Lesson 125: Doktrina at mga Tipan 111–114

Doktrina at mga Tipan 111

“Aking Isasaayos ang Lahat ng Bagay para sa Inyong Kabutihan”

Noong 1836, malaki ang pagkakautang ng Simbahan. Naglakbay si Propetang Joseph Smith at ang iba pang lider ng Simbahan patungo sa Salem, Massachusetts, kung saan nila inaasahang makakuha ng pera para mabayaran ang utang ng Simbahan. Noong Agosto 6, 1836, natanggap ni Joseph Smith ang paghahayag na nakatala sa Doktrina at mga Tipan 111. Sa paghahayag na ito, muling tiniyak sa kanya ng Panginoon ang hinggil sa utang ng Simbahan at kapakanan ng Sion. Ang lesson na ito ay makatutulong sa mga estudyante na mas magtiwala sa Ama sa Langit at kay Jesucristo.

Mga Posibleng Aktibidad sa Pag-aaral

Ano ang kahihinatnan ng sitwasyon?

Simulan ang klase sa pag-anyaya sa mga estudyante na isipin ang mga hamon na karaniwang kinakaharap ng mga tinedyer na maaaring magpahina sa kanilang loob o maaaring magdulot ng takot na hindi na bubuti ang sitwasyon. Pagkatapos ay maaari kang magdrowing ng scale sa pisara na tulad ng sumusunod at sabihin sa mga estudyante na gamitin ito sa pagsagot sa tanong sa ibaba.

• Sa iyong palagay, gaano nagtitiwala ang karamihan sa mga tinedyer na ang mga sitwasyon ay magiging maayos at matagumpay sa huli?

Isipin kung paano ninyo mamarkahan ang sarili ninyo sa scale na ito tungkol sa mga problema o hamon na kasalukuyan ninyong kinakaharap o maaaring kaharapin ninyo sa hinaharap.

Nakababagabag na panahon para kay Joseph at sa iba

Maaari mong ipabasa sa isang estudyante ang sumusunod na pinagmulang konteksto, o maaari mo itong ibuod gamit ang sarili mong mga salita. Bilang alternatibo, maaari mong anyayahan ang mga estudyante na magbasa mula sa kabanata 22 ng Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 ([2018], 294–95), o maaari mong i-play ang audio ng kabanatang iyon (makikita sa saints.ChurchofJesusChrist.org) mula sa time code na 16:14 hanggang 17:00. Maaari mong ipaliwanag na tulad ng pagharap natin sa mga hamon sa ating buhay na maaaring makapagpahina ng loob, hinarap ni Joseph Smith at ng iba pang lider ng Simbahan ang mga hamon noong 1836 na naging dahilan upang lubos nilang ipag-alala ang hinaharap ng Sion.

Pagsapit ng 1836, malaki ang pagkakautang ng Simbahan dahil sa mga gastusin sa pagpapatayo ng Templo ng Kirtland at pagbili ng mga lupain sa Ohio at Missouri. Kasabay nito, ang mga Banal sa Clay County, Missouri, ay napilitang lumipat. Noong mga huling araw ng Hulyo 1836, habang matinding nababagabag sa mga alalahaning ito, naglakbay sina Joseph at Hyrum Smith, Oliver Cowdery, at Sidney Rigdon nang mahigit 600 milya (965 kilometro) mula Kirtland, Ohio, patungong Salem, Massachusetts. Bagama’t hindi tiyak ang dahilan ng kanilang paglalakbay, maaaring kumilos sila ayon sa impormasyong iniisip nilang makatutulong sa kanilang mabayaran ang utang ng Simbahan. Nakasaad sa isang salaysay na sinabi ng isang miyembro ng Simbahan kay Joseph Smith ang tungkol sa isang bahay sa Salem kung saan nakatago ang malaking halaga ng pera. (Tingnan ang historical introduction sa “Revelation, 6 Agosto 1836 [D&C 111],” 35, josephsmithpapers.org.)

• Sa inyong palagay, gaano nagtitiwala si Joseph Smith na ang mga problemang kinakaharap ng Simbahan ay malulutas?

Sa pag-aaral ng mga estudyante ng Doktrina at mga Tipan 111, sabihin sa kanila na maghangad ng paghahayag tungkol sa mga paraan na matutulungan tayo ng Panginoon na madagdagan ang ating tiwala na maaayos at malulutas ang ating mga problema at hamon.

