Lesona 100: Fotopampianarana sy Fanekempihavanana 88

Fotopampianarana sy Fanekempihavanana 88:1–13, 41–50

Ny Fahazavan’i Kristy

Fony tao Kirtland, Ohio, i Joseph Smith sy ireo mpisorona avo maromaro dia nivavaka tamin’ny Ray any An-danitra mba handray fanambarana momba ny fanorenana an’i Ziona. Nampianatra fahamarinana momba ny hery sy ny halehiben’ny Fahazavan’i Jesoa Kristy ilay fanambarana. Ity lesona ity dia natao hanampiana ny mpianatra hahatsapa fankasitrahana kokoa noho ny fitarihan’ny Fahazavan’i Kristy eo amin’ny fiainan’izy ireo.

Sahanasa fianarana azo atao

Zavatra tsapantsika

Hevero ny hametraka ity fanontaniana manaraka ity amin’ny mpianatra ary ataovy lisitra ny valintenin’izy ireo. Afaka mifanakalo hevitra momba ilay fanontaniana ao anaty vondrona kely izy ireo ary avy eo manoratra ny valinteniny eny amin’ny solaitrabe.

• Inona ireo karazana zavatra izay tsapanao kanefa tsy hitanao?

  Mety hitanisa zavatra toy ny hafanana, ny rivotra, ny fitiavana, ny fankasitrahana, ny finoana, sy ny sisa ny mpianatra.

• Nahoana no zava-dehibe ny fahafantarana fa misy ireo zavatra izay tsapanao kanefa tsy hitanao?

Afaka manasa ny mpianatra hikatsaka fanentanam-panahy ianao mba hamantarany ny fitarihan’ Andriamanitra eo amin’ny fiainany.

Ireo asan’ny Fahazavan’i Kristy

Nivory tao amin’ny efitra ambony tao amin’ny trano fivarotan’ i Newel K. Whitney tao Kirtland, Ohio, i Joseph Smith sy ireo loholona sivy tao amin’ny Fiangonana. Naniry handray fahatakarana misimisy kokoa momba ny andraikitr’izy ireo amin’ny fanorenana an’i Ziona izy ireo. Nanasa ny olona tsirairay i Joseph mba hifandimby hivavaka mba hamantarana ny sitrapon’ny Tompo. Rehefa avy nivavaka ny Mpaminany dia naharay ny ao amin’ny Fotopampianarana sy Fanekempihavanana 88 ankehitriny.

Rehefa manomboka mamaky ity manaraka ity ny mpianatra dia ataovy izay hahatakaran’izy ireo fa ny andininy 6 dia miresaka momba an’i Jesoa Kristy.

Vakio ny Fotopampianarana sy Fanekempihavanana 88:6–13 mba hitadiavana ny zavatra azon’ireo andininy ireo ampianarina anao momba an’i Jesoa Kristy sy ny fahazavany.

• Inona no nianaranao momba ny Fahazavan’i Kristy avy amin’ireo andinin-tsoratra masina ireo?

  Ankoatra ireo hevitra izay mety hozarain’ny mpianatra dia ampio izy ireo hamantatra ilay fahamarinana hoe ny Fahazavan’i Kristy dia manome fahazavana sy fiainana amin’ny zavatra nohariny rehetra.

  Ampio ny mpianatra hahita ny mety ho fiantraikan’ny fahatakarana ny fitarihan’ Andriamanitra amin’ny alalan’ny Fahazavan’i Kristy eo amin’ny fiainan’izy ireo. Fomba iray hanaovana izany ity fanontaniana manaraka ity.

• Inona avy ireo toe-javatra sasany atrehin’ny zatovo izay hahazoan’izy ireo tombontsoa amin’ny famantarana ny fitaoman’ Andriamanitra? Nahoana?

Ity sahanasa manaraka ity dia natao hanampiana ny mpianatra hahatsapa fankasitrahana kokoa noho ny Fahazavan’i Kristy sy ny fiantraikan’izany eo amin’ny fiainan’izy ireo.

