Lesson 135: Doktrina at mga Tipan 124

Doktrina at mga Tipan 124

“Ang Bahay na Ito ay Itayo … Upang Aking Maihayag ang Aking mga Ordenansa”

Nang itayo ng mga Banal ang lunsod ng Nauvoo, iniutos sa kanila ng Panginoon na magtayo ng templo (tingnan sa Doktrina at mga Tipan 124:26–27). Sa Doktrina at mga Tipan 124, naghayag ang Panginoon ng iba pang detalye tungkol sa layunin ng mga templo bilang isang lugar kung saan matatanggap ang mga sagradong ordenansa. Ang lesson na ito ay makatutulong sa mga estudyante na maunawaan ang kahalagahan ng templo ng Panginoon at ang mga ordenansang isinasagawa roon, kabilang ang endowment.

Mga Posibleng Aktibidad sa Pag-aaral

Ang layunin ng mga templo

Paalala: Ang lesson na ito ay nakatuon sa mga tipan at ordenansa sa templo. Ang mga ito ay sagrado at dapat talakayin nang may pagpipitagan (tingnan sa Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 27.0, ChurchofJesusChrist.org).

Upang matulungan ang mga estudyante na isipin ang nalalaman nila sa kasalukuyan tungkol sa mga templo, anyayahan silang pagnilayan o isulat ang maaari nilang sabihin sa kanilang kaibigan sa sitwasyon sa ibaba.

Isipin na kunwari ay nakakita ang isang kaibigan ng larawan ng isang templo sa social media o may nadaanan siyang templo at tapat na nagtanong sa iyo ng, “Ano ang templo? Ano ang ginagawa ng mga tao sa templo?”

Maaari mong ipakita ang sumusunod na larawan:

Gamit ang mga kulay ng ilaw trapiko (pula = walang kumpiyansa; dilaw = medyo may kumpiyansa; berde = talagang may kumpiyansa), pumili ng kulay na pinakanagpapahayag ng iyong sagot sa mga sumusunod na tanong:

• Gaano kalaki ang kumpiyansa mo na maipapaliwanag mo nang malinaw sa iyong kaibigan ang templo at ang mga ordenansa nito?

• Gaano kalaki ang kumpiyansa mo na maipapaliwanag mo ang mga ito sa paraang makatutulong sa kaibigan mo na malaman kung paano ipinapakita ng Panginoon ang Kanyang pagmamahal sa pamamagitan ng templo?

Upang matulungan kang malaman ang sagot ng mga estudyante, maaari mo silang anyayahang sagutin ang mga tanong na gaya ng “Ilan sa inyo ang sumagot ng berde? dilaw? pula?” at “Bakit ninyo pinili ang kulay na iyon?”

Hikayatin ang mga estudyante na manalangin na makaunawa sa pamamagitan ng Espiritu Santo na makatutulong sa kanila na sagutin ang mga tanong na tulad ng mga nasa itaas, gayundin ang sarili nilang mga tanong tungkol sa templo at mga ordenansa sa templo.

Ang Nauvoo Temple

Nang manirahan sa Nauvoo, Illinois ang mga Banal, iniutos sa kanila ng Panginoon na magtayo ng templo (tingnan sa Doktrina at mga Tipan 124:31) gaya ng dati Niyang ginawa sa Kirtland, Ohio; Jackson County, Missouri; at Far West, Missouri (tingnan sa 88:119; 97:10; 115:7–8). Noong panahong iniutos ng Panginoon na itayo ang Nauvoo Temple, naihayag na Niya kay Propetang Joseph Smith ang doktrina ng pagbibinyag para sa mga patay (tingnan sa Mga Paksa at Mga Tanong, “Pagbibinyag para sa mga Patay,” topics.ChurchofJesusChrist.org).

Maaari mong isulat sa pisara ang “Ang aking mga tao ay tuwinang inuutusang magtayo [ng mga templo] sa aking banal na pangalan” (Doktrina at mga Tipan 124:39). Maaaring markahan ng mga estudyante ang pariralang ito sa kanilang mga banal na kasulatan.

Anyayahan ang mga estudyante na pag-aralan ang mga sumusunod na talata at maaari nilang markahan ang mga sagot na mahahanap nila. Pagkatapos ay maaari nilang talakayin sa maliliit na grupo ang natutuhan nila.

