Семинар
100-р хичээл—Сургаал ба Гэрээ 88:1–13, 41–50: Христийн гэрэл

“Сургаал ба Гэрээ 88:1–13, 41–50: Христийн гэрэл,” Сургаал ба Гэрээний семинарын багшийн гарын авлага (2025)

“Сургаал ба Гэрээ 88:1–13, 41–50,” Сургаал ба Гэрээний семинарын багшийн гарын авлага

100-р хичээл: Сургаал ба Гэрээ 88

Сургаал ба Гэрээ 88:1–13, 41–50

Христийн гэрэл

Гэрэлд анхаарлаа хандуулж буй Христийн зураг

Огайогийн Көртландад байхдаа Иосеф Смит болон дээд санваартнууд Тэнгэрлэг Эцэгт хандан Сионыг барихтай холбоотой илчлэлт авахын төлөө залбирчээ. Энэхүү илчлэлт нь Есүс Христийн гэрлийн хүч, цар хүрээний тухай үнэнийг заасан. Энэ хичээл нь суралцагчдад амьдралдаа байгаа Христийн гэрлийн нөлөөнд илүү их талархахад туслах зорилготой.

Боломжит суралцах үйл ажиллагаа

Бидний мэдэрдэг зүйлс

Суралцагчдад дараах асуултыг тавьж, хариултуудыг нь жагсаан бич. Эсвэл тэд асуултыг жижиг бүлэг дотроо ярилцаж, дараа нь хариултуудыг нь самбарт бичиж болно.

  • Та нарт мэдрэгддэг ч харагддаггүй зүйлсийн жишээ юу вэ?

    Суралцагчид дулаан, салхи, хайр, талархал, итгэл гэх мэт зүйлсийг жагсааж болно.

  • Та нарт мэдрэгддэг ч харагддаггүй зүйлс байдгийг мэдэх нь яагаад чухал вэ?

Та суралцагчдыг амьдралдаа байгаа Бурханы нөлөөг таньж мэдэхийн тулд сүнслэг өдөөлт эрэлхийлэхэд урьж болно.

Христийн гэрлийн үүрэг

Иосеф Смит болон Сүмийн есөн ахлагч Огайогийн Көртланд дахь Ньюел К.Витнейн дэлгүүрийн дээд давхарт цугларав. Тэд Сионыг байгуулах үүргийнхээ талаар илүү ихийг ойлгохыг хүсэж байлаа. Иосеф хүн бүрийг Их Эзэний тааллыг мэдэхийн тулд ээлжлэн залбирахад урьжээ. Тэднийг залбирсны дараа бошиглогч одоогийн Сургаал ба Гэрээ 88-ыг хүлээн авсан юм.

Суралцагчдыг дараахыг уншиж эхлэх үед 6-р шүлэгт Есүс Христийг хэлж байгаа гэдгийг ойлгосон эсэхийг нь нягтал.

Сургаал ба Гэрээ 88:6–13-ыг уншаад, эдгээр шүлэгт Есүс Христ болон Түүний гэрлийн талаар та нарт юу зааж буйг олж мэд.

  • Та нар эдгээр шүлгээс Христийн гэрлийн талаар юу мэдэж авсан бэ?

    Суралцагчид янз бүрийн ойлголтуудыг хуваалцаж магадгүй ч Христийн гэрэл Түүний бүх бүтээлд гэрэл бас амьдралыг өгдөг гэсэн үнэнийг олж тогтооход тэдэнд тусал.

    Христийн гэрлээр дамжуулан Бурханы нөлөөг ойлгосноор тэдний өдөр тутмын амьдрал хэрхэн өөрчлөгдөж болохыг олж мэдэхэд нь тусал. Дараах асуулт бол ийн үйлдэх нэг арга зам юм.

  • Бурханы нөлөөг таньж мэдэх нь тустай ямар нөхцөл байдлууд өсвөр үеийнхэнд тулгардаг вэ? Яагаад?