“Sa kabila ng inyong mga kahangalan”

Maaari mong isulat sa pisara ang mga sumusunod na grupo ng mga talata. Ang isang paraan para mapag-aralan ito ay basahin ang unang grupo, at pagkatapos ay sabihin sa mga estudyante na isulat ang kanilang mga sagot sa dalawang tanong sa isang piraso ng papel at pagkatapos ay ipasa ito sa isang kaklase. Talakayin ang isinulat ng mga estudyante. Ulitin ang aktibidad na ito sa natitirang dalawang grupo ng mga talata. Makatutulong ito para maibahagi ng mga estudyante ang natutuhan nila at maturuan ng kanilang mga kaklase.

Kung kinakailangan, ipaliwanag na ang kahangalan ay isang pagkakamali o kamalian sa pagpapasiya.

Magtuon sa Ama sa Langit at kay Jesucristo: Para lalo pa itong mapraktis, tingnan ang training na may pamagat na “Ituro ang tungkol sa mga titulo, tungkuling ginagampanan, at mga katangian ni Jesucristo” sa Mga Kasanayan para sa Pag-unlad ng Guro: Magtuon kay Jesucristo. Maaaring magsanay na gamitin ang kasanayang “Gumawa ng mga tanong sa pagsasaliksik upang matulungan ang mga estudyante na matukoy ang mga tungkulin, titulo, simbolo, katangian, at [pagkatao] ni Jesucristo.” Matapos rebyuhin ang training, maaari kang mag-adjust o magdagdag sa mga tanong mo sa mga estudyante tungkol sa mga sumusunod na scripture passage.

Basahin ang mga sumusunod na grupo ng mga talata, at para sa bawat grupo, sagutin ang dalawang tanong na kasunod nito:

• Doktrina at mga Tipan 111:1–4

• Doktrina at mga Tipan 111:5–8

• Doktrina at mga Tipan 111:9–11

• Ano ang mga tanong mo tungkol sa mga talatang ito?

• Anong mga katotohanan ang nalaman mo tungkol sa Diyos mula sa mga talatang ito?

Sa kanilang mga sagot sa pangalawang tanong, maaaring banggitin ng mga estudyante ang ilang katotohanan o katangian ng Diyos. Maaaring kabilang dito ang mga katotohanang tulad ng sumusunod: Ang Diyos ay maawain sa ating mga kahangalan (tingnan sa talata 1); Nangungusap ang Diyos sa atin sa pamamagitan ng kapayapaan at kapangyarihan ng Kanyang Espiritu (tingnan sa talata 8); Isasaayos ng Diyos ang lahat ng bagay para sa ating kabutihan (tingnan sa talata 11).

• Paano kaya nakatulong kay Joseph Smith ang mga katotohanang natukoy mo para makayanan niya ang mga hamon at alalahanin?

• Paano makatutulong sa iyo ang mga ito?

Isasaayos ng Diyos ang lahat ng bagay para sa ating kabutihan

Sundin ang mga pahiwatig ng Espiritu tungkol sa kung aling mga katotohanan ang makatutulong sa mga estudyante na pag-aralan nang mas malalim. Ang natitirang bahagi ng lesson na ito ay magtutuon sa katotohanan na isasaayos ng Diyos ang lahat ng bagay para sa ating kabutihan. Maaari mong isulat sa pisara ang katotohanang ito at sabihin sa mga estudyante na markahan ang mga salita sa talata 11 na nagtuturo nito.

Kung kinakailangan, tulungan ang mga estudyante na maunawaan na ang ibig sabihin ng salitang isasaayos sa talatang ito ay “aayusin.” Maaari mong banggitin ang scale sa pisara at sabihin sa mga estudyante na pagnilayan kung gaano sila nagtitiwala na isasaayos ng Diyos ang “lahat ng bagay” para sa kanilang kabutihan.

Maaari mong talakayin sa mga estudyante na kung gusto nilang mag-ibayo ang kanilang paniniwala sa katotohanang ito, maaari silang manalangin na tulungan sila na mapalalim ang kanilang pang-unawa at paniniwala sa katangiang ito ng Diyos.

• Ayon sa talata 11, ano ang hinihingi sa atin upang maisaayos ng Diyos ang lahat ng bagay para sa ating ikabubuti?

Kung kinakailangan, ipaliwanag na ang pagiging “matalino gaya ng mga ahas subalit walang kasalanan” (talata 11) ay tumutukoy sa ideya na dapat lakipan ng mga disipulo ng Tagapagligtas ang karunungan ng kadalisayan at kalinisan.

