“Lesson 140—Doktrina at mga Tipan 131: Ang Bago at Walang Hanggang Tipan ng Kasal,’” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 131,” Manwal ng Titser ng Seminary para sa Doktrina at mga Tipan
Lesson 140: Doktrina at mga Tipan 129–132
Doktrina at mga Tipan 131
Ang Bago at Walang Hanggang Tipan ng Kasal
Ang kasal sa pagitan ng isang lalaki at ng isang babae ay isang mahalagang bahagi ng plano ng Ama sa Langit para sa Kanyang mga anak. Sa pamamagitan ni Propetang Joseph Smith, inihayag ng Panginoon na kapag ang mag-asawa ay ibinuklod sa pamamagitan ng kapangyarihan ng priesthood at tapat sa kanilang mga tipan, ang kanilang kasal at pagsasama bilang mag-asawa ay tatagal hanggang sa kabilang-buhay. Ang lesson na ito ay makatutulong sa mga estudyante na maunawaan ang kahalagahan ng walang hanggang kasal sa plano ng Ama sa Langit.
Mga Posibleng Aktibidad sa Pag-aaral
Pag-unawa sa kasal
Maaari mong isulat sa pisara ang sumusunod na pahayag at sabihin sa mga estudyante na talakayin ang kanilang mga ideya tungkol sa itinuturo nito. Halimbawa, maaari mong hatiin ang mga estudyante sa maliliit na grupo at talakayin ang kasunod na mga tanong.
Ipinahayag ni Elder David A. Bednar ng Korum ng Labindalawang Apostol:
Isa sa mga dakilang gawain sa ating panahon … ay ang ipaunawa sa mga tao ang tunay na kahulugan at layunin ng kasal. (David A. Bednar, “The Divine Pattern of Eternal Marriage,” Ensign, Set. 2020, 41)
-
Paano ninyo ipapaliwanag “ang tunay na kahulugan at layunin ng kasal”?
-
Ano ang ilang halimbawa ng maling pagkaunawa ng mga tao tungkol sa kasal ngayon?
Maaaring magbahagi ang mga estudyante ng mga maling pagkaunawa tulad ng nadarama ng ilang tao na mas mainam para sa kanila na hindi mag-asawa o ang kasal ay hindi kailangang sa pagitan ng isang lalaki at isang babae lamang.
Sabihin sa mga estudyante na gumawa ng heading sa kanilang study journal na may pamagat na Bakit mahalaga sa Diyos ang kasal? Sabihin sa kanila na isulat kung paano nila sasagutin ang tanong na iyon. Maaari din silang anyayahang pagnilayan ang kanilang personal na damdamin o ang mga tanong na mayroon sila tungkol sa kasal.
Hikayatin sila na magdagdag ng mga sagot sa kanilang study journal sa buong lesson. Magpatotoo na kapag mapagpakumbaba nilang hahangarin na maunawaan kung bakit mahalaga sa Diyos ang kasal, mapapalakas ng Espiritu Santo ang kanilang patotoo tungkol sa kasal at makatutulong ito sa paglutas ng kanilang mga tanong o alalahanin.
Walang hanggang kasal
Maaari mong basahin o ibuod ang sumusunod na talata upang matulungan ang mga estudyante na maunawaan ang konteksto para sa mga turo sa Doktrina at mga Tipan 131:
Noong Mayo 1843, habang nasa Ramus, Illinois, sinabi ni Joseph Smith kina Benjamin at Melissa Johnson na balak niyang ikasal sila ayon sa batas ng Panginoon. Dahil ikinasal na sila, pabirong sinabi ni Benjamin na pakakasalan lamang niya ulit si Melissa kung liligawan siya nito. Ngunit seryoso si Joseph. Itinuro sa kanila ng Propeta ang doktrina ng walang hanggang kasal, pagkatapos ay ibinuklod ang mag-asawa sa kawalang-hanggan. Si William Clayton ay naglilingkod bilang tagasulat ni Joseph sa panahong iyon at isinulat niya ang mga turo nito, na matatagpuan ngayon sa Doktrina at mga Tipan 131 (tingnan sa “Our Hearts Rejoiced to Hear Him Speak,” sa Revelations in Context [2016], 279–280).
Bago mo anyayahan ang mga estudyante na basahin ang mga sumusunod na talata, maaaring makatulong sa kanila na malaman na ang pinakamataas na antas ng kahariang selestiyal ay kadalasang tinutukoy bilang buhay na walang hanggan o kadakilaan. Ang mga dinakila ay mabubuhay nang walang hanggan sa piling ng Ama sa Langit at ni Jesucristo at magiging katulad Nila. “Ang bago at walang hanggang tipan ng kasal” ay tumutukoy sa tipan na ginagawa ng mga mag-asawa sa templo na nagtutulot sa kanila na mabuklod sa buhay na ito at sa buong kawalang-hanggan.