Tulungan ang mga mag-aaral na talakayin sa iba ang mga paniniwala ng ebanghelyo: Para sa higit pang pagsasanay dito, tingnan ang training na may pamagat na “Mga paanyaya para sa mga estudyante na ibahagi sa isa’t isa ang natutuhan nila,” na makikita sa Mga Kasanayan para sa Pag-unlad ng Guro: Maghikayat ng Masigasig na Pag-aaral.

Basahin ang Doktrina at mga Tipan 124:25–30, 36–41, 55, at alamin kung bakit iniuutos ng Panginoon sa Kanyang mga tao na magtayo ng mga templo.

• Ano ang nalaman ninyo?

• Alin sa mga layunin o pangako ng Panginoon sa pagtatayo ng mga templo ang pinakamakabuluhan sa inyo? Bakit?

Maaaring makakita ang mga estudyante ng iba’t ibang katotohanan, tulad ng iniuutos sa atin ng Panginoon na magtayo ng mga templo “para sa Kataas-taasan upang manahanan doon” (talata 27); para “ibalik muli yaong nawala sa inyo” (talata 28); bilang isang lugar “para sa kublihan” (talata 36); at “upang akin kayong pagpalain, at putungan kayo ng karangalan, ng kawalang-kamatayan, at buhay na walang hanggan” (talata 55). Kung hindi ito babanggitin ng mga estudyante, anyayahan silang balikan ang talata 40 at idagdag ang katotohanan na iniuutos sa atin ng Panginoon na magtayo ng mga templo upang matanggap natin ang mga sagradong ordenansa. Ang huling katotohanang ito ang pagtutuunan sa lesson na ito.

Kung kailangan ng mga estudyante ng tulong sa pagtukoy ng mga katotohanan sa mga talatang ito, maaari mong isulat sa pisara ang mga numero ng talata na binanggit sa itaas sa isang column at ang mga pariralang sinipi mula sa mga ito sa ibang pagkakasunud-sunod sa isa pang column. Pagkatapos ay maaaring itugma ng mga estudyante ang parirala sa kaukulang talata.

Tinulungan tayo ni Elder David A. Bednar ng Korum ng Labindalawang Apostol na maunawaan ang layunin ng Panginoon sa pagbibigay sa atin ng mga ordenansa sa templo.

Hindi tayo nagtatayo ng mga banal na templo o pumapasok dito para lamang magkaroon tayo o ang ating pamilya ng di-malilimutang karanasan. Sa halip, ang mga tipang natatanggap at ang mga ordenansang isinasagawa sa mga templo ay mahalaga sa pagpapabanal ng ating mga puso at sa kadakilaan ng mga anak ng Diyos sa huli. (David A. Bednar, “Ang Bahay na Ito ay Itayo sa Aking Pangalan,” Liahona, Mayo 2020, 85)

• Ano ang natutuhan ninyo mula kay Elder Bednar?

• Ano na ang natutuhan ninyo na makatutulong sa inyo na maipaliwanag ang mga templo sa isang kaibigan?

Sa Kirtland Temple, nagpakita ang Tagapagligtas at ang iba pang sugo ng langit (tingnan sa Doktrina at mga Tipan 110). Ang Kirtland Temple ay isa ring lugar ng inspirasyon at pagkatuto. Sa Nauvoo, inihayag ng Panginoon ang mga karagdagang ordenansa na isinasagawa sa mga templo ngayon. Sa mga templo ngayon, nagsasagawa ang matatapat na miyembro ng Simbahan ng mga pagbibinyag para sa mga patay, tumatanggap ng mga endowment (kabilang ang paghuhugas at pagpapahid ng langis), at nakikibahagi sa mga pagbubuklod sa templo.

• Alin sa mga ordenansang ito ang binanggit ng Panginoon sa mga talatang pinag-aralan ninyo? (Tingnan sa Doktrina at mga Tipan 124:29–30, 37, 39.)

Ang mga lesson sa hinaharap ay magtutuon sa pagbibinyag para sa mga patay at pagbubuklod sa templo. Ang natitirang bahagi ng lesson na ito ay magtutuon sa endowment.

Ang endowment

Ang isa sa mga ordenansa na inihayag ng Panginoon sa mga Banal sa Nauvoo ay ang endowment.

Bago pag-aralan ang endowment, maaari mong bigyan ang mga estudyante ng ilang minuto para pag-isipan kung ano ang mga tanong nila tungkol sa endowment at kung bakit mahalaga para sa kanila na matanggap ito. Ipaliwanag na habang pinag-aaralan nila ang endowment, matutulungan sila ng Espiritu Santo na mahanap ang mga sagot sa mga tanong nila.

