Lesona 101: Fotopampianarana sy Fanekempihavanana 88

Fotopampianarana sy Fanekempihavanana 88:14–41

Miezaka mankatò ny lalàna selestialy

Ao amin’ny Fotopampianarana sy Fanekempihavanana 88, ny Tompo dia nanambara fahamarinana momba ny Fitsanganana amin’ny maty sy ireo fanjakam-boninahitra ka tafiditra ao anatin’izany ny voninahitra selestialy. Ireo fahamarinana ireo dia afaka mampiray sy mitahy ireo mpikamban’ny Fiangonana rehefa manaraka amim-pahatokiana an’i Jesoa Kristy izy ireo. Ity lesona ity dia afaka manampy ny mpianatra hampitombo ny fahatokian-tenan’izy ireo fa afaka mandray ny voninahitra selestialy izy ireo.

Sahanasa fianarana azo atao

Tanjona ho amin’ny voninahitra selestialy

Asao ny mpianatra mba hanao sarina tohatra ao amin’ny diary fandalinan’izy ireo ary hanisy soratra eo amin’ny tampon’ilay tohatra hoe “Ny Fanjakana selestialy.” Angataho ny mpianatra mba hanao ny sariny eo amin’izay tohatra ahitany ny tenany. Amporisiho izy ireo hirakitra an-tsoratra ny valintenin’izy ireo amin’ireto fanontaniana manaraka ireto:

• Mahatsapa ve ianao fa ireo safidy ataonao ankehitriny dia manampy anao handroso ho any amin’ny fanjakana selestialy? Nahoana no eny, na nahoana no tsia?

• Manao ahoana ny fahatokian-tenanao fa afaka ny hahatratra ny voninahitra selestialy ianao miaraka amin’ny fanampian’i Jesoa Kristy?

Ampahatsiahivo ny mpianatra fa satria i Jesoa Kristy no Mpamonjy antsika dia afaka miantehitra Aminy isika mba hanampy antsika hiova sy hibebaka ary hanome hery eo am-piezahantsika hanatratra ny voninahitra selestialy.

Ny fanambaran’ny Tompo voarakitra ao amin’ny Fotopampianarana sy Fanekempihavanana 88 dia manome fahazavana masina mba hanampiana antsika hahatakatra ireo fahamarinana mandrakizay. Ao amin’ny fizarana 88 dia mianatra antsipirian-javatra momba ny drafitry ny Ray any An-danitra sy fahamarinana momba an’i Jesoa Kristy ary ny fomba ahafahantsika miverina eo anatrehan’izy ireo isika.

Azonao atao ny mizara ny zavatra tsapanao momba ny hatsaran’ny drafitry ny Ray any An-danitra sy ny halehibeny. Amporisiho ny mpianatra eo am-pianaran’izy ireo anio mba hikatsaka fitaomam-panahy hahafantarana ny fomba hanaovan’izy ireo asa amim-pinoana sy handraisan’izy ireo ny fanampian’ny Mpamonjy eo am-pandrosoan’izy ireo mankany amin’ny fanjakana selestialy.

Ny vatantsika mety maty

Hazavao fa ampahany manan-danja ao amin’ny drafitr’ Andriamanitra ny hahatongavantsika ho tahaka Azy ara-panahy sy ara-batana. Nandray vatana isika tamin’ny fahaterahana. Io vatana io dia ho faty indray andro any ary hitsangana amin’ny maty.

Hevero ny hanao lisitra eny amin’ny solaitrabe ny valintenin’ny mpianatra amin’ity fanontaniana manaraka ity:

• Inona ny zavatra efa fantatrao mikasika ny Fitsanganana amin’ny maty?

Raha ilaina dia azon’ny mpianatra ampiasaina ny Sujets et Questions, “Résurrection,” topics.ChurchofJesusChrist.org mba hanohanany ny valintenin’izy ireo.

Azon’ny mpianatra atao ny mamita ity asa manaraka fandalinana ity miaraka amin’ny namany iray. Azonao atao ny mampiseho ireo fanontaniana mba hakan’ny mpianatra hevitra ka ny mpiara-miasa tsirairay no tompon’andraikitra amin’ny famaliana ny iray amin’ireo fanontaniana. Mety hanampy ny mpianatra ny fahafantarana fa ny teny hoe mamelona dia mety hidika hoe manome aina.

Vakio ny Fotopampianarana sy Fanekempihavanana 88:14–17, 27–31. Saintsaino ireto manaraka ireto rehefa mamaky izany ianao:

• Inona no nianaranao momba ny Fitsanganana amin’ny maty?

