« មេរៀនទី ១១៩—គោលលទ្ធិ និងសេចក្ដីសញ្ញា ១០៧:១–២០ ៖ ‹ បព្វជិតភាពដ៏បរិសុទ្ធ › » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្តីសញ្ញា ១០៧:១–២០ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា
មេរៀនទី ១១៩ ៖ គោលលទ្ធិ និងសេចក្តីសញ្ញា ១០៦–១០៨
គោលលទ្ធិ និងសេចក្តីសញ្ញា ១០៧:១–២០
« បព្វជិតភាពដ៏បរិសុទ្ធ »
នៅរដូវផ្ការីកនៃឆ្នាំ ១៨៣៥ សមាជិកក្នុងកូរ៉ុមនៃពួកសាវកដប់ពីរនាក់ដែលទើបបង្កើតថ្មីហៀបនឹងចេញទៅបេសកកម្មដំបូងរបស់ពួកលោក ។ វិវរណៈនេះមកពីព្រះអម្ចាស់បានផ្ដល់ព័ត៌មានលម្អិតដើម្បីជួយពួកគេ និងអ្នកដទៃទៀតបំពេញការទទួលខុសត្រូវបព្វជិតភាពរបស់ពួកគេ ។ មេរៀននេះអាចជួយសិស្សយល់អំពីសារៈសំខាន់នៃទាញយកព្រះចេស្ដានៃព្រះអង្គសង្គ្រោះ និងសិទ្ធិអំណាចបព្វជិតភាពរបស់ទ្រង់ នៅពេលពួកគេបម្រើក្នុងសាសនាចក្ររបស់ទ្រង់ ។
សកម្មភាពរៀនសូត្រដែលអាចមាន
ផ្នែកបន្ថែម
ចាប់ផ្ដើមថ្នាក់ដោយអញ្ជើញសិស្សម្នាក់ឲ្យគូររូបដើមឈើមួយ ដែលមានមែកបែកសាខានៅលើក្ដារខៀន ។ អញ្ជើញសិស្សក្នុងថ្នាក់ឲ្យកំណត់ថា ផ្នែកណានៃដើមឈើជាផ្នែកបន្ថែម ( មែក និងស្លឹក ) ។ សូមអញ្ជើញសិស្សដែលបានគូររូបដើមឈើឲ្យផ្តាច់ផ្នែកមួយក្នុងចំណោមការភ្ជាប់ទាំងឡាយដោយលុបកន្លែងដែលមែកឈើភ្ជាប់ទៅនឹងដើមចេញ ។ សូមឲ្យសិស្សក្នុងថ្នាក់ពិភាក្សាសំណួរខាងក្រោមនេះ ដើម្បីរៀបចំពួកគេឲ្យយល់អំពីមូលហេតុដែលយើងត្រូវរក្សាទំនាក់ទំនងជាមួយនឹងព្រះអង្គសង្គ្រោះ និងបព្វជិតភាពរបស់ទ្រង់ ៖
-
តើមានអ្វីកើតឡើងចំពោះផ្នែកបន្ថែម នៅពេលវាភ្ជាប់មកពីដើមឈើ ? ហេតុអ្វី ?
សូមអាន យ៉ូហាន ១៥:៥ ដោយរកមើលអ្វីដែលព្រះអង្គសង្គ្រោះបានបង្រៀនដែលទាក់ទងនឹងមេរៀនវត្ថុនេះ ។
-
តើអ្នកបានរៀនអ្វីខ្លះ ?
-
ហេតុអ្វីបានជាការបន្តទំនាក់ទំនងជាមួយនឹងព្រះអង្គសង្គ្រោះចាំបាច់ក្នុងការខិតខំរបស់យើងដើម្បីបម្រើក្នុងសាសនាចក្ររបស់ទ្រង់ ?
