“Lesona 102—Fotopampianarana sy Fanekempihavanana 88:51–95: -Manakaikeza Ahy dia hanakaiky anareo Aho,-” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 88:51–95,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 102: Fotopampianarana sy Fanekempihavanana 88
Fotopampianarana sy Fanekempihavanana 88:51–95
“Manakaikeza Ahy dia hanakaiky anareo Aho”
Ao amin’ity ampahany ao amin’ny Fotopampianarana sy Fanekempihavanana 88 ity dia manambara ny fomba fitantanany ny zavatra nohariany i Jesoa Kristy ary manasa antsika hanakaiky Azy. Ity lesona ity dia afaka manampy ny mpianatra handray ireo fitahiana avy amin’ny fanakaikezana ny Ray any An-danitra sy an’i Jesoa Kristy.
Sahanasa fianarana azo atao
Fifandraisana akaiky
Hevero ny hanomboka ny fotoam-pianarana amin’ny alalan’ny fifanakalozan-kevitra momba ny fananana fifandraisana akaiky. Afaka manasa ny mpianatra tsirairay ianao hanoratra anaran’olona iray izay akaiky azy ireo eny amin’ny solaitrabe. Manasà mpianatra vitsy hizara ny antony nisafidianany io olona io.
Azonao atao ny mametraka fanontaniana ho fanaraha-maso tahaka ireto manaraka ireo:
-
Inona no mahatonga ny fifandraisana eo amin’olon-droa ho akaiky? Inona no miteraka ny fifanalavirana?
-
Inona no azonao atao mba hamerina fifandraisana akaiky indray amin’ny olona iray izay nifanalavitra taminao?
Namaritra ny heriny izay mifehy ny zavatra nohariny ny Mpamonjy ao amin’ny Fotopampianarana sy Fanekempihavanana 88 (jereo ny andininy 41–45). Nampianatra Izy fa rehefa mahita ny kintana sy ireo planeta eny amin’ny lanitra isika dia efa “nahita an’ Andriamanitra mihetsika ao amin’ny fahandrianany sy ny heriny.” (Fotopampianarana sy Fanekempihavanana 88:47). Nanome fanoharana avy eo i Jesoa Kristy mba hampianarana momba ny fifandraisan’ Andriamanitra amin’ny zavatra nohariny. Mampianatra izany fa Andriamanitra dia nahary tontolo maro izay ipetrahan’ireo zanany ary mitsidika ny tsirairay amin’izy ireo Izy. Nandidy ireo namany ny Tompo mba hiantsoan’izy ireo Azy dieny mbola akaiky Izy (jereo ny andininy 51–62).
“Manakaikeza Ahy”
Vakio ny Fotopampianarana sy Fanekempihavanana 88:63 mba hitadiavana ireo zavatra anasan’i Jesoa Kristy mba hataontsika.
-
Inona no fanasana izay hitanao fa manan-danja aminao manokana?
-
Inona avy ireo fitsipika hitanao avy amin’ireo fanasana ireo?
Mety hahita fitsipika maro ireo mpianatra, ohatra, rehefa manakaiky an’i Jesoa Kristy aho dia hanakaiky ahy Izy. Azonao hamafisina fa rehefa manakaiky an’i Jesoa Kristy isika dia manakaiky ny Ray any An-danitra ihany koa.
Mba hanampiana ny mpianatra hahatakatra io fitsipika io dia afaka mifanakalo hevitra mikasika ny fomba nanehoana izany ao anatin’ilay fanorahana ianareo. Mety hanampy ihany koa ny sasany amin’ireto fanontaniana manaraka ireto:
-
Ahoana no hamaritanao ny dikan’izany hoe manakaiky ny Ray any An-danitra sy an’i Jesoa Kristy izany?
-
Amin’ny fomba ahoana, araka ny hevitrao, no hanakaikezan’Izy Ireo antsika?
-
Inona ireo antony sasany izay mahatonga ny olona iray te hahatsapa ho akaiky ny Ray any An-danitra sy an’i Jesoa Kristy?
Omeo fahafahana ny mpianatra mba handinika hoe aiza ho aiza ny fanakaikezan’izy ireo ny Ray any An-danitra sy an’i Jesoa Kristy araka ny fahatsapan’izy ireo. Afaka manasa azy ireo hanoratra hoe “Ray any An-danitra sy Jesoa Kristy” eo amin’ny pejy iray ao anaty diary fandalinan’izy ireo ianao. Angataho avy eo ny mpianatra mba hanao sary maneho azy ireo. Afaka mieritreritra fotoana izay nahatsapan’izy ireo ho akaiky an’ Andriamanitra sy ny Zanany sy ny zavatra nanampy azy ireo hahatsapa izany ny mpianatra. Ny mpianatra koa dia afaka misaintsaina hoe aiza ho aiza ny fanakaikezan’izy ireo ny Ray any An-danitra sy an’i Jesoa Kristy ankehitriny araka ny fahatsapan’izy ireo.