• Inona no nianaranao momba ireo ambaratongam-boninahitra telo?

Asao ny mpianatra hanao tatitra momba ny zavatra nianarany. Mihainoa amim-pitandremana ary mametraha fanontaniana fanaraha-maso mba hanampiana amin’ny fanazavana ny fahatakaran’izy ireo raha ilaina izany. Raha manana fanontaniana fanampiny ny mpianatra dia afaka mifanakalo hevitra momba izany ny iray kilasy.

Manombantombana ny fahalalan’ny mpianatra: Mba hanazaran-tena misimisy kokoa momba ity dia jereo ilay fanofanana mitondra ny lohateny hoe “Aoka ianao ho vonona mandrakariva hanaraka ireo bitsiky ny Fanahy momba ny zavatra ilain’ireo mpianatra.” izay hita ao amin’ny Fahaiza-manao ho fampivoarana ny mpampianatra: Mampianara amin’ny alalan’ny Fanahy. Hevero ny hanao fanazaran-tena amin’ny fampiasana ilay fahaiza-manao “Mametraha fanontaniana mba hanombanana ny fianarana alohan’ny hanohizana ny lesona.”

Mitondra mankany amin’ny voninahitra ny fankatoavana ireo lalàn’ Andriamanitra

Hevero ny hanasa ny mpianatra mba hizara hoe mety ho tahaka ny inona izany manana vatana selestialy izany, na hoe nahoana izy ireo no maniry handray vatana selestialy amin’ny Fitsanganana amin’ny maty.

Raha niara-niasa tamina namana iray ny mpianatra teo aloha dia afaka miara-miasa amin’ny namana iray hafa indray izy ireo mandritra ity asa fandalinana manaraka ity.

Vakio ny Fotopampianarana sy Fanekempihavanana 88:21–24, 34–36, 38–39 mba hitadiavana ny fomba ahafahantsika hitsangana amin’ny maty miaraka amin’ny vatana selestialy. Hevero ny hanisy marika ireo teny sy andian-teny tena manan-danja aminao.

• Inona no zavatra tsapanao fa zava-dehibe ka tokony hotakarina avy amin’ireo andininy ireo?

• Inona no mamaritra ny voninahitra azontsika raisina aorian’ny Fitsarana Farany? Nahoana?

Omeo fotoana hifanakalozana hevitra momba ny zavatra nianarany ny mpianatra. Mety hilaza fahamarinana isan-karazany ny mpianatra, tafiditra ao anatin’izany ny hoe raha mankatò ireo lalàna selestialy isika da handray voninahitra selestialy na mandritra ny Fitsanganana amin’ny maty dia handray voninahitra arakaraka ny lalàna hankatoavintsika isika. Azonao atao ny manoratra ireo fahamarinana ireo eny amin’ny solaitrabe.

Mba hanampiana ireo mpianatra hahatakatra sy hahatsapa ny lanjan’ny lalàna masina dia azonao atao ny mizara izao fanambarana manaraka izao:

Nampianatra ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Mazava ho azy fa ny lalànʼny fanjakana selestialy no lalàna sy fanekempihavananʼny filazantsara, izay ahitana ny fahatsiarovantsika lalandava ny Mpamonjy sy ny fanekempihavanantsika aminʼny fankatoavana, fahafoizan-tena sy fanokanana ary fahatokiana. (D. Todd Christofferson, “Avia aty Ziona,” Liahona, nôv. 2008, 38)

• Inona no zavatra ianaranao momba ny fitiavan’ Andriamanitra sy ny fahamarinany ary ny famindram-pony?

• Inona no zavatra tsapanao momba ny fomba fiasany manokana miaraka amin’ireo zanany?

Fanampiana eny an-dalana

Asao ny mpianatra hisaintsaina ny fomba hamaliany namana iray izay kivy sy mahatsapa fa tsy ampy fahatsarana mba handraisany ny voninahitra selestialy. Azonao asaina ny mpianatra mba hamaky ireto andininy manaraka ireto ary avy eo hanoratra valinteny fohy mahakasika ilay olan’ny naman’izy ireo.

Vakio ny 3 Nefia 27:19–20 mba hitadiavana ny fomba nomanin’ny Ray any An-danitra mba hahafahan’ireo zanany handray ny voninahitra selestialy. Azonao atao ny mampifandray ireo andininy ireo amin’ny Fotopampianarana sy Fanekempihavanana 88:21, 34.