សូមផ្តល់ពេលឲ្យសិស្សជញ្ជឹងគិតអំពីទំនាក់ទំនងរបស់ពួកគេជាមួយនឹងព្រះយេស៊ូវគ្រីស្ទ ។ សូមអញ្ជើញពួកគេឲ្យស្វែងរកការបំផុសគំនិត នៅពេលពួកគេពិចារណាអំពីរបៀបដែលទំនាក់ទំនងនេះនឹងមិនត្រឹមតែផ្ដល់ពរដល់ពួកគេផ្ទាល់ប៉ុណ្ណោះទេ ប៉ុន្តែថែមទាំងផ្តល់អំណាចដល់ពួកគេឲ្យផ្ដល់ពរដល់អ្នកដទៃតាមរយៈការហៅទាំងឡាយ និងការចាត់តាំងការងារបម្រើក្នុងសាសនាចក្រ ។
ផ្នែកបន្ថែមទៅនឹងបព្វជិតភាព
ដើម្បីជួយសិស្សយល់អំពីបរិបទនៃកណ្ឌទី ១០៧ សូមចែកចាយព័ត៌មានខាងក្រោមជាពាក្យសម្តីផ្ទាល់ខ្លួនរបស់អ្នក ៖
នៅថ្ងៃទី ២៨ ខែ មីនា ឆ្នាំ ១៨៣៥ សមាជិកក្នុងកូរ៉ុមនៃពួកសាវកដប់ពីរនាក់ដែលទើបបង្កើតថ្មីកំពុងរៀបចំដើម្បីបម្រើបេសកកម្មនៅភាគខាងកើតសហរដ្ឋអាមេរិក ។ សាវកមួយចំនួនមិនប្រាកដអំពីរបៀបបម្រើក្នុងការហៅថ្មីរបស់ពួកលោកឡើយ ។ ព្រះអម្ចាស់បានបើកសម្តែង គោលលទ្ធិ និងសេចក្តីសញ្ញា ១០៧ ដើម្បីណែនាំពួកគេអំពីបព្វជិតភាព និងលើកទឹកចិត្តពួកគេនៅក្នុងកិច្ចចាត់តាំងរបស់ពួកគេ ។
សូមអាន គោលលទ្ធិ និងសេចក្តីសញ្ញា ១០៧:១–៤ ដោយរកមើលអ្វី ដែលព្រះអម្ចាស់បានបើកសម្ដែងអំពីបព្វជិតភាព ។
-
តើអ្នកបានរៀនអ្វីខ្លះអំពីបព្វជិតភាពម៉ិលគីស្សាដែក ?
សូមប្រៀបធៀបឈ្មោះនៃបព្វជិតភាពដែលមាននៅក្នុង ខទី ៣ ជាមួយនឹងអ្វីដែលប្រធាន ឌៀថើរ អេហ្វ អុជដូហ្វ ដែលកាលនោះជាគណៈប្រធានទីមួយបានបង្រៀន ៖
ព្រះគ្រីស្ទ គឺជាប្រភពនៃសិទ្ធិអំណាចបព្វជិតភាពពិតទាំងអស់ និង អំណាចនៅលើផែនដី ។ វាគឺជាកិច្ចការរបស់ទ្រង់ ដែលយើងមានឯកសិទ្ធិក្នុងការជួយ ។ ( ឌៀថើរ អេហ្វ អុជដូហ្វ « The Love of God » Liahona ខែ វិច្ឆិកា ឆ្នាំ ២០១២ ទំព័រ ៥៩ )
-
ហេតុអ្វីបានជាអ្នកមានអារម្មណ៍ថាវាសំខាន់ក្នុងការយល់ថា អំណាចបព្វជិតភាពទាំងអស់មកពីព្រះយេស៊ូវគ្រីស្ទដោយផ្ទាល់ ?
មុនពេលអានខគម្ពីរខាងក្រោម សូមអញ្ជើញសិស្សឲ្យរំឭកការពិភាក្សារបស់ពួកគេអំពីផ្នែកបន្ថែម ។ សូមគូររូបដើមឈើផ្សេងទៀតនៅលើក្ដារខៀន ហើយដាក់ស្លាកវាថា សាសនាចក្រនៃព្រះយេស៊ូវ គ្រីស្ទ ។ បន្ទាប់មករាយបញ្ជីដូចតទៅនេះនៅលើក្ដារខៀន ៖ បព្វជិតភាពម៉ិលគីស្សាដែក បព្វជិតភាពអើរ៉ុន សមាគមសង្រ្គោះ យុវនារី សាលាថ្ងៃអាទិត្យ អង្គារបឋមសិក្សា ។
សូមអានជាមួយដៃគូនូវ គោលលទ្ធិ និងសេចក្តីសញ្ញា ១០៧:៥, ១៣–១៤ ដោយរកមើលពាក្យណាមួយនៅលើក្តារខៀនដែលអ្នកអាចប្រៀបធៀបទៅនឹងដើមរបស់ដើមឈើនោះ និងមួយណាដែលអ្នកអាចប្រៀបធៀបទៅនឹងផ្នែកបន្ថែម ។
-
ដោយផ្អែកលើអ្វីដែលអ្នកបានអាន តើអ្នកអាចប្រៀបធៀបអ្វីទៅនឹងដើម? តើអ្វីខ្លះជាផ្នែកបន្ថែម ?
