Lesson 126: Doktrina at mga Tipan 111–114

Doktrina at mga Tipan 112

“Ang Panginoon Mong Diyos ay Aakayin Ka sa Kamay”

Ang kababaang-loob ni Jesucristo ay nakatulong sa Kanya na maunawaan at maisakatuparan ang kalooban ng Kanyang Ama sa Kanyang buong mortal na ministeryo (tingnan sa Juan 5:30). Sa Doktrina at mga Tipan 112, itinuro ng Tagapagligtas kay Thomas B. Marsh na makatutulong sa atin ang kababaang-loob na makatanggap ng patnubay mula sa ating Ama sa Langit. Ang layunin ng lesson na ito ay tulungan ang mga estudyante na mapagpakumbabang humingi ng patnubay mula sa Ama sa Langit.

Mga Posibleng Aktibidad sa Pag-aaral

Paghahangad ng banal na patnubay

Upang maihanda ang mga estudyante na matutuhan ang tungkol sa pagtanggap ng patnubay mula sa Ama sa Langit, maaari mong ipakita ang mga sumusunod na tanong at sabihin sa mga estudyante na pag-isipan ang kanilang mga sagot. Maaari mo ring sabihin sa mga estudyante na pumili ng isa o dalawa sa mga tanong na sasagutin sa kanilang study journal.

• Anong patnubay ang kailangan mo mula sa Ama sa Langit sa iyong buhay?

• Ano ang nakatutulong sa iyo na tumanggap ng patnubay mula sa Ama sa Langit?

• Ano kung minsan ang humahadlang sa pagtanggap ng patnubay mula sa Ama sa Langit?

Habang tinatalakay natin ang isa sa mga turo ng Tagapagligtas tungkol sa pagtanggap ng banal na patnubay, bigyang-pansin ang itinuturo sa inyo ng Espiritu tungkol sa kung paano ninyo mapagbubuti ang kakayahan ninyong sumunod sa Kanya.

Ang kababaang-loob ay humahantong sa banal na patnubay

Upang matulungan ang mga estudyante na mas maunawaan ang tungkol sa konteksto ng Doktrina at mga Tipan 112 at kung bakit humihingi ng patnubay mula sa Panginoon si Thomas B. Marsh, maaari mong ipakita ang sumusunod na impormasyon at ipabasa ito sa isang estudyante:

Noong 1837, naglingkod si Thomas B. Marsh bilang Pangulo ng Korum ng Labindalawang Apostol. Nagkaroon ng diwa ng apostasiya at paghahanap ng kamalian sa ilan sa mga Banal sa Kirtland, kabilang ang ilang miyembro ng Korum ng Labindalawang Apostol. Noong Enero ng 1837, nag-organisa ang mga lider ng Simbahan ng bangko na tinatawag na Kirtland Safety Society. Sa pagharap sa iba’t ibang hamon, kabilang na ang krisis sa pananalapi sa buong bansa, ang bangko sa huli ay nalugi, na nagpatindi sa pagsalungat laban kay Propetang Joseph Smith. Nag-alala tungkol sa mga pagtuligsang ito, nilisan ni Thomas B. Marsh ang kanyang tahanan sa Missouri at naglakbay patungong Kirtland, na determinadong makipag-usap sa Labindalawa at magpakita ng suporta kay Joseph. Gayunpaman, pagdating niya, nalaman ni Pangulong Marsh na nagpadala si Joseph ng dalawang miyembro ng Labindalawa sa England upang magmisyon. Bilang pangulo ng korum, ikinalungkot ni Pangulong Marsh na hindi muna sumangguni sa kanya si Joseph. Gayunpaman, binisita ni Thomas B. Marsh si Joseph Smith upang humingi ng patnubay mula sa Panginoon.

Magpasiya kung aling paraan sa pagbabasa ang pinakamakatutulong sa iyong mga estudyante na pag-aralan ang mga sumusunod na talata. Maaari mong hatiin ang mga talata sa bawat estudyante o sa mga grupo ng mga estudyante. O maaaring magboluntaryo ang maraming estudyante na basahin nang malakas ang mga grupo ng mga talata habang sumasabay sa pagbabasa ang mga kaklase.

Basahin ang Doktrina at mga Tipan 112:2–3, 10, 12–15, 20–22, 28, 33–34, at alamin ang payo na ibinigay ng Panginoon kay Thomas B. Marsh na makatutulong sa kanya na tumanggap ng patnubay mula sa Panginoon.

• Anong mga makabuluhang salita at parirala ang nahanap ninyo?

• Ano ang ilang alituntunin na matutukoy natin mula sa mga talatang ito?