Afaka mamorona toeram-piantsonana miisa efatra ahitana asa atao ianao manodidina ny efitrano, izay azon’ny mpianatra tsirairay tsidihina sy atao. Azo asaina mba hitondra ny diariny sy zavatra hanoratana ary soratra masina ny mpianatra eny amin’ny toeram-piantsonana tsirairay avy. Raha sy izany dia azonao atao ny mizara ny mpianatra ho vondrona ahitana mpianatra efatra ary manendry ny mpianatra tsirairay hisahana fizarana iray ao anatin’ilay taratasy zaraina. Avy eo dia azon’ny mpianatra atao ny mizara ny zavatra nianaran’izy ireo amin’ny vondrona misy azy.

Ny Fahazavan’i Kristy

Farito ny Fahazavan’i Kristy

Vakio ny Fotopampianarana sy Fanekempihavanana 88:12–13 mba hitadiavana ny famaritana ny Fahazavan’i Kristy.

Vakio ity famaritana ny Fahazavan’i Kristy manaraka ity:

“[Ny Fahazavan’i Kristy] dia ny herin’ Andriamanitra, hery fitarihana mivoaka avy amin’ Andriamanitra amin’ny alalan’i Kristy ary manome aina sy fahazavana ho an’ny zava-drehetra. Izy no lalàna izay ifehezana ny zava-drehetra any an-danitra sy ety an-tany (F&F 88:6–13). Izy koa no manampy ny olona hahatakatra ireo fahamarinan’ny filazantsara sy manampy amin’ny fametrahana ny olona eo amin’ny lalan’ny filazantsara izay mitondra ho amin’ny famonjena.” (Torolalana ho an’ny Soratra Masina, “Fahazavana, Fahazavan’i Kristy,” scriptures.ChurchofJesusChrist.org)

• Ahoana no hamintinanao ny fahatakaranao ny atao hoe Fahazavan’i Kristy?

• Ahoana, araka ny hevitrao, no itaoman’ny Fahazavan’i Kristy anao manokana?

Ny Fahazavan’i Kristy ho ny fieritreretantsika

Ny fieritreretantsika dia fisehoan’ny Fahazavan’i Kristy iray. Manorata famaritana ny fahatakaranao ny atao hoe fieritreretana izay takatry ny ankizy ao amin’ny Kilonga.

Vakio ity famaritana manaraka ity ary diniho izay mety azonao ampiana amin’ny famaritana nomenao:

“[Ny fieritreretana] dia ilay fahatsapana ny marina sy ny diso ao anaty, avy amin’ny Fahazavan’ i Kristy izay ao anatin’ ny olona rehetra (Môrô. 7:16). Miara-teraka amintsika ny fahaizana voajanahary hanavaka ny marina sy ny diso noho ny fahazavan’ i Kristy izay omena ny olon-drehetra (F&F 84:46). Izany fahaizana izany no atao hoe fieritreretana. Ny fananana izany dia mahatonga antsika ho olona tompon’andraikitra. Toy ireo fahaizana hafa, ny fieritreretantsika dia mety ho faty noho ny fahotana na ny fampiasana azy tsy araka ny tokony ho izy.” (Torolalana ho an’ny Soratra Masina, “Fieritreretana,” scriptures.ChurchofJesusChrist.org)

Vakio ny Fotopampianarana sy Fanekempihavanana 84:45–46 sy ny Môrônia 7:16 mba hitadiavana ireo teny sy andian-teny izay mamaritra ny fomba fiasan’ny Fahazavan’i Kristy ho toy ny fieritreretantsika. Hevero ny hamorona fanoroana soratra masina mifandray ho an’ireo andininy roa ireo.

• Inona no andian-teny avy amin’ireo andininy ireo izay manampy anao hahatakatra ny atao hoe fieritreretana?

• Nahoana araka ny eritreritrao no nomen’ny Ray any An-danitra sy i Jesoa Kristy fieritreretana ianao?

Amin’ny fomba ahoana no mety hampisy fiantraikany ny fihainoana na ny tsy firaharahiana ny fieritreretanao eo amin’ny safidy ataonao sy ny toerana hiafaranao mandrakizay?

