Lesson 102: Doktrina at mga Tipan 88

Doktrina at mga Tipan 88:51–95

“Magsilapit sa Akin at Ako ay Lalapit sa Inyo”

Sa bahaging ito ng Doktrina at mga Tipan 88, inihayag ni Jesucristo kung paano Niya pinamamahalaan ang Kanyang mga nilikha at inaanyayahan tayong lumapit sa Kanya. Ang lesson na ito ay makatutulong sa mga estudyante na matanggap ang mga pagpapala ng paglapit sa Ama sa Langit at kay Jesucristo.

Mga Posibleng Aktibidad sa Pag-aaral

Mga Malapit na Ugnayan

Maaaring simulan ang klase sa pamamagitan ng pagkakaroon ng isang talakayan tungkol sa pagpapatibay ng mga malapit na ugnayan. Maaari mong anyayahan ang bawat estudyante na isulat sa pisara ang pangalan ng isang taong malapit sa kanila. Sabihin sa ilang estudyante na ibahagi kung bakit nila pinili ang taong iyon.

Maaari kang magtanong ng mga follow-up na tanong gaya ng sumusunod:

• Ano ang nagpapalapit sa ugnayan ng dalawang tao? Ano ang nagpapalayo?

• Ano ang magagawa ninyo para muli kayong magkalapit ng isang taong napalayo sa inyo?

Sa Doktrina at mga Tipan 88, inilarawan ng Tagapagligtas ang Kanyang kapangyarihan na namamahala sa Kanyang mga nilikha (tingnan sa talata 41–45). Itinuro Niya na kapag nakikita natin ang mga bituin at mga planeta sa kalangitan, ating “nakikita ang Diyos na gumagalaw sa kanyang kamahalan at kapangyarihan” (Doktrina at mga Tipan 88:47). Pagkatapos ay nagbigay si Jesucristo ng talinghaga upang ituro ang tungkol sa ugnayan ng Diyos sa Kanyang mga nilikha. Itinuturo nito na lumikha ang Diyos ng maraming daigdig na tinirahan ng Kanyang mga anak at dinadalaw Niya ang bawat isa sa mga ito. Iniutos ng Panginoon sa Kanyang mga kaibigan na tumawag sa Kanya habang Siya ay malapit sa kanila (tingnan sa talata 51–62).

“Magsilapit sa Akin”

Basahin ang Doktrina at mga Tipan 88:63, at alamin kung ano ang paanyaya ni Jesucristo na gawin natin.

• Anong mga paanyaya ang nakikita ninyong personal na makabuluhan?

• Anong mga alituntunin ang matutukoy ninyo mula sa mga paanyayang ito?

  Maaaring makatukoy ang mga estudyante ng iba’t ibang alituntunin—halimbawa, kapag lumalapit ako kay Jesucristo, Siya ay lalapit sa akin. Maaari mong ipaliwanag na kapag lumalapit tayo kay Jesucristo, lumalapit din tayo sa Ama sa Langit.

  Upang matulungan ang mga estudyante na maunawaan ang alituntuning ito, maaari mong talakayin kung paano ito inilarawan sa talinghaga. Maaari ding makatulong ang ilan sa mga sumusunod na tanong:

• Paano ninyo ilalarawan ang ibig sabihin ng lumapit sa Ama sa Langit at kay Jesucristo?

• Sa inyong palagay, sa paanong mga paraan Sila lumalapit sa atin?

• Ano ang ilang dahilan kung bakit nais ng isang tao na mapalapit sa Ama sa Langit at kay Jesucristo?