Para sa sumusunod na aktibidad, maaari mong hatiin ang klase sa grupo na may tigtatatlong estudyante. Sabihin sa bawat estudyante sa grupo na magbasa ng ibang scripture passage sa ibaba. Matapos basahin at talakayin ng mga estudyante ang mga scripture passage, maaari mo silang anyayahan na pumunta sa pisara at isulat ang nalaman nila. Maaari nila itong isulat sa paligid ng katotohanan sa pisara, na may arrow na nakaturo sa katotohanan.

Pag-aralan ang mga sumusunod na scripture passage, at alamin kung ano ang kailangan nating gawin para isaayos ng Diyos ang lahat ng bagay para sa ating kabutihan. Maaari mong iugnay ang mga sumusunod na talata sa Doktrina at mga Tipan 111:11.

• Roma 8:28

• Doktrina at mga Tipan 90:24

• Doktrina at mga Tipan 100:15

Ipabasa sa mga estudyante ang sumusunod na pahayag ni Pangulong Gordon B. Hinckley at pagkatapos ay idagdag ang natutuhan nila sa listahan sa pisara:

Pinatotohanan ni Pangulong Gordon B. Hinckley (1910–2008):

Magiging maayos ang lahat. Huwag mag-alala. Sinasabi ko iyan sa sarili ko tuwing umaga. Magiging maayos ang lahat. Kung gagawin ninyo ang lahat ng makakaya ninyo, magiging maayos ang lahat. Magtiwala sa Diyos, at sumulong nang may pananampalataya at tiwala sa hinaharap. Hindi tayo pababayaan ng Panginoon. Hindi Niya tayo pababayaan. (“Latter-day Counsel: Excerpts from Addresses of President Gordon B. Hinckley,” Ensign, Okt. 2000, 73)

Sabihin sa mga estudyante na ituro sa isa’t isa ang isinulat nila sa pisara. Maaari nilang ipaliwanag kung bakit makabuluhan ito sa kanila. Ang ilan sa mga sumusunod na tanong ay maaaring magpaganda sa talakayan:

• Ano ang nalaman mo na magpapalakas sa iyong tiwala na isasaayos ng Diyos ang lahat ng bagay para iyong kabutihan?

• Paano nakatutulong sa iyo ang pagkakaroon ng walang-hanggang pananaw na magtiwala na isasaayos ng Diyos ang lahat ng bagay para sa iyong kabutihan?

• Kailan o paano inayos ng Diyos ang mga bagay para sa kabutihan ng iyong buhay o ng buhay ng isang taong kilala mo?

Ang sumusunod na aktibidad ay nagbibigay sa mga estudyante ng oras na pag-isipan kung ano ang natutuhan at nadama nila ngayon na maaaring makaimpluwensya sa kanilang buhay at sa ugnayan nila sa Ama sa Langit. Matapos magsulat ang mga estudyante sa kanilang journal, maaari mong anyayahan ang ilan na magbahagi sa klase.

Kumpletuhin ang isa o mahigit pa sa mga sumusunod na pangungusap sa iyong study journal:

• Ang pagtitiwala ko na isasaayos ng Diyos ang lahat ng bagay para sa aking kabutihan ay napalakas ngayon ng …
  Ang natutuhan ko ngayon ay makatutulong sa problemang kinakaharap kosa pamamagitan ng …
  Kung magkakaroon ako ng problema sa hinaharap, gusto kong maalala …

Karagdagang Resources

Doktrina at mga Tipan 111:1. Ano ang mga kahangalan nila?

Ang kahangalan ay isang pagkakamali o kamalian sa pagpapasiya. Maaaring isang “kahangalan” para kay Joseph Smith at sa kanyang mga kasama na maghanap ng pera at umasa sa sarili nilang pagsisikap na lutasin ang mga problema sa pananalapi ng Simbahan. Gayunman, sa nalalabing bahagi ng paghahayag na nakatala sa Doktrina at mga Tipan 111 maawaing ipinangako ng Panginoon na patuloy silang tutulungan at papatnubayan.

Ang pagtanggap ng Panginoon sa mga pagkakamali ng mga lider na ito ng Simbahan ay tumutulong na linawin ang pagkakaiba ng paggawa ng mga pagkakamali at paggawa ng kasalanan. Kinilala ni Pangulong Dallin H. Oaks ng Unang Panguluhan na lahat tayo ay nagkakamali at itinuro niya na matutulungan tayo ng ating mga pagkakamali na umunlad:

Ang pagkakamali ay hindi maiiwasan sa proseso ng paglago sa mortalidad. Kapag iniwasan ang lahat ng posibilidad na magkamali, maiiwasan ang lahat ng posibilidad na umunlad. Sa talinghaga ng mga talento, isinalaysay ng Tagapagligtas ang tungkol sa isang alipin na natatakot na mawalan ng pera dahil sa maling pamumuhunan kaya’t itinago niya ang kanyang talento at walang ginawa para palaguin ito. Kinondena ng kanyang panginoon ang aliping iyon (tingnan sa Mat. 25:24–30).