Ao anatin’ny olon-drehetra ny Fahazavan’i Kristy

Alaivo sary an-tsaina hoe asaina mizara vatsim-panahy fohy ao amin’ny Sekoly Alahady ianao momba ny fomba tokony hijerentsika sy hitondrantsika ny hafa amin’ny fomba tsaratsara kokoa indrindra indrindra ireo izay tsy mitovy amintsika. Azonao ampiasaina ireto loharanom-pitaovana manaraka ireto sy izay hitanao fa manampy.

• Fotopampianarana sy Fanekempihavanana 88:11

• Fotopampianarana sy Fanekempihavanana 93:2

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Rehefa mahafantatra bebe kokoa momba ny Fahazavan’i Kristy isika dia hahatakatra bebe kokoa momba ny fiainana sy hanana fitiavana lalina ny olombelona rehetra. Ho mpampianatra sy misiônera ary ray aman-dreny tsara kokoa isika, sy ho lehilahy sy vehivavy ary zanaka tsara kokoa. Haneho fanajana lalina kokoa an’ireo rahalahintsika sy anabavintsika sy anadahintsika sy rahavavintsika ao amin’ny Fiangonana sy an’ireo izay tsy mino isika. …

Ny Fahazavan’i Kristy dia natao ho an’ny olon-drehetra tahaka ny taramasoandro. Na aiza na aiza misy ain’olombelona dia ahitana ny Fanahin’i Kristy. Manana izany avokoa ny fanahy velona rehetra. …

Raha takatsika ny maha-tena misy ny Fahazavan’i Kristy ao amin’ny olon-drehetra izay hitantsika … sy ao anatintsika, … dia hanana herim-po sy fitaomam-panahy izay mbola tsy nananantsika hatramin’izay isika. Ary tokony ho izany no ho izy! Ary izany tokoa no ho izy! Izany rehetra izany dia fatrana fahamarinan’ny filazantsara izay vitsy loatra no mahatakatra azy. (Boyd K. Packer, “The Light of Christ,” Ensign, apr. 2005, 8, 13–14)

Manorata fehezan-teny roa na telo izay maneho ny hevitrao momba ny fiantraikan’ny fahatakarana ny Fahazavan’i Kristy amin’ny fomba fijerinao ny hafa.

Ny Fahazavan’i Kristy eto amin’izao tontolo izao

Efa nanohina ny fonao ve hatrizay ny hatsarana sy ny halehiben’ity tany ity sy ny habakabaka? Inona no fahatsapana entin’ireo zavatra ireo ao anatinao?

Vakio ny Fotopampianarana sy Fanekempihavanana 88:7–10, 45–47 ary tadiavo izay azonao ianarana momba ny Fahazavan’i Kristy sy ny tany ary ny habakabaka.

• Inona no azontsika ianarana mikasika ny Tompo avy amin’ny zavatra nohariny?

• Amin’ny fomba ahoana no ahafahan’ny fahitana ny fitarihan’ Andriamanitra eto amin’izao tontolo izao manampy antsika hamantatra ny fitarihany eo amin’ny fiainantsika?

Rehefa nanana fotoana ampy nananterahana ireo asa nanerana ireo toeram-piantsonana ny mpianatra dia hevero ny hanome azy ireo fahafahana hizara ny zavatra nianarany sy tsapany. Mety ho afaka manampy ireto fanontaniana manaraka ireto.

• Inona no nianaranao momba ny Fahazavan’i Kristy ka nisy fiantraikany taminao?

• Tamin’ny fomba ahoana no nahitanao ny fitarihan’ny Fahazavan’i Kristy teo amin’ny fiainanao?

• Amin’ny fomba ahoana araka ny eritreritrao no ahafahan’ny famantarana ny Fahazavan’i Kristy eo amin’ny fiainanao hisy fiantraikany eo amin’ny fifandraisanao amin’ny Ray any An-danitra sy i Jesoa Kristy?

Azonao zaraina ny fomba nahazoanao fitarihana tamin’ny alalan’ny fahatakaranao kokoa ny Fahazavan’i Kristy.

Loharanom-pitaovana fanampiny

Inona no tsy mampitovy ny Fahazavan’i Kristy sy ny fanomezana ny Fanahy Masina?