Bigyan ang mga estudyante ng pagkakataong pagnilayan kung gaano sila kalapit sa Ama sa Langit at kay Jesucristo. Maaari mo silang anyayahang isulat ang “Ama sa Langit at Jesucristo” sa isang pahina sa kanilang study journal. Pagkatapos ay sabihin sa mga estudyante na magdrowing ng isang larawan na kumakatawan sa kanilang sarili. Maaaring pagnilayan ng mga estudyante ang mga pagkakataon na nadama nilang malapit sila sa Diyos at sa Kanyang Anak, at kung ano ang nakatulong sa kanila na madama ito. Maaari ding pagnilayan ng mga estudyante kung gaano sila kalapit sa Ama sa Langit at kay Jesucristo sa kasalukuyan.

Ipaalala sa mga estudyante na kung nadarama natin na malayo tayo sa Panginoon, maaari tayong kumilos para baguhin ang ating sitwasyon. Sabihin sa mga estudyante na pagnilayan ang mga pangangailangan nila at kung paano sila pagpapalain kung mas mapapalapit sila sa Ama sa Langit at kay Jesucristo. Hikayatin ang mga estudyante na maghangad ng personal na paghahayag para malaman kung ano ang magagawa nila para mas mapalapit sa Kanila.

Mga paanyaya at mga pagpapala

Maaaring kumpletuhin ng mga estudyante ang sumusunod na chart sa pisara o sa kanilang study journal. Kung kinakailangan, tulungan ang mga estudyante na maunawaan ang iba’t ibang parirala sa Doktrina at mga Tipan 88:63–69. Halimbawa, maaari mong linawin ang talata 65 sa pamamagitan ng pagpapaliwanag na hindi tayo dapat magkaroon ng maling motibo o maghangad na matugunan ang mga makamundong hangarin kapag nagdarasal tayo. Maaari mong tulungan ang mga estudyante na maunawaan na ang ibig sabihin ng salitang kapaki-pakinabang sa talata 64–65 ay akma o naaangkop.

Basahin ang Doktrina at mga Tipan 88:63–69 at kumpletuhin ang sumusunod na chart:

Mga Paraan para Mapalapit sa Ama sa Langit at kay Jesucristo	Mga Pagpapala mula sa Paglapit sa Ama sa Langit at kay Jesucristo

Ang isang paraan para matulungan ang mga estudyante na mahikayat sa mga talatang ito ay anyayahan ang isang estudyante na humawak ng isang larawan ng Tagapagligtas sa harapan ng klase. Sabihin sa isa pang estudyante na tumayo sa likuran ng silid-aralan.

Habang ibinabahagi ng mga estudyante ang nalaman nila, maaaring lumapit ang estudyante na nasa may likuran ng klase sa estudyanteng may hawak ng larawan ng Tagapagligtas. Ang estudyanteng may hawak ng larawan ng Tagapagligtas ay maaari ding humakbang papalapit.

Maaari mong gamitin ang ilan sa mga pahayag sa “Karagdagang Resources” para matulungan ang mga estudyante na maunawaan ang mga paraan para mapalapit sa Ama sa Langit at kay Jesucristo.

Ang mga sumusunod na tanong ay makatutulong sa iyo na talakayin kung ano ang natuklasan ng mga estudyante sa mga talatang binasa nila:

• Sa inyong palagay, paano makatutulong sa inyo ang paggawa nito para mapalapit sa Ama sa Langit at kay Jesucristo?

• Paano maaaring makaimpluwensya ang mga pagpapalang ito sa iyong ugnayan sa Kanila?

Ang aking plano

Maaari mong ipanood ang video na “How I #HearHim: Elder Dale G. Renlund” (3:00). Sabihin sa mga estudyante na alamin kung ano ang itinuro ni Elder Renlund tungkol sa paglapit kay Jesucristo. Talakayin kung ano ang natutuhan ng mga estudyante mula sa kanyang karanasan.

Ang pag-anyaya sa mga estudyante na sagutin ang mga sumusunod na tanong sa kanilang study journal ay makapaghahanda sa kanila na magbahagi sa klase. Maaari ka ring magbahagi ng isang personal na karanasan tungkol sa ginawa mo para mapalapit kay Jesucristo at kung paano mo nadama na lumalapit Siya sa iyo.