Maaaring makatukoy ang mga estudyante ng maraming alituntunin mula sa kanilang pag-aaral. Sundin ang mga pahiwatig mula sa Espiritu Santo na magtanong pa at palalimin ang pag-unawa ng mga estudyante sa mga alituntuning natukoy nila. Ang natitirang bahagi ng lesson na ito ay magtutuon sa katotohanang kung tayo ay mapagpakumbaba, aakayin tayo ng Ama sa Langit at sasagutin Niya ang ating mga panalangin (tingnan sa talata 10).

Upang matulungan ang mga estudyante na mapalalim ang kanilang pag-unawa sa alituntuning ito, maaari mong igrupo ang mga estudyante upang talakayin ang mga sumusunod na tanong. Pagkatapos ay maaari nilang basahin ang pahayag ni Elder Soares at talakayin ang sumusunod na tanong:

• Paano ninyo bibigyang-kahulugan ang kababaang-loob?

• Sa inyong palagay, paano nakatutulong ang kababaang-loob sa pagtanggap ng mga sagot sa ating mga panalangin?

Itinuro ni Elder Ulisses Soares ng Korum ng Labindalawang Apostol:

Naniniwala ako, mga kapatid, na ang mga mapagpakumbaba lamang ang nakakikilala at nakauunawa sa mga sagot ng Panginoon sa kanilang mga panalangin. Ang mga mapagpakumbaba ay madaling turuan, nakikilala nila na dumedepende sila sa Diyos at hinahangad na mapailalim sa Kanyang kagustuhan. Ang mga mapagpakumbaba ay maamo at may kakayahang impluwensyahan ang iba na gawin din ang gayon. Ang pangako ng Diyos sa mga mapagpakumbaba ay aakayin Niya sila sa kamay. Naniniwala ako na maiiwasan natin ang mga pagliko at kalungkutan sa ating buhay kapag lumakad tayong kasabay ng Panginoon. (Ulisses Soares, “Maging Maamo at may Mapagpakumbabang Puso,” Liahona, Nob. 2013, 10)

• Ano pa ang nakita ninyo na nakatutulong na mas palalimin ang inyong pag-unawa sa talata 10?

Maaari kang magbigay ng maikling pagkakataon para sa ilang grupo na ibahagi ang natutuhan nila mula sa kanilang talakayan.

Mga paraan na maaari tayong maging mapagpakumbaba sa ating mga panalangin

Mag-isip ng mga paraan para matulungan ang mga estudyante na maunawaan kung paano natin maipapakita ang kababaang-loob sa ating mga panalangin. Maaari ding ilista ng mga estudyante sa pisara ang kanilang mga ideya. Maaari din nilang pag-aralan at talakayin ang ilan sa mga sumusunod na ideya. Bigyan ang mga estudyante ng pagkakataong ibahagi kung ano ang itinuturo sa kanila ng Espiritu.

Ang sumusunod ay ilang paraan na maipapakita natin ang kababaang-loob kapag nagdarasal tayo:

• Maaari tayong magpasalamat (tingnan ang halimbawa ng Tagapagligtas sa 3 Nephi 19:19–20, 27–28).

• Maaari nating kilalanin ang ating kahinaan at ang kapangyarihan ng Ama sa Langit (tingnan ang halimbawa ng kapatid ni Jared sa Eter 3:1–6).

• Maaari tayong maghangad ng pagwawasto (panoorin ang video na “Paano ko Nagagawang Pakinggan Siya: Elder Neil L. Andersen” [2:51], na makikita sa ChurchofJesusChrist.org; tingnan din sa Mga Hebreo 12:5–9).

Maaari mo ring sabihin sa mga estudyante na pagnilayan ang mga pagkakataon na sinagot ng Ama sa Langit ang kanilang mga panalangin na bigyan sila ng gabay at patnubay na kailangan nila. Maaaring ibahagi ng ilang handang estudyante ang kanilang mga karanasan.

Ang sumusunod ay naglalayong bigyan ang mga estudyante ng pagkakataong gumawa ng plano na mapagpakumbabang humingi ng patnubay mula sa Ama sa Langit:

Pakinggan ang mga pahiwatig ng Espiritu Santo habang sinasagot ninyo ang mga sumusunod na tanong sa inyong study journal:

• Anong gabay o patnubay ang hinahangad mo mula sa Ama sa Langit?

• Ano ang magagawa mo upang mapagpakumbabang hingin ang Kanyang patnubay?

Sabihin sa mga estudyante na kumilos ayon sa mga impresyong natanggap nila. Maaari kang magbahagi ng isang personal na karanasan tungkol sa pagtanggap ng patnubay ng Ama sa Langit sa iyong buhay.

Karagdagang Resources

Saan ko malalaman pa ang tungkol sa konteksto sa kasaysayan ng Doktrina at mga Tipan 112?

