“121-р хичээл—Төгс эзэмших сургаалын дадлага 8: Сүнслэг мэдлэг олж авах зарчмуудыг хэрэгжүүлэх,” Сургаал ба Гэрээний семинарын багшийн гарын авлага (2025)
“Төгс эзэмших сургаалын дадлага 8,” Сургаал ба Гэрээний семинарын багшийн гарын авлага
121-р хичээл: Сургаал ба Гэрээ 106–108
Төгс эзэмших сургаалын дадлага 8
Сүнслэг мэдлэг олж авах зарчмуудыг хэрэгжүүлэх
Төгс эзэмших сургаал Есүс Христ, Түүний сайн мэдээн дээр амьдралынхаа суурийг тавихад суралцагчдад тусална. Энэ хичээл суралцагчдад төгс эзэмших сургаалын хэсгүүд дэх үнэнийг хэрэгжүүлэх, сүнслэг мэдлэг олж авах тэнгэрлэг зарчмуудыг сурах, хэрэгжүүлэхэд тусална.
Боломжит суралцах үйл ажиллагаа
Төгс эзэмших сургаалын давтлага: Хэрэгжүүлэх
Суралцагч бүрд жижиг цаас өгөхийг бод. Суралцагчдыг таньдаг хэн нэгэнд нь тулгараад байгаа хүнд хэцүү нөхцөл байдлын талаар цаасан дээр бичиж, бичсэн цаасаа саванд хийхэд урь. Хэт хувийн шинжтэй мэдээлэл болон нэр бичихгүй байхыг суралцагчдад анхааруул.
Суралцагчдыг хоёр хоёроор нь хуваарилаад, хос тус бүрээр савнаас хоёр ширхэг цаас сонгуул. Хос болсон хоёр суралцагчийг Төгс эзэмших сургаалыг судлах үндсэн материал дахь жагсаалтыг ашиглан Сургаал ба Гэрээний төгс эзэмших сургаалын хэсгүүдийг нягталж үзээд, сургаалын янз бүрийн хэсгүүдийг тэдний авсан цаасан дээр бичигдсэн нөхцөл байдлын аль нэгд хэрхэн хэрэгжүүлж болохыг ярилцахад урь. Хэрэв хүсвэл суралцагчид судрын бусад хэсгийг бас ашиглаж болно. Хангалттай хугацаа өнгөрмөгц ярилцсан хэсэг нь цаасан дээрх нөхцөл байдлын аль нэгд хэрхэн хэрэгжиж байгааг ангийнхандаа хуваалцахад хоёр суралцагчийг урь.
Хэрэв тухайн нөхцөл байдлыг төгс эзэмших сургаалын хэсгээр тодорхой шийдвэрлэж чадахгүйн улмаас суралцагчдад тусламж хэрэгтэй бол та тэднийг Сургаал ба Гэрээ 8:2–3 эсвэл 2 Нифай 32:3 зэрэг аливаа нөхцөл байдалд хэрэгжүүлж болох хэсэг рүү чиглүүлж өгч болно.
Дараа нь хичээл дээр төгс эзэмших сургаалын дадлага хийх хангалттай цаг гаргахын тулд энэ үйл ажиллагааг зөвхөн 10–15 минут үргэлжлүүлэхэд анхаар.
Сүнслэг мэдлэг олж авах зарчмуудыг сурах, хэрэгжүүлэх
Хичээлийн үлдсэн хэсэг суралцагчдад сүнслэг мэдлэг олж авах зарчмуудыг амьдралын бодит нөхцөл байдалд хэрэгжүүлэхэд нь туслахад чиглэсэн. Шаардлагатай бол та эхлээд суралцагчдыг Төгс эзэмших сургаалыг судлах үндсэн материал-ын “Сүнслэг мэдлэг олж авах” хэсгийн 5–12-р догол мөр дэх зарчмуудыг харахад урьж болно. Тус семинарын гарын авлагын хавсралт дахь “Төгс эзэмших сургаалыг давтах үйл ажиллагаа”-нд санал болгож буй давтах үйл ажиллагааг оруулсан.
Дараах зурагтай төстэй залуу эмэгтэйн зургийг харуулах талаар бодож үзээрэй. Ангийнхныг өөрийн бүс дэх Сүмийн гишүүдэд тулгуурлан тухайн эмэгтэйн амьдралын талаар дэлгэрэнгүй мэдээллийг товчхон зохиоход урь. Жишээлбэл: Суралцагчид түүний гэр бүл, сонирхол, Сүмийн талаарх бодол мэдрэмжийг нь юу гэж төсөөлж байгаагаа хуваалцаж болно.
