“Lesson 103—Doktrina at mga Tipan 88:117–141: Maghangad na Matuto sa pamamagitan ng Pag-aaral at Pananampalataya,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 88:117–141,” Manwal ng Titser ng Seminary para sa Doktrina at mga Tipan
Lesson 103: Doktrina at mga Tipan 88
Doktrina at mga Tipan 88:76–80, 117–141
Maghangad na Matuto sa pamamagitan ng Pag-aaral at Pananampalataya
Sa bahaging ito ng Doktrina at mga Tipan 88, inihayag ng Panginoon ang mga alituntunin ng pagkatuto at iniutos Niya kay Joseph Smith at sa iba pa na itatag ang Paaralan ng mga Propeta. Ang mga makikibahagi sa paaralan ay dapat maghangad ng karunungan “sa mga pinakamabubuting aklat” at sama-samang matuto “sa pamamagitan ng pag-aaral at gayon din sa pamamagitan ng pananampalataya” (Doktrina at mga Tipan 88:118). Ang lesson na ito ay makatutulong sa mga estudyante na matuto sa pamamagitan ng pananampalataya kay Jesucristo sa iba’t ibang sitwasyon.
Mga Posibleng Aktibidad sa Pag-aaral
Nais ng Ama sa Langit na matuto ako
Para masimulan ang lesson, maaari mong anyayahan ang mga estudyante na ibahagi ang kanilang mga paboritong asignatura sa paaralan o ilarawan nang maikli ang isang paksang nasisiyahan silang pag-aralan. Kung kinakailangan, ipaliwanag na ang sekular na edukasyon ay tumutukoy sa pag-aaral na hindi nauugnay sa relihiyon.
-
Bakit maaaring mahalagang magtamo ng sekular at espirituwal na kaalaman sa buong buhay natin?
-
Paano maaaring naiiba ang pag-aaral ng mga asignatura sa paaralan tulad ng matematika o agham sa pag-aaral ng ebanghelyo ni Jesucristo? Ano ang maaaring pagkakatulad ng mga ito?
Noong Enero 1833, sinunod ni Joseph Smith at ng iba pang maytaglay ng priesthood na nakatira sa Kirtland, Ohio, ang mga tagubilin ng Panginoon na magtatag ng isang paaralan na tinatawag na Paaralan ng mga Propeta. Noong taglamig ng 1833, ang mga miyembro ng paaralan ay nagpulong sa itaas na silid ng Tindahan ni Newel K. Whitney. Kalaunan, nagpulong sila sa tanggapan ng palimbagan ng Simbahan at sa Kirtland Temple. Basahin ang Doktrina at mga Tipan 88:77–80, at alamin kung ano ang iniutos ng Panginoon na pag-aralan ng mga maytaglay ng priesthood na ito.
Maaari mong isulat sa pisara ang mga asignaturang tulad ng heolohiya, kasaysayan, astronomiya, pulitika, at heograpiya, at ipatukoy sa mga estudyante ang mga salita o parirala na tumutukoy sa mga asignaturang ito.
-
Ano ang natuklasan ninyo?
-
Ayon sa talata 80, bakit inutusan ng Panginoon ang mga lalaking ito na pag-aralan ang iba’t ibang paksa?
-
Sa paanong paraan makatutulong sa atin ang pag-aaral ng mga bagay na ito para makapaghanda sa paglilingkod sa Panginoon?
Ibahagi sa mga estudyante na pagtutuunan sa natitirang bahagi ng lesson ang mga alituntunin ng pagkatuto na magpalalakas ng kanilang pananampalataya kay Jesucristo at maghahanda sa kanila na mas mapaglingkuran Siya. Maaari mong anyayahan ang mga estudyante na maghangad ng personal na paghahayag hinggil sa magagawa nila para umunlad sa kanilang sariling pananampalataya at pagkatuto.
Maghangad na matuto sa pamamagitan ng pag-aaral at pananampalataya
Ang Doktrina at mga Tipan 88:118 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.
Basahin ang Doktrina at mga Tipan 88:118, at alamin kung paano tayo inaanyayahan ng Panginoon na maghangad na matuto.