Ang sumusunod na resources ay nagbibigay ng karagdagang konteksto sa kasaysayan para sa bahagi 112:

• “Bawat Patibong,” Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 (2018), 296–311

• “Mananaig ang Katotohanan,” Mga Banal, 1:312–25

• Kay Darowski, “The Faith and Fall of Thomas B. Marsh,” sa Revelations in Context (2016), 54

• Mga Paksa sa Kasaysayan ng Simbahan, “Ang Kirtland Safety Society,” ChurchofJesusChrist.org/study/history/topics

Ano ang pagpapakumbaba?

Ang pagpapakumbaba ay pagkilala nang may pasasalamat na umaasa tayo sa Panginoon—na nauunawaang palagi nating kailangan ang Kanyang tulong. Ang pagpapakumbaba ay pagkilala na ang ating mga talento at kakayahan ay mga kaloob ng Diyos. Hindi ito tanda ng kahinaan, kakimian, o takot; pahiwatig ito na alam natin kung saan nagmumula ang ating tunay na lakas. (Mga Paksa at Mga Tanong, “Pagpapakumbaba,” topics.ChurchofJesusChrist.org)

Paano naging halimbawa ng kababaang-loob o pagpapakumbaba ang Tagapagligtas?

Itinuro ni Pangulong Dieter F. Uchtdorf, na dating miyembro ng Unang Panguluhan:

Sa lahat ng bagay, si Jesucristo ang ating perpektong halimbawa. Samantalang tinatangka ni Lucifer na baguhin ang plano ng kaligtasan ng Ama at kamtin ang karangalan sa kanyang sarili, sinabi ng Tagapagligtas, “Ama, masusunod ang inyong kalooban, at ang kaluwalhatian ay mapasainyo magpasawalang hanggan” [Moises 4:1–2]. Sa kabila ng Kanyang kahanga-hangang mga kakayahan at nagawa, ang Tagapagligtas ay laging maamo at mapagpakumbaba. (Dieter F. Uchtdorf, “Kapalaluan at ang Priesthood,” Liahona, Nob. 2010, 57)

Ipinaliwanag ni Elder Quentin L. Cook ng Korum ng Labindalawang Apostol:

Ang halimbawa ng kababaang-loob ng Tagapagligtas at sakripisyo para sa sangkatauhan ang pinakamatinding pangyayari sa kasaysayan. Ang Tagapagligtas, kahit bilang miyembro ng Panguluhang Diyos, ay handa noong pumarito sa lupa bilang munting sanggol at simulan ang pamumuhay na may kasamang pagtuturo at pagpapagaling sa Kanyang mga kapatid at matinding pagdanas ng hindi maipaliwanag na pasakit sa Getsemani at sa krus upang gawing ganap ang Kanyang Pagbabayad-sala. Ang gawaing ito ng pag-ibig at pagpapakumbaba sa panig ni Cristo ay kilala bilang Kanyang pagpapakababa. Ginawa Niya ito para sa bawat lalaki at babaing nilikha at lilikhain ng Diyos. (Quentin L. Cook, “Ang Araw-Araw na Walang-Hanggan,” Liahona, Nob. 2017, 52)

Mga Karagdagang Aktibidad sa Pag-aaral

“Kung Hindi Nila Patitigasin ang Kanilang mga Puso”

Upang matulungan ang mga estudyante na maunawaan ang nangyari sa Kirtland, Ohio, noong 1836 at 1837, maaari mong ipanood ang video na “If They Harden Not Their Hearts” mula sa time code na 0:00 hanggang 6:12.

Matapos panoorin ang video, maaaring basahin ng mga estudyante ang Doktrina at mga Tipan 112:2–3, 10, 12–15, 20–22, 28, 33–34, at alamin ang mga turo na nakatulong sana sa mga Banal na maiwasan ang kapalaluan at matanggap ang patnubay mula sa Panginoon. Pagkatapos ay maaaring ibahagi ng mga estudyante kung paano makatutulong sa kanila ang mga alituntuning ito para maiwasan ang kapalaluan ngayon.

Pagkatapos ay maaari mong ipanood ang natitirang bahagi ng video, mula sa time code na 6:12 hanggang 11:21, para malaman kung paano nahirapan si Thomas B. Marsh na sundin ang payo ng Panginoon. Ipinapakita rin dito ang kanyang pakikipagkasundo sa Simbahan pagkalipas ng ilang taon.