Upang matulungan ang mga estudyante na mas maunawaan ang endowment at kung bakit nais ng Panginoon na pagpalain sila sa pamamagitan ng ordenansang ito sa templo, maaari mong gamitin ang isa sa mga sumusunod na ideya:

1. Bigyan ng oras ang mga estudyante para pag-aralan ang resources na pinili nila mula sa sumusunod na listahan.

2. Ibigay sa mga estudyante ang kasamang handout upang mapag-aralan.

3. Hayaang mag-aral ang mga estudyante nang mag-isa, nang may kapartner, o sa maliliit na grupo.

Pag-aralan ang ilan sa sumusunod na resources, at alamin kung paano tayo pinagpapala ng Panginoon kapag tinanggap natin ang ating endowment sa templo.

• Gabay sa mga Banal na Kasulatan, “Endowment,” scriptures.ChurchofJesusChrist.org

• “About the Temple Endowment” at iba pang resources na makikita sa temples.ChurchofJesusChrist.org

• Mga Paksa at Mga Tanong, “Endowment,” topics.ChurchofJesusChrist.org

• “What Is a Temple Endowment?” (1:59), na makikita sa ChurchofJesusChrist.org

Ang Endowment

Noong sumapi ka sa Simbahan, nakatanggap ka ng dalawang ordenansa: binyag at kumpirmasyon. Gayundin, ang endowment sa templo ay natatanggap sa dalawang bahagi.

Sa unang bahagi, tatanggap ka ng pribado at indibiduwal na paunang ordenansa na tinatawag na mga “initiatory“ ordinance. Ang mga ordenansang ito ay may kalakip na mga espesyal na pagpapala tungkol sa iyong banal na pamana at potensyal. Bilang bahagi ng mga ordenansang ito, magiging awtorisado ka ring magsuot ng sagradong temple garment.

Sa ikalawang bahagi, tatanggapin mo ang nalalabi sa iyong endowment kasama ang isang grupo. Ginaganap ito sa isang instruction room kasama ang iba pang dumadalo sa templo. Inilalahad ang mga pangyayaring bahagi ng plano ng kaligtasan. Kabilang dito ang Paglikha, ang Pagkahulog nina Adan at Eva, ang Pagbabayad-sala ni Jesucristo, ang Apostasiya, at ang Pagpapanumbalik. Marami ka ring malalaman tungkol sa paraan kung paano makababalik ang lahat ng tao sa kinaroroonan ng Panginoon. Ang ilang bahagi ng endowment ay inilalahad sa pamamagitan ng video at ang ilan ay inilalahad ng mga temple officiator.

Habang isinasagawa ang endowment ordinance, aanyayahan kang gumawa ng mga partikular na tipan sa Diyos. Kabilang sa mga tipang ito ang sumusunod:

• Batas ng pagsunod, kung saan kabilang ang pagsisikap na sundin ang mga kautusan ng Diyos

• Batas ng Sakripisyo, kung saan kabilang ang paggawa ng lahat ng ating makakaya upang masuportahan ang gawain ng Panginoon at pagsisisi nang may bagbag na puso at nagsisising espiritu

• Batas ng ebanghelyo, na siyang mas mataas na batas na itinuro ni Jesus noong narito Siya sa lupa

• Batas ng kalinisang-puri, kung saan kabilang ang pagkakaroon lamang ng seksuwal na relasyon sa tao na kung kanino tayo ikinasal nang legal at naaayon sa batas ng Diyos

• Batas ng paglalaan, kung saan kabilang ang paglalaan ng ating oras, mga talento, at lahat ng naipagkaloob sa atin ng Panginoon sa pagtatayo ng Simbahan ni Jesucristo sa lupa

Kapag tinutupad mo ang iyong mga tipan, mas napapalapit ka sa Tagapagligtas at nagiging mas makapangyarihan ang iyong kaugnayan sa Kanya. Nangangako ang Diyos na ang mga tumutupad sa kanilang mga tipan ay tatanggap ng mga pagpapala sa buhay na ito at ng pagkakataong makabalik sa piling Niya magpakailanman.