នៅពេលសិស្សឆ្លើយសំណួរពីមុន សូមពិចារណាដាក់ស្លាកដើមនោះថា បព្វជិតភាពម៉ិលគីស្សាដែក និងផ្នែកបន្ថែម ( ឬមែក ) ថា បព្វជិតភាពអើរ៉ុន និងរាយបញ្ជីអង្គការទាំងឡាយនៅលើក្ដារខៀន ។
សូមអញ្ជើញសិស្សឲ្យគូសចំណាំសេចក្តីពិតនៅក្នុង ខទី ៥ ថា សិទ្ធិអំណាច និងតំណែងនៅក្នុងសាសនាចក្ររបស់ព្រះអង្គសង្រ្គោះទាំងអស់គឺជាផ្នែកបន្ថែមទៅនឹងបព្វជិតភាពម៉ិលគីស្សាដែក ។
-
តើយើងអាចរៀនអ្វីខ្លះចេញពីការប្រៀបធៀបរបស់ព្រះអម្ចាស់អំពីបព្វជិតភាពអើរ៉ុន និងអង្គការទាំងឡាយរបស់សាសនាចក្រទៅនឹង « ផ្នែកបន្ថែម » នៃបព្វជិតភាពម៉ិលគីស្សាដែករបស់ទ្រង់ ?
សូមប្រើប្រសាសន៍របស់ព្យាការីដើម្បីបញ្ជាក់គោលលទ្ធិ និងគោលការណ៍ទាំងឡាយ ៖ ខាងក្រោមនេះគឺជាឧទាហរណ៍មួយនៃការប្រើពាក្យព្យាករណ៍ដើម្បីពង្រឹងការយល់ដឹងរបស់សិស្សអំពីគោលលទ្ធិ ។ សម្រាប់ការអនុវត្តបន្ថែមអំពីគោលការណ៍នេះ សូមមើលការបំពាក់បំប៉នដែលមានចំណងជើងថា « បង្រៀនចេញពីព្រះគម្ពីរ និងប្រសាសន៍របស់ពួកព្យាការីថ្ងៃចុងក្រោយ » ដែលមាននៅក្នុង ជំនាញអភិវឌ្ឍន៍គ្រូបង្រៀន ។ សូមពិចារណាអនុវត្តជំនាញ « រៀបចំការអញ្ជើញដែលជួយសិស្សឲ្យភ្ជាប់សេចក្តីពិតដែលមានក្នុងបទគម្ពីរទៅនឹងអ្វីដែលពួកព្យាការីនៅរស់កំពុងមានប្រសាសន៍ » ។
ប្រធាន ដាល្លិន អេក អូក នៃគណៈប្រធានទីមួយ បានចែកចាយអំពីសិទ្ធិអំណាចបព្វជិតភាពនៅក្នុងការហៅទាំងឡាយរបស់សាសនាចក្រដូចតទៅនេះ ៖
នៅទីបំផុត រាល់កូនសោបព្វជិតភាពបានកាន់ដោយព្រះអម្ចាស់យេស៊ូវគ្រីស្ទ ដែលបព្វជិតភាពនេះជារបស់ផងទ្រង់ ។ ទ្រង់ជាអង្គដែលកំណត់ថា កូនសោណាមួយត្រូវប្រទានដល់មនុស្ស និងអំពីរបៀបប្រើប្រាស់កូនសោទាំងនោះ ។…
… ដោយសារព្រះគម្ពីរចែងថា « គ្រប់ទាំងសិទ្ធិអំណាច [ និង ] តំណែងផ្សេងៗទៀតនៅក្នុងសាសនាចក្រ សុទ្ធតែជាការបន្តោងបញ្ជាប់ទៅនឹងបព្វជិតភាព [ ម៉ិលគីស្សាដែក ] នេះ » ( គ&ស ១០៧:៥ ) នោះគ្រប់អ្វីទាំងអស់ដែលត្រូវបានធ្វើឡើងនៅក្នុងការដឹកនាំរបស់កូនសោបព្វជិតភាពទាំងនោះ គឺត្រូវបានធ្វើឡើងជាមួយនឹងសិទ្ធិអំណាចបព្វជិតភាព ។ ( ដាល្លិន អេក អូក « The Keys and Authority of the Priesthood » Liahona ខែ ឧសភា ឆ្នាំ ២០១៤ ទំព័រ ៥០ )
សូមរំឭកសិស្សថា ព្រះយេស៊ូវគ្រីស្ទ គឺជាប្រភពនៃអំណាចបព្វជិតភាពទាំងអស់ ( សូមមើល គោលលទ្ធិ និងសេចក្តីសញ្ញា ១០៧:៣ ) ។ សូមពិចារណាសរសេរ ព្រះចេស្ដារបស់ព្រះអង្គសង្រ្គោះ នៅជិត បព្វជិតភាពមិលគីស្សាដែក នៅលើដើមនៃដើមឈើ ។
-
តើការយល់ដឹងថា រាល់ការហៅក្នុងសាសនាចក្រត្រូវបានភ្ជាប់ទៅនឹងព្រះចេស្ដារបស់ព្រះអង្គសង្គ្រោះ ជួយអ្នកឲ្យបម្រើអ្នកដែលនៅជុំវិញអ្នកកាន់តែប្រសើរដោយរបៀបណា ?
