“103-р хичээл—Сургаал ба Гэрээ 88:117–141: Судлахаар мөн итгэлээр суралцахыг эрэлхийлэгтүн,” Сургаал ба Гэрээний семинарын багшийн гарын авлага (2025)
“Сургаал ба Гэрээ 88:117–141,” Сургаал ба Гэрээний семинарын багшийн гарын авлага
103-р хичээл: Сургаал ба Гэрээ 88
Сургаал ба Гэрээ 88:76–80; 117–141
Судлахаар мөн итгэлээр суралцахыг эрэлхийлэгтүн
Сургаал ба Гэрээ 88-ын энэ хэсэгт Их Эзэн суралцахуйн зарчмуудыг илчилж, Иосеф Смитэд болон бусдад Бошиглогчдын сургуулийг зохион байгуулахыг зарлигласан. Сургуульд хамрагдсан хүмүүс “шилдэг номуудаас” мэргэн ухааныг эрэлхийлэх, “судлахаар мөн тэрчлэн итгэлээр” хамтдаа суралцах ёстой байв (Сургаал ба Гэрээ 88:118). Энэ хичээл нь суралцагчдад янз бүрийн орчинд Есүс Христэд итгэх итгэлээр суралцахад тусалж чадна.
Боломжит суралцах үйл ажиллагаа
Тэнгэрлэг Эцэг намайг сураасай хэмээн хүсдэг
Хичээлийн эхэнд суралцагчдаас дуртай хичээлээ хуваалцах юм уу сурах дуртай сэдвээ товч тайлбарлахад урих талаар бод. Шаардлагатай бол иргэний боловсрол гэдэг нь шашинтай холбоогүй мэдлэгийг хэлнэ гэдгийг тайлбарла.
-
Амьдралынхаа туршид иргэний болон сүнслэг мэдлэгийг олж авах нь яагаад чухал байж болох вэ?
-
Математик эсвэл шинжлэх ухаан зэрэг хичээлүүдийг сурах нь Есүс Христийн сайн мэдээг судлахаас юугаараа ялгаатай вэ? Энэ нь юугаараа адилхан байж болох вэ?
1833 оны 1-р сард Иосеф Смит болон Огайогийн Көртландад амьдардаг бусад санваартан Их Эзэний зааврыг дагаж Бошиглогчдын сургууль нэртэй сургуулийг байгуулжээ. 1833 оны өвөл уг сургуулийн гишүүд Ньюел К.Витнейн агуулахын дээд өрөөнд цуглав. Хожим нь тэд Сүмийн хэвлэх газарт мөн Көртландын ариун сүмд уулздаг болсон. Сургаал ба Гэрээ 88:77–80-ыг уншаад, Их Эзэн эдгээр санваартанд юу судлахыг зарлиг болгосныг олж мэд.
Та самбарт геологи, түүх, одон орон, улс төр, газарзүй зэрэг хичээлийн нэрсийг бичээд, суралцагчдаас эдгээр хичээлийг илэрхийлсэн үг, хэллэгийг олж тогтоохыг хүс.
-
Та нар юу олж мэдсэн бэ?
-
80-р шүлэгт цэдэглэснээр, Их Эзэн яагаад эдгээр ахад ийм өргөн хүрээний сэдвийг судлахыг зааварласан бэ?
-
Эдгээр зүйлийг сурах нь Их Эзэнд үйлчлэхээр бэлтгэхэд бидэнд ямар арга замаар тусалж болох вэ?
Хичээлийн үлдсэн хэсэг нь тэдний Есүс Христэд итгэх итгэлийг бэхжүүлж, Түүнд илүү сайн үйлчлэхээр бэлтгэхэд сургах зарчмуудад төвлөрнө гэдгийг суралцагчдад хэл. Та суралцагчдыг итгэл, суралцахуйгаараа өсөж хөгжихийн тулд юу хийх талаар хувийн илчлэлт эрэлхийлэхэд урьж болно.
Судлахаар мөн итгэлээр суралцахыг эрэлхийлэгтүн
Сургаал ба Гэрээ 88:118 бол төгс эзэмших сургаалын судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэхэд урьж болно.
Сургаал ба Гэрээ 88:118-ыг уншаад, Аврагч суралцахыг эрэлхийлэхэд биднийг хэрхэн урьдаг талаар олж мэд.
