тойронд нь бичихэд урамшуул. Суралцагчид Тэнгэрлэг Эцэг, Есүс хоёрын талаарх бодол, мэдрэмжээ бичиж болно. Мөн тэд селестиел алдар сууд хүрэх тэдний шийдвэр, итгэл найдвар хэрхэн хүчирхэгжсэн эсвэл сурсан үнэнүүд нь одоо ба ирээдүйд тэдний сонголтод хэрхэн нөлөөлж болох талаар бичиж болох юм.

Цаг байвал та нэг юм уу хоёр суралцагчийг ангийнхантай бодлоо товч хуваалцахад урьж болно.

Нэмэлт эх сурвалж

Бурханы хуулиуд хэрхэн биднийг хайрлах Түүний хайрын нотолгоо болдог вэ?

Ерөнхийлөгч Рассэлл М.Нэлсон ийн заасан.

Ерөнхийлөгч Рассэлл М.Нэлсон

Тэнгэрлэг хуулиуд бол Бурханы хүүхдүүддээ өгсөн бэлэг юм. … Би үүнийг аль болох товч тайлбарлая. Та нар Бурханы хуулиудыг дагаснаар өргөмжлөлийн зүг урагшилж байна гэсэн үг. …

… Бурханы хамгийн агуу адислалууд Түүний хуулиудыг дуулгавартай дагадаг хүмүүст зориулагдсан ба Тэрээр: “Учир нь миний гараас адислал хүлээн авахыг хүсэх тэд бүгд тэрхүү адислалын тулд өгөгдсөн хуулийг … баримтлах ёстой” [Сургаал ба Гэрээ 132:5] хэмээн тайлбарласан. Бурханы хуулиуд биднийг хайрлах Түүний хязгааргүй их хайраас мөн чадавхаа бүрэн дүүрэн ашиглаасай хэмээх Түүний хүслээс бүрэн үүдэлтэй. …

… Өргөмжлөл амаргүй. Энэ нь биднээс Бурханы хуулиудыг сахихын тулд тууштай, төвлөрсөн хичээл зүтгэл гаргахыг, тэгээгүй тохиолдолд чанд наманчлахыг шаарддаг. Гэвч ийн үйлдсэний шагнал нь бидний төсөөлж чадахаас ч хавьгүй илүү, учир нь энэ нь бидэнд энэ амьдралд баяр баясгаланг, ирэх амьдралд “хэзээ ч төгсөшгүй аз жаргалыг” [Мозая 2:41] авчирдаг. (Russell M. Nelson, “The Love and Laws of God” [Brigham Young University devotional, Sept. 17, 2019], speeches.byu.edu)

Сургаал ба Гэрээ 88:27. Бид “сүнстэй бие” болон босож ирнэ гэдэг нь юу гэсэн үг вэ?

Ерөнхийлөгч Жозэф Фийлдинг Смит (1876–1972) ийн заасан.

Жозэф Фийлдинг Смит

Үхэгсдийг амилах үед мөхсөн эгэл бие махбодууд сүнслэг бие махбодууд болон гарч ирэх болно. Өөрөөр хэлбэл, мөнх бус амьдралд биеийн амь цусанд байдаг бол үхэшгүй байдалд амилсан бие нь цусаар биш харин сүнсээр амилуулагддаг. Тиймээс энэ нь сүнслэг болж, анхны жишээ бологч Есүсийн биетэй адил мах, яснаас бүрдэх болно. (Joseph Fielding Smith, Doctrines of Salvation, comp. Bruce R. McConkie [1955], 2:284–85)

Сургаал ба Гэрээ 88:20–24. Эцсийн шүүлтээр аль алдар суугийн хаант улсыг хүлээн авахыг маань юу тодорхойлох вэ?

Ерөнхийлөгч Рассэлл М.Нэлсон ийн гэрчилсэн.

