Lesona 139: Fotopampianarana sy Fanekempihavanana 129–132

Fotopampianarana sy Fanekempihavanana 130

Mampianatra ny filazantsaran’ny Mpamonjy

Ny filazantsara dia azo ampianarina amin’ny fomba mahomby mandritra ireo fivoriana lehibe na mandritra ireo fiaraha-mivory iarahana amin’ny olona vitsivitsy sy mitokana. Nampiasa ireo fomba roa ireo ny Mpamonjy nandritra ny asa fanompoany, tahaka ny nataon’ny Mpaminany Joseph Smith. Ny lahatsoratra ao amin’ny Fotopampianarana sy Fanekempihavanana 130 dia ahitana ny sasany amin’ireo fampianaran’ny Mpaminany nandritra ireo fiaraha-mivory nahitana ireo Olomasina vitsivitsy nonina tao Ramus, Illinois. Ity lesona ity dia natao hanampiana ireo mpianatra hampihatra ireo singa amin’ny fampianarana ny fotopampianaran’i Jesoa Kristy.

Sahanasa fianarana azo atao

Ireto asa fianarana manaraka ireto dia natao hanampiana ireo mpianatra hampianatra ampahany samihafa amin’ny lesona. Raha tianao tsy hampianatra ny mpianatra dia jereo ny “Sahanasa fianarana fanampiny” mba hahazoana hevitra enti-mampianatra izay azonao ampiasaina.

Jesoa Kristy, ilay Mpampianatra Lehibe

Mba hanombohana ny fotoam-pianarana dia asehoy ny sarin’i Jesoa Kristy mampianatra ny olona ary asao ny mpianatra haka sary an-tsaina hoe mety ho toy ny ahoana ny nanatrika teo tamin’izany. Hevero ny hametraka ireto fanontaniana manaraka ireto:

• Inona no mety ho noeritreretinao na tsapanao raha nanatrika teo ianao nandritra ny fampianaran’i Jesoa?

• Inona araka ny eritreritrao no mahatonga ny Mpamonjy ho mpampianatra mahomby?

Hazavao fa amin’ny maha-mpikamban’ny Fiangonan’ny Mpamonjy antsika dia manana fahafahana maro hampianatra ny filazantsarany isika. Azonao atao koa ny mampiseho ity hafatra avy amin’ny Fiadidiana Voalohany momba ny fampianarana ity:

Ry rahalahy sy anabavy malala,

Fahafahana azo araraotina feno voninahitra ho anareo ny mampianatra ny filazantsaran’i Jesoa Kristy! Na manana antso manokana hampianatra ianao na tsia, dia mpampianatra ianao. Amin’ny maha-mpianatr’ilay Tompo Mpampianatra anao, dia i Jesoa Kristy izany, ianao dia manana fahafahana hizara ny fahazavany na aiza na aiza alehanao: ao an-tokantrano, any am-piangonana, rehefa manompo ny hafa, ary eo anivon’ireo namanao. Adidy masina ny mampianatra ny filazantsara. Ampahany manan-danja ao anatin’ny asan’ny Tompo izany, ary tena mahomby rehefa ataontsika araka ny fombany. (Mampianatra araka ny fomban’ny Mpamonjy: Ho an’ireo rehetra izay mampianatra any an-tokantrano sy any am-piangonana [2022], 1)

• Inona avy ireo fahafahana sasany ananan’ny zatovo mba hampianarana sy hijoroana ho vavolombelona momba an’i Jesoa Kristy sy ny filazantsarany?

Hazavao amin’ny mpianatra fa hanana fahafahana hanomana lesona fohy avy amin’ny sasany amin’ireo fampianarana ao amin’ny Fotopampianarana sy Fanekempihavanana 130 sy hizatra mampianatra ny leson’izy ireo amin’ny hafa izy ireo. Raha toa ianao ka mikasa ny hangataka mpianatra vitsivitsy hampianatra ny kilasy iray manontolo dia izao no fotoana tsara hanomezana toky azy ireo fa tsy hangataka na iza na iza izay tsy vonona hanao izany ianao.

Alohan’ny hanombohan’ny mpianatra manomana lesona dia zarao ireto fampahalalana ny zava-niseho manaraka ireto.