Sa pagtatapos ng endowment, simbolikong bumabalik ang mga na-endow sa kinaroroonan ng Panginoon sa pagpasok nila sa silid-selestiyal. Doon ay maaari kang gumugol ng oras upang magnilay-nilay, manalangin, magbasa ng mga banal na kasulatan, o pabulong na ibahagi ang iyong mga naiisip sa pamilya at mga kaibigan. Ito ay isang lugar ng kapayapaan, kung saan maaari ka ring makasumpong ng kapanatagan at banal na patnubay. (Tingnan sa “About the Temple Endowment,” temples.ChurchofJesusChrist.org.)

Bigyan ng pagkakataon ang mga estudyante na ipaliwanag kung ano ang endowment at kung paano sila mapagpapala ng Panginoon kapag natanggap nila ito. Para magawa ito, maaari mong isulat sa pisara ang “Ano ang endowment sa templo?” at “Bakit mahalaga ang endowment sa templo?” Anyayahan ang iba’t ibang estudyante na sumagot. Maaari ding ibahagi ng mga estudyante ang mga tanong nila tungkol sa endowment, at maaaring ibahagi ng iba pang estudyante ang napag-aralan nila na maaaring makatulong.

Ang templo at ako

Maaari mong ipakita ulit ang sitwasyon tungkol sa kaibigan mula sa simula ng lesson. Anyayahan ang mga estudyante na pagnilayan kung ano ang itinuro sa kanila ng Espiritu Santo ngayon o idagdag ang kanilang mga ideya sa isinulat nila sa simula ng klase. Anyayahan ang mga estudyante na ibahagi kung paano nila sasagutin ang kanilang kaibigan sa paraang makatutulong sa kanya na madama ang pagmamahal ng Panginoon.

Karagdagang Resources

Saan ko malalaman pa ang tungkol sa templo at mga ordenansa sa templo?

• “Why Latter-day Saints Build Temples,” temples.ChurchofJesusChrist.org

• “About Proxy Baptism and Confirmation,” temples.ChurchofJesusChrist.org

• Mga Paksa sa Kasaysayan ng Simbahan, “Binyag para sa Patay,” ChurchofJesusChrist.org/study/history/topics

• Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 27.2, ChurchofJesusChrist.org

• “About Temple Sealings,” temples.ChurchofJesusChrist.org

• “Inside Temples,” temples.ChurchofJesusChrist.org

Paano ako naiimpluwensyahan ng mga ordenansa sa templo?

Ipinaliwanag ni Elder Gerrit W. Gong ng Korum ng Labindalawang Apostol:

Ang Pagbabayad-sala ni Cristo—ay dumarating kapag sumampalataya tayo at naghahatid ng mga bunga tungo sa pagsisisi. Kung paano sa mortalidad ay gayun din sa imortalidad. Ang mga ordenansa sa templo mismo ay hindi nagpapabago sa atin o sa mga nasa daigdig ng mga espiritu. Ngunit ang mga banal na ordenansang ito ay naghahatid ng nakadadalisay na mga pakikipagtipan sa Panginoon, na magdudulot ng pagkakasundo sa Kanya at sa bawat isa. (Gerrit W. Gong, “Maligaya Magpakailanman,” Liahona, Nob. 2022, 84)

Bakit kailangan kong tumanggap ng mga ordenansa sa templo?

Itinuro ni Elder Robert D. Hales (1932–2017) ng Korum ng Labindalawang Apostol:

Ang pangunahing layunin ng templo ay maglaan ng mga kailangang ordenansa para sa ating kadakilaan sa kahariang selestiyal. Ang mga ordenansa sa templo ay ginagabayan tayo patungo sa ating Tagapagligtas at pinagpapala tayo sa pamamagitan ng Pagbabayad-sala ni Jesucristo. (Robert D. Hales, “Mga Pagpapala ng Templo,” Liahona, Okt. 2009, 48)

Itinuturo sa “Ang Mag-anak: Isang Pagpapahayag sa Mundo” ang sumusunod:

Ang mga sagradong ordenansa at tipan na makukuha sa mga banal na templo ang nagbibigay ng pagkakataon sa mga tao upang makabalik sa kinaroroonan ng Diyos at upang ang mga mag-anak ay magkasama-sama sa walang hanggan. (“Ang Mag-Anak: Isang Pagpapahayag sa Mundo,” ChurchofJesusChrist.org)

Mga Karagdagang Aktibidad sa Pag-aaral

Mga opsiyon sa video

Ang mga sumusunod na video ay makatutulong sa mga estudyante na makita ang loob ng templo at kung saan isinasagawa ang endowment.