Basahin ang Doktrina at mga Tipan 131:1–4, at alamin kung ano ang itinuro ng Propeta tungkol sa kasal.
Ang Doktrina at mga Tipan 131:1–4 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan upang madali nilang mahanap ang mga ito.
-
Ano ang itinuturo sa inyo ng mga talatang ito tungkol sa kahalagahan ng kasal sa plano ng Ama sa Langit?
Magsulat sa pisara ng katotohanang tulad ng sumusunod gamit ang mga sinabi ng mga estudyante, kung maaari: Upang maging katulad ng Diyos at muling makapiling Siya sa kahariang selestiyal, kailangan nating pumasok sa bago at walang hanggang tipan ng kasal. Sabihin sa mga estudyante na idagdag ang katotohanang ito sa listahan ng mga sagot sa kanilang study journal.
-
Sa palagay ninyo, paano tayo maihahanda ng kasal na maging higit na katulad ng Diyos?
Ang kahalagahan ng kasal sa plano ng Diyos
Sabihin sa mga estudyante na patuloy na pag-aralan ang kahalagahan ng kasal sa plano ng Diyos. Maaari nilang gawin ang sumusunod na aktibidad nang mag-isa o sa maliliit na grupo. Kung kinakailangan, maaari kang mag-print ng mga mensahe o artikulo mula sa mga lider ng Simbahan na maaaring pag-aralan ng mga estudyante. Sabihin sa mga estudyante na isulat sa kanilang study journal ang natutuhan nila.
Bilang bahagi ng aktibidad na ito, maaari mo ring ipanood ang video na “Eternal Marriage, an Apostolic Perspective” (5:26), na makikita sa blog na Inspiration sa ChurchofJesusChrist.org.
Pumili ng isa o mahigit pa sa mga sumusunod na mungkahi para makahanap ng mga karagdagang sagot sa tanong na “Bakit mahalaga sa Diyos ang kasal?” Idagdag ang mga katotohanang natutuhan mo sa listahan ng mga sagot sa iyong study journal.
-
Saliksikin ang mga banal na kasulatan. Pag-aralan ang Doktrina at mga Tipan 49:15–17; 132:19. Maghanap ng mga karagdagang passage na pag-aaralan sa pamamagitan ng paghahanap ng paksang “kasal” sa Gabay sa mga Banal na Kasulatan.
-
Pag-aralan ang mga turo ng mga lider ng Simbahan. Hanapin ang salitang “kasal” sa Gospel Library app o sa bahaging mga paksa ng archive ng mga mensahe sa pangkalahatang kumperensya.
-
Magpadala ng text message sa isang kapamilya o pinagkakatiwalaang nakatatanda na nagtatanong kung paano nila sasagutin ang tanong na “Bakit mahalaga sa Diyos ang kasal?”
Kapag natapos nang mag-aral ang mga estudyante, sabihin sa bawat isa sa kanila na isulat sa pisara ang isang katotohanan na natutuhan nila tungkol sa kung bakit mahalaga sa Diyos ang kasal. Maaari din nilang isama ang source na ginamit nila upang mahanap ang katotohanang iyon. Sabihin sa klase na tingnan ang isinulat ng kanilang mga kaklase at tukuyin ang mga katotohanang maidaragdag nila sa kanilang study journal. Maaari mong talakayin ang natutuhan ng mga estudyante sa pamamagitan ng pagtatanong ng tulad ng mga sumusunod:
-
Ano ang isang bagay na natutuhan ninyo na hindi pa ninyo nalaman noon?
-
Paano makatutulong sa inyo ang mga turo na ito kapag may napansin kayo na mga ideya sa mundo na salungat sa mga batas ng Diyos tungkol sa kasal?
-
Paano nakaiimpluwensya sa nadarama ninyo tungkol sa kasal ang pagtingin sa kasal mula sa pananaw ng Diyos?
Ipaliwanag ang doktrina ng kasal
Kung sa palagay mo ay makikinabang ang mga estudyante sa pagbubuod ng natutuhan nila, maaari mo silang pagpartner-partnerin. Sabihin sa kanila na sagutin ang sumusunod na sitwasyon at mga tanong kasama ang kanilang kapartner:
Isipin na kunwari ay pinag-uusapan ninyo ng kaibigan mo ang iyong mga mithiin sa hinaharap. Nang banggitin mo na umaasa kang makasal, itinanong ng kaibigan mo, “Bakit pa ba mahalaga ang kasal?”
-
Ano ang isasagot mo sa iyong kaibigan gamit ang mga turo na napag-aralan mo ngayon?
Hikayatin ang mga estudyante na maghandang tanggapin ang mga pagpapala ng walang hanggang kasal. Magpatotoo na kapag nanampalataya sila kay Jesucristo, mararanasan nila ang mga pagpapalang nais Niyang ibigay sa kanila.
Isaulo
Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan ay “Ang bago at walang hanggang tipan ng kasal.” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”