“Lesona 99—Fotopampianarana sy Fanekempihavanana 87: Naminany momba ny ady i Joseph Smith,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Fotopampianarana sy Fanekempihavanana 87,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 99: Fotopampianarana sy Fanekempihavanana 85–87
Fotopampianarana sy Fanekempihavanana 87
Naminany momba ny ady i Joseph Smith
Noho ny savorovoro ara-pôlitika nisy tany Etazonia tao anatin’ireo taona nanaraka ny taona 1830 dia nivavaka tamin’ Andriamanitra i Joseph Smith mba hahafantarana ny tao an-tsainy momba ny toe-javatra nisy. Ilay fanambarana izay nanaraka izany dia nahitana faminaniana amin’ny antsipiriany manokana momba ny ady izay Andriamanitra irery ihany no afaka nahalala azy tamin’izany fotoana izany. Ity lesona ity dia afaka manampy ny mpianatra hahatakatra fa ny tenin’ny Tompo rehetra amin’ny Mpaminaniny dia ho tanteraka avokoa.
Sahanasa fianarana azo atao
Zavatra niainan’i Orson Pratt
Mba hanampiana ny mpianatra hiomana handalina ny Fotopampianarana sy Fanekempihavanana 87, dia hevero ny hamintina na hamaky ity zavatra niainan’i Orson Pratt manaraka ity nandritra ny asa fitoriany.
Mpikamban’ny Fiangonana tany am-piandohana i Orson Pratt izay isan’ireo mpikambana voalohany tao amin’ny Kôlejin’ny Apôstôly Roambinifolo. Nantsoina hanompo tany amin’ny misiôna maro izy nandritra ny androm-piainany mba hitory ny filazantsaran’i Jesoa Kristy naverina tamin’ny laoniny manerana an’i Etazonia sy i Kanadà. Nandritra ny dia nataony dia nentiny niaraka taminy ny tahadikana fanambarana iray manokana izay noraisin’i Joseph Smith avy tamin’ny Tompo tamin’ny 1832. Na dia mbola tsy tanteraka aza ilay faminaniana tao anatin’ilay fanambarana dia nozarain’ny Loholona Pratt matetika tamin’ny hafa izany. Voarabiraby matetika izy ary tsaroany fa ny olona dia nilaza ilay faminaniana ho “faran’izay tsy misy dikany” ary “nianjadian’ny fisandohana” izy (Orson Pratt, Journal of Discourses, 18:224–25).
-
Inona no mety ho fiantraikan’ny fihetsiky ny olona teo aminao raha teo amin’ny toeran’i Orson Pratt ianao?
Faminaniana avy tamin’ny Tompo
Ilay faminaniana nozarain’i Orson Pratt tamin’ny hafa dia voarakitra ao amin’ny Fotopampianarana sy Fanekempihavanana 87. Mety ho tsara ho an’ny mpianatra ny mahatakatra ireo antsipiriany ara-tantara izay hita ao amin’ny sasin-tenin’ny fizarana alohan’ny hamakiana ilay faminaniana.
Ampio ny mpianatra hahita fotopampianaran’ny filazantsara sy fitsipiky ny filazantsara: Mba hanaovana fanazaran-tena bebe kokoa amin’ity dia jereo ilay fanofanana mitondra ny lohateny hoe “Ianaro avy amin’ny ezakao manokana ny filazantsaran’i Jesoa Kristy” izay hita ao amin’ny Fahaiza-manao ho fampivoarana ny mpampianatra: Ampianaro ny fotopampianarana. Hevero ny hampianatra ilay fahaiza-manao amin’ny alalan’ny famoronana fanontaniana mampikaroka tsy mitaky valiny raikitra izay manampy ny mpianatra hahita samirery fotopampianaran’ny filazantsara sy fitsipiky ny filazantsara ary tsy mitarika ny mpianatra any amina valinteny iray manokana.
Vakio ny Fotopampianarana sy Fanekempihavanana 87:1–4 mba hitadiavana ny zavatra nambaran’i Jesoa Kristy tamin’ny alalan’ny mpaminaniny.
-
Inona no nolazain’ny Tompo fa “hitranga tsy ho ela”?
-
Inona no azontsika ianarana momba ny Tompo avy amin’ireo andinin-tsoratra masina ireo?
Omeo fahafahana hizara fahamarinana isan-karazany izay nianarany momba an’i Jesoa Kristy ny mpianatra. Ankoatra ny zavatra voalazan’izy ireo dia ampio izy ireo hamantatra fa ny Tompo dia afaka manambara amintsika ireo zavatra hitranga any aoriana amin’ny alalan’ny mpaminaniny.
Vakio ny sasany amin’ireto soratra masina ireto na izy rehetra mba hanampiana anao hahatakatra kokoa ny fahalalan’ny Tompo.
-
Inona no nianaranao? Nahoana, araka ny eritreritrao, no zava-dehibe ny mahatakatra ireo zavatra momba an’i Jesoa Kristy ireo?
-
Inona no fiantraikan’io fahalalana io eo amin’ny fahatokiantsika Azy?
Finoana ny Tompo sy ireo faminaniany
Vakio na fintino ity andiam-pehezan-teny manaraka ity mba hanampiana ny mpianatra hahatakatra ny zavatra nitranga taorian’ny nanambaran’ny Tompo ireo zavatra hitranga any aoriana ireo tamin’i Joseph Smith.