Kung handa tayong maitama sa mga kamalian natin … ang mga pagkakamaling nagawa nang hindi sinasadya ay maaaring pagmulan ng paglago at pag-unlad. (Dallin H. Oaks, “Sins and Mistakes,” Ensign, Okt. 1996, 67)

Doktrina at mga Tipan 111:8. Paano ko matutukoy ang impluwensya at kapangyarihan ng Espiritu?

Ibinigay ni Pangulong Henry B. Eyring ng Unang Panguluhan ang mga sumusunod na kabatiran na makatutulong sa mga estudyante na mas maunawaan ang impluwensya at kapangyarihan ng Espiritu sa kanilang buhay:

Nadama na ninyo ang tahimik na pagpapatibay sa inyong puso at isipan na totoo ang isang bagay. At nalaman ninyo na inspirasyon iyon mula sa Diyos. Para sa ilan sa inyo, maaaring dumating ito nang turuan kayo ng mga missionary bago kayo binyagan. Maaaring nagmula ito sa isang mensahe o lesson sa simbahan. Maaaring dumating na ito ngayong gabi nang sinabi o kinanta ang isang bagay na totoo, tulad ng nadama ko nang marinig ko ang pagkanta, tulad ng ilan sa inyo. Ang Espiritu Santo ang Espiritu ng Katotohanan. Nadarama ninyo ang kapayapaan, pag-asa, at galak kapag nangungusap Siya sa inyong puso at isipan na totoo ang isang bagay. Halos palagi ko ring nadarama ang kaliwanagan. Anumang negatibong damdamin ko ay napapawi. At lumalago ang hangaring gawin ang tama. (Henry B. Eyring, “Gifts of the Spirit for Hard Times” [Brigham Young University devotional, Set. 10, 2006], 2, speeches.byu.edu)

Doktrina at mga Tipan 111:11. Ano ang ibig sabihin ng maging “matalino gaya ng mga ahas subalit walang kasalanan”?

Nang isugo ng Tagapagligtas ang Kanyang mga disipulo upang ipangaral ang ebanghelyo, sinabi Niya sa kanila na maging “matalino kayong gaya ng mga ahas at maamong gaya ng mga kalapati” (Mateo 10:16). Sa makabagong panahon, gayundin ang payong ibinigay ng Tagapagligtas sa Kanyang mga disipulo, nagsasabing, “Kayo ay maging matalino gaya ng mga ahas subalit walang kasalanan” (D&T 111:11). Parehong itinuturo ng dalawang salaysay na dapat lakipan ng mga disipulo ng Tagapagligtas ang karunungan ng kadalisayan at kalinisan. BInigyang-diin sa Pagsasalin ni Joseph Smith ang kahalagahan ng pagiging matalinong tagapaglingkod ng Panginoon: “Maging matalino kayo na mga tagapaglingkod, at maamong gaya ng mga kalapati” (Joseph Smith Translation, Matthew 10:14; ihambing sa Mateo 10:16). (New Testament Student Manual [2018], 36–37)

Doktrina at mga Tipan 111:11. Ano pa ang magagawa ko upang “[isaayos] ng Diyos ang lahat ng bagay para sa [aking] kabutihan”?

Pinatototohanan ni Pangulong Dieter F. Uchtdorf, na noon ay kabilang sa Unang Panguluhan:

Ang mga sumusunod sa tawag na iyon at hinahanap ang Diyos, nagdarasal, naniniwala, at lumalakad sa landas ng pagkadisipulo—kahit natitisod kung minsan sa pagtahak sa landas na iyon—ay tatanggap ng nakapapanatag na katiyakan na “lahat ng bagay ay magkakalakip na gagawa para sa [kanilang] ikabubuti” (Doktrina at mga Tipan 90:24). (Dieter F. Uchtdorf, “Pananabik na Makauwi,” Liahona, Nob. 2017, 22)

Ipinahayag ni Elder Gerrit W. Gong ng Korum ng Labindalawang Apostol:

Ang lahat ng bagay ay maaaring para sa ating ikabubuti kapag tayo ay “pinabanal kay Cristo … na siyang nasa tipan ng Ama.” [Moroni 10:33]. Dumarating ang bawat mabuting bagay at ipinangakong pagpapala sa mga nananatiling tapat hanggang sa huli. Ang “maligayang kalagayan ng mga yaong sumusunod sa mga kautusan ng Diyos” ay ang “[pagpalain] sa lahat ng bagay, kapwa temporal at espirituwal” at “manahanang kasama ng Diyos sa kalagayan ng walang katapusang kaligayahan” [Mosias 2:41]. (Gerrit W. Gong, “Pagiging Kabilang sa Tipan,” Liahona, Nob. 2019, 81)

Mga Karagdagang Aktibidad sa Pag-aaral

Tunay na isasaayos ng Diyos “ang lahat ng bagay” para sa ating kabutihan

Upang matulungan ang mga estudyante na madama nang mas malalim ang katotohanan na isasaayos ng Diyos ang lahat ng bagay para sa kanilang kabutihan, maaari mong ipanood ang “Life Is Incredibly Unfair—in Our Favor” (13:33). Bago ipanood ang video, itanong sa mga estudyante kung sa palagay nila ay talagang “lahat ng bagay” ang ibig sabihin ni Jesucristo sa Doktrina at mga Tipan 111:11. Habang pinanonood ng mga estudyante ang video, sabihin sa kanila na alamin kung paano sasagutin ng asawa sa video na ito ang tanong na iyon.

Doktrina at mga Tipan 111:2. “Maraming tao sa lunsod na ito, ang aking titipunin”

Kung makikinabang ang mga estudyante mula sa karagdagang konteksto ng kasaysayan, maaari mong iugnay ang salaysay tungkol kay Elder Erastus Snow at kung paano nakatulong sa kanya ang paghahayag na nakatala sa Doktrina at mga Tipan 111 na maisakatuparan ang kanyang misyon.

Noong 1841, limang taon matapos ibigay ang bahagi 111 , si Erastus Snow ay tinawag na magpunta sa Salem, Massachusetts, upang tuparin ang paghahayag na tipunin ang mga tao ng Salem sa kaharian ng Panginoon. Noong una, hindi tinatanggap ng mga tao ang mensahe ng ebanghelyo. Umasa si Elder Snow sa pangako ng Panginoon na Siya ay mayroong “maraming tao sa lunsod na ito” (Doktrina at mga Tipan 111:2) at patuloy na nangaral tungkol sa ipinanumbalik na Simbahan ng Tagapagligtas. Kalaunan, naniwala ang mga tao sa ipinanumbalik na ebanghelyo at sila ay bininyagan. Pagsapit ng Pebrero 1843, may 110 miyembro ang branch ng Salem. Ang mga convert mula sa Salem ay naglakbay kalaunan patungo sa Nauvoo at patungo sa Rocky Mountains. (tingnan sa Elizabeth Kuehn, “More Treasures Than One,” sa Revelations in Context [2016], 229.) Maraming inapo ng mga convert na ito sa Salem ang mga miyembro pa rin ng Simbahan ngayon (tingnan sa Kim R. Burningham, “The ‘Insignificant’ Scripture” Ensign, Ago. 1990, 47–48).

Matapos ilahad ang salaysay tungkol kay Elder Erastus Snow, maaari ninyong talakayin ang mga aral na natutuhan mula sa kanyang karanasan. Maaaring makatulong ang mga sumusunod na tanong:

• Sa inyong palagay, paano matutupad ang mga pangako ng Panginoon sa panahon nito?

• Sa inyong palagay, bakit mahahalagang katangiang dapat taglayin ang tiyaga at sigasig (tingnan sa Doktrina at mga Tipan 4:6) kapag nagbabahagi ng ebanghelyo ng Tagapagligtas?

Doktrina at mga Tipan 111:11. Isasaayos ng Diyos ang lahat ng bagay para sa ating kabutihan

Kung makatutulong, maaari mong anyayahan ang mga estudyante na mag-isip ng iba pang halimbawa mula sa mga banal na kasulatan o sa kasaysayan ng Simbahan kung saan isinaayos o inayos ng Diyos ang isang negatibong bagay para sa kabutihan. Maaaring kabilang sa ilang halimbawa sina Joseph Smith at Martin Harris na naiwala ang 116 na pahina ng manuskrito ng Aklat ni Mormon (Doktrina at mga Tipan 3:1, 7–10); si Jose, na anak ni Jacob, na ipinagbili sa Egipto (Genesis 37, 39–45); si Abis na tinitipon ang mga tao ni Haring Lamoni (Alma 19:28–29); at sina Pedro at Juan na ibinilanggo (Mga Gawa 5:17–20).