“Lesson 141—Doktrina at mga Tipan 132: Maramihang Pag-aasawa,” Manwal ng Titser ng Seminary para sa Doktrina at mga Tipan (2025)
“Doktrina at mga Tipan 132” Manwal ng Titser ng Seminary para sa Doktrina at mga Tipan
Lesson 141: Doktrina at mga Tipan 129–132
Doktrina at mga Tipan 132:1–2, 34–66
Maramihang Pag-aasawa
Bagama’t ang batas ng Diyos noon pa man sa kasal ay sa pagitan ng isang lalaki at isang babae (tingnan sa Jacob 2:27, 30), may mga pagkakataon na iniutos Niya sa ilan sa Kanyang mga anak na mag-asawa nang higit sa isa. Ang mga unang taon ng ipinanumbalik na Simbahan ay isa sa mga panahong iyon. Iniutos ng Panginoon kay Propetang Joseph Smith na mag-asawa nang higit sa isa at ituro ang alituntunin sa iba. Ang lesson na ito ay makatutulong sa mga estudyante na mas maunawaan pa ang tungkol sa kautusan ng Panginoon sa ilang Banal na mag-asawa nang mahigit sa isa noong mga unang araw ng Simbahan.
Mga Posibleng Aktibidad sa Pag-aaral
Mahihirap na kautusan
Itinuro ni Pangulong Russell M. Nelson:
Noon pa man ay pinagagawa na ng Diyos ang Kanyang pinagtipanang mga anak ng mahihirap na bagay. (Russell M. Nelson, “Manindigan Bilang mga Tunay na Isinilang sa Milenyong Ito,” Liahona, Okt. 2016, 27)
-
Ano ang ilang halimbawa ng mahihirap na bagay na ipinagagawa ng Diyos sa Kanyang mga anak?
Kung kinakailangan, gamitin ang ilang salaysay sa mga banal na kasulatan na pag-iisipan ng mga estudyante. Maaaring kabilang sa mga halimbawa ang paghiling kay Abraham na ialay si Isaac (tingnan sa Genesis 22:1–2, 10), pagtanggap ni Maria sa tawag na maging ina ni Jesucristo (tingnan sa Lucas 1:26–38), at ang pagdurusa at pagbabayad-sala ni Jesucristo para sa buong sangkatauhan (tingnan sa Mateo 26:39). Maaari kang magdispley ng mga larawan na nagpapakita ng mga pangyayaring ito.
-
Sa inyong palagay, bakit inuutusan ng Diyos kung minsan ang Kanyang mga anak na gumawa ng mahihirap na bagay?
Bilang bahagi ng talakayang ito, maaari mong basahin ang Abraham 3:23–25. Maaari mo ring ipanood ang video na “Is It Hard to Be the Prophet?” (1:54), makukuha sa ChurchofJesusChrist.org.
Sa ating dispensasyon, iniutos ng Panginoon kay Propetang Joseph Smith na gawin ang maraming mahihirap na bagay. Ang isang mahirap na utos na ibinigay ng Diyos kay Joseph Smith ay pasimulan ang maramihang pag-aasawa, na kilala rin bilang poligamya, noong mga unang araw ng Simbahan.
Ipaliwanag na ang maramihang pag-aasawa ay tumutukoy sa kasal ng isang lalaki at ng mahigit sa isang babae. Tulungan ang mga estudyante na maunawaan na normal lang na mahirapan sa nadaramang pagkalito o magkaroon ng mga tanong tungkol sa gawaing ito. Maaari mong bigyan ang mga estudyante ng oras na isulat sa kanilang study journal ang mga tanong na mayroon sila.
Makabubuti sa mga estudyante na maghanap ng sarili nilang mga sagot. Sabihin sa kanila na bigyang-pansin ang patnubay na natatanggap nila sa pamamagitan ng Espiritu Santo habang nag-aaral sila. Ang tungkulin mo bilang titser ay hindi sagutin ang lahat ng tanong ng mga estudyante. Okey lang na sabihing wala kang mga sagot. Maipapakita mo na kahit hindi nahanap ang lahat ng sagot, makasusulong tayo nang may pananampalataya kay Jesucristo.
Ang mga tagubilin ng Panginoon tungkol sa maramihang pag-aasawa
Habang isinasalin ang Biblia, nabasa ni Propetang Joseph Smith ang tungkol sa ilan sa mga tagapaglingkod ng Diyos na nag-asawa ng mahigit sa isang babae. Para malaman kung ano ang itinanong ni Joseph sa Diyos, basahin ang Doktrina at mga Tipan 132:1. Pagkatapos ay basahin ang mga talata 2 at 34–37, at alamin kung paano tumugon ang Panginoon sa tanong ng Propeta.
-
Anong katotohanan ang natutuhan ninyo mula sa mga talatang ito tungkol sa kailan katanggap-tanggap ang maramihang pag-aasawa sa Panginoon?
Sabihin sa mga estudyante na ipahayag ang natutuhan nila at tulungan silang matukoy ang katotohanan na tinatanggap lamang ng Panginoon ang maramihang pag-aasawa kapag ipinag-uutos Niya ito.