Hevero ny hanasa ny mpianatra hanisy marika ny teny hoe afa-tsy ao amin’ny 3 Nefia 27:19. Mariho fa ireo teny ireo dia mety hidika hoe “ankoatra ny.” Azonao anontaniana ny mpianatra ny fomba hanampian’izany azy ireo hahatakatra ireo tenin’i Jesoa tamin’ny Nefita.

Mba hanampiana ny mpianatra hamantatra ny fanantenana sy ny fiovana misy ho azy ireo amin’ny alalan’i Jesoa dia afaka mizara ity fanambarana manaraka ity ianao:

Nampianatra ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Tokony hivavaka bebe kokoa hanana fotoana sy fahafahana hiasa sy hiezaka ary handresy ny ota isika, izay angamba mitovy amin’ny fanaovantsika vavaka bebe kokoa mba hahazo famindram-po. Tena azo antoka fa hitahy ilay olona izay maniry ny hijoro manoloana ny fitsarana amim-pahamendrehana ny Tompo. Olona izay niasa mafy isan’ andro isan’ andro mba hanova ny fahalemena ho tanjaka. Mety mitaky andrana miverimberina ny fibebahana sy ny fiovana marina, kanefa misy zavatra manadio sy manamasina ao anatin’ny fiezahana toy izany. Mirotsaka ho azy amin’ny fanahy toy izany ny famelan-keloka sy ny fanasitranana avy any an-danitra, satria, “ny hatsaran-toetra tia ny hatsaran-toetra; ny fahazavana miraikitra amin’ny fahazavana; [ary] ny famindram-po manana fangorahana ny famindram-po ary mitaky izay azy” (F&F 88:40).

Rehefa mibebaka isika dia afaka mampivoatra tsikelikely ny fahafahantsika miaina ny lalàna selestialy, satria fantatsika fa “izay tsy afaka mandray ny lalàn’ny fanjakana selestialy dia tsy afaka handray ny voninahitra selestialy” (F&F 88:22). (D. Todd Christofferson, “Ilay fanomezana masin’ny fibebahana,” Liahona, nôv. 2011, 39)

• Ahoana no ahafahan’ny fahatakaranao ny Sorompanavotan’ny Mpamonjy hisy fiantraikany amin’ny finoanao amin’ny fahatratrarana ny voninahitra selestialy?

• Inona no mety holazainao amin’ny olona iray izay matahotra ny tsy ho afaka hahatratra ny voninahitra selestialy raha araka ny zavatra nianaranao anio?

Asao ny mpianatra hamerina hijery ilay sarina tohatra nataon’izy ireo tany amin’ny fiandohan’ny fotoam-pianarana. Amporisiho izy ireo hanoratra ny zavatra nianarany eo amin’ilay tohatra na manodidina izany izay afaka manampy azy ireo hanakaiky ny fanjakana selestialy. Afaka mirakitra ny ao an-tsainy na ny zavatra tsapany momba ny Ray any An-danitra sy an’i Jesoa ny mpianatra. Azon’izy ireo ampidirina ao anatin’izany ihany koa ny fomba nanatanjahana ny fanapahan-kevitr’izy ireo sy ny fanantenan’izy ireo ny hahatratra ny voninahitra selestialy na ny fomba ahafahan’ny fahamarinana nianaran’izy ireo hisy fiantraikany eo amin’ny safidiny ankehitriny sy any aoriana.

Raha mbola misy ny fotoana dia azonao atao ny manasa mpianatra iray na roa hizara amin’ny iray kilasy ny eritreritr’izy ireo.

Loharanom-pitaovana fanampiny

Nahoana no porofon’ny fitiavan’ Andriamanitra antsika ireo lalàny?

Nampianatra izao ny Filoha Russell M. Nelson:

Fanomezan’ Andriamanitra ho an’ny zanany ireo lalàna masina. … Mamelà ahy hilaza izany amin’ny fomba mivantana araka izay azoko atao: Raha miaina araka ireo lalàn’ Andriamanitra ianareo dia mandroso mankany amin’ny fisandratana ianareo. …

… Ny fitahiana lehibe indrindra avy amin’ Andriamanitra dia natokana ho an’ireo izay mankatò ny lalàny, araka ny nohazavainy hoe: “Fa izay rehetra te hahazo fitahiana eo an-tanako dia handray ny lalàna izay voatendry ho an’izany fitahiana izany” [Fotopampianarana sy Fanekempihavanana 132:5]. Ny lalàn’ Andriamanitra dia entanin’ny fitiavany antsika tsy misy fetra sy ny faniriany mba hahatongavantsika amin’ilay tiantsika hahatongavana araka izay azontsika atao rehetra. …