Ерөнхийлөгч Рассэлл М.Нэлсон

Бүх хүмүүнийг ажлууд болон зүрх сэтгэлийнх нь хүслийн дагуу шүүх болно [С ба Г 137:9]. Та өөр хэн нэгний өр төлөөсийг төлөх шаардлагагүй. Селестиел, террестиел, телестиел хаант улсад таны эзлэх эцсийн байр суурийг тохиолдлоор шийдвэрлэдэггүй. Их Эзэн хүн бүрд зориулан хэзээ ч өөрчлөгдөхгүй шаардлагуудыг тавьсан. Та нар судруудын юу заадгийг мэдэж авч, үүний дагуу амьдралаа загварчлах боломжтой болно [Иохан 14:2; 1 Коринт 15:40–41; Сургаал ба Гэрээ 76:50–119; 98:18-ыг үзнэ үү]. (Russell M. Nelson, “Constancy amid Change,” Ensign, Nov. 1993, 35)

Сургаал ба Гэрээ 88:35. Бурханы хуулиудыг зөрчдөг хүмүүст юу тохиолддог вэ?

Арван хоёр төлөөлөгчийн чуулгын ахлагч Дэйл Г.Рэнланд ийн тайлбарлажээ.

Ахлагч Дэйл Г.Рэнланд

Нас барсныхаа дараа бид шаардлагыг нь хангасан зүйлсийг л хүлээн авах бөгөөд “[бид] [зөвхөн] хүлээн авахад бэлэн түүнийгээ эдлэх” [Сургаал ба Гэрээ 88:32] болно. Мөнхийн хувь тавилангаа олж мэдэх нь бидний сонголтоос шалтгаалдаг. Энэ нь ариун гэрээнүүдийг байгуулж, сахихыг шаарддаг. Гэрээний энэхүү зам нь бидний Христэд хүрэх зам бөгөөд туйлын үнэн, үүрдийн, өөрчлөгдөшгүй хуульд тулгуурладаг. Бид өөрсдийн замыг гаргаад, Бурханы амласан үр дүнг хүлээж болохгүй. Урьдчилан зөгнөсөн мөнхийн хуулиудыг дагаагүй атлаа Түүний адислалуудыг хүлээх нь [Сургаал ба Гэрээ 130:20–21-ийг үзнэ үү] төөрөлдсөн хэрэг бөгөөд халуун пийшинд хүрчхээд, түлэгдэхгүй байхыг “шийдэх”-тэй адил юм.

Бидний сонгох нь чөлөөтэй хэдий ч бид илчлэгдсэн замыг дагаагүйнхээ үр дагаврыг сонгож чадахгүй [2 Нифай 2:5, 16, 26–27-г үзнэ үү]. “Хууль зөрчигч, мөн хуулийг мөрддөггүй атлаа өөрөө өөртөө хууль бий болгохыг эрэлхийлдэг, … тэр нь хуулиар ч, мөн нигүүлслээр ч, шударга ёсоор ч, мөн шүүлтээр ч ариусгагдаж чадах нь үгүй” [Сургаал ба Гэрээ 88:35] хэмээн Их Эзэн айлдсан. Бид Тэнгэрлэг Эцэгийн замаас хазайчхаад, гарсан муу үр дүнгийн төлөө Түүнийг буруутгаж болохгүй. (Дэйл Г.Рэнланд, “Таны бурханлаг шинж чанар ба мөнхийн хувь тавилан,” Лиахона, 2022 оны 5-р сар, 77)

Нэмэлт суралцах үйл ажиллагаа

Үзүүлэнт хичээл

“Бидний мөнх бус бие” хэсгийг эхлүүлэх өөр нэгэн арга бол та суралцагчдад Амилуулалтын сургаалыг товч дүгнэхэд нь туслах явдал юм. Бээлий үзүүлээд, энэ нь бие махбодыг төлөөлж байгааг тайлбарла. Нэг суралцагчийг бээлийг өмсөөд хуруунуудаа хөдөлгөхөд урь. Та дараахтай адил асуултуудыг тавьж болно.

