Lesson 127: Doktrina at mga Tipan 111–115

I-assess ang Iyong Pagkatuto 8

Doktrina at mga Tipan 95–115

Ang pagninilay at pag-assess sa ating espirituwal na pagkatuto ay makatutulong sa atin na mas mapalapit sa Tagapagligtas. Ang lesson na ito ay makatutulong sa mga estudyante na maalala at masuri kung paano nakatulong sa kanila ang kanilang mga karanasan sa pag-aaral ng Doktrina at mga Tipan na espirituwal na umunlad.

Mga Posibleng Aktibidad sa Pag-aaral

I-assess ang inyong espirituwal na pag-unlad

Magdala sa klase ng ilang bato na may iba’t ibang laki, at sabihin sa mga estudyante na gumawa ng trail marker o mga tanda sa daan. Sabihin sa mga estudyante na pagpatung-patungin ang ilang bato at alamin kung ano ang makakalikha ng matatag na pundasyon. (Bilang alternatibo, magpakita ng larawan ng trail marker.) Maaari mong banggitin na noon at ngayon, ang mga trail marker na ito ay nagbibigay ng kaligtasan at direksyon sa mga naglalakbay. Maaari mong itanong ang mga sumusunod tungkol sa aktibidad.

• Ano ang ilang iba’t ibang trail marker na inilaan ng Ama sa Langit at ni Jesucristo upang gabayan tayo sa landas ng tipan pabalik sa Kanilang piling?

• Paano maaaring maging simbolo ng Tagapagligtas ang isang trail marker?

Tulungan ang mga estudyante na maunawaan na ang mga scripture passage na napag-aralan nila, mga lesson na natutuhan nila, at mga turo na ginamit nila sa kanilang pag-aaral ng Doktrina at mga Tipan ay maaaring ihalintulad sa mga bato na pinagpatung-patong, na nagbibigay ng kaligtasan at direksyon habang naglalakbay sila sa landas ng tipan. Sabihin sa mga estudyante na balikan ang mga isinulat nila at ang mga banal na kasulatan na pinag-aralan nitong mga nakaraang linggo (Doktrina at mga Tipan 95–115), at pagnilayan ang mga katotohanang natutuhan nila.

Habang pinagninilayan ninyo ang inyong karanasan sa pag-aaral ng Doktrina at mga Tipan, mapanalanging anyayahan ang Espiritu na tulungan kayong matukoy ang pagsulong na ginagawa ninyo palapit sa Ama sa Langit at sa inyong Tagapagligtas na si Jesucristo.

Ipakita ang mga sumusunod na tanong upang matulungan ang mga estudyante na pagnilayan ang kanilang espirituwal na pag-unlad. Anyayahan ang mga estudyante na sagutin sa kanilang study journal ang dalawa o mas marami pa sa mga tanong.

• Ano ang ilan sa mga espirituwal na katotohanang natutuhan o ipinamuhay mo na nakatulong sa iyo na mas mapalapit sa Ama sa Langit at kay Jesucristo?

• Paano ka nabigyan ng mga katotohanang ito ng direksyon at kaligtasan sa landas ng tipan?

• Anong mga scripture passage mula sa Doktrina at mga Tipan ang naging makabuluhan sa iyo? Bakit?

Kapag nagkaroon na ng sapat na oras ang mga estudyante na isulat ang kanilang mga sagot, anyayahan ang ilang boluntaryo na magbahagi ng mga napagnilayan nila na hindi masyadong personal. Maaari nilang ibahagi ang mga scripture passage na makabuluhan sa kanila at bakit. Habang nagbabahagi ang mga estudyante, maaari silang magdagdag ng mga bato sa trail marker.

Isaalang-alang ang mga pahiwatig ng Espiritu at ang mga pangangailangan ng iyong mga estudyante habang pinipili mo kung alin sa mga sumusunod na aktibidad ang gagamitin.

Ipaliwanag kung paano pinagpapala ng priesthood at mga susi ng priesthood ng Tagapagligtas ang Kanyang Simbahan

Tulungan ang mga estudyante na i-assess ang natutuhan nila kamakailan tungkol sa priesthood at mga susi ng priesthood ng Tagapagligtas. Sa kanilang pag-aaral ng Lesson 119: Doktrina at mga Tipan 107:1–20, maaaring natutuhan ng mga estudyante na ang mga naglilingkod sa Simbahan ay maaaring humugot ng kapangyarihan sa Tagapagligtas sa pamamagitan ng Kanyang priesthood. Sa kanilang pag-aaral ng Doktrina at mga Tipan 110, Bahagi 2, maaaring natutuhan ng mga estudyante ang tungkol sa pagpapanumbalik ng mga susi ng priesthood kina Joseph Smith at Oliver Cowdery sa Templo ng Kirtland.

