“Lesona 140: Fotopampianarana sy Fanekempihavanana 131: Ny fanekempihavanana vaovao sy maharitra mandrakizain’ny fanambadiana,” Fotopampianarana sy Fanekempihavanana: Boky torolalana ho an’ny mpampianatra seminera (2025)
“Fotopampianarana sy Fanekempihavanana 131,” Fotopampianarana sy Fanekempihavanana: Boky torolalana ho an’ny mpampianatra seminera
Lesona 140: Fotopampianarana sy Fanekempihavanana 129–132
Fotopampianarana sy Fanekempihavanana 131
Ny fanekempihavanana vaovao sy maharitra mandrakizain’ny fanambadiana
Lafiny iray tena manan-danja ao amin’ny drafitry ny Ray any An-danitra ho an’ireo zanany ny fanambadian’ny lehilahy iray sy ny vehivavy iray. Tamin’ny alalan’ny Mpaminany Joseph Smith no nanambaran’ny Tompo fa rehefa fehezin’ny herin’ny fisoronana ny mpivady ary mahatoky amin’ny fanekempihavanan’izy ireo, dia haharitra mihoatra ny fahafatesana ny fanambadian’izy ireo. Afaka manampy ny mpianatra hahatakatra ny maha-zava-dehibe ny fanambadiana mandrakizay ao amin’ny drafitry ny Ray any An-danitra ity lesona ity.
Sahanasa fianarana azo atao
Mahatakatra ny fanambadiana
Soraty eny amin’ny solaitrabe ity teny nambara manaraka ity ary asao ny mpianatra hiresadresaka ny eritreritr’izy ireo momba izay heverin’izy ireo fa ampianarin’izany. Ohatra, azonao atao ny mizara ireo mpianatra ho vondrona kely maromaro ary mifanakalo hevitra momba ireto fanontaniana manaraka ireto.
Nanambara ny Loholona David A. Bednar ao amin’ny Kôlejin’ny Apôstôly Roambinifolo hoe:
Iray amin’ireo asa lehibe amin’izao androntsika izao … ny manampy ny olona hahatakatra ny tena dikany sy ny tanjon’ny fanambadiana. (David A. Bednar, “The Divine Pattern of Eternal Marriage,” Ensign, sept. 2020, 41)
-
Ahoana no hamaritanao ny “tena dikany sy ny tanjon’ny fanambadiana”?
-
Inona avy ireo ohatra sasantsasany amin’ny fahadisoan-kevitry ny olona momba ny fanambadiana ankehitriny?
Mety ho zavatra toy ny hoe misy olona mahatsapa fa tsara kokoa ny tsy manambady na hoe tsy voatery ho eo amin’ny lehilahy iray sy ny vehivavy iray ny fanambadiana ny fahadisoan-kevitra hozarain’ny mpianatra.
Asao ny mpianatra mba hamorona lohateny ao amin’ny diary fandalinany mitondra ny lohateny hoe Nahoana no zava-dehibe amin’ Andriamanitra ny fanambadiana? Asao izy ireo hisaintsaina ny fomba hamaliany io fanontaniana io. Azo asaina koa izy ireo hisaintsaina ny fihetseham-pony manokana na ny fanontaniana ananany momba ny fanambadiana.
Amporisiho izy ireo hanampy valiny ao amin’ny diary fandalinany mandritra ny lesona. Mijoroa ho vavolombelona fa rehefa mikatsaka amim-panetren-tena ny hahatakatra ny antony maha-zava-dehibe ny fanambadiana amin’ Andriamanitra izy ireo, dia afaka manamafy orina ny fijoroana ho vavolombelona ananany momba ny fanambadiana ny Fanahy Masina ary manampy amin’ny famahana ny fanontaniana na ny olona ananan’izy ireo.