Tamin’ny 2 aprily 1843 dia nihaona tamin’ireo Olomasina tao Ramus, Illinois, ny Mpaminany Joseph Smith, izay sahabo ho 32 kilaometatra ivelan’i Nauvoo. Nampianatra fahamarinana samihafa ao amin’ny filazantsara i Joseph, anisan’izany ireo antsipirian-javatra momba Ny Andriamanitra, ny maha-zava-dehibe ny fahazoana fahalalana eto amin’ity fiainana ity, ary ny fomba ahafahantsika mandray ireo fitahian’ Andriamanitra. Voarakitra ao amin’ny Fotopampianarana sy Fanekempihavanana 130 ireo fampianaran’ny Mpaminany.

Miomàna hampianatra

Mba hanampiana ireo mpianatra hiomana hampianatra dia zarao ilay taratasy zaraina mitondra ny lohateny hoe “Mampianatra fahamarinana avy amin’ny Fotopampianarana sy Fanekempihavanana 130.” Asao ny mpianatra hanaraka ny dingana amin’ny fanomanana ny lesona mba hahazoan’izy ireo fitarihana. Koa satria andalan-tsoratra masina fifehezana fotopampianarana ny Fotopampianarana sy Fanekempihavanana 130:22–23 dia mety hilaina ny mangataka mpianatra vitsivitsy handalina io lohahevitra io mba hahazoana antoka fa hampianarina mandritra ny lesona ireo andininy ireo.

Eo am-piomanan’ireo mpianatra dia mandehana manerana ny efitrano ka ampio araka izay ilaina izy ireo. Azonao atao ny manolotra soso-kevitra vitsivitsy momba ny zavatra azon’izy ireo ampiasaina hanampiana ny hafa handray anjara mavitrika. Mety hahitana fanontaniana momba ny fifanakalozan-kevitra, zavatra jerena, zavatra, fizarana traikefan’ny tena manokana, na fanazaran-tena manoratra izany.

Mampianatra fahamarinana avy amin’ny Fotopampianarana sy Fanekempihavanana 130

Fanomanana ny lesona:

Dingana 1: Misafidiana iray amin’ireo lohahevitra hohalalinina etsy ambany ary ianaro ireo loharanom-pitaovana omena amin’izany. Ifantohy ireo eritreritra sy ireo hevitra ary ireo fahatsapana avy amin’ny Fanahy Masina momba ny zavatra vakinao. Azonao atao koa ny mitady loharanom-pitaovana hafa mba hanamafisana ny fahatakaranao ny lohahevitra nofidinao.

Dingana 2: Mamoròna drafitra ho ana lesona maharitra dimy ka hatramin’ny fito minitra ho an’ny lohahevitra nofidinao. Hevero ny hampiasa ny sasany amin’ireto fanontaniana manaraka ireto mba hanampy anao amin’ny fanomanana:

• Ahoana no tokony na ahafahan’ireo fahamarinana ireo hisy vokany amin’ny fifandraisantsika amin’ny Ray any An-danitra sy i Jesoa Kristy?

• Ahoana no ahafahako mampiasa ny soratra masina sy ny tenin’ireo mpaminany mba hanampiana ny hafa hahatakatra kokoa ity lohahevitra ity?

• Inona no azoko atao mba hanampiana ny hafa handray anjara amin’ny lesona sy ho mpandray anjara mavitrika?

• Inona no traikefa azoko zaraina na inona no azoko ijoroana ho vavolombelona?

• Inona no azoko atao mba hanampiana ny hafa hampihatra io lohahevitra io eo amin’ny fiainany?

Lohahevitra sy loharanom-pitaovana hoenti-mandalina:

Safidy 1: Ny fahalalana sy ny faharanitan-tsaina dia miara-mitsangana amintsika amin’ny Fitsanganana amin’ny maty.