Mga Himno

Maaaring kantahin o pakinggan ang isang himno na makatutulong sa mga estudyante na makita ang mga pagpapalang nagmumula sa mapagpakumbabang paghahangad ng patnubay ng Panginoon. Kabilang sa mga halimbawa ang “Magpakumbaba Ka” (Mga Himno, blg. 75), “Aba ang Puso” (blg. 100), at “Aba Naming Kahilingan” (blg. 102). Pagkatapos ay maaaring ibahagi ng mga estudyante ang mga titik na naging makabuluhan sa kanila.

Doktrina at mga Tipan 112:10. “Ang Panginoon mong Diyos ay aakayin ka sa kamay”

Upang matulungan ang mga estudyante na maunawaan ang paglalarawan ng Ama sa Langit na inaakay tayo sa kamay sa pamamagitan ng pagsagot sa ating mga panalangin, magpakita ng larawan ng isang bata na hawak ang kamay ng kanyang magulang. Talakayin ang mga dahilan kung bakit kaya humahawak ang isang bata sa kamay ng kanyang magulang (para sa kapanatagan, kaligtasan, katatagan, patnubay, at iba pa). Tulungan ang mga estudyante na maunawaan na tulad ng paghawak ng isang bata sa kamay ng isang magulang, makakaasa tayo sa Ama sa Langit sa pamamagitan ng panalangin. Maaari mong talakayin kung paano makapagbibigay ang Ama sa Langit ng mga pagpapalang katulad ng natatanggap ng isang bata mula sa paghawak sa kamay ng kanyang magulang.

Mga alituntunin ng panalangin

Upang matulungan ang mga estudyante na maunawaan kung ano ang maaaring mangyari kapag mapagpakumbaba silang nanalangin, maaari mong basahin ang sumusunod na pahayag ni President Steven J. Lund, Young Men General President:

Sa tuwing uusal tayo ng panalangin, inaanyayahan natin ang Ama sa Langit na mamagitan sa ating buhay. Bawat panalangin ay panalangin para sa himala. Maging ang mga panalangin ng pasasalamat ay umaasang magpalalim ng ating ugnayan sa langit. (Steven J. Lund, “Seminary, Institute, at Iba pang mga Bagay na Makatutulong” [mensaheng ibinigay sa Seminaries and Institutes annual training broadcast, Ene. 27, 2023])

Ang pagbabalik-aral sa mga sumusunod na alituntunin ng panalangin ay makatutulong sa mga estudyante na maunawaan ang mga paraan na makapagdarasal sila nang may higit na pagpapakumbaba:

Gawing makabuluhan ang ating mga panalangin.

Gumamit ng pananalitang nagpapakita ng pagmamahal, paggalang, pagpipitagan, at pagiging malapit.

Palaging magpasalamat sa Ama sa Langit.

Hangarin ang patnubay at lakas ng Ama sa Langit sa lahat ng ginagawa natin.

Alalahanin ang mga pangangailangan ng iba sa ating panalangin.

Hangarin ang patnubay ng Espiritu Santo upang malaman natin kung ano ang isasama sa ating mga panalangin.

Kapag may hiniling tayo sa ating panalangin, dapat gawin natin ang lahat ng makakaya natin upang makatulong na maipagkaloob ito. (hinango mula sa Mga Paksa at Mga Tanong, “Panalangin,” topics.ChurchofJesusChrist.org)

Maaari mong hatiin ang mga alituntunin sa mga grupo ng mga estudyante. Pagkatapos ay maaari silang mag-isip ng ilang halimbawa ng kung paano nila magagamit ang mga alituntuning ito sa kanilang mga panalangin.

Mga unang missionary sa England

Ang Doktrina at mga Tipan 112 ay inihayag sa araw na sinimulang ipangaral nina Elder Heber C. Kimball, Orson Hyde, at John Goodson ang ebanghelyo ni Jesucristo sa England. Maaari mong ipanood ang video na “Ang Araw-araw na Walang-Hanggan” mula sa time code na 5:51 hanggang 6:39 upang matulungan ang mga estudyante na matutuhan ang tungkol sa kababaang-loob na kinailangang taglayin ng mga missionary na ito upang ipangaral ang ebanghelyo sa unang pagkakataon sa labas ng North America.

Pagkatapos ay maaari mong ipakita ang larawan ng River Ribble sa ibaba at ibahagi ang sumusunod na impormasyon sa mga estudyante: Isang linggo matapos magsimulang mangaral ang mga missionary, bininyagan ang mga unang convert sa River Ribble. Dalawa sa mga convert na ito ang sabik na sabik na mabinyagan, kung kaya, nagpaunahan sila sa pagpunta sa ilog. Nanalo si George D. Watt sa takbuhan at naging unang bininyagang convert sa England. (Tingnan sa Mga Banal, 1:320–22; Global Histories, England, “George D. Watt and the Journal of Discourses,” history.ChurchofJesusChrist.org.)