Суралцагчдыг уг судрын хэсгийг судалсны дараа, Их Эзэн суралцахуйн талаар юу илчилснийг хуваалцахад урь. Хариултуудад хичээнгүйлэн эрэлхийлэх, бие биедээ заах, шилдэг номуудаас мэргэн ухааныг эрэлхийлэх, судлахаар мөн итгэлээр суралцах зэрэг нь багтаж магадгүй.
-
Энэ шүлэг суралцахуйн тухай юу заадаг вэ?
-
Есүс Христэд итгэх итгэлээ хэрхэн өсгөх талаар бид юу сурч болох вэ?
Шаардлагатай бол 118-р шүлгийн эхэнд Их Эзэн зарим хүн итгэлгүй байгаа талаар хэлсэн гэдгийг дурдаж болно. Мөн та итгэлгүй хүмүүст туслахын тулд Их Эзэний өгсөн тодорхой зааварчилгааг хуваалцахад суралцагчдыг урьж болно.
Эдгээр шүлгээс бидний сурч болох зарчмын нэг нь: Хэрэв бид судлахаар тэрчлэн итгэлээр суралцахыг хичээнгүйлэн эрэлхийлэх юм бол Есүс Христэд итгэх бидний итгэл өсөх болно юм.
-
Судлахаар хичээнгүйлэн суралцахаас гадна итгэлээр суралцахыг юу гэсэн утгатай гэж та нар бодож байна вэ?
Суралцагчдад итгэлээр суралцах гэдэг нь ямар утгатайг илүү сайн ойлгуулахын тулд ерөнхийлөгч Рассэлл М.Нэлсоны дараах мэдэгдлийг харуулж болох юм. Та эсвэл “Ирээдүйгээ итгэлээр хүлээн ав” видеог цагийн код 10:28-аас 11:20 хүртэл үзүүлж болно.
Ерөнхийлөгч Рассэлл М.Нэлсон ийн тайлбарласан.
Их Эзэн бидэнд хэрхэн “судлахаар мөн тэрчлэн итгэлээр, “суралцахыг эрэлхийл[ж] [Сургаал ба Гэрээ 88:118; тодотгол нэмсэн] итгэлээ өсгөх талаар заасан. Бид Есүс Христийн зарлигуудыг сахиж, “үргэлж Түүнийг сана[снаар]” [Моронай 4:3] Түүнд итгэх итгэлээ хүчирхэгжүүлдэг. Цаашилбал, биднийг Түүнд итгэх итгэлээ хэрэгжүүлэх бүрд итгэл маань өсөн нэмэгдэж байдаг. Итгэлээр суралцах гэдэг ийм л утгатай.
Жишээлбэл: Олны үзэл бодол биднийг дорд үзсэн ч гэсэн Бурханы хуулийг дуулгавартай дагахад итгэлтэй байх бүрдээ эсвэл гэрээгээ цуцлахыг дэмждэг зугаа цэнгэл эсвэл үзэл суртлыг сөрөн зогсох бүрдээ бид итгэлээ хэрэгжүүлж байдаг ба энэ нь улмаар бидний итгэлийг өсгөн нэмэгдүүлдэг юм. (Рассэлл М.Нэлсон, “Ирээдүйгээ итгэлээр хүлээн ав,” 2020 оны 10-р сарын Ерөнхий чуулган, 79)
-
Та нар ерөнхийлөгч Нэлсоны үгээс юу сурсан бэ?
-
Итгэлээр суралцахыг янз бүрийн суралцах боломжуудад (гэр, сургууль, семинар, сүм гэх мэт) хэрхэн хэрэглэх боломжтой гэж та нар бодож байна вэ?
Суралцагчдад итгэлээр суралцахын тулд гаргаж буй хичээл зүтгэлээ үнэлэхэд нь туслахын тулд самбарт гэр, сургууль, семинар, сүм гэсэн ангиллуудыг бичээд, судлах тэмдэглэлдээ жагсаан бичихэд тэднийг урь. Тэднийг итгэлээр хичээнгүйлэн суралцах хичээл зүтгэлээ ангилал тус бүрд 1–5 хүртэлх оноогоор үнэлэхэд урамшуул.
Шаардлагатай бол судлахаар мөн итгэлээр суралцах гэдэг нь суралцах боломжуудад идэвхтэй оролцож, дараа нь сурч, мэдэрч буй зүйлийнхээ дагуу үйлдэх явдал гэдгийг тэдэнд сануул. Суралцагчдыг сайжруулахыг хүсэж буй нэг талбараа сонгоод, хичээлийн үлдсэн хэсэгт тэр талбартаа анхаарахад урь.