Ireo loharanom-pitaovana hohalalinina:

Fotopampianarana sy Fanekempihavanana 130:18–19; jereo koa ny Fotopampianarana sy Fanekempihavanana 88:118; 93:36

Ny Loholona Neal A. Maxwell (1926–2004) tao amin’ny Kôlejin’ny Apôstôly Roambinifolo dia nampianatra hoe:

Raha misaintsaina fotsiny ny zavatra izay hiara-hitsangana amintsika amin’ny fitsanganana amin’ny maty isika dia toa hita miharihary fa hiara-hitsangana amintsika ny faharanitan-tsaintsika, izay midika hoe tsy ny fahatakarantsika zavatra fotsiny fa ny fahafahantsika mandray sy mampihatra ny fahamarinana ihany koa. Hiara-hitsangana amintsika ny talentantsika sy ny toetra tsara ananantsika ary ny fahaiza-manaontsika; ary toy izany koa mazava ho azy ny fahaizantsika mianatra sy ny haavon’ny fifehezantsika tena ary ny fahaizantsika miasa. (Neal A. Maxwell, We Will Prove Them Herewith [1982], 12)

Safidy 2: Mahazo fitahiana avy amin’ Andriamanitra isika amin’ny alalan’ny fankatoavana ny lalàny.

Ireo loharanom-pitaovana hohalalinina:

Fotopampianarana sy Fanekempihavanana 130:20–21; jereo koa ny Jaona 7:17; Fotopampianarana sy Fanekempihavanana 82:10

Nampianatra toy izao ny Filoha Russell M. Nelson:

Raha tena maniry fitahiana iray ianao, dia tsara kokoa ny hamantaranao hoe inona ireo lalàna mifehy izany fitahiana izany ary avy eo dia miezaha ny ho tonga mpankatò ireo lalàna ireo. (Russell M. Nelson, “The Mission and Ministry of the Savior: A Discussion with Elder Russell M. Nelson,” Ensign, jona 2005, 19)

Safidy 3: Manana vatana nofo sy taolana ny Ray any An-danitra sy i Jesoa Kristy. Ny Fanahy masina dia vatana fanahy.

Ireo loharanom-pitaovana hohalalinina:

Fotopampianarana sy Fanekempihavanana 130:22–23; jereo koa ny Matio 3:13–17; Asan’ny Apostoly 7:55–56

Nampianatra toy izao ny Loholona Jeffrey R. Holland ao amin’ny Kôlejin’ny Apôstôly Roambinifolo:

Mino isika fa ireo olona masina telo ireo izay mandrafitra ny Andriamanitra tokana izay iray eo amin’ny tanjony sy ny fomba fiasany, sy ny fijoroany ho vavolombelona ary eo amin’ny iraka tanterahiny. Mino isika fa Izy Ireo dia samy henik’ilay toetra araka an’ Andriamanitra feno famindram-po sy fitiavana, fahamarinana sy fahasoavana, faharetana, sy famelan-keloka ary fanavotana. Mihevitra aho fa marina ny filazana fa mino isika fa iray Izy Ireo eo amin’ny lafiny manan-danja sy mandrakizay rehetra azo heverina afa-tsy ny finoana Azy Ireo ho olona telo mitambatra ho olona iray. … Ambaranay fa miharihary avy amin’ny soratra masina fa ny Ray sy ny Zanaka ary ny Fanahy Masina dia olona misaraka, olona masina telo. (Jeffrey R. Holland, “The Only True God and Jesus Christ Whom He Hath Sent,” Liahona, nôv. 2007, 40–41)

Traikefa amin’ny fampianarana

Ampitao amin’ny mpianatra fa sarobidy ny anjara biriky entin’izy ireo: Rehefa mizara ny lesona nomaniny ny mpianatra dia ampio izy ireo hahafantatra fa ny anjara biriky nentin’izy ireo tamin’ny lesona dia sarobidy sy ankasitrahana. Raha mila fanazaran-tena kokoa amin’izany dia jereo ny fiofanana mitondra ny lohateny hoe “Ampahafantaro fa manome lanja ny mpianatra ianao alohan’ny hanehoany hevitra na rehefa manangan-tanana izy ireo” izay hita ao amin’ny Fahaiza-manao ho fampivoarana mpampianatra: Tiavo ireo izay ampianarinao.

Rehefa avy nanome fotoana ny mpianatra hanomanana rindran-damin’ny lesona iray ianao dia asao ny mpianatra vitsivitsy hampianatra ny lesony eo anoloan’ny kilasy. Azonao atao koa ny mandamina ireo mpianatra ho vondrona kely ary afaka mifandimby mifampianatra izy ireo. Mandritra ny famelabelarana ataon’ny mpianatra dia amporisiho ny mpianatra haneho fanajana sy handray anjara feno amin’ny dingan’ny fianarana. Raha misy mpianatra tsy mahazo aina rehefa mampianatra ao amin’ny seminera na raha lany ihany ny fotoana kanefa tsy nanana fahafahana hanao izany ny rehetra, dia amporisiho izy ireo mba hanandrana hampianatra ny lesony any an-trano, na any am-piangonana, na amin’ny namana iray. Mba hamaranana, diahevero ny hametraka fanontaniana tahaka ireto manaraka ireto:

• Inona no nianaranao momba ny Ray any An-danitra sy i Jesoa Kristy izay afaka manampy anao amin’ny toe-javatra iainanao ankehitriny?