… Tsy mora ny fahazoana ny fisandratana. Tafiditra ao anatin’ireo fepetra takina amin’izany ny ezaka mifantoka sy tsy tapaka amin’ny fitandremana ireo lalàn’ Andriamanitra sy ny fibebahana mafy rehefa tsy manao izany isika. Saingy ny vokatry ny fanaovana izany dia lehibe lavitra noho ny azontsika eritreretina satria mitondra fifaliana ho antsika eto sy “fahasambarana tsy mifarana na oviana na oviana” [Môzià 2:41] izany. (Russell M. Nelson, “The Love and Laws of God” [Fampaherezam-panahy tao amin’ny Oniversite Brigham Young, 17 sept. 2019], speeches.byu.edu)

Fotopampianarana sy Fanekempihavanana 88:27. Inona no dikan’izany hoe hitsangana amin’ny “vatana ara-panahy” isika?

Nampianatra izao ny Filoha Joseph Fielding Smith (1876–1972):

Amin’ny fitsanganana amin’ny maty, ireo vatana nampandriana izay vatana voajanahary dia hitsangana ho vatana ara-panahy. Izany hoe ao anatin’ny ra no misy ny ain’ny vatana mandritra ny fiainantsika eto an-tany saingy rehefa hitsangana tsy ho faty intsony ny vatana dia hovelomin’ny fanahy fa tsy ny ra. Noho izany lasa ara-panahy izany saingy hahitana nofo sy taolana tahaka ny vatan’i Jesoa izay maodely amin’izany. (Joseph Fielding Smith, Doctrines of Salvation, comp. Bruce R. McConkie [1955], 2:284–85)

Fotopampianarana sy Fanekempihavanana 88:20–24. Inona no hamaritra ny fanjakam-boninahitra izay horaisiko amin’ny Fitsarana Farany?

Nijoro ho vavolombelona ny Filoha Russell M. Nelson hoe:

Ny tsirairay aminareo dia hotsaraina araka ny asanareo manokana sy ny fanirian’ny fonareo. [jereo ny F&F 137:9]. Tsy hotakina aminao ny hanefa ny trosan’olon-kafa. Tsy kisendrasendra no hametrahana anao any amin’ny fanjakana selestialy, na terestrialy, na telestialy. Ny Tompo dia nametraka fepetra takina izay tsy miova ho an’ny fanjakana tsirairay. Afaka mahafantatra izay ampianarin’ny soratra masina ianao, ary mamolavola ny fiainanao mifanaraka amin’izany. [jereo ny Jaona 14:2; 1 Kôrintiana 15:40–41; Fotopampianarana sy Fanekempihavanana 76:50–119; 98:18]. (Russell M. Nelson, “Constancy amid Change,” Ensign, Nov. 1993, 35)

Fotopampianarana sy Fanekempihavanana 88:35. Inona no manjo an’ireo izay mandika ny lalàn’ Andriamanitra?

Nanazava izao ny Loholona Dale G. Renlund ao amin’ny Kôlejin’ny Apôstôly Roambinifolo:

Aorian’ny fahafatesana dia handray ny zavatra mendrika ny ho azontsika isika ary “[tsy handray afa-tsy] izay tian[tsika] horaisina.” [Fotopampianarana sy Fanekempihavanana 88:32]. Miankina amin’ny safidy izay nataontsika ny fahafantarana ny anjarantsika mandrakizay. Mitaky fanaovana sy fitandremana fanekempihavanana masina izany. Io lalan’ny fanekempihavanana io no fomba hanatonantsika an’i Kristy ary mifototra amin’ny fahamarinana tanteraka sy amin’ny lalàna tsy miova mandrakizay izany. Tsy afaka mamorona ny lalantsika manokana isika dia hanantena ireo vokatra nampanantenain’ Andriamanitra. Ny manantena ireo fitahiany kanefa tsy manaraka ireo lalàna mandrakizay ifotoran’izany [jereo ny Fotopampianarana sy Fanekempihavanana 130:20–21] dia tsy mety, tahaka ny fieritreretana hoe afaka mikasika fatana mahamay isika ary “manapa-kevitra” ny tsy ho may. …

… Manana safidy malalaka isika, saingy tsy afaka misafidy ny vokatry ny tsy fanarahana ny lalana nambara isika [jereo ny 2 Nefia 2:5, 16, 26–27]. Hoy ny Tompo hoe: “Izay mandika lalàna sy tsy mandray ny lalàna fa mitady ny ho lalàna ho an’ny tenany, … dia tsy azo hamasinina amin’ny lalàna, na amin’ny famindram-po, na ny fahamarinana, na ny fitsarana.” [Fotopampianarana sy Fanekempihavanana 88:35]. Tsy afaka miala amin’ny lalan’ny Ray any An-danitra isika dia avy eo manome tsiny Azy noho ny fahazoana vokatra ratsy. (Dale G. Renlund, “Ny toetranao araka an’ Andriamanitra sy ny anjaranao mandrakizay,” Liahona, mey 2022, 75)