Tamin’ny fiandohan’ny taona 1833, fotoana fohy taorian’ny nanomezana ilay faminanian’i Joseph Smith, dia voavaha tamim-pilaminana ireo tsy fitovian-kevitra izay nampihevitra fa hisy ady hipoaka tao Amerika afaka fotoana fohy.
-
Inona, araka ny eritreritrao, no fanontaniana mety ho nanananao raha nahafantatra momba ilay faminanian’i Joseph Smith ianao tamin’izany fotoana izany?
Notantarain’i Orson Pratt ireo eritreritra nananany rehefa tsy nazava tsara hoe ahoana sy rahoviana no hahatanterahan’ilay faminaniana.
Fantatro fa marina ilay faminaniana satria niresaka tamiko ny Tompo ary nanome fanambarana ahy. Fantatro ihany koa ny fahamasinan’ity asa ity. Taona maro no nandalo ary indraindray ny sasany tamin’ireo olona nifankahafantatra tamiko teo aloha dia nilaza hoe: “Nanao ahoana ihany ilay faminaniana e? Toa tsy ho tanteraka velively ilay izy.” Nilaza aho hoe, “Miandrasa fa manana ny fotoanany ny Tompo.” (Orson Pratt, Journal of Discourses, 18:224–25)
-
Inona no nisarika ny sainao tao anatin’ny valintenin’i Orson Pratt?
-
Tamin’ny fomba ahoana no nanaovany asa amim-pinoana sy nananany fomba fijery mibanjina ny mandrakizay?
Misafidy ny hiara-hijoro amin’ny Tompo
Hevero ny hanasa ny mpianatra hifanakalo hevitra momba ity fanontaniana manaraka ity miaraka amina namana miara-miasa iray na ao anaty vondrona kely alohan’ny hizaran’izy ireo ny valintenin’izy ireo amin’ny iray kilasy.
-
Inona ireo toe-javatra sasantsasany izay mety hitaky ny fanaovan’ny olona iray asa amim-pinoana ho valin’ny hafatry ny mpaminany ankehitriny?
Amporisiho ny mpianatra hisaintsaina hoe hatraiza ny fahavononan’izy ireo hiara-hijoro amin’ny mpaminanin’ny Tompo rehefa mampianatra zavatra izay tsy eken’ny hafa aza izy ireo.
Vakio ny Fotopampianarana sy Fanekempihavanana 1:37–38 sy ny 21:4–6. Tadiavo ireo fampianarana izay afaka manampy anao hitoetra ho mahatoky amin’ny Tompo sy ireo mpaminaniny na dia tsy manaiky ny tenin’izy ireo aza ny hafa.
-
Inona no hitanao?
Mba hanampiana ny mpianatra hamantatra fa ny finoana sy ny faharetana dia matetika fepetra takina mba hahitana ny fahatanterahan’ireo faminanian’ny Tompo dia hevero ny hizara ireto antsipirian-javatra ara-tantara manaraka ireto.
Na dia efa maty aza i Joseph Smith ka tsy nahita ny fahatanterahan’ilay faminaniana, dia tanteraka 30 taona latsaka kely taorian’ny nanomezana izany ny ampahany tamin’izany. Nanomboka tao Caroline du Sud ilay fifandirana ary niady ny Faritany Tatsimo sy ny Faritany Tavaratra nanomboka tamin’ny 1861 ka hatramin’ny 1865. Araka ny efa naminaniana dia nangataka fanampiana tamin’i Grande Bretagne ny Tatsimo ary maro tamin’ireo izay nandevozina no niady tamin’ireo tompony teo aloha (jereo ny Fotopampianarana sy Fanekempihavanana 87:1–4). Maro ireo olona maty nandritra izany ady izany. Araka ny voafariparitra ao amin’ilay faminaniana dia nisy ireo ady nitranga tany amin’ireo firenena maneran-tany taorian’izany (jereo ny Fotopampianarana sy Fanekempihavanana 87:6–7).
Mijoroa eo amin’ny toerana masina
Mety mahatsapa fisalasalana na tahotra ny sasany amin’ny mpianatra eo am-pieritreretana ireo ady sy faharavana voafariparitra ao anatin’io faminaniana io. Hazavao fa ny teny farany nataon’ny Tompo ao amin’io fanambarana io dia manome torohevitra izay afaka manampy antsika ao anatin’ireo fisafotofotoana amin’ny andro farany.
Vakio ny Fotopampianarana sy Fanekempihavanana 87:8 mba hitadiavana ny torohevitra avy amin’ny Tompo.
-
Inona no sasany amin’ireo toerana masina izay nomen’ny Tompo antsika izay afaka manampy antsika hahita fiadanana sy fiarovana eto amin’ity izao tontolo izao misy antsika ity?
Hevero ny hanazava fa ny fijanonana ho mahatoky amin’ny Tompo sy ny mpaminaniny dia fomba iray ahafahantsika “[mitsangana] eo amin’ny toerana masina ary … tsy hoesorina.” Mijoroa ho vavolombelona momba ny fahamarinana izay noresahinareo androany ary amporisiho ny mpianatra handray andraikitra eo anatrehan’ireo fahatsapana voarain’izy ireo.