• Paano mo sinisikap na mapalapit sa Ama sa Langit at kay Jesucristo?

• Paano ka napagpala o ang isang taong kilala mo dahil sa pagsisikap na mapalapit sa Kanila?

Sabihin sa mga estudyante na hangarin ang Espiritu Santo para akayin sila na malaman kung ano ang magagawa nila para mapalapit sa Ama sa Langit at kay Jesucristo. Ipaalala sa mga estudyante na maaaring nakatanggap na sila ng mga pahiwatig sa oras ng lesson.

Maaaring isulat ng mga estudyante kung paano nila sisikaping mapalapit sa Ama sa Langit at kay Jesucristo, kung paano ito makatutulong sa kanila sa mga pagsubok na kinakaharap nila, at sa anumang balakid na maaaring kailangan nilang madaig. Maaaring magsulat ang mga estudyante sa kanilang mga drowing o magsulat ng tala na iuuwi nila.

Hikayatin ang mga estudyante na ibahagi sa Ama sa Langit sa kanilang mga panalangin kung ano ang plano nilang gawin at hingin ang Kanyang tulong.

Karagdagang Resources

Ano ang ilang paraan na mapapalapit tayo kay Jesucristo?

Ibinahagi ni Pangulong Henry B. Eyring ng Unang Panguluhan:

Nadarama ko ang galak ng pagiging malapit sa Tagapagligtas at ng Kanyang pagiging malapit sa akin sa mga simpleng pagsunod sa mga utos. (Henry B. Eyring, “Magsiparito sa Akin,” Liahona, Mayo 2013, 22)

Ipinahayag ni Elder Dieter F. Uchtdorf ng Korum ng Labindalawang Apostol:

Magsihingi, at kayo ay makatatanggap. Kumatok, at kayo ay pagbubuksan [tingnan sa Doktrina at mga Tipan 88:63]. Magtiwala sa Panginoon [tingnan sa Mga Kawikaan 3:5].

Sa ating araw-araw na buhay, pinakamahalagang gawain at mapalad na oportunidad nating makasalamuha ang Diyos.

Kapag isinantabi natin ang kapalaluan at lumapit tayo sa Kanyang luklukan nang may bagbag na puso at nagsisising espiritu [tingnan sa 3 Nephi 9:20; Doktrina at mga Tipan 20:37], lalapit Siya sa atin [tingnan sa Doktrina at mga Tipan 88:63].

Sa paghahangad nating sundin si Jesucristo at lumakad sa landas ng pagkadisipulo, nang taludtod sa taludtod, darating ang araw na daranasin natin ang mahirap-isiping kaloob na pagtanggap ng kaganapan ng kagalakan. (Dieter F. Uchtdorf, “Kasama Natin ang Diyos,” Liahona, Mayo 2021, 11)

Itinuro ni Sister Neill F. Marriott, dating Pangalawang Tagapayo sa Young Women General Presidency:

Kailangang isakripisyo ang ating mga personal na plano para bigyang-puwang ang mga walang-hanggang plano ng Diyos. Ang Tagapagligtas, na nagsasalita para sa Ama, ay sumasamo sa atin na “Magsilapit sa akin at ako ay lalapit sa inyo” [Doktrina at mga Tipan 88:63]. Ang paglapit sa Diyos ay maaaring mangahulugan ng pag-alam ng Kanyang katotohanan sa pamamagitan ng mga banal na kasulatan, pagsunod sa payo ng propeta, at pagsisikap na mas lubusang gawin ang Kanyang kalooban. (Neill F. Marriott, “Pagsunod sa Diyos at Pag-alis ng Agwat,” Liahona, Nob. 2017, 11)

Basahin ang sumusunod na pahayag mula kay Pangulong Russell M. Nelson o panoorin ang video na “Paghugot ng Lakas kay Jesucristo sa Ating Buhay” mula sa time code na 12:25 hanggang 13:06, at alamin ang itinuro niya tungkol sa paglapit sa Diyos.

