“Leksiyon 107—Doktrina ug mga Pakigsaad 93:1–22: Pauswaga ang Imong Kahibalo kang Jesukristo,” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 93:1–22,” Manwal sa Magtutudlo sa Seminary sa Doktrina ug mga Pakigsaad
Leksiyon 107: Doktrina ug mga Pakigsaad 93
Doktrina ug mga Pakigsaad 93:1–22
Pauswaga ang Imong Kahibalo kang Jesukristo
Niadtong Mayo 6, 1833, nadawat ni Propeta Joseph Smith ang pagpadayag nga girekord diha sa Doktrina ug mga Pakigsaad 93. Gipadayag dinhi sa Manluluwas ang importanteng mga kamatuoran bahin sa Iyang kaugalingon aron mas masabtan nato kon kinsa Siya. Kini nga leksiyon makatabang sa mga estudyante nga mas mapalawom ang ilang pagsabot sa pipila ka tahas ug kinaiya ni Jesukristo.
Mga Posibleng Kalihokan sa Pagkat-on
Usa ka tawo nga nailhan sa mga tawo
Ikonsiderar ang pagsugod sa leksiyon pinaagi sa pagpakita og litrato sa usa ka iladong tawo nga nailhan sa imong mga estudyante, ug pangutan-a sila kon nahibalo ba sila sa ngalan sa tawo. Dapita ang mga estudyante nga hisgotan kon nganong ilado kaayo ang maong tawo ug kon nganong importanteng mailhan kon kinsa kining tawhana.
Dayon ipakita ang litrato ni Jesukristo ug dapita ang mga estudyante sa paghisgot sa mosunod nga mga pangutana:
-
Ngano kaha nga importante man nga mailhan kon kinsa si Jesukristo ug kon unsay Iyang nahimo?
-
Unsa ang pipila ka ehemplo kon sa unsang paagi ang atong kahibalo kang Jesukristo makaapektar sa atong mga kinabuhi?
Ikonsiderar ang pagdapit sa mga estudyante nga hunahunaon sa hilom kon unsay epekto kanila sa personal tungod sa ilang kahibalo bahin kang Jesukristo. Samtang magtuon sila, dasiga sila sa pagpangita sa mga kamatuoran nga motabang nilang mas masabtan kon kinsa si Jesukristo ug kon unsay Iyang mabuhat para nila.
“Makakita sa akong panagway ug masayod nga Ako mao”
Gipakigbahin sa Manluluwas ang daghang importanteng kamatuoran bahin sa Iyang kaugalingon sa Doktrina ug mga Pakigsaad 93. Iyang gipasabot nga usa sa Iyang mga katuyoan sa pagpadayag niini nga mga kamatuoran mao ang pagtabang nato nga mailhan kon kinsay atong gisimba (tan-awa sa Doktrina ug mga Pakigsaad 93:19).
Basaha ang Doktrina ug mga Pakigsaad 93:1, nga mangita kon sa unsang paagi gisugdan sa Manluluwas kini nga pagpadayag.
Aron matabangan ang mga estudyate nga masundan ang mga imbitasyon sa Manluluwas niini nga bersikulo, ikonsiderar ang pagdapit nila nga butangan og numero ang kada usa sa ilang mga kasulatan. Pwede usab dapiton ang mga estudyante nga ilista kini nga mga imbitasyon sa ilang mga journal sa pagtuon o isulat kini sa pisara.
-
Unsay gikatabang niini nga mga bersikulo aron imong makat-onan o mabati ang mga tinguha sa Manluluwas para nato?
-
Sa unsang paagi nga ang kada aksiyon niini nga bersikulo makatabang nato na mas mailhan ang Manluluwas?
Aduna tingali mga pangutana ang mga estudyante bahin sa saad sa Manluluwas nga kadtong mosanong sa Iyang imbitasyon sa bersikulo 1 makakita sa Iyang nawong. Pwede nimong hatagan og gibug-aton nga kini nga mga panalangin moabot sa “kaugalingon nga higayon, ug sa iyang kaugalingon nga paagi, ug sumala sa iyang kaugalingon nga kabubut-on” sa Ginoo (Doktrina ug mga Pakigsaad 88:68).
Mga kinaiya sa Manluluwas
Samtang gipadayon sa Manluluwas ang Iyang mga pagtulun-an niini nga pagpadayag, Iyang gipakigbahin ang daghang lainlain nga mga kinaiya ug mga hiyas kabahin sa Iyang kaugalingon. Ang pagkat-on bahin niini nga mga kinaiya ug hiyas makatabang nimong masabtan ang pipila ka paagi nga ang Manluluwas makatabang sa imong kinabuhi.