“Өөрсдийгөө зохион байгуул”
Сургаал ба Гэрээ 88:119–126-г уншаад, судлахаар мөн итгэлээр суралцах бидний чадварыг нэмэгдүүлэх Их Эзэний зөвлөгөөг олж мэд.
Та цүнх авчирч бас жижиг бүлгээрээ хэрэглэх хэд хэдэн цаас бэлдэж болно. Суралцагчдыг Сургаал ба Гэрээ 88:119–126-г судлах явцдаа итгэлээр суралцахад туслах Их Эзэний сургаалуудыг цаасан дээр тус тусад нь бичихэд урь. Суралцагчид Их Эзэний урамшуулдаг бас бидний зайлсхийх ёстой хандлага, зан байдлыг жагсааж болно. Бичиж дуусаад тэд цаасаа цүнхэнд хийнэ.
-
Эдгээр хандлага, зан байдлын аль нь та нарын сурах чадварт нөлөөлсөн бэ?
-
Эдгээр хандлага эсвэл зан байдлын алиныг нь туршиж үзэхэд Сүнс таныг өдөөж байна вэ?
Суралцагчдаас өсвөр үеийнхэнд янз бүрийн орчинд (гэр, сургууль, семинар, сүмд) гардаг итгэлээр суралцахад тулгардаг саад бэрхшээлийн талаар бодохыг хүс. Ангилал тус бүрийн доор тэдний санааг жагсаа. Суралцагчдыг цүнхнээс цаас сонгоход урь. Тэгээд тэд цаасан дээр бичсэн зүйлийг уншаад, суралцахад тулгардаг аль нэг сорилтыг даван туулахад Их Эзэний зөвлөгөө хэрхэн тус болж болох тухай ярилцлагыг явуулж болно. Аврагч энэ зөвлөгөөг хэрхэн үлгэрлэсэн талаар бодоход тэднийг урьж болох юм.
Жишээлбэл: Тэд сургуулийн шалгалтад бэлдэх эсвэл тодорхой залбирлын хариултыг хүлээн авах зэрэг бэрхшээлийг тодорхойлж болно. Хэрэв цүнхнээс мацгийн өргөөг байгуул гэж бичсэн цаас гарч ирвэл тэд мацаг барих, залбирах нь тэдний суралцах, Их Эзэнээс ирсэн хариултыг илүү сайн таньж мэдэх чадварыг хэрхэн сайжруулах талаар санаа, туршлагаа солилцож болно. Хэрэв та суралцагчдаас Аврагч мацаг барих замаар суралцахуйг хэрхэн үлгэрлэсэн тухай жишээг бодохыг хүссэн бол Тэрээр ажил болон тохинуулалдаа бэлтгэхийн тулд хэрхэн мацаг барьсныг тэд санаж магадгүй (Матай 4:1–10-ыг үзнэ үү). Есүс Христийн сургаал амьдралд нь хамааралтай болохыг суралцагчдад ойлгуулахын тулд уг үйл ажиллагааг олон удаа давт.
Хувьдаа хэрэгжүүлэх
Хичээлээ дүгнэхийн тулд тэдэнд итгэлээр суралцахыг илүүтэй эрэлхийлэх арга замуудыг тунгаан бодох цаг гаргаж өг. Та тэднийг дараах зөвлөмжийг ашиглан судлах тэмдэглэлдээ бодол санаагаа тэмдэглэхэд урамшуулж болно.
-
Итгэлээр суралцахын тулд хичээл зүтгэлээ сайжруулах боломжтой амьдралынхаа талбарыг (гэр, сургууль, семинар, сүм гэх мэт) сонго.
-
Итгэлээр суралцах нь энэ талбарт та нарт хэрхэн тусална гэж бодож байна вэ?
-
Та нар Есүс Христэд итгэх итгэлээр суралцахын тулд юу хийхийг хичээх вэ?
Хуваалцах хүсэлтэй суралцагчдыг хариултаасаа хуваалцахад урь. Үүнийг амжилттай хэрэгжүүлсэн туршлагатай хүмүүсийг гэрчлэлээ хуваалцахад урих нь тохиромжтой цаг байж болох юм.