Kung huhugot kayo ng lakas sa Panginoon sa inyong buhay na kasingtindi ng isang taong nalulunod na nagpupumilit at nangangapos ang hininga, sasainyo ang lakas mula kay Jesucristo. Kapag alam ng Tagapagligtas na talagang gusto ninyong lumapit sa Kanya—kapag nadama Niya na pinakamimithi ng inyong puso na humugot ng lakas sa Kanya sa inyong buhay—gagabayan kayo ng Espiritu Santo na malaman kung ano mismo ang dapat ninyong gawin [Doktrina at mga Tipan 88:63]. (Russell M. Nelson “Paghugot ng Lakas kay Jesucristo sa Ating Buhay,” Liahona, Mayo 2017, 42)

Para sa mga karagdagang ideya, tingnan sa Russell M. Nelson, “Paghugot ng Lakas kay Jesucristo sa Ating Buhay,” Liahona, Mayo 2017, 39–42.

Paano kung nadarama ko na malayo ako sa Diyos?

Ibinahagi ni Pangulong Dieter F. Uchtdorf, na noon ay kabilang sa Unang Panguluhan:

Simple lang ang paanyaya ng [Diyos]:

“Magsipanumbalik … sa akin” [Joel 2:12].

“Magsiparito sa akin” [Mateo 11:28].

“Magsilapit sa akin at ako ay lalapit sa inyo” [Doktrina at mga Tipan 88:63].

Sa ganitong paraan natin ipinapakita sa Kanya na gusto nating masagip.

Kailangan dito ang kaunting pananampalataya. Ngunit huwag mawalan ng pag-asa. Kung wala pa kayong pananampalataya ngayon, umasa na kayo’y magkakaroon.

Kung hindi ninyo masabi na alam ninyong nariyan ang Diyos, umasa na nariyan Siya. Maaari ninyong hangaring maniwala. Sapat nang simula iyan.

Pagkatapos, taglay ang pag-asang iyan, magsumamo sa Ama sa Langit. Ipadarama ng Diyos ang Kanyang pagmamahal sa inyo, at sisimulan Niya kayong sagipin at baguhin.

Sa paglipas ng panahon, mapapansin ninyo ang impluwensya Niya sa inyong buhay. Madarama ninyo ang Kanyang pagmamahal. At ang hangaring lumakad sa Kanyang liwanag at sundan ang Kanyang mga yapak ay mag-iibayo sa bawat paghakbang ninyo nang may pananampalataya. (Dieter F. Uchtdorf, “Papasanin Ka Niya sa Kanyang Balikat at Iuuwi,” Liahona, Mayo 2016, 103)

Mga Karagdagang Aktibidad sa Pag-aaral

Doktrina at mga Tipan 88:51–62. Isang talinghaga

Nagturo ang Tagapagligtas ng isang talinghaga upang tulungan tayong maunawaan kung paano nakikipag-ugnayan ang Diyos sa mga kaharian, o mga daigdig, na Kanyang nilikha.

Ang isang paraan para mahikayat ang mga estudyante at matulungan sila na maunawaan ang talinghaga ay anyayahan ang ilan sa kanila na isadula ang talata 51–60. Maaaring basahin ng isang estudyante ang mga talata bilang narrator. Maaaring isa pang estudyante ang gumanap bilang tao na may bukid na dumadalaw sa iba pang estudyante, na gumaganap bilang mga alipin. Pagkatapos, maaaring basahin ng mga estudyante ang talata 61–62, at alamin ang kahulugan ng talinghaga. Ang mga sumusunod na tanong ay maaaring gumabay sa talakayan:

• Ano ang itinuturo sa inyo ng talinghagang ito tungkol sa Diyos at sa mga kaharian, o sa mga daigdig na Kanyang nilikha?

• Sa paanong mga paraan tayo matutulungan ng talinghagang ito na mas maunawaan ang Kanyang kaugnayan sa atin?