Ikonsiderar ang pagpakita sa mosunod nga tsart ug pagdapit sa mga estudyante sa pagkopya niini sa ilang mga journal sa pagtuon. Pwede silang makigtrabaho nga managpares o sa gagmayng mga grupo aron tun-an ang matag tudling sa tsart. Laing alternatibo, pwede pod nimong isulat ang mga bersikulo sa gagmayng piraso sa papel ug ibutang ang mga papel sa usa ka sudlanan. Ang mga estudyante makapili og usa o kapin pang piraso sa papel gikan sa sudlanan ug tun-an ang mga bersikulo nga ilang napili.
Tabangi ang mga tigkat-on nga mapalawman ang ilang pagdayeg ug gugma kang Jesukristo. Alang sa dugang pagpraktis niini, tan-awa ang pagbansay nga nag-ulohan nga “Pagtudlo mahitungod sa mga titulo, mga tahas, ug mga hiyas ni Jesukristo” nga makita sa Pagpalambo sa mga Kahanas sa Magtutudlo: Magpunting kang Jesukristo. Ikonsiderar ang pagpraktis sa kahanas pinaagi sa paghimog makapasiksik nga mga pangutana nga motabang sa mga estudyante nga ilhon ang mga tahas, mga titulo, mga simbolo, mga hiyas, ug mga kinaiya ni Jesukristo.
Dapita ang mga estudyante samtang sila magtuon sa paghunahuna bahin sa unsang paagi nga ang unsay ilang nakat-onan bahin sa Manluluwas makatabang sa ilang kinabuhi.
|
Mga bersikulo nga tun-an |
Unsay akong nakat-onan mahitungod kang Jesukristo |
|---|---|
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an | |
Mga bersikulo nga tun-an |
Dapita ang mga estudyante nga ipakigbahin ang ilang nakat-onan bahin kang Jesukristo gikan sa mga bersikulo nga ilang gitun-an. Kon imong ipakita ang tsart sa pisara, pwede ning kompletohon sa pipila ka estudyante pinaagi sa pagsulat og mga kamatuoran nga ilang nakat-onan tupad sa mga bersikulo nga ilang gitun-an.
Pipila sa mga kamatuoran nga pwedeng hisgotan o ipakigbahin sa mga estudyante ang si Jesukristo ang Kahayag sa kalibotan (tan-awa sa bersikulo 2, 9); si Jesukristo ang mensahero sa kaluwasan (tan-awa sa bersikulo 8); si Jesukristo miuswag sa matag grasya hangtod nga nabatonan niya ang kahingpitan sa Amahan (tan-awa sa bersikulo 12–14); ug si Jesukristo ang kinamagulangan sa tanang espiritu nga anak sa Langitnong Amahan (tan-awa sa bersikulo 21).
Aron matabangan ang mga estudyante sa paghisgot sa ilang mga nadiskobrehan ug mga panabot bahin sa Manluluwas, ikonsiderar ang pagsukna sa mga pangutanang sama sa mosunod:
-
Hain sa mga kamatuoran nga imong gitun-an mahigtungod ni Jesukristo ang labing talagsaon alang nimo? Ngano?
-
Unsay gidugang sa mga cross-reference nga imong gitun-an diha sa imong pagsabot bahin sa mga kamatuoran nga gitudlo sa Doktrina ug mga Pakigsaad 93?
-
Sa unsang paagi nga ang pagkahibalo niini nga mga kamatuoran bahin sa Manluluwas makaapektar sa imong relasyon Kaniya?
Dasiga ang mga estudyante nga maningkamot nga mas hingpit nga makaila ni Jesukristo samtang naningkamot sila sa pagpapadayon sa ilang personal nga pagtuon sa kasulatan. Kon naa pay panahon, ikonsiderar ang paggamit sa pamahayag ni Elder David A. Bednar diha sa “Dugang nga mga Kapanguhaan” aron matabangan ang mga estudyante nga masabtan ang dugang mga paagi aron mas mailhan ang Manluluwas. Maayo tingali ning higayon nga dapiton sila nga ipakigbahin ang ilang gibati bahin sa Manluluwas ug sa pagpamatuod sa mga panalangin nga resulta sa pagpauswag sa atong kahibalo Kaniya.
Pwede nimong taposon pinaagi sa pagbasa sa Juan 17:3 ug dapiton ang mga sakop sa klase nga pangitaon ang mahinongdanong panalangin nga atong madawat pinaagi sa pagpaduol ngadto sa Langitnong Amahan ug kang Jesukristo.