Lesona 109: Fotopampianarana sy Fanekempihavanana 93

Tombano ny fianaranao 7

Fotopampianarana sy Fanekempihavanana 84–93

Ny fisaintsainana sy ny fanombanana ny fianarantsika ara-panahy dia afaka manampy antsika hanakaiky kokoa an’i Jesoa Kristy. Afaka manampy ireo mpianatra hahatsiaro sy hanombantombana ny fivoarany ara-panahy amin’ny alalan’ny fandalinany ny Fotopampianarana sy Fanekempihavanana ity lesona ity.

Sahanasa fianarana azo atao

Fivoarana

Soraty eny amin’ny solaitrabe ny teny hoe fivoarana.

Azonao atao koa ny mampiseho sarina tsipika maneho fivoarana, tahaka ity manaraka ity:

• Inona avy ireo ohatra sasantsasany amin’ireo zavatra izay azontsika arahina maso ny fivoarany?

  Mety ho isan’ny ohatra vitsivitsy amin’izany ny fanabeazana antsika, ny tanjona napetratsika ho an’ny tenantsika, ny toerana hitodiantsika, na ny zavatra mety hovidintsika na sintonintsika avy ao amin’ny internet.

• Nahoana no zava-dehibe ny mahafantatra ny fivoaran’ireo zavatra ireo?

Ato amin’ity lesona ity dia hanombantombana ny sasany amin’ireo fivoarana ara-panahy azonao amin’ny alalan’ny fandalinanao ny Fotopampianarana sy Fanekempihavanana ianao. Izany dia afaka manome anao fahafahana hankalaza ny fahombiazanao sy hanao izay fanitsiana ilaina.

• Inona avy ireo fomba vitsivitsy nivoaranao ara-panahy rehefa nandalina ny Fotopampianarana sy Fanekempihavanana ianao?

Mety ho nanantitrantitra fahamarinana hafa noho ireo izay tombanana ato amin’ireto asa atao manaraka ireto ianao teo am-pampianarana lesona momba ny Fotopampianarana sy Fanekempihavanana 84–93. Raha ilaina dia ampifanaraho amin’izay ilaina ireto sahanasa manaraka ireto mba hanampiana ireo mpianatra hanombantombana ny tenany amin’ireo fahamarinana izay nantitranterin’ny mpianatra mafimafy kokoa.

Hazavao ireo anjara asa, anarana fiantsoana ary ireo toetoetra mampiavaka an’i Jesoa Kristy

Azonao atao ny mampiseho ny sarin’i Jesoa Kristy alohan’ny hizarana ity manaraka ity.

Isan’ireo fanasana nataon’ny Mpamonjy ao amin’ny Fotopampianarana sy Fanekempihavanana ny “ [mianatra Aminy] sy [mihaino] ny teni[ny]” (Fotopampianarana sy Fanekempihavanana 19:23).

• Inona no ianaranao momba an’i Jesoa Kristy tamin’ny fandalinanao vao haingana ny Fotopampianarana sy Fanekempihavanana?

  Ity ampahany amin’ny lesona ity dia natao hanampiana ireo mpianatra hanazava ireo anjara asa voafaritra tsara, anarana fiantsoana, na toetoetra mampiavaka an’i Jesoa Kristy. Asehoy ny iray na ny maromaro amin’ireto safidy manaraka ireto ary omeo fotoana ny mpianatra hamita iray. Azon’ny mpianatra atao ny manao ireo sahanasa ireo samirery na mandeha tsiroaroa.

  Mety hanampy ny mampiseho toko sy andinin-tsoratra masina vitsivitsy nohalalinin’ny mpianatra vao haingana izay mamaritra ny anjara asa na ny anarana fiantsoana an’i Jesoa Kristy. Azon’ny mpianatra atao ny mamerina mijery izany ao anatin’ny sahanasa. Azo atao ohatra amin’izany ny Fotopampianarana sy Fanekempihavanana 76:1–7, 22–24; 88:1–13, 41; 93:1–10.

• Manaova lisitry ny sasany amin’ireo anarana na anarana fiantsoana an’i Jesoa Kristy izay nohalalininao vao haingana. Avy eo dia mifidiana iray na maromaro amin’izy ireo ary valio ireto fanontaniana manaraka ireto: (1) Inona no ampianarin’io anarana na anarana fiantsoana io anao momba an’i Jesoa Kristy? (2) Manampy anao hahatakatra inona momba ny fomba ahafahany manampy anao io anarana na anarana fiantsoana io?

• Mamoròna fanehoana an-tsary ny sasany amin’ireo anjara asa na anarana fiantsoana an’i Jesoa Kristy tianao indrindra. Mety ho vondron-teny tsy mitovy habe mivangongo izany na sary izay maneho ny iray na ny maromaro amin’ireo anjara asa na anarana fiantsoana nosafidianao. Ampidiro ao anatin’ny zavatra noforoninao ireo andinin-tsoratra masina azo ampiharina.

• Manorata tononkalo na tononkira izay ahitana ireo anjara asa na anarana fiantsoana sasany an’i Jesoa Kristy izay tianao indrindra.

• Alaivo sary an-tsaina hoe nanana fahafahana hampianatra olona iray ianao momba ny hoe iza i Jesoa Kristy ary inona no azony atao ho antsika. Manorata fanoritsoritana anaty andiam-pehezan-teny iray farafahakeliny, izay ahitana telo amin’ireo anjara asan’i Kristy na anarana fiantsoana Azy.