• Inona no nianaranao androany momba ny fampianarana ny filazantsaran’ny Mpamonjy?

• Nahoana no mety hahasoa anao amin’izao fotoana izao sy amin’ny hoavy ny fanararaotana ireo fahafahana hampianatra ny filazantsaran’i Jesoa Kristy?

Ny Fotopampianarana sy Fanekempihavanana 130:22–23 dia andinin-tsoratra masina fifehezana fotopampianarana. Hevero ny hanasa ny mpianatra hanisy marika amin’ny fomba miavaka ireo andinin-tsoratra masina fifehezana fotopampianarana mba ho mora aminy ny mahita ny toerana misy azy ireny.

Manao tsianjery

Mety ho tianao ny hanampy ny mpianatra hanao tsianjery ny toko sy andinin-tsoratra masina sy ny andian-teny manan-danja ao amin’ny soiratra masina Fotopampianarana sy Fanekempihavanana 130:22–23 sy hamerina hijery izany ao anatin’ireo lesona manaraka. Ny andian-teny manan-danja ao amin’ny soratra masina ao amin’ity andalan-tsoratra masina ity dia ny hoe “Ny Ray dia manana vatana nofo sy taolana … ; ny Zanaka koa; fa ny Fanahy Masina … dia vatana Fanahy.” Ireo hevitra ho an’ny asa fitadidiana dia hita ao amin’ireo fitaovana ao amin’ny tovana ao anatin’ny “Sahanasa famerenana ny fifehezana fotopampianarana.”

Loharanom-pitaovana fanampiny

Aiza no ahafahako mianatra kokoa momba ireo fampianarana ao amin’ny Fotopampianarana sy Fanekempihavanana 130:1–17?

Ankoatra ireo lohahevitra resahina ato amin’ity lesona ity, dia nampianatra momba ireo lohahevitra fanampiny izay voarakitra ao amin’ny Fotopampianarana sy Fanekempihavanana 130 ny Mpaminany Joseph Smith. Ny sasany amin’ireo dia ahitana ny toetra mandrakizain’ny fifandraisantsika amin’ny hafa, ny fahalalana ny zavatra rehetra sy ny fahafantarana mialoha an’ Andriamanitra, izay hiafaran’ny tany ary ny Fiavian’i Jesoa Kristy Fanindroany. Raha mila fanazavana fanampiny momba ireo lohahevitra ireo dia jereo ny Fotopampianarana sy Fanekempihavanana: Boky torolalana ho an’ny mpianatra (2018) ho an’ny institiota, 751–58.

Fotopampianarana sy Fanekempihavanana 130:18–19. Nahoana aho no tokony hanohy hanabe ny saiko sy ny fanahiko?

Nampianatra toy izao ny Filoha Russell M. Nelson:

Anjaranareo ny mandranto fianarana. Tsy misy olon-kafa afaka mandranto izany eo amin’ny toeranareo. Na aiza na aiza misy anareo dia miezaha hanana faniriana lalina ny hianatra. Ho antsika Olomasin’ny Andro Farany, ny fandrantoana fianarana dia tsy tombontsoa lehibe fotsiny ihany fa andraikitra ara-pivavahana. Ny faharanitan-tsaina no voninahitr’ Andriamanitra (jereo ny Fotopampianarana sy Fanekempihavanana 93:36). Eny tokoa, ny fianarantsika dia ho an’ny mandrakizay. … Ny fianarana no tsy mampitovy ny hoe mangetaheta ny ho afaka hanampy ny hafa sy ny hoe afaka manampy ny hafa. (Russell M. Nelson, “Will You Choose to Increase in Learning?,” New Era, sept. 2014, 2–3)

Fotopampianarana sy Fanekempihavanana 130:20–21. Inona no fitahiana faratampony amin’ny fankatoavana ny lalàn’ Andriamanitra?