Sa Aklat ni Mormon, nalaman natin na ilang Nephita ang nagsimulang mag-asawa nang higit sa isa na labag sa kalooban ng Diyos. Binigyang-katwiran nila ang kanilang mga ginawa batay sa mga salaysay sa banal na kasulatan mula sa Lumang Tipan (tingnan sa Jacob 2:23–24; tingnan din sa Doktrina at mga Tipan 132:38–39). Kinundena ng Panginoon ang mga gawaing ito at itinuro sa mga Nephita ang Kanyang pamantayan para sa kasal.
Basahin ang Jacob 2:26–27, 30, at alamin ang mga turo ng Panginoon sa mga Nephita.
-
Ano ang idinagdag ng mga talatang ito sa pagkaunawa ninyo tungkol sa maramihang pag-aasawa?
Kung kinakailangan, tulungan ang mga estudyante na maunawaan na ang kasal sa pagitan ng isang lalaki at isang babae ay batas ng Diyos sa kasal noon pa man. Gayunman, kung minsan ay iniuutos ng Diyos ang maramihang pag-aasawa bilang eksepsyon sa batas na ito. Ang isang dahilan kung bakit iniuutos ng Diyos ang maramihang pag-aasawa ay upang “magbangon ng mga binhi sa [Kanya]” (Jacob 2:30).
-
Paano makatutulong ang kaalamang ito sa mga tanong ninyo tungkol sa maramihang pag-aasawa sa mga unang araw ng Simbahan?
Maramihang pag-aasawa sa mga naunang Banal
Maaaring makatulong sa mga estudyante ang pagkakataong gamitin ang mga tulong o sources na itinakda ng Diyos upang mas maunawaan ang maramihang pag-aasawa noong mga unang araw ng Simbahan.
Maaari mong ipamahagi ang handout na may pamagat na “Mga Hango mula sa ‘Maramihang Pag-aasawa sa Kirtland at Nauvoo.’” Maaari mong sabihin sa mga estudyante na pag-aralan nang mag-isa o sa maliliit na grupo ang mga materyal na ito. Sabihin sa kanila na maghanap ng impormasyon na makatutulong sa pagsagot sa mga tanong nila.
Matapos mag-aral ng mga estudyante, bigyan sila ng pagkakataong ibahagi ang natutuhan nila sa pamamagitan ng pagtatanong ng tulad ng mga sumusunod:
-
Ano ang natutuhan ninyo mula sa inyong pag-aaral na nakatulong sa inyo?
-
Ano ang pakiramdam ni Joseph Smith at ng iba pang mga naunang miyembro ng Simbahan nang iutos sa kanila na mag-asawa nang mahigit sa isa?
-
Paano tinulungan ng Diyos ang mga Banal sa mahirap na utos na ito?
Tulungan ang mga estudyante na maunawaan na ayos lang kung may mga tanong pa sila tungkol sa paksang ito. Ito ay isang mahirap na kautusan para sa mga naunang Banal na sundin at maaaring mahirap itong maunawaan ngayon. Gayunman, ang pagtutuon sa mahahalagang katotohanang alam natin tungkol sa Ama sa Langit, kay Jesucristo, at sa ipinanumbalik na ebanghelyo ay makatutulong sa atin na sumulong nang may pananampalataya. Maaari kang magbigay ng personal na patotoo at magbahagi ng pahayag na tulad ng mga sumusunod:
Itinuro ni Elder Neil L. Andersen ng Korum ng Labindalawang Apostol:
Ang pananampalataya ay hindi humihingi ng sagot sa bawat tanong ngunit naghahangad ng katiyakan at katapangan upang sumulong, at kung minsan ay tinatanggap na, “Hindi ko alam ang lahat, ngunit sapat ang nalalaman ko upang magpatuloy sa landas ng pagkadisipulo.” (Neil L. Andersen, “Ang Pananampalataya ay Hindi Matatamo Kung Wala Munang Pagpiling Gagawin,” Liahona, Nob. 2015, 66)
Ibuod ang natutuhan mo
Upang matulungan ang mga estudyante na maipahayag ang natutuhan nila ngayon, maaari mong banggitin ang isang sitwasyon na tulad ng sumusunod:
Isipin kunwari na nakikipag-usap ka sa isang kaibigan na nag-iisip kung sinuway ni Joseph Smith ang kalooban ng Diyos nang pasimulan niya ang maramihang pag-aasawa sa Simbahan. Ibuod sandali sa inyong journal ang ilang punto na maaari ninyong ibahagi sa inyong kaibigan nang may kabaitan at tiyaga.
Matapos magkaroon ng pagkakataon ang mga estudyante na magsulat sa kanilang journal, maaari mong itanong kung may mga estudyante na gustong magbahagi ng isinulat nila. Maaaring magandang pagkakataon din ito para maipahayag ng mga estudyante ang anumang sagot na maaaring nahanap nila para sa ilan sa sarili nilang mga tanong o alalahanin.
Maaari mong patotohanan sa mga estudyante na kapag nanampalataya sila kay Jesucristo at bumaling sa kanilang Ama sa Langit para humingi ng tulong, tutulungan Niya sila sa mga hamon o tanong na kinakaharap nila sa sarili nilang buhay.