Дараах жишээг үзүүл. Ийм нөхцөл байдалд буй залуу эмэгтэйд тусалж болох сүнслэг мэдлэг олж авах зарчмуудыг хуваалцахыг суралцагчдаас хүс.
(Өөр нэг арга бол та жишээн дээрх доогуур нь зурсан асуудлуудыг хоосон орхиж, суралцагчдыг тухайн залуу эмэгтэйд эмэгтэйчүүд, санваарын талаар байж болох асуултуудыг эсвэл санаа зовоосон асуудлуудыг самбар дээр бичих замаар уг жишээг дуусгахад урьж болно. Суралцагчдыг жишээн дээр дэлгэрэнгүй мэдээлэл нэмэхэд урих нь тэдэнд өөрсдийн амьдралд хамааралтай санаа зовоосон хувийн асуудлаа болгоомжтой илэрхийлэх боломжийг олгоно.)
Андрэа ням гарагт Залуу эмэгтэйчүүдийн ангид заахаар бэлтгэж байхдаа Сургаал ба Гэрээ 107-г судалж эхлэв. Тэрээр 8-р шүлэг-ийг уншсаныхаа дараа түр зогсоод, санваар залуу эмэгтэйчүүдэд ямар хамаатай болохыг сонирхож эхэлжээ. Тэр хэрэв Бурхан охидоосоо илүү хөвгүүддээ итгэдэг бол яах вэ гэдэгт санаа зовнин бодож эхлэв. Тэрээр Есүс Христийн Сүм дэх эмэгтэйчүүдэд хэрхэн хандаж буй талаарх санал бодлоо илэрхийлсэн видеог саяхан онлайнаар үзсэнээ санав. Нэг хүн эмэгтэйчүүд санваарын албыг хашдаггүйн улмаас урагшилдаггүй гэсэн утга санаагаар Сүмийг шүүмжилжээ.
Андрэад тус болно гэж бодож буй зарчмуудыг ярилцах хангалттай цагийг суралцагчдад гаргаж өг. Тэдний ярилцсан дээр үндэслэн та үлдсэн хичээлийн материалаас тэдний гүнзгийрүүлж ярилцаагүй зарчмуудыг илүү сайн ойлгоход туслах хэсгүүдийг сонгож болно.
Итгэлээр үйлд
Суралцагчдыг жижиг бүлгүүд болгон зохион байгуулж, дараах асуултуудыг үзүүлж, хариултаа бүлэгтэйгээ ярилцахад урих талаар бодож үзээрэй. Өрөөн дотуур тойрч алхан, тэдний ярилцлагыг сонсож, шаардлагатай бол нэмэлт ойлголт, чиглэл өг.
-
Андрэагийн асуулт, санаа зовоосон асуудал Есүс Христэд итгэх итгэлээ болон Түүний Сүмд хандах үнэнч байдлаа хүчирхэгжүүлэхэд нь хэрхэн боломж болж чадах вэ?
-
Сатан түүнийг ямар асуулт, санаа зовоосон асуудлаар нь Есүсээс холдуулж, уруу татаж болох вэ?
-
Та түүнд асуулт, санаа зовоосон асуудалдаа итгэлээр хэрхэн хандахыг зөвлөх вэ?
Утга санаа, асуултуудыг мөнхийн талаас нь шинжлэн судал
Төгс эзэмших сургаалын үндсэн материал-ын “Сүнслэг мэдлэг олж авах” хэсгийн 8-р догол мөр-ийг уншаад, Андрэад тустай үнэнийг олж мэдэхэд суралцагчдыг урь.
Дараах үйл ажиллагаа нь суралцагчдын хувьд олж мэдсэн зүйлээ хуваалцах нэг арга зам юм. Суралцагчдаас доорх эхний алхмыг гүйцэтгэхийг хүс. Тэднээс дараагийн алхмыг гүйцэтгэхийг хүсэхээс өмнө алхам тус бүрийг дуусгах хүртэл нь хүлээ.
-
Та 8-р догол мөр-өөс Андрэад тус болно гэж бодсон нэг үнэнийг мөн яагаад тус болохыг судлах тэмдэглэлдээ бич.
