Leksiyon 109: Doktrina ug mga Pakigsaad 93

Sukda ang Imong Nakat-onan 7

Doktrina ug mga Pakigsaad 84–93

Makatabang ang pagpamalandong ug ang pagsukod sa atong espirituwal nga pagkat-on aron mas mapaduol kang Jesukristo. Kini nga leksiyon makatabang sa mga estudyante nga mahinumdoman ug masusi ang espirituwal nga pag-uswag nga ilang nasinatian sa ilang pagtuon sa Doktrina ug mga Pakigsaad.

Mga Posibleng Kalihokan sa Pagkat-on

Pag-uswag

Ikonsiderar ang pagsulat sa pulong pag-uswag sa pisara.

Pwede usab nimong ipakita ang imahe sa progress bar, sama sa mosunod:

• Unsa ang mga ehemplo sa mga butang nga pwedeng mabantayan ang pag-uswag?

  Ang pipila sa mga ehemplo mahimong maglakip sa ang atong edukasyon, ang mga tumong nga atong gitakda para sa atong kaugalingon, mga lugar nga ato nang naadtoan, o mga butang nga pwede natong mapalit o ma-download sa internet.

• Nganong importanteng mahibalo sa pag-uswag niining mga butanga?

Niini nga leksiyon, imong susihon ang pipila sa imong espirituwal nga pag-uswag pinaagi sa imong pagtuon sa Doktrina ug mga Pakigsaad. Mohatag kini nimo og higayon nga saulogon ang imong mga nakab-ot ug maghimo og gikinahanglang kausaban.

• Unsa ang pipila ka paagi nga miuswag ka sa espirituwal samtang ikaw nagtuon sa Doktrina ug mga Pakigsaad?

Mahimo nimog hatagan og gibug-aton ang lainlaing mga kamatuoran samtang magtudlo og mga leksiyon sa Doktrina ug mga Pakigsaad 84–93 kaysa niadtong gisusi sa mosunod nga mga kalihokan. Kon kinahanglan, ipahaom ang mosunod nga mga kalihokan aron tabangan ang mga estudyante nga susihon ang ilang kaugalingon sa mga kamatuoran nga mas gihatgan og gibug-aton sa klase.

Ipasabot ang mga tahas, mga titulo, ug mga kinaiya ni Jesukristo

Ikonsiderar ang pagpakita sa imahe ni Jesukristo sa dili pa ipakigbahin ang mosunod.

Usa sa mga pagdapit sa Manluluwas diha sa Doktrina ug mga Pakigsaad mao ang “pagkat-on [Kaniya], ug pagpaminaw sa [Iyang] mga pulong” (Doktrina ug mga Pakigsaad 19:23).

• Unsay imong nakat-onan bahin kang Jesukristo sa imong bag-ohay nga pagtuon sa Doktrina ug mga Pakigsaad?

  Kini nga bahin sa leksiyon gituyo aron tabangan ang mga estudyante nga ipasabot ang pipila sa pihong mga tahas, mga titulo, o mga kinaiya ni Jesukristo. Ikonsiderar ang pagpakita og usa o kapin pa sa mga mosunod nga opsiyon ug paghatag og panahon sa mga estudyante nga kompletohon ang usa . Pwedeng trabahoon kining mga kalihokan sa mga estudyante nga indibidwal o uban sa usa ka pares.

  Makatabang tingali ang pagpakitag pipila ka pakisayran nga bag-o lang gitun-an sa mag estudyante nga naghulagway sa mga tahas o mga titulo ni Jesukristo. Pwede kining irebyo sa mga estudyante isip bahin sa kalihokan. Pwedeng apil sa mga ehemplo ang Doktrina ug mga Pakigsaad 76:1–7, 22–24; 88:1–13, 41; 93:1–10.

• Paghimog listahan sa pipila ka mga ngalan o mga titulo ni Jesukristo nga bag-o lang nimong natun-an. Dayon pagpili og usa o kapin pa ug tubaga ang mosunod nga pangutana: (1) Unsay gitudlo kanimo niini nga ngalan o titulo bahin kang Jesukristo? (2) Unsay gikatabang niini nga ngalan o titulo aron masabtan kon sa unsang paagi Siya makatabang nimo?

• Paghimog biswal nga representasyon sa pipila sa imong paboritong tahas o titulo ni Jesukristo. Pwede ni nga koleksyon sa mga pulong nga naghulagway sa lainlain nga gidak-on [word cloud] o drowing nga nagrepresentar sa usa o kapin pa sa mga tahas o titulo nga imong gipili. Apila ang angay nga mga pakisayran sa kasulatan isip kabahin sa imong gihimo.

• Paghimog balak o liriko sa kanta nga naay pipila sa imong paboritong mga tahas o mga titulo ni Jesukristo.

• Handurawa nga naa kay kahigayonan nga tudloan ang usa ka tawo bahin kang Jesukristo ug kon unsay mahimo Niya para nato. Pagsulat og paghulagway nga dili moubos sa usa ka parapo lakip ang dili moubos sa tulo ka tahas o mga titulo ni Kristo.