• Хэрэв бээлий бие махбодыг төлөөлж байгаа бол гар нь юуг төлөөлж болох вэ?

• Хэрэв “бие” нь “сүнс”-нээс салбал юу болох вэ?

Бурханы хуулиуд биднийг хамгаалдаг

Суралцагчдад Бурханы хуулиудаас ирдэг хамгаалалтын талаар эргэцүүлэн бодоход нь туслахын тулд та дараах видеонуудаас аль нэгийг үзүүлж болох юм.

• “A Secure Anchor” (3:36)

• “Why Does God Give Us Commandments?” (0:39)

• “Blessed and Happy Are Those Who Keep the Commandments of God” (5:41)

Шат

Суралцагчдыг хичээлийн төгсгөлд өөрсдийн зурсан шат дээр үнэлэлт дүгнэлт хийх үед та бошиглогч Иосеф Смитийн (1805–44) дараах мэдэгдлийг хуваалцаж, үүний талаар ярилцаж болно.

Бошиглогч Иосеф Смит

Та шатаар өгсөх боллоо гэхэд доороос нь эхэлж, дээд талд нь гартал алхам алхмаар өгсдөг шүү дээ. Сайн мэдээний зарчмуудыг эзэмших нь үүнтэй адил бөгөөд та нар өргөмжлөлийн анхдагч зарчмаас эхэлж, улмаар бүгдийг нь мэдэж авах ёстой. Гэвч та эдгээр зарчмыг мэдэхээсээ өмнө хөшигний цаад талд гарчихсан бол үүнд ихээхэн цаг хугацаа шаардагдана. Энэ дэлхийд бүхнийг ойлгоно гэж байхгүй. Бид бүр ирэх дэлхийд ч аврал, өргөмжлөлөө мэдэх нь агуу ажил байх болно. (Сүмийн ерөнхийлөгчдийн сургаалаас: Иосеф Смит [2007], 303).

Амилуулалтын дараалал

Та суралцагчдыг Сургаал ба Гэрээ 88:96–102-ыг уншаад, Амилуулалтаар юу тохиолдохыг олж мэдэхэд урьж болно. Та уншлагыг амилуулалтын талаарх хэд хэдэн шүлгүүдэд хувааж болно (96–98, 99, 100–101, 102-р шүлэг). Та эдгээр шүлгийг дэлгэрэнгүй тайлбарлахын тулд дараахыг хуваалцаж болох юм.

Их Эзэний Хоёр дахь ирэлтийн үеэр амьд буй зөв шударга хүмүүс “амилуулагдаж мөн түүнийг угтахаар дээш аваачигдах болно” (С ба Г 88:96). Селестиел хаант улсыг өвлөх хүмүүс хамгийн түрүүнд амилуулагдана (С ба Г 88:96–98-ыг үзнэ үү). Селестиел хаант улсыг өвлөн авах хүмүүсийг амилуулагдсаны дараа террестриел хаант улсыг өвлөх тэд амилуулагдана (С ба Г 88:99; мөн С ба Г 76:71–79-ийг үзнэ үү). Эдгээр нь Есүс Христийг амьд байхдаа бус, сүнсний дэлхийд хүлээн авсан хүмүүс юм (С ба Г 88:99-ийг үзнэ үү). Мянган жилийн дараа “сүүлчийн амилалт” (С ба Г 76:85) буюу шударга бус хүмүүсийн амилуулалт тохиох болно. Эдгээр нь телестиел хаант улсыг өвлөн авах хүмүүс ба эцэст нь “бузар хэвээр үлдэх” мөхлийн хөвгүүд юм (С ба Г 88:100–102-ыг үзнэ үү). (Сургаал ба Гэрээний суралцагчийн гарын авлага [2018], 488)