Maaari mong ibahagi ang sumusunod na sitwasyon. Sa pagsulat ng kanilang mga sagot, maaaring balikan ng mga estudyante ang mga isinulat nila sa kanilang journal o ang mga banal na kasulatan na minarkahan nila.

Sina Becky at Michael ay magkapatid na sumapi kamakailan sa Simbahan. Sila lamang ang mga miyembro sa kanilang pamilya. Pareho silang may malakas na patotoo tungkol sa Aklat ni Mormon, kay Propetang Joseph Smith, at sa ipinanumbalik na Simbahan ni Jesucristo, ngunit alam nilang marami pa silang dapat matutuhan. Sa simbahan, sa isang araw ng Linggo, narinig nila ang isang tao na nagsasalita tungkol sa kung paano pinagpapala ng priesthood at ng mga susi ng priesthood ng Tagapagligtas ang bawat miyembro ng Simbahan. Hindi talaga nila alam kung ano ang ibig sabihin niyon.

• Ano ang magagamit ninyo mula sa inyong pag-aaral kamakailan sa Doktrina at mga Tipan upang matulungan sina Becky at Michael na mas maunawaan kung paano tayo pinagpapala ng kapangyarihan ng priesthood at ng mga susi ng priesthood ng Tagapagligtas bilang mga miyembro ng Simbahan?

Kung kailangan ng mga estudyante ng tulong, maaari mong idrowing ulit sa pisara ang puno mula sa Lesson 119: Doktrina at mga Tipan 107:1–20 at isulat sa mga sanga ang iba’t ibang organisasyon sa Simbahan. Maaaring ibahagi ng mga estudyante na ang kalalakihan at kababaihan na tumatanggap ng mga tungkulin sa Simbahan ay humuhugot ng kapangyarihan mula sa Tagapagligtas upang mapaglingkuran ang iba sa Kanyang Simbahan. Bilang bahagi ng kanilang mga paliwanag, maaaring gamitin ng mga estudyante ang mga talata mula sa bahagi 107 para ilarawan na ang lahat ng awtoridad at katungkulan sa Simbahan ng Tagapagligtas ay nakaakibat sa Melchizedek Priesthood. Kabilang sa ilang talata na magagamit nila ang mga talata 5, 8, 14, 18–20, o ang iba pang mga talatang pipiliin nila upang ituro ito.

Bilang alternatibo, maaari kang magpakita ng mga larawan ng mga pagdalaw nina Moises, Elias, at Elijah sa Templo ng Kirtland, na inilarawan sa Doktrina at mga Tipan 110. Sabihin sa mga estudyante na ibahagi kung sino ang mga sugong ito at ano ang mga susing ipinanumbalik nila. Hikayatin sila na gamitin ang mga talata mula sa bahagi 110 sa kanilang mga paliwanag.

Mas magtiwala na ang mga Apostol ay mga natatanging saksi ni Jesucristo

Sa isang lesson kamakailan, maaaring natutuhan ng mga estudyante na ang Unang Panguluhan at Korum ng Labindalawang Apostol ay mga natatanging saksi ng pangalan ni Cristo sa buong mundo (tingnan sa Doktrina at mga Tipan 107:23). Bigyan ang mga estudyante ng pagkakataong pagnilayan ang kanilang patotoo na ang mga propeta at apostol ay mga natatanging saksi ni Cristo sa ating panahon at inatasan sila ni Jesucristo na tulungan tayong mas mapalapit sa Kanya.

Ang isang paraan para magawa ito ay magpakita ng pinakahuling larawan ng Unang Panguluhan at ng Korum ng Labindalawang Apostol at itanong ang sumusunod. Maaari mong bigyan ang mga estudyante ng sapat na oras upang pag-isipan at isulat sa kanilang study journal ang mga sagot nila. Pagkalipas ng ilang sandali, pahintulutan ang ilang handang estudyante na magbahagi.

• Ano ang nagawa ninyo kamakailan na nakaapekto sa inyong patotoo na ang mga propeta at apostol ay talagang mga natatanging saksi ni Cristo?