Rehefa avy nomena fotoana ampy ireo mpianatra mba hamitana ny sahanasa nofidiny dia omeo fahafahana izy ireo hizara ny zavatra nataony. Raha niasa tsirairay izy ireo dia afaka mizara izany amin’ny namana iray na anatina vondrona kely. Raha niara-niasa tamin’ny mpianatra hafa izy ireo dia afaka mizara izany amin’ny vondrona hafa. Azonao atao koa ny manasa mpianatra vitsivitsy vonona ny hizara ny zavatra nataony amin’ny kilasy iray manontolo.

Mahatsapa faniriana lehibe kokoa hanakaiky kokoa an’i Jesoa Kristy

Ity asa fanombanana manaraka ity dia mifandray amin’ny fanasan’ny Mpamonjy ao amin’ny Fotopampianarana sy Fanekempihavanana 88:63 mba hanatona Azy. Raha azo atao dia ampahatsiahivo an’ireo mpianatra ireo sahanasa fianarana sasany avy ao amin’ny lesona “Fotopampianarana sy Fanekempihavanana 88:51–95” mba hanampiana azy ireo hahatsiaro ny zavatra nianarany sy tsapany.

Ohatra, raha nampiasa andriamby ho zavatra azo tsapain-tanana tamin’ny lesona ianao dia azonao atao ny manangana andriamby roa ary manasa ireo mpianatra hizara ny zavatra tadidiny momba io lesona io. Raha toa ka nanao sary tao amin’ny diary fandalinany ireo mpianatra izay maneho hoe hatraiza no tsapany fa naha-akaiky azy tamin’ny ny Ray any An-danitra sy i Jesoa Kristy tamin’izany fotoana izany, dia azonao atao ny manasa azy ireo hitady ireo sary ireo mba hanampiana azy ireo hampitaha ny zavatra tsapany ankehitriny sy ny zavatra tsapany tamin’izany fotoana izany.

Mety ho tadidinao ny nandalinanao fanasana manan-danja iray avy amin’ny Mpamonjy tao amin’ny Fotopampianarana sy Fanekempihavanana 88:63. Vakio io andininy io mba hijerena ny fanasana nataon’ny Mpamonjy.

Omeo fahafahana ny mpianatra hanombantombana ny fanirian’izy ireo hanakaiky kokoa an’i Jesoa Kristy amin’ny alalan’ny famaliana ireto fanontaniana manaraka ireto ao anatin’ny diary fandalinany.

• Manao ahoana ny fanirianao hanakaiky kokoa an’i Jesoa Kristy amin’izao fotoana izao, raha oharina amin’ny toerana nisy azy herinandro na volana vitsivitsy lasa izay (ambany kokoa, mitovitovy ihany, na ambony kokoa)?

• Inona no zavatra nianaranao na niainanao ka nisy fiantraikany tamin’ny fanirianao?

• Inona no zavatra nataonao mba hanatonana kokoa an’i Kristy? Inona no zavatra tianao hatao mba hanatonana Azy kokoa?

Rehefa nanana fotoana ampy nanoratana ny valin-teniny ny mpianatra dia manasà olona vitsivitsy izany vonona ny hizara ny valin-teniny amin’ny iray kilasy.

Fanasana hampihatra

Mety ho efa nasaina ianao, tao anatin’ny fandalinanao nandritra ny seminera, mba hampihatra eo amin’ny fiainanao ny sasany amin’ireo fanasana avy amin’ny soratra masina.

Makà fotoana kely hitadidiana ny sasany amin’ireo tanjona napetrakao ho an’ny tenanao na ireo fahatsapana ara-panahy nanananao rehefa nandalina ianao. Azonao atao izany amin’ny alalan’ny fijerena ny diary fandalinanao na amin’ny fitadiavana soratra masina izay nomarihinao vao haingana.

Raha azo atao dia zarao ireo fanasana manokana sasany izay nomenao ny mpianatra nandritra ireo lesona farany. Ohatra, azonao atao ny manasa ireo mpianatra hametraka tanjona mitovy amin’ireto manaraka ireto:

• Manaraka ny fanasan’i Jesoa Kristy hoe: “Katsahonareo ny fianarana amin’ny alalan’ny fandinihana ary koa amin’ny alalan’ny finoana” (Fotopampianarana sy Fanekempihavanana 88:118).

• Mankatò ny fampianaran’ny Mpamonjy ao amin’ny Tenin’ny Fahendrena (jereo ny Fotopampianarana sy Fanekempihavanana 89).

• Mandray bebe kokoa ny fahazavana sy ny fahamarinan’i Kristy eo amin’ny fiainan’izy ireo (jereo ny Fotopampianarana sy Fanekempihavanana 93:19–20, 27–28).

Rehefa avy nomena fotoana ampy hamerenana mijery ny tanjona napetrak’izy ireo ho an’ny tenany ny mpianatra dia omeo fotoana hanombanana ny fivoarany izy ireo amin’ny alalan’ny fametrahana aminy fanontaniana toy izao manaraka izao:

• Inona no ezaka nataonao mba hampiharana ireo fampianarana avy amin’i Jesoa Kristy ireo eo amin’ny fiainanao?

• Inona no fiovana nentin’ireo ezaka ireo teo amin’ny fiainanao sy ny fifandraisanao amin’ Andriamanitra?

• Inona araka ny hevitrao no tokony hataonao manaraka amin’ireo sehatra ireo?