тараах материалын шигтгээ зурагДараах үйл ажиллагаа нь суралцагчдыг Христийн гэрэлд, үүний амьдралд үзүүлэх нөлөөнд илүү талархдаг болоход туслах зорилготой.

Та ангийн эргэн тойронд суралцагч бүр очиж мөн гүйцээх боломжтой дөрвөн өртөөг бүтээж болно. Суралцагчдыг өртөө бүр лүү явахдаа тэмдэглэлийн дэвтэр, бичих зүйл, судар зэргээ авч явахад урь. Эсвэл та суралцагчдыг дөрөв дөрвөөр нь бүлэгт хуваагаад, суралцагч бүрд тараах материалын нэг хэсгийг бөглөхөөр даалгаж болох юм. Дараа нь тэд сурсан зүйлээ бүлгийнхээ гишүүдтэй хуваалцаж болно.

Христийн гэрэл

Христийн гэрлийг тодорхойлох

Сургаал ба Гэрээ 88:12–13-ыг уншаад, Христийн гэрлийг хэрхэн дүрсэлснийг олж мэд.

Христийн гэрлийн дараах тодорхойлолтыг унш.

“[Христийн гэрэл бол] Христээр дамжин Бурханаас ирж мөн бүх зүйлд амьдрал хийгээд гэрлийг өгдөг бурханлаг эрч хүч буюу нөлөө. Энэ бол тэнгэр, газар дээрх бүх зүйл түүгээр зохицуулагддаг хууль юм (С ба Г 88:6–13). Энэ нь түүнчлэн сайн мэдээний үнэнийг ойлгоход, тэрчлэн аврал руу хөтөлдөг сайн мэдээний тэрхүү зам дээр гарахад хүмүүст тусалдаг.” (Судруудын удирдамж, “Гэрэл, Христийн гэрэл,” scriptures.ChurchofJesusChrist.org)

  • Та нар Христийн гэрлийн талаарх ойлголтоо хэрхэн дүгнэх вэ?

  • Христийн гэрэл та нарт хувь хүний чинь хувьд хэрхэн нөлөөлсөн гэж бодож байна вэ?

Христийн гэрэл бол бидний ухамсар юм

Христийн гэрлийн нэг илрэл бол бидний ухамсар. Ухамсрын талаарх ойлголтоо Хүүхдийн хэсгийн хүүхдэд ойлгогдохоор тодорхойлон бич.

Дараах тодорхойлолтыг уншаад, өөрийн тодорхойлолтод юу нэмж болохыг хар.

“[Ухамсар нь] бүх хүмүүст Христийн гэрлээс ирдэг зөв ба буруугийн дотоод мэдрэмж юм (Морон. 7:16). Христийн гэрэл хүн бүхэнд өгөгдсөн учраас бид төрөхдөө зөв бурууг ялгах төрөлхийн чадвартай байдаг (С ба Г 84:46). Энэ чадварыг ухамсар гэдэг. Үүнийг эзэмшсэнээр бид хариуцлагатай бие хүмүүс болдог. Бусад чадварын нэгэн адил бидний ухамсар нүглээс болон буруу ашигласнаас болж мөхөж болно.” (Судруудын удирдамж, “Ухамсар,” scriptures.ChurchofJesusChrist.org)

Сургаал ба Гэрээ 84:45–46 ба Моронай 7:16-г уншаад, Христийн гэрэл бидний ухамсрын үүргийг хэрхэн гүйцэтгэдгийг дүрсэлсэн үг, хэллэгийг хайж ол. Хоёр эшлэлийг холбоотой болгон тэмдэглэх талаар бодож үз.

  • Эдгээр шүлэгт ухамсар гэж юу болохыг ойлгоход туслах ямар үг хэллэг байна вэ?

  • Тэнгэрлэг Эцэг, Есүс Христ хоёр яагаад та нарт ухамсар суулгасан гэж бодож байна вэ?

Ухамсраа дагах эсвэл үл тоомсорлох нь та нарын сонголт болон мөнхийн аянд хэрхэн нөлөөлөх вэ?