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Ny olon-drehetra na aiza na aiza misy azy dia efa manana ny Fanahin’i Kristy [na Fahazavan’i Kristy] ao aminy, ary raha toa ka afaka mamangy na iza na iza ny Fanahin’ny Fanahy Masina, ny fanomezana ny Fanahy Masina kosa dia tsy azo raha tsy “amin’ny fankatoavana ireo lalàna sy ôrdônansin’ny Filazantsara” (Fanekem-pinoana 1:3), amin’ny fanekena ny “batisa asitrika ho famelana ny fahotana; sy ny fametrahan-tanana ho fanomezana ny Fanahy Masina” (Fanekem-pinoana 1:4). Tsy tonga ho azy tahaka ny fanatrehan’ny Fanahin’i Kristy akory izany. Ity fanomezana ity dia tsy maintsy omena amin’ny alalan’ny fametrahan-tanan’ny olona iray izay manana fahefana (jereo ny Fanekem-pinoana 1:5). (Boyd K. Packer, “The Light of Christ,” Ensign, Apr. 2005, 13)

Afaka ny hisy fiantraikany eo amin’ny fomba fizarantsika ny filazantsara amin’ny hafa amin’ny fomba ahoana ny fifanarahantsika tsara amin’ny Fahazavan’i Kristy?

Nizara izao ny Loholona D. Todd Christofferson ao amin’ny Kôlejin’ny Apôstôly Roambinifolo:

Raha mitoetra ao anatintsika ny fitiavan’i Kristy dia ho fantatry ny hafa fa tena izy ny fitiavantsika azy ireo. Raha mirehitra ao anatintsika ny fahazavan’ny Fanahy Masina dia hampirehitra ny fahazavan’i Kristy ao amin’izy ireo izany. Ny toetranao no miteraka ny fahatsapana fa tena marina ny fanasanao mba ho tonga hiaina ny fifaliana avy amin’ny fahafenoan’ny filazantsaran’i Jesoa Kristy. (D. Todd Christofferson, “Mizara ny hafatry ny Famerenana amin’ny laoniny sy ny Fitsanganana amin’ny maty,” Liahona, mey 2020, 112)

Moa ve afaka ny ho faty ny Fahazavan’i Kristy?

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Nisy tao aminao talohan’ny nahaterahanao ny Fahazavan’i Kristy (jereo ny F&F 93:23, 29–30) ary hiaraka aminao amin’ny fotoana rehetra iainanao ka tsy ho faty rehefa hivadika ho vovoka ny ampahany mety maty aminao. Eo foana izany. …

Nanazava ny Filoha Harold B. Lee hoe: “Tsy ho faty tanteraka mihitsy izany fahazavana izany … [raha niresaka momba ny Fahazavan’i Kristy izy] raha tsy manao ilay fahotana tsy ahazoana famelana isika. Mety hitsilopilopy ny tara-pahazavany ka mety ho zara raha hitantsika saingy eo izany mba ho azontsika kopahina ka ho lasa lelafo miredareda feno fahatakarana sy fahalalana. Raha tsy nisy izany dia tsy ho nahavita na inona na inona isika. Ho tsinontsinona ny asa fitoriana ataontsika.” (Boyd K. Packer, “The Light of Christ,” Ensign, Apr. 2005, 10, 14)

Hoy ny Rahavavy Sharon Eubank, Mpanolotsaina Voalohany tao amin’ny Fiadidian’ny Fikambanana Ifanampiana maneran-tany tamin’izany hoe:

Iray amin’ireo zavatra fototra ilaintsika ananana indrindra mba hitomboana ny mifandray amin’i Jesoa Kristy—ilay loharanon’ny fahazavantsika. Izy no loharanon’ny herintsika, ilay Fahazavana sy Fiainan’izao tontolo izao. Raha tsy misy fifandraisana mafy Aminy dia manomboka maty ara-panahy isika. …