Fanambadiana mandrakizay
Zarao na fintino ity andiam-pehezanteny manaraka ity mba hanampiana ny mpianatra hahatakatra ny sahan-kevitr’ilay fampianarana ao amin’ny Fotopampianarana sy Fanekempihavanana 131:
Tamin’ny mey 1843, fony tao Ramus Illinois i Joseph Smith dia nilaza tamin’i Benjamin sy i Melissa Johnson fa nikasa ny hampanambady azy ireo araka ny lalàn’ny Tompo izy. Satria efa mpivady izy ireo, dia nivazivazy i Benjamin fa tsy hanambady an’i Melissa indray izy raha tsy mihontihonty aminy i Melissa. Tena matotra anefa i Joseph. Nampianatra azy ireo ny fotopampianaran’ny fanambadiana mandrakizay ny Mpaminany, ary avy eo dia namehy azy ireo ho mpivady mandrakizay. I William Clayton dia mpitantsoratr’i Joseph tamin’izany fotoana izany ary nirakitra an-tsoratra ny fampianarany, izay hita ankehitriny ao amin’ny Fotopampianarana sy Fanekempihavanana 131 (jereo ny “Nous nous réjouissions de l’entendre parler” ao amin’ny Révélations dans leur contexte [2016], 279–280).
Alohan’ny hanasanao ny mpianatra hamaky ireto andininy manaraka ireto dia mety hanampy azy ireo ny mahafantatra fa ny ambaratonga ambony indrindra amin’ny fanjakana selestialy dia antsoina matetika hoe fiainana mandrakizay na fisandratana. Ireo izay nasandratra dia hiaina mandrakizay miaraka amin’ny Ray any An-danitra sy i Jesoa Kristy ary ho tonga tahaka Azy Ireo. “Ny fanekempihavanana vaovao sy maharitra mandrakizain’ny fanambadiana” dia ilazana ireo fanekempihavanana nataon’ireo mpivady tany amin’ny tempoly izay mamela azy ireo hofehezina ho amin’izao fiainana izao sy mandrakizay.
Vakio ny Fotopampianarana sy Fanekempihavanana 131:1–4, ka tadiavo ny zavatra nampianarin’ny Mpaminany momba ny fanambadiana.
Ny Fotopampianarana sy Fanekempihavanana 131:1–4 dia andinin-tsoratra masina fifehezana fotopampianarana. Hevero ny hanasa ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora aminy ny mahita ny toerana misy azy ireny.
-
Inona no ampianarin’ireo andininy ireo anao momba ny maha-zava-dehibe ny fanambadiana eo amin’ny drafitry ny Ray any An-danitra?
Manorata fahamarinana mitovy amin’ity manaraka ity eny amin’ny solaitrabe amin’ny fampiasana ny tenin’ny mpianatra, raha azo atao: Mba hahatongavana tahaka an’ Andriamanitra sy hiara-hiaina Aminy indray ao amin’ny fanjakana selestialy dia tsy maintsy miditra amin’ny fanekempihavanana vaovao sy maharitra mandrakizain’ny fanambadiana isika. Asao ny mpianatra hanampy io fahamarinana io ao amin’ny lisitr’ireo valinteny ao amin’ny diary fandalinany.
-
Araka ny hevitrao, dia ahoana no ahafahan’ny fanambadiana manomana antsika ho tonga tahaka an’ Andriamanitra kokoa?
Ny tanjon’ny fanambadiana ao anatin’ny drafitr’ Andriamanitra
Asao ny mpianatra hanohy hianatra momba ny maha-zava-dehibe ny fanambadiana ao amin’ny drafitr’ Andriamanitra. Afaka miasa amin’ny alalan’ity sahanasa manaraka ity tsirairay izy ireo na ao anatina vondrona kely maromaro. Raha ilaina dia hevero ny hanonta printy lahateny na lahatsoratra avy amin’ireo mpitarika ao amin’ny Fiangonana izay azon’ny mpianatra ianarana. Asao ny mpianatra mba hirakitra ny zavatra ianarany ao amin’ny diary fandalinan’izy ireo.
ChurchofJesusChrist.org
Misafidiana iray na maromaro amin’ireto sosokevitra manaraka ireto mba hahitana valinteny fanampiny amin’ilay fanontaniana hoe “Nahoana no zava-dehibe amin’ Andriamanitra ny fanambadiana?” Ampidiro ao amin’ilay andiana valinteny ao amin’ny diary fandalinanao ireo fahamarinana nianaranao.