Христийн гэрэл хүн бүрийн дотор байдаг

Ням гаргийн хичээл дээр танаас бүх хүнийг, ялангуяа өөрөөсөө ялгаатай хүмүүсийг илүү ойлгож, харьцах талаар бодлоо товч хуваалцахыг хүссэн гэж төсөөлөөд үз. Та нар дараах болон өөрт хэрэгтэй гэж үзсэн бусад эх сурвалжийг ашиглаж болно.

Арван хоёр төлөөлөгчийн чуулгын ерөнхийлөгч Боид К.Пакэр (1924–2015) ийн заасан.

Ерөнхийлөгч Боид К.Пакэр

Бид Христийн гэрлийн талаар мэдэх тусам амьдралыг улам илүү ойлгож, бүх хүн төрөлхтнийг илүү их хайрлах болно. Бид илүү сайн багш, номлогч, эцэг эх, эрэгтэй, эмэгтэй мөн хүүхдүүд байх болно. Бид Сүм дэх ах, эгч, дүү нараа болон итгэдэггүй хүмүүсийг ч илүү гүн гүнзгий хүндэтгэх болно. …

Христийн гэрэл нь нарны гэрэл шиг түгээмэл зүйл юм. Хүний амьдрал хаана байна, тэнд Христийн Сүнс байдаг. Аливаа амьд бодгаль бүр үүнийг эзэмшдэг. …

Хэрэв бид уулзах хүн бүрийнхээ хийгээд … өөрсдийнхөө дотор байдаг … Христийн гэрлийн бодит байдлыг ойлговол урьд өмнө мэддэг байснаасаа илүү урам зоригтой, хүсэл тэмүүлэлтэй байх болно. Ийм л байх ёстой! Ийм ч байх болно! Энэ бүхэн нь сайн мэдээний үнэний хэмжээс ба дэндүү цөөн хүн үүнийг ойлгодог. (Boyd K. Packer, “The Light of Christ,” Ensign, Apr. 2005, 8, 13–14)

Христийн гэрлийг ойлгох нь бусдыг харах өнцөгт тань хэрхэн нөлөөлөх талаар 2-оос 3 өгүүлбэр бич.

Орчлон ертөнц дэх Христийн гэрэл

Та нар хэзээ нэгтээ энэ дэлхийн буюу орчлон ертөнцийн гоо үзэсгэлэн, сүр жавхланд сэтгэл тань хөдөлж байсан уу? Эдгээр нь та нарт ямар мэдрэмж төрүүлдэг вэ?

Сургаал ба Гэрээ 88:7–10, 45–47-г уншаад, Христийн гэрэл, дэлхий, орчлон ертөнцийн талаар юу сурч болохыг олж мэд.

  • Бид Их Эзэний бүтээлтээс Түүний талаар юу мэдэж авч болох вэ?

  • Орчлон ертөнц дэх Бурханы нөлөөг харах нь үүнийг амьдралдаа таньж мэдэхэд бидэнд хэрхэн тусалж чадах вэ?

Суралцагчдад өртөөнүүдээр явж даалгавруудыг гүйцэтгэх цаг гаргаж өгсний дараа тэдэнд сурсан, мэдэрсэн зүйлээ хуваалцах боломжийг олгох талаар бодож үз. Дараах асуултууд тусалж магадгүй.

  • Та нар Христийн гэрлийн талаар гүн сэтгэгдэл төрүүлсэн юуг сурсан бэ?

  • Христийн гэрлийн нөлөөг та нар амьдралдаа хэрхэн харсан бэ?

  • Христийн гэрлийг амьдралдаа таньж мэдэх нь Тэнгэрлэг Эцэг, Есүс Христ хоёртой харилцах харилцаанд чинь хэрхэн нөлөөлж чадна гэж та нар бодож байна вэ?

Та Христийн гэрлийг илүү сайн ойлгосноор танд хэрхэн нөлөөлснийг хуваалцаж болно.