Nilaza i Jesoa hoe: “Izaho no fahazavana [izay] mamirapiratra ao amin’ny haizina, ary ny haizina tsy mahazo izany.” [Fotopampianarana sy Fanekempihavanana 6:21]. Midika izany fa na hiezaka toy ny ahoana aza izany dia tsy afaka ny hamono izany fahazavana izany ny haizina. Na oviana na oviana. Afaka matoky ianareo fa ho eo hanampy anareo io fahazavana io. (Sharon Eubank, “I Kristy: Ilay hazavana izay mamiratra ao anaty haizina,” Liahona, mey 2019, 73, 75)

Sahanasa fianarana fanampiny

Asan’ny Fahazavan’i Kristy fanampiny

Raha ilaina dia afaka mampiasa ity fitaovana manaraka ity ianao mba hanoloana ny iray amin’ireo fizarana na hanampiana fizarana iray hafa amin’ilay taratasy zaraina.

Fanomezana sy fahaiza-mamorona

Iray amin’ireo asan’ny Fahazavan’i Kristy ny “mampahavitrika ny fahatakaranareo” (Fotopampianarana sy Fanekempihavanana 88:11). Mety hiseho izany amin’ny alalan’ny fahazoanao fanentanam-panahy ao anatin’izay asa mendrika ataonao.

Ny Filoha Boyd K. Packer (1924–2015) tao amin’ny Kôlejin’ny Apôstôly Roambinifolo dia nampianatra izao:

Ny Fanahin’i Kristy dia afaka manazava ny mpamorona, ny mpahay siansa, ny mpandoko, ny mpanao sary sokitra, ny mpamoron-kira, ny mpiseho an-tsehatra, ny mpahaimari-trano, ny mpanoratra mba hamoahany zavatra tsara sy azo avy amin’ny fitaomam-panahy ho fitahiana sy ho soa ho an’ny olombelona rehetra.

Ny Fanahy dia mety hibitsika amin’ny mpamboly ao amin’ny sahany sy ny mpanarato eny ambony sambony. Afaka manentana ny fanahin’ny mpampianatra ao anaty kilasy izany sy ny misiônera rehefa mampianatra ny lesony. Afaka manentana ny fanahin’ny mpianatra izay mihaino izany. Ary ny zava-dehibe indrindra dia afaka manentana ny fanahin’ny mpivady sy ny ray sy reny izany. (Boyd K. Packer, “The Light of Christ,” Ensign, Apr. 2005, 10)

• Ahoana no mety hamantaranao ny fanampiana avy amin’ny fahazavan’ny Mpamonjy?

• Inona no asa nohatsarain’ny Fahazavan’i Kristy na azon’izany hatsaraina eo amin’ny fiainanao?

Ny Fanahy Masin’ny fampanantenana

Mba hanampiana ny mpianatra hahatakatra ny dikan’ny Fotopampianarana sy Fanekempihavanana 88:3–5, dia hevero ny hanasa ny mpianatra hamaky ireo andininy ary hitady ny zavatra izay natolotry ny Tompo an’ireo Olomasina izay nivondrona mba hivavaka.

Azonao atao ny mizara ity teny nindramina manaraka ity mba hahatakarana misimisy kokoa momba ny Fanahy Masin’ny Fampanantenana.

Nanazava ny Loholona David A. Bednar ao amin’ny Kôlejin’ny Apôstôly Roambinifolo hoe:

Ny Fanahy Masin’ny Fampanantenana dia ilay hery manamafin’ny Fanahy Masina. Rehefa fehezina amin’ny alalan’ny Fanahy Masin’ny Fampanantenana dia mamehy eto an-tany sy any an-danitra ny ôrdônansy na voady na fanekempihavanana iray. (Jereo ny F&F 132:7.) Ny fandraisana io “fitombo-kasen’ny fankatoavana” avy amin’ny Fanahy Masina io dia vokatry ny fahatokiana, hitsim-po ary fiorenana amin’ny fanajana ireo fanekempihavanan’ny filazantsara “rehefa afaka elaela” (Mosesy 7:21). Io famehezana io anefa dia azo ahemotra noho ny tsy fahamarinana sy ny fandikan-dalàna.

Ny fanadiovana sy ny famehezan’ny Fanahy Masin’ny Fampanantenana dia mandrafitra ireo dingana faratampony amin’ny fahaterahana indray. (David A. Bednar, “Ye Must Be Born Again,” Liahona, May 2007, 22).