  Kung sa palagay mo ay maaaring gumamit ang mga estudyante ng karagdagang aktibidad upang mag-ibayo ang tiwala nila na ang mga propeta at apostol ay mga natatanging saksi ni Cristo, maaari mo silang anyayahang gawin ang isa sa mga sumusunod na aktibidad:

• Pumili ng isang mensahe na ibinigay kamakailan ng Unang Panguluhan o Korum ng Labindalawang Apostol na naging makabuluhan sa iyo. Pagnilayan kung paano nakaimpluwensya ang mensaheng iyon sa nadarama mo tungkol kay Jesucristo.

• Sumagot sa isang paanyaya sa social media ng isa sa mga miyembro ng Unang Panguluhan o ng Korum ng Labindalawang Apostol. Ibahagi ang paanyaya sa iyong social media page.

• Sa social media, sumagot sa isang post o magpadala ng direktang mensahe sa isang miyembro ng Unang Panguluhan o ng Korum ng Labindalawang Apostol na nagpapahayag ng iyong pasasalamat para sa isang mensahe kamakailan na nakatulong sa iyo na mas mapalapit sa Tagapagligtas na si Jesucristo.

Pagkatapos ng sapat na oras, maaaring ibahagi ng ilang estudyante sa klase ang isinulat o nai-post nila.

Maghandang sambahin ang Panginoon sa templo

Sa mga nakaraang lesson, nagkaroon ang mga estudyante ng mga pagkakataong maghandang sambahin ang Panginoon sa Kanyang templo. Narito ang ilang buod ng mga huling lesson na nakatulong dito:

• Sa bahagi 95, maaaring tinalakay ng mga estudyante ang pagsasakripisyo upang sumamba sa templo.

• Sa bahagi 97, maaaring nirebyu nila kung paano tayo tinutulungan ng mga tanong sa temple recommend na maging dalisay ang puso.

• Sa bahagi 109, natuklasan ng mga estudyante ang mga pagpapalang nauugnay sa pagsamba sa templo at napag-isipan kung paano sila mahihikayat ng mga pagpapalang ito sa kanilang buhay.

• Sa bahagi 110, maaaring tinalakay ng mga estudyante kung paano makatutulong ang kanilang pagkamarapat na mapalapit sa Panginoon sa Kanyang templo (tingnan sa Doktrina at mga Tipan 110:5–10).

Sabihin sa mga estudyante na rebyuhin ang mga partikular na mithiin o plano na ginawa nila upang matulungan silang maghandang sambahin Siya sa Kanyang templo.

• Anong mga pagsisikap ang ginawa ninyo kamakailan upang maging mas handang sambahin ang Panginoon sa templo?

Kung makikinabang ang mga estudyante sa mas partikular na mga tanong na nagpa-follow-up sa mga plano o mithiin na maaaring isinasagawa nila, maaari mong ipakita ang sumusunod na teksto para sa mga estudyante at sabihin sa kanila na sagutin ang mga ito sa kanilang study journal.

Maghangad ng personal na paghahayag na gagabay sa inyo habang sinasagot ninyo ang isa o mahigit pa sa mga sumusunod na tanong sa inyong study journal:

• Anong mga sakripisyo ang ginawa o handa mong gawin upang ipakita na ang pagsamba sa Panginoon sa templo ay isang prayoridad sa buhay mo?

• Anong mga pagpapala ang nakita mo sa iyong buhay nang pagnilayan mo ang iyong mga sagot sa mga tanong sa temple recommend bilang paghahanda sa pagpasok sa bahay ng Panginoon?

• Ano ang ginawa mo para magsikap na maging karapat-dapat na sambahin ang Panginoon sa templo?

Isipin kung paano ka pinagpala dahil sa iyong mga pagsisikap. Ano ang patuloy mong gagawin o sisimulang gawin upang mas maging handang sumamba sa Kanyang templo?

Hikayatin ang mga estudyante na kumilos ayon sa anumang pagbabagong nadama nila na dapat nilang gawin habang sinusuri nila ang kanilang pag-unlad. Maaari mong purihin ang mga pagsisikap ng mga estudyante na gawing priyoridad sa kanilang buhay ang Ama sa Langit, ang ating Tagapagligtas, at ang ebanghelyo. Maaari mong tapusin ang klase sa pamamagitan ng pagbabahagi ng halimbawa ng mga pagpapalang natanggap mo mula sa iyong mga paghahanda na sambahin ang Tagapagligtas sa Kanyang templo.