Fotopampianarana sy Fanekempihavanana 88

Fotopampianarana sy Fanekempihavanana 88

Topimaso ankapobeny

Tamin’ny faramparan’ny taona 1832 sy ny fiandohan’ny taona 1833 dia nanambara hafatra iray tamin’i Joseph Smith ny Tompo izay nantsoina hoe “ravin’oliva.” Io hafatra mitondra fiadanana avy amin’ny Tompo io dia nanambara fahamarinana maro izay manana lanjany mandrakizay, ka tafiditra ao anatin’izany ilay hery izay ifehezany ireo zavatra nohariny sy ny fahamarinana momba ny lalàny mandrakizay. Nampianatra momba ny Fitsanganana amin’ny maty ny Mpamonjy ary ny lalàna izay ankatoavintsika no mamaritra ny voninahitra izay horaisintsika rehefa hitsangana amin’ny maty isika. Nanasa ireo mpanara-dia Azy Izy mba hanakaiky Azy. Nandidy ny olony Izy mba hanorina tempoly ary nanome torolalana mba hanangana ny Sekolin’ny Mpaminany.

Manombantombana ny fahalalan’ny mpianatra: Mety hiovaova ny fahalalan’ny mpianatra momba ireo lohahevitry ny filazantsara. Mety hanampy ny famaritana ny fahalalan’izy ireo momba ny zavatra iray mba hanampiana azy ireo hivoatra. Ny fanasana azy ireo hizara ny zavatra nianarany na ny fanontaniana azy ireo raha toa ka manana fanontaniany izy ireo dia afaka manampy amin’ny famaritana ireo ampahany amin’ny lesona izay tokony hifantohan’izy ireo. Mba hahitana ny fomba nanaovan’ny Mpamonjy izany dia jereo ny fizarana “Vonona lalandava ny handray andraikitra eo anatrehan’ireo zavatra nilain’ny hafa ny Mpamonjy” ao amin’ny Mampianatra araka ny fomban’ny Mpamonjy. Afaka mahita ohatra iray momba ny fomba hanaovana izany ianao ao amin’ny lesona amin’ity herinandro ity izay mitondra ny lohateny hoe “Fotopampianarana sy Fanekempihavanana 88:14–41.”

Miomana hampianatra

Ity fampahalalana manaraka ity dia manome hevitra anao momba ny zavatra mety hilaina homanina mialoha ho an’ny lesona tsirairay.

Fotopampianarana sy Fanekempihavanana 88:1–13, 41–50

Tanjon’ny lesona: Mba hanampiana ny mpianatra hahatsapa fankasitrahana kokoa noho ny fitarihan’ny Fahazavan’i Kristy eo amin’ny fiainan’izy ireo.

• Fanomanana ny mpianatra: Asao ny mpianatra mba haka fotoana handinihana ny lanitra amin’ny andro alina na hitady sarin’ny habakabaka iray amin’ny internet ka hisaintsaina ny fiandrianan’ Andriamanitra araka ny hita eo amin’ilay habakabaka hita maso.

• Taratasy zaraina: “Ny Fahazavan’i Kristy (Tapany 1 sy Tapany 2)”

Fotopampianarana sy Fanekempihavanana 88:14–41

Tanjon’ny lesona: Mba hanampiana ny mpianatra hampitombo ny fahatokian-tenan’izy ireo fa afaka mandray ny voninahitra selestialy izy ireo.

• Fanomanana ny mpianatra: Asao ny mpianatra hamorona lisitra fohy iray mitanisa ny fomba itondran’ireo lalàna soa eo amin’ny fiainantsika. Amporisiho izy ireo hiomana hizara ny eritreriny.

Fotopampianarana sy Fanekempihavanana 88:51–95

Tanjon’ny lesona: Mba hanampiana ny mpianatra handray ireo fitahiana avy amin’ny fanakaikezana ny Ray any An-danitra sy an’i Jesoa Kristy.

• Fanomanana ny mpianatra: Asao ny mpianatra mba hangataka ombam-bavaka amin’ny Ray any An-danitra ireo zavatra azon’izy ireo atao mba hahatsapany ho akaiky kokoa Azy sy an’i Jesoa Kristy.

Fotopampianarana sy Fanekempihavanana 88:76-80,117–141

Tanjon’ny lesona: Mba hanampiana ny mpianatra hianatra amin’ny alalan’ny finoana an’i Jesoa Kristy ao anatin’ny toe-javatra samihafa.

• Fanomanana ny mpianatra: Amporisiho ny mpianatra mba hisaintsaina izay zavatra ataon’izy ireo mba hianarany momba an’i Jesoa Kristy sy hampitomboany ny finoany Azy. Amporisiho izy ireo mba ho tonga miaraka amin’ny fahavononana hizara ny heviny sy ny fivoarany amin’ny iray kilasy.

• Horonan-tsary: “Raiso amim-pinoana ny hoavy” (16:24; jereo manomboka amin’ny mari-potoana 10:28 hatramin’ny 11:20)

• Zavatra ampiasaina: Kitapo iray sy tapa-taratasy kely maromaro