-
Өрөөн дотуур тойрон алхаад, таны бичсэнтэй адил үнэнийг сонгосон өөр нэг суралцагчийг олохыг хичээ. Энэ үнэн Андрэад хэрхэн тусалж чадах талаар тухайн суралцагчтай ярилц.
-
Тухайн суралцагчийн тантай хуваалцсан бодууштай чухал санааг судлах тэмдэглэлдээ нэмж бич.
-
Өрөөн дотуур дахин явж, таны бичсэнээс өөр үнэнийг сонгосон өөр нэг суралцагчийг ол. Судлах тэмдэглэлдээ тэмдэглэсэн санааг тухайн суралцагчтай хуваалц.
Өмнөх хуваалцах үйл ажиллагаа дуусмагц дараах асуултуудын зарим нь нэмэлт ойлголт авахад чиглэсэн ангийн ярилцлагыг өрнүүлэхэд тусална.
-
Анрдэа эмэгтэйчүүд яагаад санваарын алба хашдаггүй вэ гэсэн асуултад тодорхой хариулт олж чадахгүй байна гэж бодъё. Та Андрэаг санаж яваасай гэж хүсдэг Тэнгэрлэг Эцэгийн төлөвлөгөө, Түүнийг охидынхоо талаар юу гэж боддог талаар юу мэдэх вэ?
-
Сургаал ба Гэрээн (эсвэл бусад судар) дэх төгс эзэмших сургаалын аль хэсгүүд Андрэад Бурханы төлөвлөгөө, түүний талаарх мэдрэмжийг сануулахад тусалж чадах вэ?
Тэнгэрээс томилогдсон эх сурвалжуудаар дамжуулан илүү гүн гүнзгий ойлголттой болохыг эрэлхийл
Суралцагчдыг дараах асуултуудыг хамтрагчтайгаа ярилцахад урих талаар бодож үз. Дараа нь ярилцсан зүйлээ сайн дураараа ангийнхантай хуваалцах суралцагчдыг урь.
-
Андрэагийн мэдээлэл олохдоо ашигладаг эх сурвалжууд чухал, учир нь …
-
Би Андрэад … руу орж хариулт олохыг, … руу орж хариулт хайхгүй байхыг зөвлөх байсан.
Хамтрагчид Тэнгэрлэг Эцэгийн үнэнч охидоо гэх хайр, тэдэнд итгэдгийг харуулсан жишээг судруудаас болон Сүмийн түүхээс эсвэл өнөөгийн эмэгтэйчүүдийн амьдралаас хайж олоод хуваалцаж болно.
Хамтрагчид мөн Андрэад тус болох Сүмийн орчин цагийн удирдагчдын мэдэгдлүүдийг хайж олоод, хуваалцаж болно. Шаардлагатай бол та дараах эх сурвалжуудыг санал болгож болно. Үүнд:
-
“Сүнслэг эрдэнэс” (Рассэлл М.Нэлсон, 2019 оны 10-р сарын Ерөнхий чуулган, 82–84) зэрэг Ерөнхий чуулганы үгс
-
Халамжийн нийгэмлэгийн ерөнхий ерөнхийлөгчийн сургаалууд, тухайлбал “Relief Society General Presidency Addresses Four Key Questions about Women and the Priesthood” (Aubrey Eyre, Church News, May 2, 2019, thechurchnews.com)
-
Сүмийн Ерөнхий гарын авлага-аас сонгосон хэсгүүд, тухайлбал “Санваарын зарчмууд” (Ерөнхий гарын авлага: Есүс Христийн Хожмын Үеийн Гэгээнтнүүдийн Сүмд үйлчлэх нь, 3-р бүлэг, ChurchofJesusChrist.org)
Дүгнэлт
Та суралцагчдыг судлах тэмдэглэлдээ дараах асуултуудын аль нэгд залбирч байгаад хариулахад урин, хичээлээ дуусгаж болно.
-
Тэнгэрлэг Эцэг таныг асуулт, санаа зовоосон асуудлаа хэрхэн шийдвэрлээсэй гэж хүсдэг гэж та бодож байна вэ?
-
Асуулт, санаа зовоосон асуудал гарах үед сүнслэг мэдлэг олж авах зарчмуудыг дагахаар сонгох нь Тэнгэрлэг Эцэг, Есүс Христ хоёртой харилцах харилцаанд тань хэрхэн нөлөөлөх вэ?