• “Welcome to the Washington D.C. Temple”

  • Itinatampok sa time code na 0:00 hanggang 1:05 ang pagsagot ni Pangulong Russell M. Nelson sa kung bakit nagtatayo ang Simbahan ng mga templo.

  • Tinatalakay sa time code na 5:00 hanggang 7:00 ang endowment.

• “Washington D.C. Temple 360 Video Tour”

  • Ang time code na 3:49 hanggang 4:59 ay tumutulong sa mga estudyante na makita ang mga silid para sa initiatory, silid para sa endowment, at silid-selestiyal.

• “Two Apostles Lead a Virtual Tour of the Rome Italy Temple”

  • Ipinapakita sa time code na 4:59 hanggang 7:35 ang loob ng endowment room sa Rome Italy Temple.

• “Sacred Temple Clothing”

  • Ang video na ito ay nagbibigay ng kapaki-pakinabang na impormasyon para sa mga estudyante na maaaring may mga tanong tungkol sa templo clothing at temple garment.

Isang pagpapahayag ng aking ebanghelyo

Sa Doktrina at mga Tipan 124:2, iniutos ng Panginoon sa mga Banal na “gumawa ng kapita-pitagang pagpapahayag ng aking ebanghelyo.” Para sa kapaki-pakinabang na impormasyon tungkol sa paghahayag na ito, tingnan ang Doctrine and Covenants Student Manual (2018) ng institute, 707–10.

Maaari mong itanong sa mga estudyante kung anong mga pagpapahayag o proklamasyon ng Simbahan ang pamilyar sa kanila at kung bakit naglalabas ng mga pagpapahayag o proklamasyon ang Simbahan.

Maaaring basahin ng mga estudyante ang Doktrina at mga Tipan 124:3–7 at sagutin ang mga tanong na tulad ng mga sumusunod:

• Para kanino ang pagpapahayag o proklamasyon?

• Paano isinulat ang pagpapahayag o proklamasyon?

Pagkatapos ay maaari mong bigyan ang mga estudyante ng ilang minuto para isulat ang kanilang “Personal na Pagpapahayag sa Mundo.” Maaari nilang isama ang ilan sa mga bagay na pinaniniwalaan nila na maibabahagi nila sa iba sa mundo. Maaari mo ring anyayahan ang mga estudyante na isipin kung anong impormasyon tungkol sa templo ang maaari nilang isama sa kanilang pagpapahayag.

Integridad

Maaari mong tulungan ang mga estudyante na maunawaan ang kahalagahan ng integridad sa pamamagitan ng paggawa ng sumusunod. Maaaring basahin ng mga estudyante ang Doktrina at mga Tipan 124:15 at 20, at alamin ang katangiang parehong taglay nina Hyrum Smith at George Miller na nagpalugod sa Panginoon.

Pagkatapos ay maaaring basahin ng mga estudyante ang sumusunod mula sa Para sa Lakas ng mga Kabataan: Isang Gabay sa Paggawa ng mga Pagpili:

Ang pamumuhay nang may integridad ay nangangahulugan na mahal ninyo ang katotohanan nang buong puso—nang higit kaysa pagmamahal ninyo sa personal na kapanatagan, katanyagan, o kaginhawahan. Nangangahulugan ito ng paggawa ng tama dahil lang sa tama iyon. (Para sa Lakas ng mga Kabataan: Isang Gabay sa Paggawa ng mga Pagpili [2022], 31)

Maaari mong tulungan ang mga estudyante na mapalalim ang kanilang pag-unawa sa integridad sa pamamagitan ng pagtatanong ng mga sumusunod:

• Paano kaya maipapakita ng isang tinedyer ang pagmamahal sa katotohanan nang higit kaysa sa personal na kapanatagan, katanyagan, o kaginhawahan?

• Paano nakatutulong sa atin ang pamumuhay nang may integridad na maging mas mabubuting disipulo ni Jesucristo?

Pagkatapos ay maaaring pagnilayan ng mga estudyante ang mga paraan na maaari silang magkaroon ng higit na integridad sa tahanan, sa paaralan, at sa kanilang pakikipag-ugnayan sa iba.

Ang endowment sa Nauvoo

Kalaunan ay pinalayas sa Nauvoo ang mga Banal. Panoorin ang “Endowed with Power” upang makita ang hangarin ng mga Banal na tanggapin ang kanilang endowment bago nila kinailangang lisanin ang templo.