Matapos basahin ng mga estudyante ang scripture passage, sabihin sa kanila na ibahagi ang inihayag ng Panginoon tungkol sa pagkatuto. Maaaring kabilang sa mga sagot ang masigasig na paghahanap, pagtuturo sa isa’t isa, paghahangad ng karunungan mula sa pinakamabubuting aklat, at paghahangad na matuto sa pamamagitan ng pag-aaral at pananampalataya.
-
Ano ang itinuturo ng talatang ito tungkol sa pagkatuto?
-
Ano ang matututuhan natin tungkol sa kung paano mapapalakas ang ating pananampalataya kay Jesucristo?
Kung kinakailangan, maaari mong banggitin na sa simula ng talata 118, ipinahiwatig ng Panginoon na may mga tao na walang pananampalataya. Maaari mo ring anyayahan ang mga estudyante na magbahagi ng mga malinaw na tagubilin na ibinigay ng Panginoon para tulungan ang mga taong walang pananampalataya.
Ang sumusunod ay isang paraan para sabihin ang isang alituntunin na matututuhan natin mula sa mga talatang ito: Kung masigasig nating hahangaring matuto sa pamamagitan ng pag-aaral at pananampalataya, lalakas ang ating pananampalataya kay Jesucristo.
-
Bukod pa sa masigasig na matuto sa pamamagitan ng ating pag-aaral, ano sa palagay ninyo ang ibig sabihin ng matuto sa pamamagitan ng pananampalataya?
Maaari mong ipakita ang sumusunod na pahayag ni Pangulong Russell M. Nelson upang matulungan ang mga estudyante na mas maunawaan ang ibig sabihin ng matuto sa pamamagitan ng pananampalataya. Maaari mo ring panoorin ang video na “Yakapin ang Bukas nang may Pananampalataya” mula sa time code na 10:28 hanggang 11:20.
Ipinaliwanag ni Pangulong Russell M. Nelson:
Tinuruan tayo ng Panginoon kung paano palakasin ang ating pananampalataya sa pamamagitan ng paghahangad na “matuto, maging sa pamamagitan ng pag-aaral at gayon din sa pamamagitan ng pananampalataya” [Doktrina at mga Tipan 88:118; idinagdag ang pagbibigay-diin]. Pinalalakas natin ang ating pananampalataya kay Jesucristo kapag sinisikap nating sundin ang Kanyang mga kautusan at “lagi siyang [inaalala]” [Moroni 4:3]. Bukod pa rito, lumalakas din ang ating pananampalataya sa tuwing ginagamit natin ito. Ito ang ibig sabihin ng pagkatuto sa pamamagitan ng pananampalataya.
Halimbawa, kapag nanampalataya tayo at sumunod sa mga batas ng Diyos—maliitin man tayo ng maraming tao—o sa bawat pagkakataon na tinatanggihan natin ang mga kasiyahan o ideolohiya na tahasang lumalabag sa ating mga tipan, ginagamit natin ang ating pananampalataya, at lalo itong lumalakas. (Russell M. Nelson, “Yakapin ang Bukas nang may Pananampalataya,” Liahona, Nob. 2020, 75)
-
Ano ang natutuhan ninyo mula sa pahayag ni Pangulong Nelson?
-
Sa inyong palagay, paano magagamit ang pagkatuto sa pamamagitan ng pananampalataya sa iba’t ibang pagkakataong matuto (tulad ng tahanan, paaralan, seminary, at simbahan)?
Upang matulungan ang mga estudyante na masuri ang kasalukuyan nilang pagsisikap na maghangad na matuto sa pamamagitan ng pananampalataya, maaari mong anyayahan sila na ilista ang mga sumusunod na kategorya sa kanilang study journal habang isinusulat mo ang mga ito sa pisara: tahanan, paaralan, seminary, at simbahan. Hikayatin ang mga estudyante na i-rate ang kanilang mga pagsisikap na masigasig na matuto sa pamamagitan ng pananampalataya sa bawat kategorya gamit ang scale na mula 1 hanggang 5, kung saan 5 ang pinakamahusay.
Kung kinakailangan, ipaalala sa kanila na bahagi ng ibig sabihin ng pagkatuto sa pamamagitan ng pag-aaral at pananampalataya ay ang aktibong pakikibahagi sa mga pagkakataong matuto at pagkilos ayon sa mga bagay na natutuhan at nadama nila. Sabihin sa mga estudyante na pumili ng isang aspetong gusto nilang pagbutihin pa at pag-aralan ang natitirang bahagi ng lesson na nasasaisip ang aspetong iyon.