Nanazava toy izao ny Filoha Dallin H. Oaks ao amin’ny Fiadidiana Voalohany:

Nampianatra i Joseph Smith fa Andriamanitra dia “nametraka lalàna … hahafahan’[ireo fanahy izay alefany eto amin’izao tontolo izao] hanana fahafahana hivoatra tahaka Azy.” [Teachings of Presidents of the Church: Joseph Smith (2007), 210.] Tena tonga lafatra ny fitiavan’ Andriamanitra hany ka mitaky amim-pitiavana antsika hankatò ny didiny Izy satria fantany fa amin’ny alalan’ny fankatoavana ny lalàny ihany no ahafahantsika ho tonga lafatra tahaka Azy. (Dallin H. Oaks, “Fitiavana sy lalàna,” Liahona, nôv. 2009, 27)

Fotopampianarana sy Fanekempihavanana 130:22–23. Aiza no azoko ianarana misimisy kokoa momba Ny Andriamanitra?

Sahanasa fianarana fanampiny

Fotopampianarana sy Fanekempihavanana 130:18–19. Fahalalana sy fahendrena

Asao ny mpianatra haka sary an-tsaina hoe mandao ny tranony mandritra ny herinandro vitsivitsy izy ireo. Izay zavatra azony atsofoka ao anatina valizy na kitapo iray ihany no azony entina. Anontanio azy ireo hoe inona no hoentiny.

Dia angataho ny mpianatra avy eo haka sary an-tsaina hoe any amin’ny tontolon’ny fanahy no halehany, izay toerana hidirantsika rehefa maty isika. Asao izy ireo hizara hoe inona amin’ireo zavatra noeritreretiny teo aloha no ho azony entina rehefa maty izy ireo.

Vakio ny Fotopampianarana sy Fanekempihavanana 130:18–19, ka tadiavo ny zavatra azontsika entina miaraka amintsika avy eto amin’ity fiainana ity rehefa maty isika. Rehefa avy mangataka ny mpianatra hanao tatitra ny zavatra hitany ianao dia ampio izy ireo hamantatra fahamarinana iray toy izao: Ny fahalalana sy ny faharanitan-tsaina azontsika eto amin’ity fiainana ity dia hiara-hitsangana amintsika amin’ny Fitsanganana amin’ny maty.

Ifanakalozy hevitra ny fanontaniana toy izao manaraka izao:

• Ahoana no ahafahan’ny fahalalana io fahamarinana io hisy fiantraikany amin’ny fanapahan-kevitrao sy ny laharam-pahamehanao?

• Inona no ianaranao avy amin’ireo andinin-tsoratra masina ireo mikasika ny fomba ahafahanao mitombo fahalalana sy faharanitan-tsaina?

Fotopampianarana sy Fanekempihavanana 130:20–21. Mahazo fitahiana avy amin’ Andriamanitra

Asao ny mpianatra haka sary an-tsaina hoe te hanatsara ny sora-tanan’izy ireo izy ireo. Angataho izy ireo mba hizara zavatra vitsivitsy azony atao mba hahatratrarany io tanjona io.

Avy eo dia asao izy ireo haka sary an-tsaina hoe tapa-kevitra fa afaka manatsara ny sora-tanany amin’ny alalan’ny fihazakazahana telo kilaometatra, mandritra ny dimy andro isan-kerinandro, ao anatin’ny iray volana.

• Inona no ho vokatr’izany? Nahoana?

Afaka mamaky ny Fotopampianarana sy Fanekempihavanana 130:20–21 ny mpianatra avy eo, ka mitady fahamarinana iray izay afaka mifandray amin’ireo fitahiana ara-panahy iriantsika horaisina. (Azonao atao ny manazava fa ny hoe “ifotorany” dia midika hoe “mifototra amin’ny” ary ny lalàna iray izay “navoaka tsy azo novana” dia maharitra sy tsy azo ovaina.)

• Araka ny voalazan’ny Fotopampianarana sy Fanekempihavanana 130:20–21, dia ahoana no fomba ahazoantsika fitahiana iray avy amin’ Andriamanitra?

Raha ilaina dia ampio ny mpianatra hamantatra ity fahamarinana manaraka ity: Raha te hahazo fitahiana iray avy amin’ Andriamanitra isika dia tsy maintsy mankatò ny lalàna izay ifotoran’izany.