-
តើពេលណាដែលអ្នកមានអារម្មណ៍ថា ព្រះចេស្ដារបស់ព្រះអង្គសង្គ្រោះបានជួយអ្នកក្នុងការបម្រើរបស់អ្នកក្នុងសាសនាចក្រ ?
ការដកពិសោធន៍អំណាចបព្វជិតភាព
សូមអញ្ជើញសិស្សអានវគ្គបទគម្ពីរខាងក្រោម ហើយពិភាក្សានូវសំណួរខាងក្រោមជាមួយដៃគូ ៖ អ្នកប្រហែលជាចង់បង្ហាញសំណួរសម្រាប់ជាសេចក្តីយោងដល់សិស្ស ។
សូមអាន គោលលទ្ធិ និងសេចក្តីសញ្ញា ១០៧:៨, ១៨–២០ ដោយរកមើលរបៀបដែលព្រះអង្គសង្គ្រោះប្រទានព្រះចេស្តាតាមរយៈបព្វជិតភាពរបស់ទ្រង់ទៅដល់អ្នកដែលបម្រើក្នុងសាសនាចក្រ ។
គោលលទ្ធិ និងសេចក្ដីសញ្ញា ១០៧:៨ គឺជាវគ្គបទគម្ពីរចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីពួកគេអាចងាយរកវាឃើញ ។
-
តើអ្វីជា « ការណ៍ទាំងឡាយខាងវិញ្ញាណ » ( ខទី ៨ ) តើព្រះអម្ចាស់ប្រទានពរអ្វីខ្លះដល់យើងតាមរយៈបព្វជិតភាពម៉ិលគីស្សាដែក ?
សូមជួយសិស្សយល់ថា ការចាត់ចែង « ការណ៍ទាំងឡាយខាងវិញ្ញាណ » រួមបញ្ចូលទាំងការចាត់ចែងពរជ័យ ពិធីបរិសុទ្ធ និងសេចក្ដីសញ្ញាទាំងឡាយ ។
-
តើ « ការប្រព្រឹត្តិខាងក្រៅទាំងឡាយ » នៃបព្វជិតភាពអើរ៉ុន ( ដូចជាពិធីបុណ្យជ្រមុជទឹក និងសាក្រាម៉ង់ ) ដែលសំដៅទៅនៅក្នុង ខទី ២០ ជួយភ្ជាប់អ្នកទៅនឹងព្រះយេស៊ូវគ្រីស្ទដោយរបៀបណា ?
-
តើនៅពេលណាដែលការភ្ជាប់នៃនរណាម្នាក់ជាមួយនឹងព្រះអង្គសង្គ្រោះ ពេលពួកគេបានបម្រើ បានក្លាយជាពរជ័យនៅក្នុងជីវិតរបស់អ្នក ?