Maaari mong gamitin ang video na “Mahalaga Kayo sa Kanya” (0:48) para matulungan ang mga estudyante na malaman na sa Kanyang maraming nilikha, alam ng Diyos ang tungkol sa kanila.

Doktrina at mga Tipan 88:73. “Aking mamadaliin ang aking gawain sa panahon nito”

Upang matulungan ang mga estudyante na maunawaan ang ibig sabihin nang ipinahayag ng Panginoon na mamadaliin Niya ang Kanyang gawain, matutulungan mo silang bigyang-kahulugan ang salitang mamadaliin. Maaari mong ibahagi ang sumusunod na pahayag ni Pangulong Russell M. Nelson at talakayin kung paano minamadali ng Panginoon ang Kanyang gawain. Maaari mo ring talakayin ang mga paraan ng pakikibahagi natin sa gawaing ito at kung bakit isa itong pribilehiyong gawin.

Ito ay Ang Simbahan ni Jesucristo ng mga Banal sa mga Huling Araw. Tayo ang Kanyang pinagtipanang mga tao. Sinabi ng Panginoon na mamadaliin Niya ang Kanyang gawain sa panahong ito [tingnan sa Doktrina at mga Tipan 88:73], at pinabibilis pa Niya ito. Mapalad tayo na makibahagi sa Kanyang banal na gawain. (Russell M. Nelson, “Dalisay na Katotohanan, Dalisay na Doktrina, at Dalisay na Paghahayag,” Liahona, Nob. 2021, 7)

Doktrina at mga Tipan 88:81. “Nababagay lamang sa bawat tao na nabigyang-babala na balaan ang kanyang kapwa”

Pag-isipang talakayin ang layunin ng mga babala at ang iba’t ibang paraan kung paano tayo binabalaan.

Basahin ang Doktrina at mga Tipan 88:81 at ang sumusunod na pahayag ni Elder D. Todd Christofferson ng Korum ng Labindalawang Apostol. Talakayin kung sino ang ating kapwa at ang mga paraan na mababalaan natin sila.

Bagama’t damang-dama ng mga propeta ang tungkuling magbabala, tungkulin din ito ng iba. Katunayan, “nababagay lamang sa bawat tao na nabigyang-babala na balaan ang kanyang kapwa.” [Doktrina at mga Tipan 88:81]. Tayo na nakakaalam na ng dakilang plano ng kaligayahan—at ng kaugnay nitong mga kautusan—ay dapat magkaroon ng hangaring ibahagi ang kaalamang iyan dahil gumagawa ito ng malaking kaibhan dito at sa kawalang-hanggan. (D. Todd Christofferson, “Ang Tinig ng Babala,” Liahona, Mayo 2017, 108)

Doktrina at mga Tipan 88:88–95. Mga palatandaan na nagpapatotoo sa pagdating ng Tagapagligtas

Ang mga talatang ito ay makatutulong sa mga estudyante na matukoy ang mga paraan kung paano nangungusap sa atin ang Panginoon upang ihanda tayo para sa Kanyang pagbabalik. Maaaring basahin ng mga estudyante ang mga talatang ito at gumawa ng listahan ng mga pangyayari o kalamidad na ipadadala ng Panginoon bago ang Kanyang Ikalawang Pagparito. Talakayin kung paano nangungusap sa atin ang Tagapagligtas sa pamamagitan ng mga pangyayaring ito para tulungan tayong maghanda para sa Kanyang pagbabalik. Tulungan ang mga estudyante na maunawaan na marami sa mga kalamidad sa mga huling araw ay isang paanyaya na magsisi at maghanda na harapin ang Panginoon. Maaari mo ring ipaalala sa mga estudyante na hindi natin kailangang mabagabag sa mga palatandaang ito, dahil maipapaalala nito sa atin ang mga pangako ng Panginoon (tingnan sa Doktrina at mga Tipan 45:35).