Ampahatsiahivo ny mpianatra fa raha mahatsapa ho lavitry ny Tompo isika dia afaka mandray andraikitra mba hanovana ny toe-javatra iainantsika. Asao ny mpianatra mba hisaintsaina momba ny zavatra ilain’izy ireo sy ny fitahiana horaisin’izy ireo raha akaikin’ny Ray any An-danitra sy an’i Jesoa Kristy izy ireo. Amporisiho ny mpianatra hikatsaka fanambarana ho an’ny tenany manokana mba hahafantarany ny zavatra azony atao hanakaikezana Azy Ireo.
Fanasana sy fitahiana
Afaka mameno ity tabilao manaraka ity eny amin’ny solaitrabe na ao anatin’ny diary fandalinany ny mpianatra. Raha ilaina dia ampio ny mpianatra hahatakatra andian-teny isan-karazany ao amin’ny Fotopampianarana sy Fanekempihavanana 88:63–69. Ohatra, azonao hazavaina ny andininy 65 amin’ny alalan’ny fanazavana fa tsy tokony hanana tanjona ratsy na hikatsaka ny hanome fahafaham-po ireo faniriana araka izao tontolo izao isika rehefa mivavaka. Azonao ampiana ireo mpianatra hahatakatra fa ilay teny hoe ilainareo ao amin’ny andininy 64–65 dia midika hoe mety na azo ekena.
Vakio ny Fotopampianarana sy Fanekempihavanana 88:63–69 ary fenoy ity tabilao manaraka ity:
|
Fomba hanakaikezana ny Ray any An-danitra sy an’i Jesoa Kristy |
Fitahiana azo avy amin’ny fanakaikezana ny Ray any An-danitra sy an’i Jesoa Kristy |
|---|---|
Fomba iray hanampiana ny mpianatra hahatakatra ireo andininy ireo ny fanasana mpianatra iray hihazona sarin’ny Mpamonjy iray eo anoloan’ny iray kilasy. Mangataha mpianatra iray hafa hijoro eny aoriana.
Rehefa mizara ny zavatra hitany ny mpianatra, dia afaka mandroso manakaiky ilay mpianatra mihazona ilay sarin’ny Mpamonjy ilay mpianatra eny aoriana. Afaka manakaiky ihany koa ilay mpianatra mihazona ilay sarin’ny Mpamonjy.
Azonao ampiasaina ny sasany amin’ireo fanambarana ao amin’ny “Loharanom-pitaovana fanampiny” mba hanampiana ny mpianatra hanakaiky ny Ray any An-danitra sy an’i Jesoa Kristy.
Ireto fanontaniana manaraka ireto dia afaka manampy anareo hifanakalo hevitra momba ny zavatra hitan’ny mpianatra tao amin’ireo andininy novakiny:
-
Afaka manampy anao hanakaiky ny Ray any An-danitra sy an’i Jesoa Kristy amin’ny fomba ahoana ny fanaovana ireo zavatra ireo?
-
Inona no mety ho fiantraikan’ireo fitahiana ireo eo amin’ny fifandraisanao amin’Izy Ireo?
Ny drafitro
Afaka manampy ny mpianatra hiomana hizara amin’ny iray kilasy ny fanasana azy ireo hamaly ireto fanontaniana manaraka ireto ao amin’ny diary fandalinan’izy ireo. Afaka mizara zavatra niainanao manokana koa ianao momba ny zavatra nataonao hanakaikezana an’i Jesoa Kristy sy ny fomba nahatsapanao fa nanakaiky anao Izy.
-
Ahoana no fomba fiezahanao hanakaiky ny Ray any An-danitra sy an’i Jesoa Kristy?
-
Inona no fitahiana azonao na azon’ny olona fantatrao noho ny fiezahana hanakaiky Azy Ireo?
Asao ny mpianatra hikatsaka ny Fanahy Masina mba hitarika azy ireo hahafantatra ny zavatra azon’izy ireo atao mba hanakaikezana ny Ray any An-danitra sy an’i Jesoa Kristy. Ampahatsiahivo ny mpianatra fa mety efa nahazo bitsika izy ireo nandritra ny lesona.
Ny mpianatra dia afaka manoratra ny fomba hiezahan’izy ireo hanakaiky ny Ray any An-danitra sy an’i Jesoa Kristy , ny fomba hanampian’izany azy ireo amin’ny fiatrehana ireo olana atrehan’izy ireo ary ireo sakana izay mety hilain’izy ireo horesena. Afaka manoratra eo amin’ny sary nataony ny mpianatra na eo amin’ny taratasy kely hoentina mody.
Amporisiho ny mpianatra hizara amin’ny Ray any An-danitra ao anatin’ny vavaka ataon’izy ireo ny zavatra homaniny hatao ary hangataka ny fanampiany.