Human sa igong panahon aron taposon sa mga estudyante ang ilang napiling kalihokan, hatagi silag higayon nga ipakigbahin ang ilang nahimo. Kon indibiduwal nila kining gihimo, pwede nila kining ipakigbahin sa usa ka partner o gamayng grupo. Kon nakigtinabangay sila sa ubang mga estudyante, pwede nila kining ipakigbahin sa laing grupo. Pwede usab nimong dapiton ang pipila ka estudyante nga gustong ipakigbahin ang ilang nahimo sa tibuok klase.

Pagbaton og mas dakong tinguha nga mapaduol kang Jesukristo

Ang mosunod nga kalihokan sa pagsukod konektado sa pagdapit sa Manluluwas sa Doktrina ug mga Pakigsaad 88:63 nga mapaduol Kaniya. Kon nahiangay, ikonsiderar ang pagpahinumdom sa mga estudyante sa pipila sa mga kalihokan sa pagkat-on gikan sa leksiyon “Doktrina ug mga Pakigsaad 88:51–95” aron tabangan silang mahinumdom kon unsay ilang nakat-onan ug gibati.

Pananglitan, kon migamit ka og magnet isip leksiyon nga gigamitan og butang, pwede nimong ikonsiderar ang paggunit og duha ka magnet ug dapiton ang mga estudyante nga ipakigbahin ang ilang nahinumdoman sa maong leksiyon. Kon ang mga estudyante nagdrowing sa ilang mga journal sa pagtuon nga nagrepresentar kon unsa na sila kasuod sa Langitnong Amahan ug kang Jesukristo, pwede nimo silang dapiton nga pangitaon ang maong mga drowing aron matabangan silang makompara ang ilang gibati karon sa ilang gibati adtong panahona.

Nakahinumdom tingali ka nga nagtuon mo bahin sa importanteng imbitasyon gikan sa Manluluwas sa Doktrina ug mga Pakigsaad 88:63. Basaha ni nga bersikulo aron marebyo ang imbitasyon sa Manluluwas.

Hatagi ang mga estudyante og higayon nga susihon ang ilang mga tinguha nga mapaduol kang Jesukristo pinaagi sa pagtubag sa mosunod nga mga pangutana sa ilang mga journal sa pagtuon.

• Kumusta ang imong tinguha nga mapaduol kang Jesukristo karon kompara sa imong tinguha pipila ka semana o bulan ang milabay (mas ubos, parehas lang, o mas dako)?

• Unsay imong nakat-onan o nasinati nga nakaimpluwensiya sa imong tinguha?

• Unsang mga aksiyon ang imong gihimo aron mas mapaduol kang Kristo? Unsang mga aksiyon ang gusto nimong himoon aron mas mapaduol Kaniya?

Sa higayon nga naa nay igong panahon ang mga estudyante aron irekord ang ilang mga tubag, dapita ang pipila ka boluntaryo nga ipakigbahin sa klase ang pipila sa ilang mga tubag.

Mga imbitasyon sa pagbuhat

Isip bahin sa imong pagtuon sa seminary, gidapit na tingali kang buhaton ang pipila ka imbitasyon nga gikan sa kasulatan diha sa imong kinabuhi.

Paggahin og panahon sa paghinumdom sa pipila sa mga tumong nga imong gitakda para sa imong kaugalingon o espirituwal nga mga impresyon nga naa nimo samtang nagtuon ka. Mahimo nimo kini pinaagi sa pagtan-aw sa imong journal sa pagtuon o pagpangita sa mga kasulatan nga bag-o lang nimong gimarkahan.

Kon posible, ikonsiderar ang pagpakigbahin sa pipila ka pihong mga imbitasyon nga gihatag nimo sa mga estudyante sa bag-ohay nga mga leksiyon. Pananglitan, gidapit tingali nimo ang mga estudyante nga magtakda og mga tumong nga sama sa mosunod:

• Sunda ang imbitasyon ni Jesukristo nga “pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118).

• Sunda ang mga pagtulun-an sa Manluluwas sa Pulong sa Kaalam (tan-awa sa Doktrina ug mga Pakigsaad 89).

• Magdawat og dugang kahayag ug kamatuoran ni Kristo diha sa ilang mga kinabuhi (tan-awa sa Doktrina ug mga Pakigsaad 93:19–20, 27–28).

Human makabaton og igong panahon ang mga estudyante aron marebyo ang mga tumong nga ilang gitakda para sa ilang kaugalingon, hatagi sila og panahon nga susihon ang ilang pag-uswag pinaagi sa pagsukna og mga pangutana sama sa mosunod:

• Unsang mga paningkamot ang imong gihimo aron buhaton kini nga mga pagtulun-an nga gikan kang Jesukristo sa diha imong kinabuhi?

• Unsang mga kalainan ang nahimo niini nga mga paningkamot sa imong kinabuhi ug sa imong relasyon sa Dios?

• Unsay gibati nimo nga sunod nimong himoon para niining bahina?