Mety hanampy ny mpianatra ny hahita ohatra ao amin’ny soratra masina izay maneho ireo fitahiana azontsika raisina amin’ny alalan’ny fanarahana ny lalàn’ Andriamanitra sasany. Azonao atao, ohatra, ny mandroso hevitra ny handalinan’izy ireo ny Jaona 7:17; 2 Nefia 32:3; Fotopampianarana sy Fanekempihavanana 10:5; 88:124.

Asao ireo mpianatra hanoratra ireo fitahiana izay tiany ho azo. Avy eo dia asao izy ireo hanoratra ny lalàna na ireo lalàna izay ilainy ankatoavina mba hahazoana ireo fitahiana ireo. Hamafiso fa ny lalàna sy ny fitahiana sasany dia voafaritra mazava tsara mihitsy, fa ny hafa kosa dia amin’ny ankapobeny kokoa. Ampahatsiahivo ny mpianatra fa mety ho tonga any amin’ny fiainana ho avy ny sasantsasany amin’ireo fitahiana nampanantenaina. Azonao zaraina ihany koa ity teny nolazain’ny Loholona D. Todd Christofferson ao amin’ny Kôlejin’ny Apôstôly Roambinifolo manaraka ity:

Isika dia tsy tokony hieritreritra ny drafitr’ Andriamanitra ho toy ny milim-pivarotana ana habakabaka izay hanindrintsika hoe (1) safidio ny fitahiana tianao, (2) ampidiro ny habetsahan’ny asa tsara vita, ary dia (3) voatitra avy hatrany ny zavatra nafarana.

Marina tokoa fa hanatanteraka ireo fanekempihavanany sy ireo fampanantenany nataony tamintsika tsirairay avy Andriamanitra. … Manan-danja ny hoe manaja sy mankatò ireo didiny, saingy tsy ny fitahiana rehetra izay mifototra amin’ny fankatoavana lalàna [Fotopampianarana sy Fanekempihavanana 130:20–21] no voavolavola, sy natao, ary mifanaraka amin’izay anantenantsika azy. Manao izay tsara vitantsika isika saingy tsy maintsy mamela Azy hitantana ireo fitahiana ara-nofo sy ara-panahy. (D. Todd Christofferson, “Ny fifandraisantsika amin’ Andriamanitra,” Liahona, mey 2022, 78)

Fotopampianarana sy Fanekempihavanana 130:22–23. Ny toetran’ Ny Andriamanitra

Asao ireo mpianatra hisaintsaina izao toe-javatra manaraka izao:

Tonga ny resaka momba ny finoana an’ Andriamanitra raha iny ianao niresaka tamin’ny namanao iny. Nampianarina ny namanao fa Andriamanitra dia tsy olona fa mihoatra noho ny fisiana na hery izay misy ary hita eny rehetra eny amin’ny fotoana iray.

Angataho ny mpianatra mba handalina ny Fotopampianarana sy Fanekempihavanana 130:22–23, ka tadiavo ireo fahamarinana momba Ny Andriamanitra izay nambaran’ny Tompo tamin’ny Mpaminany Joseph Smith izay afaka manampy amin’ny olana toy ilay nozaraina tao amin’ilay rafi-tantara.

Azonao atao koa ny manasa azy ireo hikaroka ny teny iditra hoe “Andriamanitra, Ny Andriamanitra” ao amin’ny Torolalana ho an’ny Soratra Masina mba hahitana soratra masina fanampiny azon’izy ireo zaraina amin’ny namany.

Rehefa vita ny fandalinan’ny mpianatra dia ifanakalozy hevitra ny zavatra nianarany amin’ny fametrahana fanontaniana toy ny:

• Inona no fahamarinana hitanao avy amin’ny soratra masina izay azonao zaraina? (Mety hahita fahamarinana toy izao manaraka izao ny mpianatra: Misy olona telo miavaka tsara ao amin’ Ny Andriamanitra. Manana vatana nofo sy taolana azo tsapain-tanana sy feno voninahitra ny Ray sy ny Zanaka. Ny Fanahy masina dia manana vatana fanahy.)

• Ahoana no ahafahan’ny fahafantarana sy ny finoana ireo fahamarinana ireo manova ny fiainanao na ny fifandraisanao amin’ Andriamanitra?