-
Hadihadio ny soratra masina. Halalino ny Fotopampianarana sy Fanekempihavanana 49:15–17; 132:19. Mitadiava andalan-tsoratra masina fanampiny hohalalinina amin’ny alalan’ny fijerena ny hoe “fanambadiana” ao amin’ny Torolalana ho an’ny Soratra Masina.
-
Halalino ny fampianaran’ireo mpitarika ao amin’ny Fiangonana. Karohy ny hoe “fanambadiana” ao amin’ny application Médiathèque de l’Évangile na ao amin’ny fizarana lohahevitra ao amin’ny arisivan’ny lahatenin’ny fihaonamben’ny Fiangonana maneran-tany.
-
Mandefasa hafatra an-tsoratra amin’ny olona iray ao amin’ny fianakaviana na olon-dehibe azo itokisana izay manontany ny fomba hamalian’izy ireo ilay fanontaniana hoe “Nahoana no zava-dehibe amin’ Andriamanitra ny fanambadiana?”
Rehefa vita ny fandalinan’ny mpianatra dia asao izy ireo mba hanoratra eny amin’ny solaitrabe fahamarinana iray izay nianarany mikasika ny antony maha-zava-dehibe ny fanambadiana amin’ Andriamanitra. Azon’izy ireo atao koa ny mampiditra ny loharanom-pahalalana nampiasainy mba hahitana izany fahamarinana izany. Asao ny iray kilasy hijery ny zavatra nosoratan’ny mpiara-mianatra aminy ary hamantatra ireo fahamarinana azony hanatevenana ny ao amin’ny diary fandalinany. Ifanakalozy hevitra ny zavatra nianaran’ny mpianatra tamin’ny fametrahana fanontaniana toy izao manaraka izao:
-
Inona no zavatra nianaranao izay tsy fantatrao taloha?
-
Ahoana no ahafahan’ireo fampianarana ireo manampy anao rehefa mahatsikaritra hevitra eto amin’izao tontolo izao izay mifanohitra amin’ny lalàn’ Andriamanitra momba ny fanambadiana ianao?
-
Raha jerena amin’ny fomba fijerin’ Andriamanitra ny fanambadiana, dia ahoana no ahafahan’izany mitondra fiantraikany eo amin’ny fahatsapanao momba ny fanambadiana?
Hazavao ny fotopampianaran’ny fanambadiana
Raha tsapanao fa hahazo tombony amin’ny famintinana ny zavatra nianarany ireo mpianatra dia ampiaraho tsiroaroa izy ireo. Asao izy ireo hamaly ity rafi-tantara manaraka ity sy ireto fanontaniana manaraka ireto miaraka amin’ny namany:
Eritrereto hoe miresaka momba ny tanjonao amin’ny hoavy ianao. Rehefa milaza ianao hoe manantena ny hanambady ianao, dia manontany ny namanao hoe: “Nahoana anefa no zava-dehibe ny fanambadiana e?”
-
Ahoana no havalinao ny namanao amin’ny alalan’ny fampiasana ireo fampianarana nohalalininao androany?
Amporisiho ny mpianatra hiomana handray ireo fitahian’ny fanambadiana mandrakizay. Mijoroa ho vavolombelona fa rehefa mampihatra finoana an’i Jesoa Kristy izy ireo dia hiaina ireo fitahiana izay tiany homena azy ireo.
Manao tsianjery
Azonao atao ny manampy ireo mpianatra hitadidy ilay andinin-tsoratra masina fifehezana fotopampianarana sy ilay andian-teny manan-danja ao amin’ny soratra masina nandritra ity lesona ity, ary mamerin mijery izany mandritra ireo lesona hafa any aoriana any. Ny andian-teny manan-danja amin’io soratra masina io dia hoe “Ny fanekempihavanana vaovao sy maharitra mandrakizain’ny fanambadiana.” Ireo hevitra ho an’ny asa fitadidiana dia hita ao amin’ireo fitaovana ao amin’ny tovana ao anatin’ny “Sahanasa famerenana ny fifehezana fotopampianarana.”