សូមពិចារណាពីការចែកចាយគំរូមួយអំពីនរណាម្នាក់ដែលបានទទួលពរជ័យនៅពេលអ្នកផ្សេងទៀតបម្រើក្នុងរបៀបមួយដែលភ្ជាប់ពួកគេជាមួយនឹងព្រះចេស្ដារបស់ព្រះអង្គសង្គ្រោះ ។ គំរូមួយគឺត្រូវបានបង្ហាញនៅក្នុងវីដេអូ « The Tender Mercies of the Lord » ចាប់ពីនាទីទី ៦:៥៥ ដល់នាទីទី ៨:៥៣ ដែលមាននៅលើគេហទំព័រ ChurchofJesusChrist.org ។ នៅក្នុងសុន្ទរកថានេះ អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានចែកចាយរឿងមួយអំពីអ្នកដឹកនាំបព្វជិតភាពម្នាក់ ដែលព្រះបានដឹកនាំក្នុងការងារបម្រើដល់យុវជននៅក្នុងស្តេករបស់គាត់ ។
The Tender Mercies of the Lord
I testify that the tender mercies of the Lord are available to all of us and that the Redeemer of Israel is eager to bestow such gifts upon us.
ការអនុវត្តផ្ទាល់ខ្លួន
ស៊ីស្ទើរ បូនី អិល អូស្ការសុន អតីតប្រធានយុវនារីទូទៅបានបង្រៀនអំពីរបៀបដែលសិទ្ធិអំណាចបព្វជិតភាពអាចផ្តល់អំណាចដល់ស្ត្រីវ័យក្មេងនៅក្នុងការហៅរបស់ពួកនាង ។ សូមរកមើលអំពីរបៀបដែលសេចក្តីថ្លែងការណ៍របស់គាត់អាចអនុវត្តចំពោះយុវវ័យទាំងអស់នៅពេលពួកគេបម្រើ ។
យុវនារីក្នុងសាសនាចក្រត្រូវចាត់ទុកខ្លួនគេជាអ្នករួមចំណែកយ៉ាងសំខាន់ ក្នុងកិច្ចការនៃការសង្គ្រោះដែលដឹកនាំដោយបព្វជិតភាព ដោយមិនគ្រាន់តែធ្វើជាអ្នកឈរមើល និងអ្នកគាំទ្រឡើយ ។ អ្នកមានការហៅបម្រើ ហើយត្រូវបានញែកចេញដោយអ្នកកាន់កូនសោបព្វជិតភាព ដើម្បីកាន់តំណែងជាអ្នកដឹកនាំដែលមានអំណាច និង សិទ្ធិអំណាចនៅក្នុងកិច្ចការនេះ ។ ពេលអ្នកតម្កើងការហៅរបស់អ្នកក្នុងគណៈប្រធានថ្នាក់ ហើយត្រៀមខ្លួនខាងវិញ្ញាណ ប្រឹក្សាជាមួយគ្នា ជួយសមាជិកក្នុងថ្នាក់ ហើយបង្រៀនដំណឹងល្អដល់គ្នាទៅវិញទៅមក នោះអ្នករួមចំណែកក្នុងកិច្ចការនេះ ហើយទាំងអ្នក និងមនុស្សដែលអ្នកបម្រើនឹងមានពរ ។ ( បូនី អិល អូស្ការសុន « Rise Up in Strength, Sisters in Zion » Liahona ខែ វិច្ឆិកា ឆ្នាំ ២០១៦ ទំព័រ ១៤ )
-
តើអ្វីដែលធ្វើឲ្យអ្នកចាប់អារម្មណ៍ចេញពីសេចក្តីថ្លែងការណ៍នេះ ? ហេតុអ្វី ?
សូមអញ្ជើញសិស្សឲ្យឆ្លើយនឹងសំណួរខាងក្រោម នៅក្នុងសៀវភៅកំណត់ហេតុការសិក្សារបស់ពួកគេ ។ អ្នកអាចសុំឲ្យអ្នកស្ម័គ្រចិត្តចែកចាយចម្លើយរបស់ពួកគេ ។
-
តើអ្នកបានរៀនអ្វីខ្លះនៅសព្វថ្ងៃនេះអំពីសារៈសំខាន់នៃទាញយកព្រះចេស្តានៃព្រះអង្គសង្គ្រោះ និងសិទ្ធិអំណាចបព្វជិតភាពរបស់ទ្រង់ នៅពេលអ្នកបម្រើក្នុងសាសនាចក្ររបស់ទ្រង់ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះគឺ « បព្វជិតភាពម៉ិលគីស្សាដែក … មានអំណាច និងសិទ្ធិអំណាច … ដើម្បីចាត់ចែងការណ៍ទាំងឡាយខាងវិញ្ញាណ » ។ គំនិតសម្រាប់សកម្មភាពទន្ទេញមាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។