“Isaayos ang inyong sarili”
Basahin ang Doktrina at mga Tipan 88:119–126, at hanapin ang payo ng Panginoon na makadaragdag sa kakayahan nating matuto sa pamamagitan ng pag-aaral at pananampalataya.
Maaari kang magdala ng school bag at maghanda ng ilang piraso ng papel na magagamit ng mga estudyante sa maliliit na grupo. Sa pag-aaral ng mga estudyante ng Doktrina at mga Tipan 88:119–126, sabihin sa kanila na isulat sa magkakahiwalay na papel ang mga turo ng Panginoon na makatutulong sa kanila na matuto sa pamamagitan ng pananampalataya. Maaaring ilista ng mga estudyante ang mga pag-uugali at gawi na hinihikayat ng Panginoon at ang mga dapat nating iwasan. Kapag natapos na sila, maaaring ilagay ng mga estudyante ang mga piraso ng papel sa school bag.
-
Alin sa mga pag-uugali o gawing ito ang nakaapekto sa kakayahan ninyong matuto?
-
Alin sa mga pag-uugali o gawing ito ang hinihikayat ng Espiritu na subukan ninyo?
Sabihin sa mga estudyante na mag-isip ng iba’t ibang balakid sa pagkatuto sa pamamagitan ng pananampalataya na maaaring maranasan ng mga tinedyer sa iba’t ibang sitwasyon (tahanan, paaralan, seminary, at simbahan). Ilista ang kanilang mga ideya sa ilalim ng bawat kategorya. Sabihin sa mga estudyante na pumili ng mga piraso ng papel mula sa school bag. Pagkatapos ay maaaring basahin ng mga estudyante ang nakasulat at simulan ang talakayan tungkol sa kung paano makatutulong ang payo ng Panginoon sa isang tao para madaig niya ang isa sa mga hamon sa pagkatuto. Maaari mo ring sabihin sa mga estudyante na mag-isip ng mga paraan na ipinakita ng Tagapagligtas ang pagsunod sa payong ito.
Halimbawa, maaaring matukoy ng mga estudyante ang isang hamon tulad ng pag-aaral para sa mga exam sa paaralan o pagtanggap ng mga sagot sa mga partikular na panalangin. Kung may papel na pinili mula sa bag at may nakasulat dito na magtayo ng bahay ng pag-aayuno, maaaring talakayin ng mga estudyante ang mga ideya at karanasan sa kung paano madaragdagan ng pag-aayuno at panalangin ang kanilang kakayahang matuto at mas mahiwatigan ang mga sagot mula sa Panginoon. Kung sinabi mo sa mga estudyante na mag-isip ng isang halimbawa kung paano ipinakita ng Tagapagligtas ang pagkatuto sa pamamagitan ng pag-aayuno, maaari nilang maalala kung paano Siya nag-ayuno upang maghanda para sa Kanyang gawain at ministeryo (tingnan sa Mateo 4:1–10). Ulitin nang maraming beses ang aktibidad para matulungan ang mga estudyante na maunawaan ang kaugnayan ng mga turo ni Jesucristo sa kanilang buhay.
Personal na pagsasabuhay
Sa pagtatapos ng lesson, bigyan ng oras ang mga estudyante na pag-isipan ang mga paraan na mas maghahangad silang matuto sa pamamagitan ng pananampalataya. Maaari mo silang hikayatin na isulat ang kanilang mga ideya sa kanilang study journal gamit ang mga sumusunod na pahiwatig o prompt.
-
Pumili ng isang aspeto sa iyong buhay kung saan mapagbubuti mo pa ang iyong mga pagsisikap na matuto sa pamamagitan ng pananampalataya (tulad ng tahanan, paaralan, seminary, at simbahan).
-
Sa iyong palagay, paano makatutulong sa iyo ang pagkatuto sa pamamagitan ng pananampalataya sa aspetong ito?
-
Ano ang sisikapin mong gawin para matuto sa pamamagitan ng pananampalataya kay Jesucristo?
Anyayahan ang mga handang estudyante na magbahagi ng ilan sa kanilang mga ideya. Maaaring magandang pagkakataon din ito para anyayahan ang mga estudyante na nagtagumpay na noon na magpatotoo.