Sahanasa fianarana fanampiny

Lesona ampiasana zavatra azo tsapain-tanana

Ho solon’ny fiandohan’ilay fizarana hoe “Ny vatantsika mety maty,” dia azonao atao ny manampy ny mpianatra hamerina hijery vetivety ny fotopampianaran’ny Fitsanganana amin’ny maty. Mampisehoa fonon-tanana iray ary hazavao fa maneho ny vatantsika izany. Asao ny mpianatra iray mba hanao ilay fonon-tanana ary hampihetsika ny rantsantanany. Afaka mametraka fanontaniana toy izao ianao:

• Raha maneho ny vatana ny fonon-tanana dia maneho inona kosa ny tanana?

• Inona no hitranga raha sarahina amin’ny “fanahy” ny “vatana”?

Miaro antsika ireo lalàn’ Andriamanitra

Mba hanampiana ny mpianatra hisaintsaina momba ny fiarovana azo avy amin’ireo lalàn’ Andriamanitra dia asehoy ny iray amin’ireto horonan-tsary manaraka ireto:

• “Voatahy sy sambatra ireo izay mitandrina ny didin’ Andriamanitra” (5:41)

Tohatra

Rehefa manombantombana ny tohatr’izy ireo ny mpianatra any amin’ny faran’ity lesona ity dia azonao atao ny mizara na mifanakalo hevitra momba ity fanambarana manaraka nataon’ny Mpaminany Joseph Smith ity (1805–44).

Raha miakatra tohatra ianao dia tsy maintsy manomboka any ambany ary miakatra tsikelikely mandra-pahatonga anao any amin’ny tampony ary dia toy izany koa amin’ireo fitsipiky ny filazantsara—tsy maintsy manomboka any amin’ny voalohany ianao ary manohy hatrany mandra-pahaizanao ireo fitsipika rehetra mikasika ny fisandratana. Saingy mbola ho fotoana lava any aorian’ny hiampitanao ny voaly hahafatesanao mihitsy aza vao hahalala azy rehetra ianao. Tsy natao ho takatra eto amin’ity izao tontolo izao ity daholo izany; fa ho asa lehibe ny fianarana momba ny famonjena sy ny fisandratana ho antsika, eny fa na dia any ankoatry ny fasana aza. (Teachings of Presidents of the Church: Joseph Smith [2007], 268).

Ny lamin’ny Fitsanganana amin’ny maty

Azonao atao ny manasa ny mpianatra hamaky ny Fotopampianarana sy Fanekempihavanana 88:96–102 mba hitadiavana ny zavatra hitranga amin’ny Fitsanganana amin’ny maty. Azonao zaraina ny famakiana ireo andinin-tsoratra masina maro momba ny fitsanganana amin’ny maty (andininy 96–98, 99, 100–101, 102). Azonao heverina ny mizara ity manaraka ity mba hanazavana misimisy kokoa momba ireo andininy ireo:

Ny olo-marina izay velona mandritra ny Fiavian’ny Tompo Fanindroany, dia “hampahavitrihana sy hakarina mba hitsena Azy” (F&F 88:96). Ireo izay handova ny fanjakana selestialy no hitsangana voalohany (jereo ny F&F 88:96–98). Rehefa avy mitsangana amin’ny maty ireo izay handova ny fanjakana selestialy dia hitsangana amin’ny maty ireo izay handova ny fanjakana terestrialy (jereo ny F&F 88:99; jereo ihany koa ny F&F 76:71–79). Ireo no olona izay tsy nandray an’i Jesoa Kristy tamin’ny fahavelomany saingy nandray Azy kosa tao amin’ny tontolon’ny fanahy (jereo ny F&F 88:99). Aorian’ny Arivotaona dia hitranga ny “fitsanganana amin’ny maty farany” (F&F 76:85) na ny fitsanganan ny tsy marina amin’ny maty. Ireo olona ireo no handova ny fanjakana telestialy ary ny farany dia ireo zanaky ny fahaverezana “izay mbola hitoetra ho maloto” (jereo ny F&F 88:100–102). (Boky torolalana ho an’ny mpianatra: Fotopampianarana sy Fanekempihavanana [2018], 488)